“Parigona an Saindong Puso”

“Kaipuhan nindo an pakatagal, tanganing, pakatapos na magibo nindo an kabotan nin Dios, akoon nindo an kaotoban kan panuga.”—HEBREO 10:36.

1, 2. (a) Ano an nangyari sa dakol na Kristiano kan enot na siglo? (b) Taano ta pasil na lumuya an pagtubod?

SA GABOS na kagsurat kan Biblia, mayo nin mas parateng nasambitan an pagtubod kisa ki apostol Pablo. Asin parate, sia nagtaram manongod sa mga nanluya o nagadan an pagtubod. Halimbawa, si Himeneo asin Alejandro “nagkarulunod may labot sa saindang pagtubod.” (1 Timoteo 1:19, 20) Inabandonar ni Demas si Pablo huli ta “namotan nia an presenteng palakaw nin mga bagay.” (2 Timoteo 4:10) An nagkapira, paagi sa saindang bakong sa Kristiano, iresponsableng mga gawe-gawe “nagpainda kan pagtubod.” An iba nadaya nin kadonongan na bakong totoo asin “napasuhay sa pagtubod.”—1 Timoteo 5:8; 6:20, 21.

² Taano ta nadaog an linahidan na mga Kristianong idto sa mga paaging ini? Bueno, “an pagtubod iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” (Hebreo 11:1) Kita minatubod sa dai niato naheheling. Iyan dai niato kaipuhan para sa mga bagay na naheheling na. Mas pasil na magtrabaho para sa kayamanan na naheheling kisa sa dai naheheling na espirituwal na kayamanan. (Mateo 19:21, 22) An dakol na bagay na naheheling—arog baga kan “mawot kan laman asin an mawot kan mga mata”—nakaaakit na marhay sa satong laman na bakong sangkap asin puedeng magpaluya sa satong pagtubod.—1 Juan 2:16.

3. Anong klaseng pagtubod an maninigong kultibaron nin sarong Kristiano?

³ Pero, sabi ni Pablo, “an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” Si Moises may pagtubod na arog kaiyan. Sia “nakatorohok na gayo sa pagtao kan balos” asin “nagpadagos na marigon na garo baga nakaheheling kan Saro na dai naheheling.” (Hebreo 11:6, 24, 26, 27) Kaipuhan nin Kristiano an arog kaining pagtubod. Arog kan sinabi sa sinusundan na artikulo, si Abraham marahay na halimbawa sa bagay na ini.

An Halimbawa ni Abraham sa Pagtubod

4. Paano an dalagan kan buhay ni Abraham naapektaran kan saiyang pagtubod?

⁴ Yaon sa Ur si Abraham kan akoon nia an panuga nin Dios na sia mangangaki nin sarong banhi na magigin bendisyon sa mga tawo sa gabos na nasyon. (Genesis 12:1-3; Gibo 7:2, 3) Basado sa panugang iyan, kinuyog ni Abraham si Jehova, na nagbalyo primero sa Haran dangan sa Canaan. Duman, si Jehova nanuga na itao an dagang iyan sa banhi ni Abraham. (Genesis 12:7; Nehemias 9:7, 8) Minsan siring, an dakol sa ipinanuga ni Jehova maootob pagkagadan ni Abraham. Halimbawa, si Abraham mismo nungka na nasadiri an arin man na parte kan Canaan—apuera sa lungib nin Macpela, na binakal nia bilang lolobngan. (Genesis 23:1-20) Sa ibong kaiyan, sia may pagtubod sa tataramon ni Jehova. Orog sa gabos, sia may pagtubod sa maabot na “siudad na may tunay na mga pundasyon, na an paratogdok asin kaggibo kan siudad na iyan iyo an Dios.” (Hebreo 11:10) An siring na pagtubod nakasustenir sa saiya sa bilog niang buhay.

5, 6. Sa anong paagi na nabalo an pagtubod ni Abraham kun dapit sa panuga ni Jehova?

