Nagsunod sa Diyos si Abraham Asin Sara

Igwang sarong siyudad na bako man harayuon sa Babel. Inaapod iyan na Ur. An mga taga duman nagsasamba sa dakul na diyos imbes na ki Jehova sana. Pero igwang sarong lalaki sa Ur na si Jehova sana an sinasamba. Siya si Abraham.

Sinabi ni Jehova ki Abraham: ‘Bayaan mo an saimong harong saka an saimong mga paryente, tapos magduman ka sa lugar na ipapahiling ko saimo.’ Dangan nangako an Diyos: ‘Magigin sarong dakulang nasyon ka, asin bebendisyunan ko an dakul na tawo sa bilog na daga dahil saimo.’

Dai aram ni Abraham kun sain siya papadumanon ni Jehova, pero nagtiwala siya ki Jehova. Maiba man ki Abraham an saiyang agom na si Sara, an saiyang amang si Tera, asin an pamangkin niyang si Lot. Kaya nag-impake sinda, tapos pinunan na ninda an halawig na pagbaklay.

Kan makaabot si Abraham kaiba an pamilya niya sa lugar na itinukdo ni Jehova, 75 na an edad niya. Canaan an apod sa lugar na idto. Duman, nakipag-ulay ki Abraham an Diyos asin ipinangako ini: ‘An gabos na dagang ini na saimong nahihiling sa palibot mo itatao ko sa saimong mga aki.’ Pero gurang na si Abraham saka Sara tapos wara man sindang mga aki. Kaya paano magigibo ni Jehova an pangakong ini?