‘Paglakaw Paagi sa Pagtubod, Bakong Paagi sa Pakaheling’

“Kita naglalakaw paagi sa pagtubod, bakong paagi sa pakaheling.”—2 CORINTO 5:7.

1. Ano an boot sabihon kan ‘paglakaw paagi sa pagtubod’?

SA KADA pamimibi niato kaoyon sa mga paggiya na yaon sa Tataramon nin Dios, ipinaheheling niato na kita dawa paano igwa nin pagtubod. Kun kita nagpapatotoo sa iba manongod sa Kahadean nin Dios, ini nagpapaheling man nin pagtubod. Asin kun idinudusay niato an satong buhay ki Jehova, kita nagtatao nin ebidensia na mawot niatong ‘maglakaw paagi sa pagtubod,’ na an boot sabihon, pagmamaigot na mamuhay sono sa pagtubod.​—2 Corinto 5:7; Colosas 1:​9, 10.

2. Taano an partisipasyon sa mga aktibidad kan kongregasyon ta bako man pirmeng prueba na an saro igwa nin pagtubod?

² Kun kita tunay na mamumuhay sa siring na paagi, kaipuhan niato an pagtubod na may marigon na basehan. (Hebreo 11:​1, 6) An dakol na tawo naaakit sa Mga Saksi ni Jehova huli sa halangkaw na mga pamantayan sa moral asin sa pagkamoot na naheheling ninda sa tahaw kan mga Saksi. Iyan sarong marahay na pagpoon, alagad iyan dai nangangahulogan na an siring na mga tawo igwa nin pagtubod. An iba tibaad igwa nin agom o magurang na may makosog na pagtubod, asin sinda tibaad nakikikabtang sa nagkapira sa mga aktibidad kan saindang namomotan na iyan. An pagkaigwa nin siring na impluwensia sa laog nin harong bendisyon nanggad, alagad ini man bakong kasalihid nin personal na pagkamoot sa Dios asin personal na pagtubod.​—Lucas 10:​27, 28.

3. (a) Tanganing kita magkaigwa nin pagtubod na may marigon na basehan, ano an dapat na magin personal na kombiksion niato mapadapit sa Biblia? (b) Taano an ibang mga tawo ta mas pasil na makombensir sa pagigin ipinasabong kan Biblia kisa sa iba?

³ An tunay na nagraralakaw paagi sa pagtubod lubos na kombensido na an Biblia iyo an Tataramon nin Dios. Igwa nin kadakoldakol na ebidensia na an Banal na Kasuratan tunay na “ipinasabong nin Dios.”a (2 Timoteo 3:16) Gurano kadakol kan ebidensiang ini an kaipuhan na siyasaton antes na makombensir an sarong tawo? Iyan tibaad depende sa saiyang pinaghalean. An biyong nakakokombensir sa sarong tawo tibaad dai makadagka sa iba. Sa nagkapirang kaso, minsan ngani an sarong tawo pahelingan nin kadakol na dai mapahihimutikan na ebidensia, tibaad sayumahan nia man giraray an lohikong konklusyon. Taano daw? Huli sa mga kamawotan na nakatago sa kairairaromi kan saiyang puso. (Jeremias 17:9) Sa siring, minsan ngani an sarong tawo tibaad maghingakong interesado sa katuyohan nin Dios, an saiyang puso tibaad maghimuyawot na kamtan an pag-oyon kan kinaban. Tibaad habo niang haleon an sarong paagi nin pamumuhay na kontra sa mga pamantayan kan Biblia. Minsan siring, kun an sarong tawo tunay na nagugutom sa katotoohan, kun sia sadiosan sa saiyang sadiri, asin kun sia mapakumbaba, marerealisar nia pag-abot nin panahon na an Biblia iyo an Tataramon nin Dios.

4. Ano an kahagadan sa sarong indibiduwal tanganing magkaigwa nin pagtubod?

⁴ Sa parate sa laog sana nin pirang bulan, an mga tawo na tinatabangan sa pag-adal sa Biblia nakasasabot na igo na an naheling nindang prueba na iyan an Tataramon nin Dios. Kun ini nagpapahiro sa sainda na buksan an saindang puso tanganing matokdoan ni Jehova, dangan an saindang kairairaroming mga kaisipan, an saindang mga pagmawot, asin an saindang mga motibasyon luway-luway na mamomolde kan saindang nanonodan. (Salmo 143:10) An Roma 10:​10 nagsasabi na “paagi sa puso” an sarong tawo naggigibo nin pagtubod. Ipinahahayag kan siring na pagtubod kun ano talaga an namamatean kan indibiduwal, asin iyan malinaw na maririsa sa saiyang pamumuhay.

Si Noe Huminiro Sono sa Pagtubod na May Marigon na Basehan

5, 6. Sa ano nakabasar an pagtubod ni Noe?

