Si Abraham Asin Sara—Puede Nindong Arogon an Saindang Pagtubod!

INAPOD sia na “ama kan gabos na igwa nin pagtubod.” (Roma 4:11) An saiyang namomotan na agom igwa man kan kualidad na iyan. (Hebreo 11:11) Sinda an diosnon na patriarkang si Abraham asin an saiyang debotong agom, si Sara. Taano ta sinda marahayon na mga halimbawa nin pagtubod? Ano an nagkapirang pagbalo na tinagalan ninda? Asin ano an halaga kan saindang estorya para sa sato?

Si Abraham nagpaheling nin pagtubod kan pagbotan sia nin Dios na bayaan an saiyang harong. Si Jehova nagsabi: “Humale ka sa saimong daga asin sa saimong mga paryente patin sa harong kan saimong ama pasiring sa daga na ipaheheling ko sa saimo.” (Genesis 12:1) An maimbod na patriarka nagkuyog, ta sinasabi sa sato: “Huli sa pagtubod si Abraham, kan sia apodon, nagkuyog sa pagluwas pasiring sa sarong lugar na nakatalagang akoon nia bilang mana; asin sia luminuwas, minsan ngani dai aram kun saen sia maduman.” (Hebreo 11:8) Estudyare an kalabot sa pagbalyong iyan.

Si Abraham nag-erok sa Ur, sa midbid ngonyan na timog na Iraq. An Ur kaidto sarong maoswag na sentro sa Mesopotamia na nakikipagnegosyo sa kadagaan sa Golpo Persiano asin posibleng sa Kababan nin Indus. Si Sir Leonard Woolley, na nagdirehir sa sistematikong pagkotkot sa Ur, nagsabi na kan kapanahonan ni Abraham an kadaklan na harong duman gibo sa ladrilyo, na may mga lanob na pinalitadahan asin pinintahan nin puti. Halimbawa, an harong nin sarong mayaman na siudadano sarong duwang eskalon na edipisyo na may pinalitadahan na patyo sa tahaw. An enot na eskalon para sa kasararo sa pamilya asin mga bisita. Sa sunod na eskalon, may balkonaheng gibo sa kahoy na nakapalibot sa lanob, na nagseserbing agihan pasiring sa mga kuarto na itinagamang gamiton kan pamilya. Mantang igwa iyan nin 10 sagkod 20 kuarto, an siring na mga residensia “medyo mahiwas asin nagtao nin disente, komportable asin, komporme sa mga pamantayan sa Sirangan, luhosong pamumuhay,” an sabi ni Woolley. Iyan “sa pangenot mga harong nin sibilisadong mga tawo asin pinapanigoan kaiyan an mga pangangaipo nin sarong maoswag nanggad na buhay sa siudad.” Kun binayaan ni Abraham asin Sara an siring na harong na yaon an posibilidad na mag-eerok sinda sa mga tolda, sinda naggibo nin dakulaon na mga pagsasakripisyo tanganing kuyogon si Jehova.

Si Abraham kaiba an saiyang pamilya enot na nagbalyo sa Haran, sarong siudad sa amihanan na Mesopotamia, dangan sa Canaan. Iyan mga 1,600 na kilometro an distansia​—bako nanggad suba-subang pagbalyo para sa may edad nang mag-agom! Kan maghale sa Haran, si Abraham 75 anyos asin si Sara 65.​—Genesis 12:4.

Ano daw an nagin saboot ni Sara kan ipaaram ni Abraham na mahale sinda sa Ur? Tibaad ikinahadit nia an paghale sa seguridad nin komportableng harong, an pagbalyo sa bakong pamilyar asin puedeng masakit na lugar, asin an pag-ako sa mas hababang klase nin pamumuhay. Minsan siring, si Sara mapagpasakop, na iniisip na si Abraham saiyang “kagurangnan.” (1 Pedro 3:​5, 6) Sinasabi nin nagkapirang intelektuwal na ini nagpaparisa nin “pinagkatodan na asin magalang na aktitud saka gawe-gawe [ni Sara] sa saiya,” na katunayan nin “tunay na ugale sa isip asin saboot.” Alagad orog sa gabos, si Sara nagtiwala ki Jehova. An saiyang pagpasakop asin pagtubod nagseserbing marahayon na halimbawa para sa Kristianang mga agom.

