Manarig ki Jehova na Ootobon Nia an Saiyang Katuyohan
“An mga matanos mismo magmamana kan daga, asin sinda mag-eerok dian sagkod lamang.”—SALMO 37:29.
1. Ano an katuyohan ni Jehova para sa mga tawo asin sa dagang ini?
KAN lalangon ni Jehova an satong enot na mga magurang, si Adan asin Eva, ginibo nia sindang sangkap. Asin linalang nia sinda tanganing sinda mabuhay sagkod lamang sa dagang ini—kun saindang kinuyog an saiyang mga pagboot. (Genesis 1:26, 27; 2:17) Dugang pa, ibinugtak sinda nin Dios sa paraisong kamugtakan. (Genesis 2:8, 9) Sinabihan sinda ni Jehova: “Pangagbunga asin pangagdakol kamo asin panoa nindo an daga asin sakopa nindo iyan.” (Genesis 1:28) Sa siring, an saindang mga aki pag-abot nin panahon malakop sa bilog na daga, asin an planetang ini magigin sarong paraiso na pano nin sangkap, maogmang rasa nin mga tawo. Magayonon nanggad an pagpopoon kan pamilya nin tawo! “Naheling nin Dios an gabos niang ginibo asin, uya! idto marahayon.”—Genesis 1:31.
2. An kamugtakan kan mga agi-agi nin tawo nagpapalataw nin anong mga hapot?
2 Alagad, an kamugtakan kan mga agi-agi nin tawo na nag-eksister sa laog nin rinibong taon harayoon sa orihinal na katuyohan nin Dios. An katawohan harayoon sa pagkasangkap asin bako nanggad maogma. An mga kamugtakan sa kinaban nakasususto, asin siring kan ihinula, orog pa nanggad iyan na naggrabe sa satong panahon. (2 Timoteo 3:1-5, 13) Kaya paano kita makapananarig na an katuyohan nin Dios para sa katawohan maootob sa harani nang ngapit? Maagi pa daw an halawig na mga peryodo nin panahon na padagos an masakit na mga kamugtakan?
Ano an Causa kan Pagraot?
3. Taano ta dai tolos tinapos ni Jehova an pagrebelde nin katawohan?
3 An mga igwa kan tamang kaaraman sa ipinasabong na Tataramon nin Dios nakakaaram kun taano ta itinogot ni Jehova an maraot na mga kamugtakan na ini digdi sa daga. Aram man ninda kun ano an saiyang gigibohon manongod kaiyan. Gikan sa tala kan Biblia, nanodan ninda na an satong enot na mga magurang sala an paggamit sa makangangalas na balaog na libreng pagpili na itinao nin Dios sa mga tawo. (Ikomparar an 1 Pedro 2:16.) Sala an pagpili ninda sa dalan nin pagkaindipendiente sa Dios. (Genesis, kapitulo 2 asin 3) An saindang pagrebelde nagpalataw kan mahalagang marhay na mga hapot, arog baga kan: An Unibersal na Soberano daw igwa nin diretso na pamahalaan an mga tawo? Pinakamarahay daw para sa sainda an saiyang pamamahala? Magigin mapanggana daw an pamamahala nin tawo kun mayo kan pangangataman nin Dios? An seguradong paagi na makua an mga simbag sa mga hapot na ini iyo an pagtogot na umagi an mga siglo nin pamamahala nin tawo. An mga resulta daing dudang magpapaheling kun baga magigin mapanggana an mga tawo na suhay sa saindang Kaggibo.
4, 5. (a) Ano an ibinunga kan pagsikwal nin tawo sa pamamahala nin Dios? (b) Ano an daing dudang ipinaheling kan pag-agi nin panahon?
4 Kan an Dios bayaan ni Adan asin Eva, dai na nia sinda sinusteniran sa pagkasangkap. Mayo kan saiyang suporta, sinda luminuya. An resulta pagkabakong sangkap, paggurang, asin sa katapustapusi kagadanan. Paagi sa mga ley nin erensia, ipinasa kan satong enot na mga magurang an negatibong mga karakteristikong idto sa gabos nindang gikan, kabale na kita. (Roma 5:12) Asin kumusta an resulta kan rinibong taon na pamamahala nin tawo? Iyan nagin kapahapahamak na gayo, arog nanggad kan totoong sinasabi kan Eclesiastes 8:9: “An tawo nagsakop sa tawo sa saiyang ikararaot.”
