Inootob ni Jehova an Saiyang mga Panuga sa mga Fiel
“Sia na nanuga fiel.”—HEBREO 10:23.
1, 2. Taano ta puede kitang magkaigwa nin biyong kompiansa sa mga panuga ni Jehova?
HINAHAGAD ni Jehova na an saiyang mga lingkod magpatalubo asin magpadanay nin marigon na pagtubod sa saiya asin sa saiyang mga panuga. Paagi sa siring na pagtubod an saro biyong makapagtitiwala ki Jehova na gibohon an ipinanuga niang gibohon. Ipinahahayag kan saiyang ipinasabong na Tataramon: “Si Jehova nin mga hukbo nanumpa, na an sabi: ‘Sierto nanggad na siring sa sakong dinesisyonan, iyan an dapat na mangyari; asin siring sa sakong isinabi, iyan an maootob.’”—Isaias 14:24.
2 An deklarasyon na, “Si Jehova nin mga hukbo nanumpa,” nagpapaheling na itinatao nia an saiyang sagradong panunumpa na otobon an saiyang mga panuga. Iyan an dahelan na nasasabi kan saiyang Tataramon: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:5, 6) Kun kita nagtitiwala ki Jehova asin nagpapagiya kita sa saiyang kadonongan, segurado na an satong mga dana magiya pasiring sa buhay na daing katapusan, ta an kadonongan nin Dios “kahoy nin buhay para sa mga nangangapot kaiyan.”—Talinhaga 3:18; Juan 17:3.
Tunay na Pagtubod kan Suanoy na mga Panahon
3. Paano si Noe nagpaheling nin pagtubod ki Jehova?
3 An rekord kan mga ginibo ni Jehova para sa mga may tunay na pagtubod nagpapatunay sa saiyang pagkamasasarigan. Halimbawa, kaidtong labi nang 4,400 na taon an nakaagi, si Noe sinabihan nin Dios na an kinaban kan saiyang kaaldawan lalaglagon paagi sa sarong panglobong Baha. Pinagbotan nia si Noe na gumibo nin dakulang dahong para sa pagpreserbar kan buhay nin mga tawo asin hayop. Ano an ginibo ni Noe? An Hebreo 11:7 nagsasabi sa sato: “Huli sa pagtubod si Noe, pakatapos na matawan nin patanid nin Dios dapit sa mga bagay na dai pa naheheling, nagpaheling nin diosnon na takot asin nagtogdok nin dahong para sa pagligtas kan saiyang kairiba sa harong.” Taano si Noe ta nagkaigwa nin pagtubod sa sarong bagay na dai pa noarin man nangyari kaidto, bagay na “dai pa naheheling”? Huli ta may igo siang kaaraman dapit sa nakaaging mga pagtratar nin Dios sa pamilya nin tawo tanganing masabotan na nagigin totoo an ano man na sabihon nin Dios. Kaya kompiado si Noe na mangyayari man an Baha.—Genesis 6:9-22.
4, 5. Taano ta lubos na nagtiwala si Abraham ki Jehova?
4 An saro pang halimbawa nin tunay na pagtubod iyo si Abraham. Kaidtong haros 3,900 na taon na an nakaagi, sinabihan sia nin Dios na iatang si Isaac, an solo niang aki sa agom nia, si Sara. (Genesis 22:1-10) Ano an nagin reaksion ni Abraham? An Hebreo 11:17 nagsasabi: “Huli sa pagtubod si Abraham, kan sia baloon, garo man sana idinolot si Isaac.” Minsan siring, sa ultimo-ora, si Abraham pinogolan kan anghel ni Jehova. (Genesis 22:11, 12) Pero, taano ngani ta iisipon man lamang ni Abraham na gibohon an siring na bagay? Huli ta, siring sa sinasabi kan Hebreo 11:19, “sia naglaom na mahihimo nin Dios na buhayon [si Isaac] minsan hale sa mga gadan.” Alagad paano nagkaigwa nin pagtubod si Abraham sa pagkabuhay liwat mantang mayo pa siang naheling na binuhay liwat asin mayo nin nakaaging rekord nin pagbuhay liwat?