Totoo, dai hinahagad sa sato na bayaan an satong harong tanganing kuyogon an Dios, minsan ngani binayaan kan nagkapirang bilog na panahon na ebanghelisador an saindang dagang tinuboan tanganing ihulit an maogmang bareta sa ibang nasyon. Saen man kita naglilingkod sa Dios, sagkod na ineenot niato sa buhay an espirituwal na intereses, itatao nia an satong mga pangangaipo.​—Mateo 6:25-33.

Dai nagbasol si Sara ni si Abraham sa ginibo nindang desisyon. “Kun talagang pinaggirumdom ninda an lugar na iyan na saindang pinaghalean, may oportunidad kutana sindang magpuli,” an sabi ni apostol Pablo. Alagad dai sinda nagpuli. Huling may kompiansa na si Jehova “nagigin an parabalos sa mga maigot na naghahanap sa saiya,” nagtubod sinda sa saiyang mga panuga. Dapat na iyo man kita tanganing padagos kitang makatao nin bilog na kalag na debosyon ki Jehova.​—Hebreo 11:​6, 15, 16.

Espirituwal Asin Materyal na mga Kayamanan

Kan si Abraham makaabot sa Canaan, sinabi sa saiya nin Dios: “Itatao ko sa saimong banhi an dagang ini.” Si Abraham naghimate paagi sa pagtogdok nin altar para ki Jehova asin paagi sa pag-apod “sa ngaran ni Jehova.” (Genesis 12:​7, 8) Pinayaman ni Jehova si Abraham, asin kadakol kan nasa saiyang kampamento. Mantang sarong beses tinipon nia an 318 sinanay na tawohan, mga oripon na ipinangaki kan saiyang kasararo sa harong, isinuherir na “gabos-gabos siertong labi nanggad sa sangribo an nasa saiyang grupo.” Sa ano man na dahelan, ibinilang sia kan mga tawo na “sarong namamayo nin Dios.”​—Genesis 13:2; 14:14; 23:6.

Si Abraham an nangenot sa pagsamba, na tinotokdoan an mga kabilang sa saiyang harong na “magdanay sa dalan ni Jehova na gumibo nin katanosan asin paghusgar.” (Genesis 18:19) An Kristianong mga payo nin pamilya sa presenteng panahon puedeng makakua nin pamparigon sa boot sa halimbawa ni Abraham bilang sarong tawong nagin mapanggana sa pagtotokdo sa mga miembro kan saiyang harong na manarig ki Jehova asin gumawe sa matanos na paagi. Kun siring bakong makangangalas na an Egipciong surogoon ni Sara na si Agar, an pinakamatuang surugoon kan patriarka, asin an aki ni Abraham na si Isaac nagsarig ki Jehova Dios.​—Genesis 16:​5, 13; 24:10-14; 25:21.

Gusto ni Abraham nin Katoninongan

Ihinahayag kan mga pangyayari sa buhay ni Abraham na si Abraham may diosnon na personalidad. Imbes na togotan na magpadagos an iriwal kan mga pastor nia asin kan mga pastor kan saiyang sobrinong si Lot, isinuherir ni Abraham na pagsiblagon an saindang mga kampamento asin an mas hoben na lalaking si Lot an pinapili kan gusto niang daga. Si Abraham sarong parapatoninong.​—Genesis 13:5-13.