5 An pag-agi nin panahon daing dudang nagpapaheling na dai mapangganang magigiyahan nin tawo an saindang mga aktibidad na suhay sa saindang Kaglalang. An pinasabngan na kagsurat kan Biblia na si Jeremias nagpahayag: “Aram kong marhay, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad.”—Jeremias 10:23; Deuteronomio 32:4, 5; Eclesiastes 7:29.
An Katuyohan nin Dios Dai Naliwat
6, 7. (a) Naliwat daw kan rinibong taon na kasaysayan an katuyohan ni Jehova? (b) Ano an kabale sa katuyohan ni Jehova?
6 An pag-agi daw kan rinibong taon na kasaysayan nin tawo—na pano-pano nin karatan asin kasakitan—nakaliwat sa katuyohan nin Dios? An saiyang Tataramon nagsasabi: “Ini an isinabi ni Jehova, an Kaglalang kan kalangitan, Sia an totoong Dios, an Naghaman kan daga asin an Naggibo kaiyan, Sia an Saro na masarig na nagbugtak kaiyan, na dai iyan linalang na dai nin kapakanan, na naghaman kaiyan tanganing pag-istaran.” (Isaias 45:18) Kaya hinaman nin Dios an daga tanganing pag-istaran nin mga tawo, asin iyan pa giraray an saiyang katuyohan.
7 Dai sana linalang ni Jehova an daga tanganing pag-istaran kundi katuyohan man nia na iyan magin sarong paraiso na kakamtan nin sangkap, maogmang mga tawo. Iyan an dahelan na ihinula kan Biblia na magkakaigwa nin “sarong bagong daga,” sarong bagong sosyedad nin tawo, na dian “an katanosan an magdadanay.” (2 Pedro 3:13) Asin sa Kapahayagan 21:4, an Tataramon nin Dios nagsasabi sato na sa saiyang bagong kinaban, ‘papahidon nia an gabos na luha sa mga mata nin katawohan, asin an kagadanan mawawara na, dai na sagkod magkakaigwa nin pagmondo ni pagtangis ni kolog.’ Sa mga dahelan na iyan na naapod ni Jesus an madatong na bagong kinaban na iyan digdi sa daga na “Paraiso.”—Lucas 23:43.
8. Taano ta makaseseguro kita na ootobon ni Jehova an saiyang katuyohan?
8 Huling si Jehova an pinakamakapangyarihan asin pinakamadonong na Kaglalang kan uniberso, mayo nin siisay man na makaoolang sa saiyang katuyohan. “Si Jehova nin mga hukbo nanumpa, na an sabi: ‘Sierto nanggad na siring sa sakong plano, iyan dapat na mangyari; asin siring sa sakong isinabi, iyan an maootob.’” (Isaias 14:24) Kun siring, kun sinasabi nin Dios na saiyang gigibohon na paraiso an dagang ini na iniistaran nin sangkap na mga tawo, iyan an mangyayari. Si Jesus nagsabi: “Maogma an mga mahoyo, mantang mamanahon ninda an daga.” (Mateo 5:5; ikomparar an Salmo 37:29.) Makakapagtiwala kita sa kaotoban kan panugang iyan. Sa katunayan, puwede niatong itaya dian an satong buhay.
Nanarig Sinda ki Jehova
9. Ano an ginibo ni Abraham na nagpaheling kan saiyang pananarig ki Jehova?
9 Dakol na tawong may pagkatakot sa Dios sa bilog na kasaysayan an talagang itinaya an saindang buhay sa katuyohan nin Dios para sa daga huli ta kombensido sindang ootobon nia iyan. Minsan ngani tibaad limitado an saindang kaaraman, nanarig sinda sa Dios asin itinalaga an saindang buhay sa paggibo kan saiyang kabotan. Halimbawa, yaon si Abraham, na nabuhay mga 2,000 na taon bago si Jesus nabuhay sa daga—haloy pa bago pinonan na isurat an Biblia. Nanarig siang ootobon ni Jehova an Saiyang mga panuga. Posibleng nanodan ni Abraham an dapit sa saiyang Kaglalang gikan sa saiyang maimbod na apoon na si Sem, na tinokdoan ni Noe. Kaya kan sabihan nin Dios si Abraham na humale sa asensadong Ur kan mga Caldeo pasiring sa dai nia kabisado asin peligrosong daga nin Canaan, aram kan patriarkang idto na puwede niang panarigan si Jehova, asin sa siring nagduman sia. (Hebreo 11:8) Pag-abot nin panahon, sinabihan sia ni Jehova: “Magibo ako nin dakulang nasyon hale saimo.”—Genesis 12:2.
