Igwa daw Kamo nin Pagtubod na Arog kan ki Abraham?

“Kun dumatong na an Aki nin tawo, talaga daw na makukua nia an pagtubod sa daga?”—LUCAS 18:8.

1. Taano ta depisil na papagdanayon na makosog an pagtubod nin saro ngonyan?

BAKONG pasil na papagdanayon na makosog an pagtubod nin saro ngonyan. An kinaban makosog an pan-iimpluwensia sa mga Kristiano tangani na irayo an saindang atension sa espirituwal na mga bagay. (Lucas 21:34; 1 Juan 2:15, 16) An dakol kaipuhan na maglapigot tanganing magdanay na buhay sa ibong nin mga guerra, kalamidad, helang, o gutom. (Lucas 21:10, 11) Sa dakol na nasyon, may makosog na sekular na kultura, asin an siisay man na namumuhay oyon sa saindang pagtubod ibinibilang na bakong rasonable, panatiko pa ngani. Dugang pa, dakol na Kristiano an pinaglalamag huli sa saindang pagtubod. (Mateo 24:9) An hapot ni Jesus, na pinalataw kaidtong haros 2,000 na taon na an nakaagi, angay nanggad: “Kun dumatong na an Aki nin tawo, talaga daw na makukua nia an pagtubod sa daga?”—Lucas 18:8.

2. (a) Taano ta mahalagang marhay para sa Kristiano an makosog na pagtubod? (b) Kiisay na halimbawa nin pagtubod an marahay na pensaron niato?

² Pero, an totoo iyo na mahalagang marhay an makosog na pagtubod tangani na magin mapanggana an buhay niato ngonyan asin akoon niato an ipinanugang buhay na daing katapusan sa ngapit. Kinokotar an mga tataramon ni Jehova ki Habacuc, si apostol Pablo nagsurat: “‘An sakong matanos mabubuhay huli sa pagtubod,’ asin, ‘kun sia sumibog, an sakong kalag mayo nin kaogmahan sa saiya.’ . . . Kun dai nin pagtubod imposible na mapaogma [an Dios] nin marhay.” (Hebreo 10:38–11:6; Habacuc 2:4) Si Timoteo sinabihan ni Pablo: “Makipaglaban ka kan marahay na pakilaban nin pagtubod, mangapot ka nin marigon sa buhay na daing katapusan na huli kaiyan ika inapod.” (1 Timoteo 6:12) Kun siring, paano posible na magkaigwa nin pagtubod na dai napanluluya? Sa pagpensar kan hapot na iyan, marahay na asahan tang makatabang sato an sarong tawo na nabuhay kaidtong mga 4,000 na taon na an nakaagi, pero an pagtubod sagkod ngonyan pinahahalagahan na marhay sa tolong mayor na relihion—an Islam, Judaismo, asin Kristianismo. An tawong iyan iyo si Abraham. Taano ta pambihirang marhay an saiyang pagtubod? Maaarog daw niato sia ngonyan?

Pagkuyog sa Instruksion nin Dios

3, 4. Taano ta ibinalyo ni Tare an saiyang pamilya hale sa Ur pasiring sa Haran?

³ Si Abraham (na an orihinal na ngaran Abram) enot na nasasambitan sa enotan pang marhay kan Biblia. Sa Genesis 11:26, mababasa niato: “Si Tare . . . nagin ama ni Abram, Nacor asin Haran.” Si Tare asin an saiyang pamilya nag-iistar kaidto sa Ur kan mga Caldeo, sarong maoswag na siudad sa timog na parte kan Mesopotamia. Minsan siring, dai sinda nagdanay duman. “Kinua ni Tare si Abram na aki nia asin si Lot, na aki ni Haran, an saiyang makoapo, patin si Sarai [Sara] na saiyang manugang na babae, na agom na babae ni Abram na aki nia, asin sinda uminiba sa saiya hale sa Ur kan mga Caldeo tanganing magduman sa daga nin Canaan. Pag-abot nin panahon nag-abot sinda sa Haran asin nag-erok duman.” (Genesis 11:31) Dinara man kan tugang ni Abraham na si Nacor an saiyang pamilya sa Haran. (Genesis 24:10, 15; 28:1, 2; 29:4) Pero taano si Tare ta nagbalyo hale sa asensadong Ur pasiring sa harayong Haran?