Kun kaipuhan man kitang pumili kun baga iiinsistir an satong mga deretso o mapahunod tanganing ingatan an katoninongan, puede niatong mangnohon na dai pinabayaan ni Jehova na mawaran si Abraham huli ta sia nagpaheling nin konsiderasyon ki Lot. Al kontraryo, pakatapos kaiyan ipinanuga nin Dios ki Abraham asin sa saiyang banhi an bilog na daga na naheheling ni Abraham sa gabos na direksion. (Genesis 13:14-17) “Maogma an mga mapagpatoninong [“parapatoninong,” nota sa ibaba],” an sabi ni Jesus, “ta sinda aapodon na ‘mga aki nin Dios.’”​—Mateo 5:9.

Siisay an Magigin Paramana ni Abraham?

Apisar kan mga panuga dapit sa sarong banhi, si Sara nagdanay na baog. Ipinakipag-olay ni Abraham an bagay na iyan sa Dios. An lingkod daw nia na si Eliezer an magmamana kan gabos na nasasadirihan nia? Dai, ta si Jehova nagsabi: “An tawong ini dai masalihid sa saimo bilang paramana, kundi saro na mahale sa saimong nasa laog na mga kabtang an masalihid sa saimo bilang paramana.”​—Genesis 15:1-4.

Sa ibong kaiyan mayo pa sindang aki, asin an 75 anyos na si Sara nawaran na nin paglaom na mangaki. Huli kaini, sinabi nia ki Abraham: “Sinerahan ako ni Jehova sa pangangaki. Tabi, makidorog ka sa sakong surogoon. Tibaad magkakaigwa ako nin mga aki hale sa saiya.” Dangan kinua ni Abraham si Agar bilang sekondaryong agom na babae, dinorogan sia, asin nagbados ini. Kan maaraman ni Agar na sia bados, nagpoon nang magin maraot an pagheling nia sa saiyang babaeng kinakagurangnan. Si Sara may kapaitan nin boot na nagreklamo ki Abraham asin sinupog si Agar, na nagin dahelan na dumulag an surogoon.​—Genesis 16:1-6.

Si Abraham asin Sara naghona na tama an saindang ginibo, na an ginibo ninda kaoyon kan akseptadong kaugalean kan kaaldawan ninda. Minsan siring, bako iyan an paagi ni Jehova sa pagpaluwas sa banhi ni Abraham. Tibaad idikta kan satong kultura na an nagkapirang ginigibo niato tama segun sa laen-laen na kamugtakan, alagad dai ini pirmeng nangangahulogan na minaoyon si Jehova. An saiyang punto de vista sa satong situwasyon tibaad laen nanggad. Huli kaini, kaipuhan niatong hagadon an paggiya nin Dios, na ipinapamibi na logod iparisa nia an paagi na gusto niang gibohon niato.​—Salmo 25:​4, 5; 143:​8, 10.

Mayo nin “Ekstraordinaryong Marhay Para ki Jehova”

Pag-abot nin panahon, si Agar nagkaigwa nin aki ki Abraham na an ngaran Ismael. Pero bako sia an ipinanugang Banhi. Si Sara mismo an mapangaki kan paramanang iyan, sa ibong kan saiyang halangkaw nang edad.​—Genesis 17:​15, 16.

Kan espesipikong sabihon nin Dios na si Sara magkakaaki nin aking lalaki sa saiyang agom, “si Abraham luminaob asin nagpoon na magngisi asin magsabi sa saiyang puso: ‘An sarong lalaki daw na sanggatos anyos magkakaigwa pa nin aki na imumundag, asin si Sara daw, iyo, an sarong babae daw na nobenta anyos mangangaki pa?’” (Genesis 17:17) Kan otrohon kan sarong anghel an mensahe na nadadangog ni Sara, sia ‘nagngisi sa boot nia.’ Alagad mayo nin “ekstraordinaryong marhay para ki Jehova.” Makakatubod kita na puede niang gibohon an ano man na booton nia.​—Genesis 18:12-14.