⁵ Ini nangorognang naheheling mapadapit sa panuga na an banhi ni Abraham magigin dakulang nasyon. Tanganing ini mangyari, kaipuhan ni Abraham an sarong aki, asin haloy na panahon na sia naghalat na bendisyonan nin saro. Dai niato aram kun ano an edad nia kan enot niang madangog an panuga nin Dios, alagad kan magbaklay sia nin harayo pasiring sa Haran, dai pa sia tinatawan nin aki ni Jehova. (Genesis 11:30) Nagdanay sia sa Haran nin may igong lawig tanganing ‘makadamot nin rogaring asin mapasaiya an mga kalag,’ asin kan sia bumalyo sa Canaan, sia 75 anyos asin si Sara 65 anyos. Pero, mayo pa man giraray nin aki. (Genesis 12:4, 5) Kan si Sara mag-75 na, nagkonklusyon sia na gurangon na sia tanganing tawan nin aki si Abraham. Huli kaini, sa pagsunod sa sarong kostumbre kan panahon na idto, itinao nia ki Abraham an oripon niang babae na si Agar, asin si Abraham nagkaaki sa saiya. Alagad bako ini an ipinanugang aki. Si Agar asin an aki nia, si Ismael, sa kahurihurihi pinalayas. Sa ibong kaiyan, kan si Abraham makimaherak para sa sainda, nanuga si Jehova na bebendisyonan si Ismael.—Genesis 16:1-4, 10; 17:15, 16, 18-20; 21:8-21.

⁶ Sa itinalaan na panahon nin Dios—halawigon nanggad na panahon pakatapos na enot nindang madangog an panuga—an 100 anyos na si Abraham asin an 90 anyos na si Sara nagkaigwa nin omboy na lalaki, si Isaac. Seguradong idto makangangalas nanggad! Para sa gurang nang mag-agom na ini, idto haros garo pagkabuhay liwat kan an saindang mga hawak na “gadan na” mangaki nin bagong buhay. (Roma 4:19-21) Haloy an paghalat, alagad kan an panuga otobon sa katapustapusi, bakong sayang an paghalat.

7. Paano konektado sa pakatagal an pagtubod?

⁷ An halimbawa ni Abraham nagpapagirumdom sa sato na an pagtubod maninigo na bakong sa halipot na panahon sana. Ikinonektar ni Pablo an pagtubod sa pakatagal kan sia sumurat: “Kaipuhan nindo an pakatagal, tanganing, pakatapos na magibo nindo an kabotan nin Dios, akoon nindo an kaotoban kan panuga. . . . Bako kita an klase na minasibog sa kalaglagan, kundi an klase na may pagtubod sa ikapagdadanay na buhay kan kalag.” (Hebreo 10:36-39) Dakol an haloy na naghalat sa kaotoban kan panuga. An nagkapira bilog na buhay na naghalat. Sinusteniran sinda kan saindang makosog na pagtubod. Asin, arog ni Abraham, aakoon nanggad ninda an balos sa itinalaan na panahon ni Jehova.—Habacuc 2:3.

Paghinanyog sa Dios

8. Paano kita naghihinanyog sa Dios ngonyan, asin taano ta pakokosogon kaiyan an satong pagtubod?

⁸ Kisuerra apat na bagay an nakapakosog sa pagtubod ni Abraham, asin an mga bagay na iyan makatatabang sa sato. Enot, pinatunayan nia an saiyang ‘pagtubod na an Dios iyo nanggad’ paagi sa paghimate kun nagtataram si Jehova. Sa siring, iba sia sa mga Judio kan kaaldawan ni Jeremias, na nagtubod ki Jehova alagad mayo nin pagtubod sa saiyang mga tataramon. (Jeremias 44:15-19) Ngonyan, si Jehova nagtataram sa sato paagi sa mga pahina kan Biblia, an saiyang ipinasabong na Tataramon, na sabi ni Pedro garo “sarong ilawan na nagliliwanag sa madiklom na lugar . . . sa saindong puso.” (2 Pedro 1:19) Kun binabasa niato nin atento an Biblia, kita ‘pinakakakan sa mga tataramon kan pagtubod.’ (1 Timoteo 4:6; Roma 10:17) Dugang pa, sa huring mga aldaw na ini, “an fiel asin madonong na oripon” nagtatao nin espirituwal na “kakanon sa igong panahon,” paggiya sa pag-aplikar kan mga prinsipyo sa Biblia asin sa pagsabot kan hula sa Biblia. (Mateo 24:45-47) An paghinanyog ki Jehova sa mga paaging ini kaipuhan nanggad sa pagkaigwa nin makosog na pagtubod.