⁴ Mga 2,000 na taon pakalihis kan panahon ni Abraham, an fiel na tawong si Esteban, sa pagtaram sa atubangan kan Judiong Sanhedrin, ipinaliwanag an pambihirang aksion na ini kan pamilya ni Tare. Sabi nia: “An Dios nin kamurawayan nagpaheling sa satong apoon na si Abraham kan sia yaon sa Mesopotamia, bago sia nag-istar sa Haran, asin sinabi nia sa saiya, ‘Humale ka sa saimong daga asin sa saimong mga paryente patin paduman ka sa daga na ipaheheling ko sa saimo.’ Dangan naghale sia sa daga kan mga Caldeo asin nag-istar sa Haran.” (Gibo 7:2-4) Si Tare nagpasakop sa kabotan ni Jehova para ki Abraham kan ibalyo nia sa Haran an pinakaharani niang kasararo sa harong.

5. Saen nagduman si Abraham pagkagadan kan saiyang ama? Taano?

⁵ An pamilya ni Tare namirmehan sa bago nindang siudad. Pakalihis nin mga taon kan si Abraham magtaram manongod sa “sakuyang daga,” an boot niang sabihon an lugar nin Haran, bakong an Ur. (Genesis 24:4) Minsan siring, an Haran bakong iyo an magigin permanenteng istada ni Abraham. Segun ki Esteban, “pagkagadan kan ama [ni Abraham], pinapangyari nin Dios na ibalyo nia an saiyang istada sa dagang ini na ineerokan nindo ngonyan.” (Gibo 7:4) Makinuyog sa instruksion ni Jehova, si Abraham, kaiba si Lot, nagdakit sa Eufrates pasiring sa daga nin Canaan.a

6. Anong panuga an sinabi ni Jehova ki Abraham?

⁶ Taano ta pinabalyo ni Jehova si Abraham sa Canaan? An dahelan may koneksion sa mga katuyohan nin Dios para sa fiel na tawong iyan. Nagsabi si Jehova ki Abraham: “Humale ka sa saimong daga asin sa saimong mga paryente patin sa harong kan saimong ama pasiring sa daga na ipaheheling ko sa saimo; asin magibo ako nin dakulang nasyon hale sa saimo asin ika bebendisyonan ko asin padadakulaon ko an saimong ngaran; asin magigin kang bendisyon. Asin bebendisyonan ko an mga nagbebendisyon sa saimo, asin sia na nagsusumpa sa saimo susumpaon ko, asin an gabos na pamilya kan daga magbebendisyon nanggad kan saindang sadiri paagi sa saimo.” (Genesis 12:1-3) Si Abraham magigin ama nin sarong dakulang nasyon na magkakamit kan pagprotehir ni Jehova asin makasasadiri kan daga nin Canaan. Abaa karahay na panuga! Alagad si Abraham kinaipuhan na gumibo nin ekstraordinaryong mga pagbago sa saiyang buhay tanganing manahon an dagang iyan.

7. Anong mga pagbago an kaipuhan na andam si Abraham na gibohon tanganing manahon an panuga ni Jehova?

⁷ Kan an Ur bayaan ni Abraham, an binayaan nia sarong asensadong siudad asin posibleng marhay na pati an pamilyang ekstendido kan saiyang ama—na mahahalagang gikanan nin seguridad kan patriarkal na mga panahon na idto. Kan bayaan nia an Haran, isiniblag nia an saiyang sadiri sa kasararo sa harong kan saiyang ama, pati sa pamilya kan tugang niang si Nacor, asin buminalyo sia sa sarong dagang dai nia midbid. Sa Canaan dai sia naghingoang magin ligtas sa peligro sa laog kan mga lanob nin sarong siudad. Taano ta dai? Dai nahaloy pagkalaog ni Abraham sa dagang idto, si Jehova nagsabi sa saiya: “Libota an daga sa kalabaan kaiyan asin sa kalakbangan kaiyan, huli ta sa saimo itatao ko iyan.” (Genesis 13:17) Sinunod kan 75 anyos na si Abraham asin kan 65 anyos niang agom, si Sara, an mga instruksion na ini. “Huli sa pagtubod sia nag-erok bilang dayo sa daga kan panuga siring sa nasa ibang daga, asin nag-erok sa mga tolda.”—Hebreo 11:9; Genesis 12:4.