10, 11. Taano si Abraham ta andam na idolot an saiyang aking bugtong, si Isaac?
10 Ano an nangyari pagkamundag ni Isaac ki Abraham? Isinabi ni Jehova ki Abraham na paagi ki Isaac na an saiyang mga gikan magigin sarong dakulang nasyon. (Genesis 21:12) Kaya, puwedeng nagin garo dakulang kontradiksion kan sabihan ni Jehova si Abraham, bilang pagbalo sa saiyang pagtubod, na iatang an saiyang aking si Isaac. (Genesis 22:2) Alagad, may lubos na pananarig ki Jehova, ginibo ni Abraham an mga paagi na sumunod, na aktuwal na ibinikyaw an saiyang daga tanganing bonoon si Isaac. Sa ultimong oras, nagsugo an Dios nin sarong anghel tanganing pogolan si Abraham.—Genesis 22:9-14.
11 Taano ta makinuyog na gayo si Abraham? Ihinahayag kan Hebreo 11:17-19: “Huli sa pagtubod si Abraham, kan sia baloon, haros ikinadolot si Isaac, asin an tawo na maogmang nag-ako kan mga panuga binalong idolot an saiyang bugtong na aki, minsan ngani sinabi sa saiya: ‘An aapodon na “saimong banhi” paagi ki Isaac.’ Alagad sia naglaom na mahihimo nin Dios na buhayon sia minsan hale sa mga gadan; asin hale dian talagang inako man nia sia sa makaladawan na paagi.” An Roma 4:20, 21 kaagid an sinasabi: “Huli sa panuga nin Dios dai [si Abraham] nagduwaduwa huli sa kakulangan nin pagtubod, . . . biyo an panarig na an . . . ipinanuga [nin Dios] kaya niang gibohon.”
12. Paano binalosan si Abraham huli kan saiyang pagtubod?
12 Si Abraham binalosan huli kan saiyang pagtubod bako sanang paagi sa pagpadanay na buhay ki Isaac asin sa pagkaigwa nin sarong “makosog na nasyon” hale sa saiya kundi sa saro pang paagi. Nagsabi an Dios ki Abraham: “Paagi sa saimong banhi an gabos na nasyon sa daga magbebendisyon nanggad kan saindang sadiri huli sa bagay na ika naghinanyog sa sakong tingog.” (Genesis 22:18) Paano? An Hade sa langitnon na Kahadean nin Dios madatong paagi sa linya nin mga gikan ni Abraham. An Kahadean na iyan paparaon an maraot na kinaban na ini na sakop ni Satanas. (Daniel 2:44; Roma 16:20; Kapahayagan 19:11-21) Dangan, sa sarong lininigan na daga sa irarom kan pamamahala kan Kahadean, an Paraiso paooswagon sa bilog na globo, asin hale sa “gabos na nasyon” an mga tawo na naggigibo kan kabotan nin Dios magkakamit nin sangkap na salud asin buhay sagkod lamang. (1 Juan 2:15-17) Asin minsan ngani limitado an kaaraman ni Abraham dapit sa Kahadean, sia nanarig sa Dios asin linaoman an pagpatindog kaiyan.—Hebreo 11:10.
13, 14. Taano si Job ta nanarig sa Dios?
13 Pakalihis nin nagkapirang gatos na taon, yaon si Job, na nabuhay sa pag-oltanan kan ika-17 asin ika-16 na siglo B.C.E. sa lugar na ngonyan iyo an Arabia. Sia nabuhay man bago pinonan na isurat an Biblia. Si Job “daing kasalan asin matanos, saka natatakot sa Dios asin naglilikay sa maraot.” (Job 1:1) Kan si Job pasakitan ni Satanas nin makababalde, makologon na helang, an maimbod na lalaking idto “dai nagtaram minsan sarong makasalan na tataramon” sa bilog niang pagsakit. (Job 2:10, The New English Bible) Nagsarig si Job sa Dios. Asin dawa ngani dai nia aram an mga detalye sa kun taano sia ta grabe an pagsakit, itinaya nia an saiyang buhay sa Dios asin sa Saiyang mga panuga.