5 Girumdoma, si Sara 89 anyos na kan panugaan sinda nin Dios nin sarong aki. An matris ni Sara lihis na sa pangangaki—gadan na, sabi ngani. (Genesis 18:9-14) Binuhay giraray nin Dios an matris ni Sara, asin ipinangaki nia si Isaac. (Genesis 21:1-3) Aram ni Abraham na mantang binuhay giraray nin Dios an gadan nang matris ni Sara, kun siring kaya man niang buhayon giraray si Isaac kun kinakaipuhan. An Roma 4:20, 21 nagsasabi dapit ki Abraham: “Huli sa panuga nin Dios dai sia nag-urong-sulong sa kadaihan nin pagtubod, kundi nagin makosog huli sa saiyang pagtubod, na nagpapamuraway sa Dios asin biyong kombensido na an saiyang ipinanuga kaya man niang gibohon.”
6. Paano si Josue nagpahayag nin kompiansa ki Jehova?
6 Kaidtong labi nang 3,400 na taon an nakaagi kan si Josue labi nang sanggatos na taon an edad asin pakalihis na maeksperyensiahan sa bilog niang buhay kun gurano kamapagtitiwalaan an Dios, itinao nia an dahelan na ini kan saiyang pagkompiar: “Aram nindong gayo sa bilog nindong puso asin sa bilog nindong kalag na ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.”—Josue 23:14.
7, 8. Anong nakapagliligtas na aksion an ginibo kan fiel na mga Kristiano kan enot na siglo, asin taano?
7 Kaidtong mga 1,900 na taon na an nakaagi, dakol na mapakumbaba an nagpaheling nin tunay na pagtubod. Naaraman ninda gikan sa kaotoban kan hula sa Biblia na si Jesus an Mesiyas asin inako an saiyang mga katokdoan. Igwa nin marigon na basehan sa aktuwal na mga pangyayari asin sa Hebreong Kasuratan, nagtubod sinda sa itinokdo ni Jesus. Sa siring, kan sabihon ni Jesus na an paghokom nin Dios madatong sa Judea asin sa Jerusalem huli sa pagigin bakong fiel, sinda naniwala sa saiya. Asin kan sabihon nia sa sainda kun anong aksion an kaipuhan nindang gibohon tanganing ikaligtas an saindang buhay, ginibo ninda iyan.
8 Sinabi ni Jesus sa nagturubod na kun an Jerusalem napalilibotan na nin mga hukbo, sinda maninigong dumulag. An mga hukbong Romano talagang nagdatong tumang sa Jerusalem kan taon 66 C.E. Alagad ta huminale an mga Romano huli sa dai ikapaliwanag na dahelan. Idto an senyal para sa mga Kristiano na bayaan na an siudad, huli ta si Jesus nagsabi: “Kun maheling na nindo an Jerusalem na napalilibotan nin nagkakampong mga hukbo, dangan aramon nindo na harani na an paggibo sa saiya na daing tawo. Dangan an mga nasa Judea magpoon nang dumulag pasiring sa kabukidan, asin an mga nasa tahaw nia magruluwas, patin an mga nasa oma dai na magralaog sa saiya.” (Lucas 21:20, 21) An mga may tunay na pagtubod binayaan an Jerusalem asin an lugar sa palibot patin duminulag pasiring sa kaligtasan.
Mga Resulta nin Kadaihan nin Pagtubod
9, 10. (a) Paano ipinaheling kan mga namomoon sa relihion an kadaihan ninda nin pagtubod ki Jesus? (b) Ano an mga resulta kan kadaihan nin pagtubod na iyan?
9 Ano an ginibo kan mga daing tunay na pagtubod? Dai sinda duminulag kan sinda magkaoportunidad. An paghona ninda ikaliligtas sinda kan mga namomoon sa sainda. Pero, an mga namomoon na idto asin an saindang mga parasunod igwa man kan ebidensia kan pagigin Mesiyas ni Jesus. Kaya taano ta dai ninda inako an sinabi nia? Huli sa maraot na kamugtakan kan saindang puso. Nabuyagyag ini kan enot kan maheling ninda an dakol na ordinaryong tawo na nagbuburunyog pasiring ki Jesus pakabuhaya nia liwat ki Lazaro. An Juan 11:47, 48 nagsasaysay: “An mga poon na saserdote asin mga Fariseo tiniripon an Sanhedrin [an Judiong korte suprema] asin nagpoon na magsabi: ‘Ano an satong gigibohon, huli ta an tawong ini [si Jesus] naggigibo nin dakol na tanda? Kun pabayaan ta sana sia nin siring, sinda gabos maturubod sa saiya, asin madatong an mga taga-Roma asin kukuanon an satong lugar asin an satong nasyon.’” An bersikulo 53 nagsasabi: “Kun siring magpoon kan aldaw na idto nagpaharatolhatol sinda na gadanon sia.”