“Paagi sa pagtubod [na] si Sara mismo nag-ako kan kapangyarihan na mangidam nin banhi, minsan ngani sia lihis na sa edad, mantang saiyang ibinilang na maimbod idtong nanuga.” (Hebreo 11:11) Pag-abot nin panahon, ipinangaki ni Sara si Isaac, na an ngaran nangangahulogan “Pagngisi.”

Pagtiwala nin Lubos sa mga Panuga nin Dios

Sinabi ni Jehova na si Isaac iyo an haloy nang hinahalat na paramana. (Genesis 21:12) Kaya siertong namungnan si Abraham kan hinagad sa saiya nin Dios na iatang an saiyang aki. Pero, si Abraham may marahay na mga dahelan na magtiwala nin lubos sa Dios. Bako daw na kayang buhayon liwat ni Jehova hale sa mga gadan si Isaac? (Hebreo 11:17-19) Bako daw na pinatunayan na ngani nin Dios an saiyang kapangyarihan paagi sa milagrosong pagbalik kan kakayahan sa pangangaki ni Abraham asin Sara tanganing ikapangaki si Isaac? Huling kombensido sa kakayahan nin Dios na otobon an Saiyang mga panuga, si Abraham andam na kumuyog. Totoo, inolang sia sa aktuwal na paggadan sa saiyang aki. (Genesis 22:1-14) Minsan siring, an kabtang ni Abraham digdi nagtatabang sa sato na masabotan na siertong nagin depisil nanggad para ki Jehova Dios na ‘itao an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.’​—Juan 3:16; Mateo 20:28.

Huli sa pagtubod sa Dios nagin malinaw ki Abraham na an paramana sa mga panuga ni Jehova dai puedeng mag-agom nin falsong parasamba na taga Canaan. Paanong ooyonan nin diosnon na magurang an pag-agom kan saiyang aki sa siisay man na dai naglilingkod ki Jehova? Sa siring si Abraham naghanap nin angay na agom para ki Isaac sa tahaw kan saiyang mga paryente sa Mesopotamia, labing 800 kilometros an rayo. Binendisyonan nin Dios an paghihingoang iyan paagi sa pag-indikar na si Rebeca an babae na pinili nia na magin nobya ni Isaac asin apoon kan Mesiyas. Iyo, “binendisyonan ni Jehova si Abraham sa gabos na bagay.”​—Genesis 24:1-67; Mateo 1:​1, 2.

Mga Bendisyon Para sa Gabos na Nasyon

Si Abraham asin Sara arogan sa pagtagal sa mga pagbalo asin sa pagtubod sa mga panuga nin Dios. An kaotoban kan siring na mga panuga may labot sa daing sagkod na mga oportunidad kan katawohan, huli ta inasegurar ni Jehova si Abraham: “Paagi sa saimong banhi an gabos na nasyon sa daga magbebendisyon nanggad kan saindang sadiri huli sa bagay na ika naghinanyog sa sakong tingog.”​—Genesis 22:18.

Siempre, si Abraham asin Sara bakong sangkap, na kapareho ta man. Minsan siring, kan magin malinaw para sa sainda an kabotan nin Dios, tolos-tolos nindang sinunod iyan​—ano pa man an kalabot na sakripisyo. Sa siring si Abraham ginigirumdom bilang “katood ni Jehova” asin si Sara bilang ‘banal na babae na naglalaom sa Dios.’ (Santiago 2:23; 1 Pedro 3:5) Paagi sa pagmamaigot na arogon an pagtubod ni Abraham asin Sara, puede man niatong kamtan an mahal na marhay na kadayupotan sa Dios. Makikinabang man kita sa mahalagang marhay na mga panuga ni Jehova ki Abraham.​—Genesis 17:7.

[Ritrato sa pahina 26]

Huli sa saindang pagtubod, binendisyonan ni Jehova si Abraham asin Sara nin sarong aking lalaki sa saindang kagurangan

[Ritrato sa pahina 28]

An halimbawa ni Abraham nagtatabang sa sato na masabotan kun paano naapektaran si Jehova sa pagtogot na magadan an saiyang bugtong na Aki