14 Aram ni Job na minsan pa sia magadan, pag-abot nin aldaw an Dios ikababalik sia sa buhay paagi sa pagkabuhay liwat. Saiyang ipinarisa an paglaom na ini kan sabihon nia ki Jehova Dios: “O marahay pang ako tagoon mo sa Sheol [an lolobngan], . . . na tawan mo ako nin talaan na panahon asin girumdomon mo ako! Kun an makosog na tawo magadan puwede pa daw siang mabuhay giraray? . . . Ika maapod, asin ako masimbag sa saimo.” (Job 14:13-15) Minsan ngani nasa grabeng pagsakit, si Job nagpaheling nin pagtubod sa pagkasoberano ni Jehova, na nagsasabi: “Sagkod na ako magadan dai ko hahaleon sa sakuyang sadiri an sakuyang integridad!”—Job 27:5.
15. Paano ipinahayag ni David an saiyang kompiansa sa katuyohan ni Jehova?
15 Mga anom na siglo pakalihis ni Job asin mga sangribong taon bago si Jesus nagdigdi sa daga, si David ipinahayag an saiyang kompiansa sa bagong kinaban. Saiyang sinabi sa mga salmo: “Idtong mga naglalaom ki Jehova iyo an magmamana kan daga. Asin dai na mahahaloy, asin ta an maraot mawawara na . . . Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan. An mga matanos mismo magmamana kan daga, asin sinda mag-eerok dian sagkod lamang.” Huli kan saiyang marigon na paglaom, nagsadol si David: “Manarig ka ki Jehova . . . Siring man maranga nanggad dian ki Jehova, asin itatao nia sa saimo an mga hinahagad kan saimong puso.”—Salmo 37:3, 4, 9-11, 29.
16. Ano an paglaom kan “dakulang panganoron nin mga saksi”?
16 Sa nag-aging mga siglo, an maimbod na mga lalaki asin babae nagkaigwa kan kaparehong paglaom na ini na buhay na daing sagkod digdi sa daga. An totoo, sinda “dakulang panganoron nin mga saksi” na literal nanggad na itinaya an saindang buhay sa mga panuga ni Jehova. An dakol sa suanoy na mga saksing idto ni Jehova pinasakitan asin ginadan huli kan saindang pagtubod, “tanganing sinda magkamit nin mas marahay na pagkabuhay liwat.” Paano iyan? Sa bagong kinaban, babalosan sinda nin Dios nin mas marahay na pagkabuhay liwat asin kan paglaom na buhay na daing katapusan.—Juan 5:28, 29; Hebreo 11:35; 12:1.
An Kristianong mga Saksi Nananarig sa Dios
17. Gurano karigon na nanarig ki Jehova an mga Kristiano kan enot na siglo?
17 Kan enot na siglo C.E., ihinayag ni Jehova sa bagong mapatindog na Kristianong kongregasyon an orog pang mga detalye dapit sa Kahadean asin sa pamamahala kaiyan sa daga. Halimbawa, pinasabngan kan saiyang espiritu si apostol Juan na magsurat na an bilang kan makakaiba ni Jesu-Cristo sa Kahadean nin langit magigin 144,000. An mga ini maimbod na mga lingkod nin Dios na “binakal hale sa katawohan.” (Kapahayagan 7:4; 14:1-4) Pamamahalaan ninda an daga bilang mga ‘hade’ kaiba ni Cristo sa langit. (Kapahayagan 20:4-6) Marigon nanggad an pagsarig kan mga Kristianong idto kan enot na siglo na ootobon ni Jehova an saiyang katuyohan para sa langitnon na Kahadean asin sa daganon na sakop kaiyan kaya andam sindang magadan para sa saindang pagtubod. An dakol sa sainda iyan nanggad an ginibo.
18. Paano inaarog kan mga Saksi ni Jehova ngonyan an saindang mga katimbang kan suanoy?
18 Ngonyan, an haros limang milyon na Saksi ni Jehova igwa nin kaparehong pananarig sa Dios na arog kan sa saindang mga katimbang na nabuhay mga siglo bago sa sainda. An mga Saksing ini sa presenteng aldaw itinaya man an saindang buhay sa mga panuga nin Dios. Saindang idinusay an buhay ninda sa saiya asin yaon sainda an kompletong Biblia sa pagparigon kan saindang pagtubod. (2 Timoteo 3:14-17) An mga Saksing ini ni Jehova sa modernong aldaw inaarog an mga parasunod ni Jesus kan enot na siglo na nagpahayag na sinda ‘magkukuyog sa Dios bilang poon kisa mga tawo.’ (Gibo 5:29) Sa siglong ini an dakol sa mga Kristianong Saksing ini maringis na pinaglamag. An iba ginadan pa ngani huli kan saindang pagtubod. An iba nagadan sa helang, aksidente, o kagurangan. Minsan siring, arog kan maimbod na mga saksi kan nakaaging mga panahon, nanarig sinda sa Dios huling aram ninda na ibabalik nia sinda sa buhay sa saiyang bagong kinaban paagi sa pagkabuhay liwat.—Juan 5:28, 29; Gibo 24:15; Kapahayagan 20:12, 13.