Pagtubod na Arog kan ki Abraham Ngonyan

8. Huli sa halimbawa ni Abraham asin nin iba pang suanoy na mga saksi, ano an maninigo niatong kultibaron?

⁸ Si Abraham asin an saiyang pamilya nginangaranan kabilang kan dakulang “panganoron nin mga saksi” kaidtong mga panahon bago kan mga Kristiano na nasasambitan sa Hebreo kapitulo 11. Huli sa pagtubod kan enot na mga lingkod na ini nin Dios, inenkaminar ni Pablo an mga Kristiano na “pabayaan ta man an gabos na kagabatan asin an kasalan [kadaihan nin pagtubod] na pasil sanang nakagagapos sa sato.” (Hebreo 12:1) Iyo, an kadaihan nin pagtubod puedeng ‘pasil sanang makagapos sa sato.’ Alagad sa kaaldawan ni Pablo asin niato, an tunay na mga Kristiano nakakultibar nin makosog na pagtubod na kaagid kan ki Abraham asin nin iba pa kaidtong suanoy na mga panahon. Sa pagtaram manongod sa saiyang sadiri asin sa kapwa mga Kristiano, si Pablo nagsasabi: “Bako kita an klase na minasibog sa kalaglagan, kundi an klase na may pagtubod sa ikapagdadanay na buhay kan kalag.”—Hebreo 10:39.

9, 10. Ano an ebidensia na an dakol ngonyan may pagtubod na arog kan ki Abraham?

⁹ Totoo, liwat na an kinaban poon kan panahon ni Abraham. Minsan siring, an pinaglilingkodan niato iyo pa man giraray “an Dios ni Abraham,” asin sia dai nagliliwat. (Gibo 3:13; Malaquias 3:6) Si Jehova maninigong sambahon ngonyan arog kaidtong panahon ni Abraham. (Kapahayagan 4:11) An dakol idinudusay nin biyo an saindang sadiri ki Jehova asin, arog ni Abraham, ginigibo an ano man na pagbagong kaipuhan sa saindang buhay tanganing magibo an kabotan nin Dios. Kan nakaaging taon, 316,092 an nagtao nin pampublikong ebidensia kan saindang pagdusay paagi sa pagpabautismo sa tubig “sa ngaran kan Ama asin kan Aki patin kan banal na espiritu.”—Mateo 28:19.

¹⁰ An kadaklan sa bagong mga Kristianong ini dai kinaipuhan na magbiahe pasiring sa hararayong daga tanganing maotob an saindang pagdusay. Pero, sa espirituwal na sentido, dakol sa sainda an haroharayo an biniahe. Halimbawa, sa Mauricio, si Elsie dating pararatak na babae. Takot sa saiya an gabos. An sarong espesyal payunir iinareglo an pakipag-adal sa Biblia sa aking babae ni Elsie, asin ini an nagbukas kan dalan na si Elsie ‘bumirik hale sa kadikloman pasiring sa liwanag.’ (Gibo 26:18) Huli sa interes kan saiyang aking babae, uminoyon si Elsie na adalan an My Book of Bible Stories. An pag-adal nia ginibo nin tolong beses kada semana ta kaipuhan nia an danay na pagparigon sa boot. An mga gibo nia sa okulto daing kaogmahan na itinao sa saiya, asin kadakol kan personal niang problema. Pero, pag-abot nin panahon, natapos nia an halawig na biahe hale sa demonismo pasiring sa tunay na pagsamba. Kun minaduman an mga tawo sa paghagad kan saiyang serbisyo, ipinaliliwanag nia na solamente si Jehova an makapoprotehir sa sainda sa maraot. Ngonyan si Elsie bautisado nang Saksi, asin 14 katawo sa saiyang pamilya asin mga kamidbid an nag-ako kan katotoohan.

