Si Abraham—Amigo nin Diyos

AN SARO sa mga lugar na pig-istaran nin mga tawo pagkatapos kan Baha iyo an Ur. Iyan nagin midbid na siyudad na may magagayon na harong. Pero an mga nakaistar diyan nagsasamba sa mga diyos-diyosan. Iyan man su piggibo ninda sa Babel. Bako sindang arog ni Noe asin kan aki niyang si Sem, na padagos na naglingkod ki Jehova.

Pakalihis nin 350 taon pagkatapos kan Baha, nagadan si Noe. Duwang taon an luminihis asin namundag an tawong nahihiling mo digdi, si Abraham. Siya espesyal na marhay sa Diyos. Nakaistar siya kaiba kan pamilya niya sa Ur.

Sarong aldaw, sinabi ni Jehova ki Abraham: ‘Bayaan mo an Ur asin an mga paryente mo, tapos magduman ka sa lugar na itutukdo ko saimo.’ Nagsunod daw si Abraham asin binayaan an komportableng buhay sa Ur? Iyo. Pirmi niyang pigsusunod an Diyos, kaya namidbid siya bilang amigo nin Diyos.

May mga kapamilya si Abraham na nag-iba saiya. Kaiba diyan an saiyang ama na si Tera saka an pamangkin niyang si Lot. Siyempre, kaiba man an agom niyang si Sara. Nakaabot sinda sa lugar na inaapod na Haran, asin duman nagadan si Tera. Harayo na sinda sa Ur.

Pagkatapos, naghali sa Haran si Abraham kaiba kan pamilya niya asin nakaabot sa lugar nin Canaan. Duman, sinabi ni Jehova: ‘Ini an dagang itatao ko sa mga aki mo.’ Sa Canaan, nag-istar si Abraham sa mga tolda.

Tinabangan nin Diyos si Abraham kaya nagkaigwa siya nin kadakul na karnero asin iba pang hayop saka ginatos na suruguon. Pero mayo sindang aki ni Sara.

Kan si Abraham 99 anyos na, sinabi ni Jehova: ‘Ipinapangako ko na magigin ama ka nin dakul na nasyon.’ Pero paano mangyayari ini mantang pareho nang gurangon si Abraham asin Sara para magkaaki?