10 Kanigoan kamakangangalas na milagro an ginibo ni Jesus—an pagbuhay ki Lazaro hale sa mga gadan! Alagad gusto kan mga namomoon sa relihion na ipagadan si Jesus huli kaiyan. An grabeng karatan ninda orog pang nabuyagyag kan “an poon na mga saserdote nagpaharatolhatol . . . na gadanon man si Lazaro, ta huli sa saiya an dakol na Judio nagduduruman asin nagtuturubod na ki Jesus.” (Juan 12:10, 11) Si Lazaro bago pa sanang ibangon hale sa mga gadan, asin boot kan mga saserdoteng idto na maheling sia na gadan giraray! Dai ninda iniisip an kabotan nin Dios o an ikararahay kan banwaan. Sinda paslo, na an iniisip an saindang posisyon asin mga bentaha. “Namotan ninda an kamurawayan nin mga tawo nin labi pa ngani sa kamurawayan nin Dios.” (Juan 12:43) Alagad ta nagbayad sinda huli sa saindang kadaihan nin pagtubod. Kan taon 70 C.E., nagbalik an mga hukbong Romano asin linaglag an saindang lugar asin an saindang nasyon, saka an dakol sa sainda.
Ipinaheling an Pagtubod sa Satong Kapanahonan
11. Sa enot na mga taon kan siglong ini, paano ipinaheling an tunay na pagtubod?
11 Sa siglong ini, kadakol man kan lalaki asin babae na may tunay na pagtubod. Halimbawa, kaidtong enot na mga taon nin 1900, an mga tawo sa pankagabsan nag-aantisipar nin matoninong, asensadong ngapit. Kan panahon man na idto, an mga nagtutubod ki Jehova nagpapaisi na an katawohan palaog sa pinakagrabeng panahon kaiyan nin kapurisawan sagkod kaidto. Iyan an ihinula kan Tataramon nin Dios sa Mateo kapitulo 24, 2 Timoteo kapitulo 3, asin sa iba pang kabtang. An sinabi kan mga tawong idto na may pagtubod aktuwal na nangyari, magpoon kan 1914 sa Guerra Mundial I. An kinaban tunay na luminaog sa ihinulang “huring mga aldaw” na may “delikadong mga panahon na masakit pakibagayan.” (2 Timoteo 3:1) Taano ta naaraman kaidto kan mga lingkod ni Jehova an katotoohan manongod sa mga kamugtakan sa kinaban mantang an iba dai? Huli ta, arog ni Josue, may pagtubod sinda na mayo ni sarong tataramon ni Jehova na masusudya.
12. Ngonyan, anong panuga ni Jehova an lubos na pinagtitiwalaan kan saiyang mga lingkod?
12 Ngonyan, an mga lingkod ni Jehova, na nagtitiwala sa saiya, may kabilangan na haros anom na milyon sa bilog na kinaban. Aram ninda gikan sa ebidensia bilang kaotoban kan makahulang tataramon nin Dios na sa dai na mahahaloy tataposon nia an madahas, inmoral na palakaw na ini nin mga bagay. Kaya kompiado sinda na harani na an panahon na maheheling ninda an kaotoban kan 1 Juan 2:17, na nagsasabi: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” Biyong nagtitiwala an saiyang mga lingkod na ootobon ni Jehova an panugang ini.
13. Sagkod saen kamo makapagtitiwala ki Jehova?
13 Sagkod saen kamo makapagtitiwala ki Jehova? Puede nindong itaya an saindong buhay sa saiya! Dawa kun mawara nindo an saindong buhay ngonyan huli sa paglilingkod sa saiya, ibabalik nia sa saindo an orog pa karahay na buhay sa pagkabuhay liwat. Sinisierto sa sato ni Jesus: “An oras maabot na an gabos na nasa mga lolobngan nin girumdoman [an boot sabihon, nasa memorya nin Dios] makadadangog kan saiyang tingog asin maruluwas.” (Juan 5:28, 29) May midbid daw kamong doktor, namomoon sa politika, sientista, negosyante, o siisay man na iba pang tawo na makagigibo kaiyan? An saindang nakaaging rekord nagpapaheling na dai ninda iyan kaya. Kaya iyan ni Jehova, asin gigibohon nia iyan!