9. Ano an magigin resulta kun kita talagang nagtutubod sa Kristianong paglaom?

⁹ An pagtubod ni Abraham konektadong marhay sa saiyang paglaom. “Basado sa paglaom sia nagtubod, tangani na sia magin ama nin dakol na nasyon.” (Roma 4:18) Ini ikaduwang bagay na makatatabang sa sato. Nungka na lingawan niato na si Jehova “an parabalos sa mga maigot na naghahanap sa saiya.” Si apostol Pablo nagsabi: “Kita nagpapagal asin naghihingoa, huli ta ibinugtak niato an satong paglaom sa nabubuhay na Dios.” (1 Timoteo 4:10) Kun talagang nagtutubod kita sa Kristianong paglaom, an bilog na pamumuhay niato magigin patunay sa satong pagtubod, arog kan nangyari ki Abraham.

Pakikipag-olay sa Dios

10. Anong klaseng pamibi an mapakosog sa satong pagtubod?

¹⁰ Si Abraham nakipag-olay sa Dios, asin ini ikatolong bagay na nakapakosog sa saiyang pagtubod. Ngonyan, kita puede man na makipag-olay ki Jehova, na ginagamit an regalong pamibi paagi ki Jesu-Cristo. (Juan 14:6; Efeso 6:18) Pakasaysay nin sarong parabola na nagdodoon kan pangangaipo nin dayaday na pamibi na si Jesus naghapot: “Kun dumatong na an Aki nin tawo, talaga daw na makukua nia an pagtubod sa daga?” (Lucas 18:8) An pamibi na nakaparirigon sa pagtubod bakong dai pinag-isipan o automatiko. Iyan makahulogan na marhay. Halimbawa, mahalagang marhay an odok sa pusong pamibi kun kita may mahahalagang desisyon na gigibohon o kun kita nasa irarom nin grabeng tension.—Lucas 6:12, 13; 22:41-44.

11. (a) Paano napakosog si Abraham kan buksan nia an saiyang puso sa Dios? (b) Ano an manonodan niato sa eksperyensia ni Abraham?

¹¹ Kan naggugurang na si Abraham asin dai pa man giraray sia tinatawan ni Jehova kan ipinanugang banhi, nakipag-olay sia sa Dios manongod sa kapurisawan nia. Pinakosog liwat ni Jehova an boot nia. An resulta? Si Abraham “tuminubod ki Jehova; asin ibinilang nia iyan sa saiya na katanosan.” Dangan, si Jehova nagtao nin tanda sa pagpatunay sa saiyang nakapakokosog liwat sa boot na mga tataramon. (Genesis 15:1-18) Kun satong bubuksan an satong puso ki Jehova sa pamibi, aakoon an mga pagpasarig sa boot ni Jehova sa saiyang Tataramon, an Biblia, asin kukuyogon sia na bilog an pagtubod, kun siring pakokosogon man ni Jehova an satong pagtubod.—Mateo 21:22; Judas 20, 21.

12, 13. (a) Paano binendisyonan si Abraham kan sia sumunod sa paggiya ni Jehova? (b) Anong klaseng mga eksperyensia an mapakosog sa satong pagtubod?

¹² An ikaapat na bagay na nakapakosog sa pagtubod ni Abraham iyo an pagsuportar na itinao sa saiya ni Jehova kan sunodon nia an paggiya nin Dios. Kan si Abraham magduman sa pagsalbar ki Lot sa mga hadeng nananakyada, itinao sa saiya ni Jehova an kapangganahan. (Genesis 14:16, 20) Mantang si Abraham namumuhay na garo nakiiistar nin temporaryo sa daga na mamanahon kan saiyang banhi, binendisyonan sia ni Jehova sa materyal. (Ikomparar an Genesis 14:21-23.) Giniyahan ni Jehova an mga paghihingoa kan saiyang mayordomo na humanap nin angay na agom para ki Isaac. (Genesis 24:10-27) Iyo, “binendisyonan ni Jehova si Abraham sa gabos na bagay.” (Genesis 24:1) Makosogon an saiyang pagtubod bilang resulta asin haranihon an saiyang relasyon ki Jehova Dios kaya inapod sia ni Jehova na “sakuyang katood.”—Isaias 41:8; Santiago 2:23.

¹³ Kita daw ngonyan puedeng magkaigwa nin siring kakosog na pagtubod? Iyo. Kun, arog ni Abraham, babaloon niato si Jehova paagi sa pagkuyog sa saiyang mga pagboot, bebendisyonan man nia kita, asin iyan mapakosog sa satong pagtubod. Halimbawa, an pagsalimbad sa Report kan 1998 Taon nin Paglilingkod nagpapaheling na dakol an binendisyonan sa makangangalas na paagi kan kuyogon ninda an saiyang pagboot na ihulit an maogmang bareta.—Marcos 13:10.