11. Anong mga pagliwat an andam na gibohon kan mga nagdusay kan saindang sadiri ki Jehova?

¹¹ An kadaklan sa mga nagdusay kan saindang sadiri na maglingkod sa Dios kan nakaaging taon dai kinaipuhan na gumibo nin siring kaekstraordinaryong mga pagbago. Alagad an gabos naliwat hale sa pagigin gadan sa espirituwal pasiring sa pagigin buhay sa espirituwal. (Efeso 2:1) Minsan ngani yaon pa sa kinaban sa pisikal, bako na sindang kabtang kaiyan. (Juan 17:15, 16) Kaagid nin linahidan na mga Kristiano, na an “pagkasiudadano nasa kalangitan,” sinda garo “mga dayo asin nakiiistar nin temporaryo.” (Filipos 3:20; 1 Pedro 2:11) Iinoyon ninda an saindang buhay sa mga pamantayan nin Dios, na orog sa gabos minomotibar nin pagkamoot sa Dios asin pagkamoot sa kapwa. (Mateo 22:37-39) Dai ninda pinag-aaabot an paslo, materyalistikong mga pasohan o namamatean an pangangaipo nin personal na satispaksion sa kinaban na ini. Imbes, itinotorohok ninda an saindang mga mata sa ipinanugang ‘bagong kalangitan asin sarong bagong daga na dian magdadanay an katanosan.’—2 Pedro 3:13; 2 Corinto 4:18.

12. Anong aktibidad na irineport kan nakaaging taon an nagtatao nin ebidensia na sa panahon kan saiyang presensia nakua ni Jesus “an pagtubod sa daga”?

¹² Kan si Abraham bumalyo sa Canaan, sia asin an saiyang pamilya solo duman na solamente si Jehova an masuportar asin maprotehir sa sainda. Minsan siring, an 316,092 na bagong mabautismohan na mga Kristianong ini dai nanggad nagsosolo. Totoo, sinusuportaran asin pinoprotehiran sinda ni Jehova paagi sa saiyang espiritu, arog kan ginibo nia ki Abraham. (Talinhaga 18:10) Pero, apuera dian, sinusuportaran nia sinda paagi sa sarong maogma, internasyonal na “nasyon” na mas dakol an populasyon kisa sa nagkapirang kinabanon na nasyon ngonyan. (Isaias 66:8) Kan nakaaging taon, an pinakahalangkaw na kabilangan na 5,888,650 siudadano kan nasyon na iyan nagtao nin ebidensia kan saindang aktibong pagtubod paagi sa pakipag-olay sa saindang mga kapwa manongod sa mga panuga nin Dios. (Marcos 13:10) Ginamit ninda an ekstraordinaryong kabilangan na 1,186,666,708 oras sa gibohon na ini, na naghihingoang manompongan an mga interesado. Bilang resulta, 4,302,852 na pag-adal sa Biblia an ginibo kaiba nin iba na boot na magkultibar nin pagtubod. Bilang dugang pang prueba kan saindang kaigotan, 698,781 sa “nasyon” na ini an nakikabtang sa paglilingkod bilang payunir, magsalang bilog na panahon o sa laog nin saro o labi pang bulan. (An mga detalye kan gibohon kan Mga Saksi ni Jehova kan nakaaging taon yaon sa pahina 12 sagkod 15.) An pambihirang rekord na ini positibo, buhay na simbag sa hapot ni Jesus, “Kun dumatong na an Aki nin tawo, talaga daw na makukua nia an pagtubod sa daga?”

Fiel sa Ibong nin mga Pagbalo

13, 14. Iladawan an nagkapira sa mga kadepisilan na inatubang ni Abraham asin kan saiyang pamilya sa Canaan.

¹³ Parateng depisil an mga kamugtakan para ki Abraham asin sa saiyang kasararo sa harong sa Canaan. Sa kisuerra sarong okasyon, may grabeng gutom na nakapirit sa saiya na humale sa Canaan asin magduman sa Egipto. Apuera dian, an namamahala sa Egipto sagkod an namamahala sa Gerar (na harani sa Gaza) pareho nagprobar na kuanon an agom ni Abraham, si Sara. (Genesis 12:10-20; 20:1-18) Nag-iiriwal man an mga pastor kan ataman na mga hayop ni Abraham asin an mga pastor kan ataman na mga hayop ni Lot, asin ini ginikanan nin pagkabulag kan duwang pamilya. Daing kapasloan, pinaenot ni Abraham si Lot sa pagpili nin daga, asin pinili ni Lot na mag-istar sa Distrito kan Jordan, na garo Eden sa pagigin balunbon asin sa kagayonan.—Genesis 13:5-13.