Sarong Marahayon na Ngapit Para sa mga Fiel
14. Anong marahayon na ngapit an ipinanunuga kan Tataramon nin Dios sa mga fiel?
14 Ipinarisa ni Jesus an pagkasegurado nin sarong bagong kinaban na sakop kan langitnon na Kahadean nin Dios, na an sabi: “Maogma an mga mahoyo, mantang mamanahon ninda an daga.” (Mateo 5:5) Idinoon kaiyan an panuga nin Dios na yaon sa Salmo 37:29: “An mga matanos mismo magmamana kan daga, asin sinda mag-eerok dian sagkod lamang.” Asin kaidtong madali nang magadan si Jesus kan an sarong paragibo nin maraot magpahayag nin pagtubod sa saiya, si Jesus nagsabi sa tawong iyan: “Ika makakaibahan ko sa Paraiso.” (Lucas 23:43) Iyo, bilang Hade sa Kahadean nin Dios, sisiertohon ni Jesus na an tawong ini mabuhay liwat digdi sa daga na igwa kan oportunidad na mabuhay sagkod lamang sa Paraisong iyan. Ngonyan, an mga nagtutubod sa Kahadean ni Jehova makalalaom man na mabuhay sa Paraiso na sa panahon na iyan “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”—Kapahayagan 21:4.
15, 16. Taano ta magigin matoninong na marhay an buhay sa bagong kinaban?
15 Iabante niato an satong isip sa bagong kinaban na iyan. Imahinara nindo na nabubuhay na kita dian. Tolos-tolos, dai niato malikayan na mamasdan sa gabos na lugar an maogmang mga tawo na magkairibahan na may lubos na katoninongan. Sinda nasa mga kamugtakan na kaagid kan ilinaladawan sa Isaias 14:7: “An bilog na daga nahingaloan, nawaran nin karibokan. An mga tawo nag-ogma sa magayagayang mga kurahaw.” Taano ta siring sinda kaiyan? Enot, mangnoha na an pinto kan mga harong mayo nin mga pamarat. Dai na kaipuhan iyan, ta mayo na nin krimen o kadahasan. Siring nanggad iyan kan sinabi kan Tataramon nin Dios na mangyayari: “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”—Miqueas 4:4.
16 Mayo na man nin ralaban, huli ta sa bagong kinaban na ini, bawal an ralaban. An gabos na armas ginibo nang mga kagamitan na pankatoninongan. Sa lubos na sentido, an Isaias 2:4 naotob na: “Dadaragopdopon ninda an saindang mga espada na magin tarom nin arado asin an saindang mga budyak na magin mga sanggot. An nasyon dai mabingat nin espada tumang sa nasyon, ni mag-aadal pa man sinda sa pakilaban.” Alagad, iyan talaga an linaoman niato! Taano? Huli ta an dakol na nag-eerok sa bagong kinaban nakanood na gibohon iyan mantang naglilingkod sa Dios sa daan na kinaban.
17. Anong mga kamugtakan sa pamumuhay an mangyayari sa pagsakop kan Kahadean nin Dios?
17 An saro pang naririsa nindo iyo na mayo nin kadukhaan. Mayong nag-iistar sa maation na payag-payag o nagsusulot nin mga pasing-pasing o mayo nin harong. An gabos igwa nin komportableng harong asin malinig na solar na may magagayon na kahoy asin burak. (Isaias 35:1, 2; 65:21, 22; Ezequiel 34:27) Asin daing nagugutom huli ta inotob nin Dios an saiyang panuga na magkakaigwa nin abundang kakanon para sa gabos: “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.” (Salmo 72:16) Sa katunayan, sa paggiya kan Kahadean nin Dios, lakop sa bilog na daga an sarong mamuraway na paraiso, siring kan nagin katuyohan nin Dios kaidto sa Eden.—Genesis 2:8.
18. Sa bagong kinaban, anong mga bagay an dai na magtatao nin peligro sa mga tawo?
18 Nagngangalas man kamo sa bagsik kan gabos. Ini huli ta ngonyan sangkap na an saindang hawak asin isip. Mayo na nin helang, kolog, o kagadanan. Mayo ni saro na nasa silyang de rueda o nasa ospital. Iyan gabos nawara na sagkod lamang. (Isaias 33:24; 35:5, 6) Tara, mayo na man nin hayop na nagtatao nin peligro, huli ta ginibo na sindang matoninong kan kapangyarihan nin Dios!—Isaias 11:6-8; 65:25; Ezequiel 34:25.