Sarong Rekord nin Pagtubod Ngonyan

14. Paano binendisyonan ni Jehova an kampanya sa Kingdom News Num. 35?

¹⁴ Kaidtong Oktubre 1997, an pambilog na kinaban na kampanya sa Kingdom News Num. 35 pambihira an kapangganahan huli sa kaigotan asin entusiasmo kan minilyon na indibiduwal na Saksi. Tipiko an nangyari sa Ghana. Haros 2.5 milyones na kopya an ikinawaras sa apat na lenguahe, asin bilang resulta haros 2,000 na pag-adal sa Biblia an hinagad. Sa Chipre an duwang Saksi na nagwawaras kan Kingdom News nakarisa na sinusundan sinda nin sarong padi. Paghaloyhaloy, inalok sia ninda nin kopya kan Kingdom News. Nakaresibi na sia nin kopya asin nagsabi: “Nagulat akong marhay sa mensahe kaiyan kaya gusto kong pelisitaron an mga naggibo kaiyan.” Sa Dinamarca, 1.5 milyones na kopya kan Kingdom News an ikinawaras na may mararahay na resulta. An sarong babae na nagtatrabaho sa relasyones publikas duman nagsabi: “An pulyeto may mensahe para sa gabos. Iyan pasil na masabotan, asin iyan nagpapahiro saimo, nagtatao saimo nin kamawotan na dugangan pa an kaaraman. Iyan talagang tamang-tama!”

15. Anong mga eksperyensia an nagpapaheling na binendisyonan ni Jehova an paghihingoa na aboton an mga tawo sa gabos na lugar?

¹⁵ Kan 1998 ginibo an paghihingoa na maghulit sa mga tawo bako sanang sa saindang harong kundi sa gabos na lugar. Sa Côte d’Ivoire sinongko nin sarong mag-agom na misyonero an 322 na barko sa pantalan. Nakapasakamot sinda nin 247 libro, 2,284 magasin, 500 na brosyur, asin ginatos na pulyeto, saka mga video na madadalan kan mga marinero mantang nasa dagat. Sa Canada an sarong Saksi nagduman sa sarong talyer nin kaha nin mga auto. Interesado an kagsadiri, asin an tugang nagdanay duman nin apat may kabangang oras, minsan ngani an oras na ginamit sa pagpatotoo sa kabilogan mga sarong oras sana sa pag-oltanan nin mga parokyano. Sa kahurihurihi, ikinaareglo an pag-adal sa alas 10:00 n.b. Pero, kun beses, iyan matangang banggi nang napoponan asin nagpapadagos sagkod alas dos nin aga. Posibleng marhay na nagin sarong angat an iskedyul, alagad nakamtan an marahay na mga resulta. An lalaki nagdesisyon na sirrahan an saiyang talyer kun Domingo tanganing makaatender sa pagtiripon. Dai nahaloy sia asin an saiyang pamilya marahay na an pag-oswag.

16. Anong mga eksperyensia an nagpapaheling na an brosyur na Kahagadan asin an librong Kaaraman mapuersang mga kasangkapan sa gibong paghuhulit asin pagtotokdo?

¹⁶ An brosyur na Ano an Kahagadan sa Sato nin Dios? asin an librong Kaaraman na Minagiya Pasiring sa Buhay na Daing Katapusan padagos na nagigin mapuersang mga instrumento sa gibong paghuhulit asin pagtotokdo. Sa Italia an sarong madre na naghahalat nin auto nag-ako nin kopya kan Kingdom News. Kan sumunod na aldaw, sia dinolok giraray asin nag-ako kan brosyur na Kahagadan. Aroaldaw poon kaidto, nagkaigwa sia nin 10 sagkod 15 minutos na pag-adal sa Biblia sa pondohan nin auto. Pakalihis nin saro may kabangang bulan, nagdesisyon sia na humale sa kombento asin magpuli sa Guatemala tanganing ipadagos an saiyang pag-adal. Sa Malawi an sarong maigot na parasimba na an ngaran Lobina naanggot kan an saiyang mga aking babae magpoon na makipag-adal kan Biblia sa Mga Saksi ni Jehova. Pero, ihinihiras kan mga daragita sa saindang ina an katotoohan sa Biblia kun noarin puede. Kan Hunyo 1997, naheling ni Lobina an librong Kaaraman asin napukaw an saiyang interes kan fraseng “Kaaraman na Minagiya.” Kan Hulyo nag-oyon sia na mag-adal sa Biblia. Kan Agosto sia nag-atender sa pandistritong kombension asin maingat na naghinanyog sa bilog na programa. Sa katapusan kan bulan na idto, binayaan na nia an saiyang iglesia asin nakualipikar na sia bilang dai pa bautisadong parahayag. Nabautismohan sia kan Nobyembre 1997.