¹⁴ Dangan, si Lot napalabot sa guerra sa pag-oltanan kan hade kan harayong Elam saka kan mga kaalyado nia asin kan mga hade kan limang siudad sa Hababang Kaplanodohan nin Sidim. Dinaog kan dayong mga hade an lokal na mga hade asin dakol an nakuang sinamsaman, kaiba si Lot asin an saiyang mga rogaring. Kan mabaretaan ni Abraham an nangyari, daing takot na linapag nia an dayong mga hade asin nabawi nia si Lot saka an saiyang kasararo sa harong, pati an mga rogaring kan lokal na mga hade. (Genesis 14:1-16) Minsan siring, bako iyan an pinakamaraot na eksperyensia ni Lot sa Canaan. Sa dai maaraman na dahelan nag-istar sia sa Sodoma, sa ibong kan inmoral na reputasyon kan siudad.b (2 Pedro 2:6-8) Kan patanidan nin duwang anghel na lalaglagon an siudad, duminulag si Lot kaiba an saiyang agom asin mga aking babae. Minsan siring, dai inintindi kan agom ni Lot an espesipikong instruksion kan mga anghel asin, bilang resulta, nalobong sia sa asin. Sa kadikit na panahon si Lot nag-istar na sana sa sarong kueba sa Zoar kaiba an duwa niang aking babae. (Genesis 19:1-30) Siertong nakaribok na marhay ki Abraham an mga pangyayaring ini, nangorogna ta si Lot nagduman sa Canaan bilang kabtang kan kasararo sa harong ni Abraham.

15. Sa ibong kan mga problema na inatubang ni Abraham mantang nag-iistar sa mga tolda sa dagang dai nia kabisado, anong negatibong kaisipan an malinaw na linikayan nia?

¹⁵ Inisip-isip daw ni Abraham kasuarin man kun baga sia saka si Lot maninigo na nagdanay na sana kutana sa proteksion kan Ur kaiba kan pamilyang ekstendido kan saiyang ama o sa Haran kaiba kan tugang niang si Nacor? Minawot daw nia kasuarin man na namirmehan na sana kutana sia sa lugar na harayo sa peligro sa laog nin siudad na nalalanoban imbes na mag-istar sa mga tolda? Pinagdudahan daw nia an kadonongan kan mga ginibo niang sakripisyo sa paglagawlagaw sa dagang dai nia kabisado? Sa pagtaram manongod ki Abraham asin sa saiyang pamilya, sinabi ni apostol Pablo: “Kun talagang pinaggirumdom ninda an lugar na iyan na saindang pinaghalean, may oportunidad kutana sindang magpuli.” (Hebreo 11:15) Pero, dai sinda nagpuli. Dai nadesganar sa mga kasakitan, nagdanay sinda kun saen gusto ni Jehova.

Pakatagal Ngonyan

16, 17. (a) Anong mga kadepisilan an inaatubang ngonyan nin dakol na Kristiano? (b) Ano an positibong aktitud nin mga Kristiano? Taano?

¹⁶ Naheheling sa mga Kristiano ngonyan an kaagid na pakatagal. Minsan ngani gikanan nin dakulang kagayagayahan para sa sainda an paglilingkod sa Dios, bakong pasil an buhay para sa tunay na mga Kristiano sa huring mga aldaw na ini. Dawa ngani sinda namumuhay sa sarong espirituwal na paraiso, inaagihan ninda an mga sakit sa pagbuhay na kapareho kan inaagihan kan saindang kapwa. (Isaias 11:6-9) Dakol an nagin inosenteng biktima sa mga guerra kan mga nasyon, asin an nagkapira namugtak sa labi-labing kadukhaan na bako man nindang sala. Dugang pa, tinatagalan ninda an mga problema sa pagigin minoriyang ikinauuyam. Sa dakol na kadagaan ihinuhulit ninda an maogmang bareta sa ibong nin grabeng pagkaindiperente. Sa iba nagdudusa sinda sa mapandayang mga pagsalakay kan mga “naggigibo nin karatan paagi sa pagboot” asin ‘ipinahahayag na maraot pati an dugo kan sarong inosente.’ (Salmo 94:20, 21) Dawa sa kadagaan na an mga Kristiano dai sinasalakay asin inoomaw sinda nin nagkapira huli sa saindang halangkaw na mga pamantayan, risa ninda na sinda laen sa saindang mga kaeskuela asin katrabaho—garo baga arog ni Abraham, na nag-istar sa mga tolda mantang an kadaklan sa palibot nia nag-eerok sa mga siudad. Iyo, bakong pasil na mabuhay sa kinaban pero magin “bakong kabtang” kaiyan.—Juan 17:14.