19. Taano an kada aldaw sa bagong kinaban ta magigin aldaw na ‘nakararanga nin labi-labi’?
19 Kanigoan karahay na sibilisasyon an ginigibo kan fiel na mga nag-eerok sa bagong kinaban na ini! An saindang kosog asin mga abilidad patin an kayamanan kan daga idinudusay sa kapakipakinabang na mga okupasyon, bakong sa nakadadanyar; sa pakipagtabangan sa iba, bakong sa pakipagdaogan sa sainda. Asin an gabos na nakakamidbid nindo saro na mapagtitiwalaan nindo huli ta, siring kan ipinanuga nin Dios, an gabos “tawong tinokdoan ni Jehova.” (Isaias 54:13) Mantang an gabos ginigiyahan kan mga ley nin Dios, an daga ‘pano kan kaaraman dapit ki Jehova kun paanong an tubig nakatatahob sa mismong kadagatan.’ (Isaias 11:9) Tunay nanggad, an kada aldaw sa bagong kinaban na ini siring kan sinabi kan Salmo 37:11 na mangyayari, aldaw na ‘nakararanga nin labi-labi.’
Garantisado an Maogmang Ngapit
20. Ano an dapat niatong gibohon tanganing magkamit nin matoninong na ngapit?
20 Ano an dapat niatong gibohon tanganing magin kabtang kan maogmang ngapit na iyan? An Isaias 55:6 nagsasabi sa sato: “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa.” Asin mantang kita naghahanap, an satong kaisipan maninigo na magin arog kan ilinaladawan sa Salmo 143:10: “Tokdoan mo ako na gibohon an saimong kabotan, huli ta ika an sakong Dios.” An mga naggigibo kaini makalalakaw na daing kanawayan sa atubangan ni Jehova sa huring mga aldaw na ini asin makalalaom sa sarong marahay na ngapit. “Pagmasdan mo an daing kanawayan asin helingon mo an tanos, huli ta an ngapit kan tawong iyan magigin matoninong. Alagad an mga paralapas tunay na iribang paparaon; an ngapit kan mga maraot tunay na tataposon.”—Salmo 37:37, 38.
21, 22. Ano an inoorganisar ngonyan nin Dios, asin paano ginigibo an pagsasanay?
21 Ngonyan mismo inaapod ni Jehova hale sa gabos na nasyon an mga gustong gumibo kan saiyang kabotan. Inoorganisar nia sinda na magin an pundasyon kan saiyang bagong daganon na sosyedad, arog kan ihinula sa Biblia: “Sa huring kabtang kan mga aldaw [an panahon na nabubuhayan niato ngonyan] . . . dakol na banwaan an maduruman nanggad asin masarabi: ‘Madia kamo, banwaan, asin tumukad kita sa bukid ni Jehova [an halangkaw na tunay na pagsamba sa saiya] . . . Totokdoan nia kita dapit sa saiyang mga dalan, asin kita maglalakaw sa saiyang mga dana.’”—Isaias 2:2, 3.
22 An mga ini ilinaladawan kan Kapahayagan 7:9 bilang “sarong dakulang kadaklan . . . hale sa gabos na nasyon asin tribo asin banwaan patin tataramon.” An bersikulo 14 nagsasabi: “An mga ini an nagluwas sa dakulang kahorasaan,” na natadang buhay sa katapusan kan presenteng palakaw. An pundasyon na ini kan bagong kinaban ngonyan haros anom na milyon na, na dakol na bagohan an nagigin kabtang kaiyan kada taon. An gabos na fiel na lingkod na ini ni Jehova sinasanay para sa buhay sa saiyang bagong kinaban. Nakanonood sinda kan espirituwal asin iba pang mga abilidad na kaipuhan sa paggibo kan dagang ini na magin paraiso. Asin sinda lubos na nagtitiwala na an Paraiso tunay na mangyayari ta “sia na nanuga fiel.”—Hebreo 10:23.
Mga Punto Para sa Pagrepaso
◻ Anong mga resulta an ibinunga nin kadaihan nin pagtubod kan enot na siglo?
◻ Sagkod saen makapagtitiwala sa saiya an mga lingkod nin Dios?
◻ Anong ngapit an natatagama para sa mga fiel?
◻ Ano an dapat niatong gibohon tanganing makaseguro sa sarong maogmang ngapit para sa satong sadiri sa bagong kinaban nin Dios?
[Retrato sa pahina 18]
Ngonyan mismo inoorganisar ni Jehova an pundasyon nin sarong bagong daganon na sosyedad