17, 18. Paano nagin kapakipakinabang an mga video kan Sosyedad sa pagtabang sa mga indibiduwal na “maheling” an espirituwal na mga bagay?

¹⁷ An mga video kan Sosyedad nakatabang sa dakol na “maheling” an espirituwal na mga bagay. Sa Mauricio naghale sa saiyang iglesia an sarong lalaki huli sa dai pagkasararo dian. Ipinaheling sa saiya nin sarong misyonero an pagkasararo kan Mga Saksi ni Jehova, na ginagamit an video na United by Divine Teaching. Nagulat, an lalaki nagsabi: “Kamong Mga Saksi ni Jehova nasa Paraiso na!” Nag-oyon sia na mag-adal kan Biblia. Ipinaheling nin sarong tugang na babae sa Hapon sa saiyang agom na daing pagtubod an video na Jehovah’s Witnesses—The Organization Behind the Name, asin napahiro ini na magkaigwa nin regular na pag-adal sa Biblia. Pakadalan sa United by Divine Teaching, gusto na kaining magin saro sa Mga Saksi ni Jehova. An may tolong kabtang na serye na an titulo The Bible—A Book of Fact and Prophecy nakatabang sa saiya na iaplikar sa saiyang buhay an mga prinsipyo sa Biblia. Sa katapustapusi, ipinaheling sa saiya kan Jehovah’s Witnesses Stand Firm Against Nazi Assault na pinakokosog ni Jehova an Saiyang banwaan tumang sa mga pagsalakay ni Satanas. An lalaki nabautismohan kan Oktubre 1997.

¹⁸ Pira sana ini sa kadakoldakol na nagin eksperyensia kaidtong nakaaging taon nin paglilingkod. Ipinaheheling kan mga iyan na an Mga Saksi ni Jehova may aktibong pagtubod asin na pinakokosog ni Jehova an pagtubod na iyan paagi sa pagbendisyon sa saindang aktibidad.—Santiago 2:17.

Kultibaron an Pagtubod Ngonyan

19. (a) Paano na kita mas marahay an kamugtakan kisa ki Abraham? (b) Pira an nagtiripon kan nakaaging taon tanganing girumdomon an kagadanan ni Jesus sa pag-atang? (c) Anong mga nasyon an nagkaigwa nin pambihirang kabilangan nin mga nag-atender sa Memorial kan nakaaging taon? (Helingon an tsart sa pahina 12 sagkod 15.)

¹⁹ Sa dakol na paagi mas marahay an kamugtakan niato ngonyan kisa ki Abraham. Aram niato na inotob ni Jehova an gabos niang panuga ki Abraham. An mga gikan ni Abraham minana nanggad an Canaan, asin sinda nagin nanggad dakulang nasyon. (1 Hade 4:20; Hebreo 11:12) Apuera dian, mga 1,971 taon pagkahale ni Abraham sa Haran, an saro niang gikan, si Jesus, binautismohan sa tubig ni Juan na Bautisador dangan sa banal na espiritu ni Jehova mismo tanganing magin an Mesiyas, an Banhi ni Abraham sa bulaos, espirituwal na sentido. (Mateo 3:16, 17; Galacia 3:16) Kan Nisan 14, 33 C.E., idinolot ni Jesus an saiyang buhay bilang pantubos para sa mga matubod sa saiya. (Mateo 20:28; Juan 3:16) An minilyon puede nang bendisyonan an saindang sadiri paagi sa saiya. Kan nakaaging taon, 13,896,312 an nagtiripon kan Nisan 14 tanganing girumdomon an makangangalas na aktong ini nin pagkamoot. Abaang pagbindikar ki Jehova, an Dakulang Paraotob nin mga panuga!

20, 21. Paano an mga tawo hale sa gabos na nasyon nagbendisyon sa saindang sadiri paagi sa Banhi ni Abraham kan enot na siglo, asin paano sinda nagbebendisyon sa saindang sadiri ngonyan?