¹⁷ Kun siring, pinagbabasolan daw niato an satong pagdusay sa Dios? Mawot daw niato na nagdanay kutana kitang kabtang kan kinaban, na arog kan iba? Pinagsosolsolan daw niato an mga pagsakripisyo niato sa paglilingkod ki Jehova? Dai nanggad! Imbes na may paghidaw na magparagirumdom, minimidbid niato na an ano man na tibaad isinakripisyo niato mayo nin tunay na halaga kun ikokomparar sa mga bendisyon na nakakamtan ngonyan asin sa mga makakamtan sa ngapit. (Lucas 9:62; Filipos 3:8) Apuera kaiyan, maogma daw an mga tawo sa kinaban? An totoo, dakol sa sainda an naghahanap nin mga simbag na dati nang yaon sa sato. Nagdudusa sinda huli sa dai pagsunod sa paggiya na sinusunod niato gikan sa Dios paagi sa mga pahina kan Biblia. (Salmo 119:105) Asin dakol sa sainda an naghihidaw sa klase nin Kristianong pakiibaiba asin nakaoogmang marhay na asosasyon na nakakamtan niato kaiba nin mga kapagtubod.—Salmo 133:1; Colosas 3:14.

18. Ano an resulta sa huri kun an mga Kristiano nagpapaheling nin kapusoan na arog kan ki Abraham?

¹⁸ Totoo, kun beses kaipuhan na kita magin mapuso arog ni Abraham kan lapagon nia an mga nambihag ki Lot. Alagad kun mapuso kita, binebendisyonan ni Jehova an resulta. Halimbawa, sa Amihanan na Irlandia masakit nang mabago an mga pagkaongis bilang resulta kan kadahasan nin mga sekta, asin kaipuhan an kapusoan tanganing magin neutral. Pero, sinunod nin fiel na mga Kristiano an mga tataramon ni Jehova ki Josue: “Magmapuso asin magmakosog ka. Dai ka mahandal o matakot, huli ta si Jehova na saimong Dios danay na nasa kaibanan mo saen ka man paduman.” (Josue 1:9; Salmo 27:14) Sa nag-aging mga taon iginalang sinda huli sa saindang daing takot na paninindogan, asin ngonyan libre sindang nakakapaghulit sa gabos na komunidad sa nasyon na iyan.

19. Saen naoogmang mamugtak an mga Kristiano, asin anong resulta an may kompiansang linalaoman ninda kun sinusunod ninda an instruksion ni Jehova?

¹⁹ Dai kita noarin man dapat na magduda na ano man na situwasyon an atubangon niato, kun susunodon niato an instruksion ni Jehova, an magigin pangultimong resulta para sa saiyang ikamumuraway asin sa panhaloyan na pakinabang niato. Sa ibong nin mga kadepisilan asin sakripisyo, mayo na nin ibang gusto niatong mamugtakan kundi an paglilingkod ki Jehova, na naoogma sa pakikiiba kan satong Kristianong mga tugang asin may kompiansang inaantisipar an daing sagkod na ngapit na ipinanuga nin Dios.

[Mga Nota sa Ibaba]

Nagigirumdoman daw Nindo?

◻ Taano ta kaipuhan an makosog na pagtubod?

◻ Paano ipinaheling ni Abraham na sia may makosog na pagtubod?

◻ Paano an pagdusay may kaibang mga pagbago sa buhay nin saro?

◻ Taano ta naoogma kitang maglingkod sa Dios sa ibong nin ano man na mga problemang tibaad atubangon niato?

[Mga ritrato sa pahina 7]

Si Abraham andam na gumibo nin darakulang pagbago sa saiyang buhay tanganing manahon an panuga

[Mga ritrato sa pahina 9]

Ipinaheheling kan ebidensia na nakua ni Jesus “an pagtubod sa daga” sa panahon kan saiyang presensia