19, 20. Ano an inaako niato manongod sa hula kan Biblia sa satong panahon?
19 Nasasabotan kan mga Saksi ni Jehova na an pagkua sainda hale sa gabos na nasyon pasiring sa sarong panglobong asosasyon nin magturugang haloy nang ihinula sa propesiya kan Biblia. (Isaias 2:2-4; Kapahayagan 7:4, 9-17) Asin si Jehova ipinapagibo sainda an pankinaban na paghuhulit tanganing tiponon sa saiyang pabor asin proteksion an iba pang mga sadiosan an puso. (Talinhaga 18:10; Mateo 24:14; Roma 10:13) An gabos na ini lubos na nananarig ki Jehova, na nakakaaram na sa dai na mahahaloy saiyang iiintrodusir an saiyang makangangalas na bagong kinaban.—Ikomparar an 1 Corinto 15:58; Hebreo 6:10.
20 Ipinaririsa kan mga hula sa Biblia na an kinaban ni Satanas nasa huring mga aldaw na kaini sa laog nin haros 80 taon na ngonyan, magpoon kan mahalagang marhay na taon nin 1914. An kinaban na ini naghaharani na sa katapusan kaiyan. (Roma 16:20; 2 Corinto 4:4; 2 Timoteo 3:1-5) Kaya mapuso an mga Saksi ni Jehova huli ta narerealisar ninda na sa dai na mahahaloy an Kahadean nin Dios magkakaigwa nin lubos na kontrol sa gabos na aktibidad sa daga. Paagi sa pagtapos sa presenteng maraot na kinaban na ini asin sa pagpopoon kan saiyang matanos na bagong kinaban, biyong paparaon nin Dios an maraot na situwasyon na nag-eksister digdi sa daga sa laog nin dakolon na siglo.—Talinhaga 2:21, 22.
21. Taano ta makapaggagayagaya kita ano man an presenteng mga kahaditan?
21 Dangan, sa panahon na daing katapusan, ipaheheling nin Dios an saiyang dakulang pagmakolog sa sato paagi sa pagpaoran nin mga bendisyon na labing marhay na balos sa ano man na kolog niato kan nakaagi. Dakolon na mararahay na bagay an mangyayari sato sa bagong kinaban kaya an dati tang mga kahaditan mawawara na sa memorya. Nakararanga nanggad na maaraman na sa panahon na iyan si Jehova ‘ibibiklad an saiyang kamot asin paninigoan an mawot nin lambang bagay na may buhay.’—Salmo 145:16; Isaias 65:17, 18.
22. Taano ta maninigo niatong itao an satong pagsarig ki Jehova?
22 Sa bagong kinaban, an maimbod na katawohan makaheheling sa kaotoban kan Roma 8:21: “An linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.” Maheheling ninda an pagkaotob kan pamibing ini na itinokdo ni Jesus sa saiyang mga parasunod: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) Kaya itao an saindong bilog na pagsarig ki Jehova huli ta an saiyang daing saltong panuga iyo: “An mga matanos mismo magmamana kan daga, asin sinda mag-eerok dian sagkod lamang.”—Salmo 37:29.
Paano Nindo Sisimbagon?
◻ Ano an katuyohan ni Jehova para sa mga tawo asin sa dagang ini?
◻ Taano ta itinogot nin Dios an maraot na mga kamugtakan digdi sa daga?
◻ Paano ipinaheling kan maimbod na mga tawo kan suanoy an saindang pagsarig ki Jehova?
◻ Taano an mga lingkod nin Dios ngonyan ta nananarig ki Jehova?
[Ritrato sa pahina 16]
Linalang nin Dios an mga tawo tanganing mabuhay sagkod lamang sa kaogmahan sa sarong paraisong daga
[Ritrato sa pahina 18]
Si Abraham nanarig sa kakayahan ni Jehova na buhayon liwat an mga gadan