²⁰ Kan enot na siglo, an dakol hale sa gabos na nasyon—poon sa Israel sa laman—tuminubod sa Banhing ini ni Abraham asin nagin linahidan na aki nin Dios, mga miembro nin bago, espirituwal na “Israel nin Dios.” (Galacia 3:26-29; 6:16; Gibo 3:25, 26) Igwa sinda nin siertong paglaom sa inmortal na espiritung buhay sa kalangitan bilang mga kaibang namamahala sa Kahadean nin Dios. Solamente 144,000 an bebendisyonan sa paaging ini, asin pira na sana sa sainda an natatada. (Kapahayagan 5:9, 10; 7:4) Kan nakaaging taon, 8,756 an nagpatotoo sa paniniwala ninda na sinda kabilang digdi paagi sa pakikikabtang sa mga emblema durante kan selebrasyon nin Memorial.

²¹ Haros gabos sa Mga Saksi ni Jehova ngonyan kabilang sa “dakulang kadaklan” na ihinula sa Kapahayagan 7:9-17. Huli ta binebendisyonan ninda an saindang sadiri paagi ki Jesus, igwa sinda kan paglaom na buhay na daing sagkod sa sarong paraisong daga. (Kapahayagan 21:3-5) An 5,888,650 na nakikabtang sa gibong paghuhulit kan 1998 ebidensia na talagang “dakula” an kadaklan na ini. Nangorognang nakaoogma na maheling an Rusya sagkod Ucrania na magreport nin labing 100,000 na parahayag sa kaenot-enote. Pambihira man an report hale sa Estados Unidos—1,040,283 na parahayag kan Agosto! Tolo sana ini sa 19 nasyon na nagreport nin labing 100,000 na parahayag kan nakaaging taon.

Paglaom na Madali Nang Maotob

22, 23. (a) Taano ta maninigo niatong parigonon an satong puso ngonyan? (b) Paano kita magigin arog ni Abraham, bakong arog kan mga daing pagtubod na nasambitan ni Pablo?

²² An mga nag-atender sa Memorial pinagirumdom kun gurano na karayo kan naabot niato sa pagkaotob kan mga panuga ni Jehova. Kan 1914, si Jesus pinatukaw sa trono bilang Hade kan langitnon na Kahadean nin Dios, na pinonan an saiyang presensia na may kapangyarihan sa Kahadean. (Mateo 24:3; Kapahayagan 11:15) Iyo, an Banhi ni Abraham naghahade na ngonyan sa langit! Sinabi ni Santiago sa mga Kristiano kan saiyang kaaldawan: “Magin mapasensia; parigona an saindong puso, huli ta an presensia kan Kagurangnan harani na.” (Santiago 5:8) Bueno, an presensiang iyan tunay na nangyayari na! Abaa kamas makosog na dahelan na parigonon an satong puso!

²³ An satuya logod na kompiansa sa mga panuga nin Dios daing ontok na ibalik nin regular na pag-adal sa Biblia asin makahulogan na pamibi. Logod na nungka kitang mapondo sa pakaeksperyensia kan bendisyon ni Jehova mantang kinukuyog niato an saiyang Tataramon. Dangan kita magigin arog ni Abraham, bakong arog kan mga nanluya asin nagadan an pagtubod, na nasambitan ni Pablo. Mayo nin makakapasuway sato sa satong kabanalbanaleng pagtubod. (Judas 20) Ipinamimibi niato na ini magin totoo sa gabos na lingkod ni Jehova durante kan 1999 taon nin paglilingkod asin padagos sa ngapit na daing sagkod.

Aram daw Nindo?

◻ Paano kita makahihinanyog sa Dios ngonyan?

◻ Anong mga pakinabang an nakakamtan gikan sa makahulogan na mga pamibi sa Dios?

◻ Kun makinuyog niatong susunodon an paggiya ni Jehova, paano mapakokosog an satong pagtubod?

◻ Anong mga aspekto kan taonan na report (pahina 12 sagkod 15) an nangorognang interesante para sa saindo?

[Tsart sa pahina 12-15]

REPORT KAN 1998 NA TAON NIN PAGLILINGKOD KAN MGA SAKSI NI JEHOVA SA BILOG NA KINABAN

(Hilingon an bound volume)

[Ritrato sa pahina 16]

Kun kita maghihinanyog sa Tataramon ni Jehova, an satong kompiansa sa saiyang mga panuga ikababalik

[Ritrato sa pahina 18]

An satong pagtubod napakokosog kun kita nakikakabtang sa ministeryo