⁵ Si Noe tawong an pagtubod may marigon na basehan. (Hebreo 11:7) Ano an basehan nia kaiyan? Si Noe igwa kan tataramon nin Dios, bakong sa nasusurat na porma, kundi itinaram sa saiya. An Genesis 6:​13 nagsasabi: “An Dios nagsabi ki Noe: ‘Nagdatong na para sa sako an katapusan kan gabos na laman, huli ta an daga pano nin kadahasan huli sa sainda.’” Pinagbotan ni Jehova si Noe na magtogdok nin dahong asin nagtao nin mga detalye manongod sa paggibo kaiyan. Dangan idinugang nin Dios: “Kun para sa sako, uya dadarahon ko sa daga an baha tanganing laglagon an gabos na laman na dian aktibo an puersa nin buhay sa sirong nin kalangitan. An gabos na nasa daga magagadan.”​—Genesis 6:​14-​17.

⁶ Nag-oran na daw bago kaini? Dai sinasabi kan Biblia. An Genesis 2:​5 nagsasabi: ‘Dai pa pinaooran ni Jehova Dios.’ Alagad ini an pagkapahayag ni Moises, na nabuhay pakalihis nin dakol na siglo, sa pagpaliwanag bakong kan aldaw ni Noe kundi kan halawig na panahon bago kaiyan. Arog kan ipinaheheling sa Genesis 7:​4, si Jehova nagtaram dapit sa oran kan nakikipag-olay ki Noe, asin minalataw na nasabotan ni Noe an boot niang sabihon. Pero, an pagtubod ni Noe bakong sa saiyang naheheling. Si apostol Pablo nagsurat na si Noe ‘tinawan nin patanid nin Dios dapit sa mga bagay na dai pa naheheling.’ Sinabihan nin Dios si Noe na dadarahon Nia sa daga “an baha,” o “dagat nin langit,” siring sa pagkasabi sa nota sa ibaba kan New World Translation sa Genesis 6:17. Sagkod sa panahon na idto, an siring na bagay dai pa noarin man nangyari. Alagad an gabos na linalang na naheheling ni Noe nagserbing hayag na pagpapaheling na kayang gibohon nin Dios an siring na mapanlaglag na delubyo. Napahiro nin pagtubod, itinogdok ni Noe an dahong.

7. (a) Ano an dai kaipuhan ni Noe tanganing magibo an ipinagboot nin Dios sa saiya? (b) Paano kita nakinabang sa paghorophorop kan pagtubod ni Noe, asin paano puedeng magin bendisyon sa iba an satong pagtubod?

⁷ Si Noe dai tinawan nin Dios nin petsa kun noarin mapoon an Delubyo. Alagad iyan dai ginibong sarahotan ni Noe sa pagkaigwa nin aktitud na halaton na sana an mangyayari, na ginigibong segunda na sana sa saiyang buhay an pagtogdok nin dahong asin paghuhulit. Sa igong panahon, sinabi nin Dios ki Noe kun noarin malaog sa dahong. Mientras tanto, “ginibo ni Noe an sono sa gabos na ipinagboot sa saiya nin Dios. Siring nanggad an ginibo nia.” (Genesis 6:22) Si Noe naglakaw paagi sa pagtubod, bakong paagi sa pakaheling. Kanigoan an satong pagpasalamat na ginibo nia iyan! Huli sa saiyang pagtubod, kita buhay ngonyan. Sa sato man na kaso, an pagtubod na ipinaheheling niato puedeng magkaigwa nin hararom na epekto sa ngapit bako sanang para sa sato kundi siring man kan satong mga aki asin kan ibang tawo sa palibot niato.

An Pagtubod ni Abraham

8, 9. (a) Sa ano ibinasar ni Abraham an saiyang pagtubod? (b) Sa anong paagi si Jehova “nagpaheling” ki Abraham?

⁸ Estudyare an saro pang halimbawa​—an halimbawa ni Abraham. (Hebreo 11:​8-10) Sa ano ibinasar ni Abraham an saiyang pagtubod? An mga kamugtakan na dinakulaan nia sa Ur kan mga Caldeo idolatroso asin materyalistiko. Alagad may iba pang impluwensia na nagmolde sa punto de vista ni Abraham. Daing duwa-duwa na nakakaasosyar nia an aking lalaki ni Noe na si Sem, na nagin katemporanyo nia sa laog nin 150 taon. Si Abraham nakombensir na si Jehova an “Kaharohalangkaweng Dios, Kaggibo kan langit asin daga.”​—Genesis 14:22.

⁹ Igwa pa nin sarong bagay na nakaimpluwensia nin hararom ki Abraham. Si Jehova “nagpaheling [ki] Abraham kan sia yaon sa Mesopotamia, bago sia nag-istar sa Haran, asin sinabi nia sa saiya, ‘Lumuwas ka hale sa saimong daga asin hale sa saimong mga paryente patin paduman ka sa daga na ipaheheling ko sa saimo.’” (Gibo 7:​2, 3) Sa anong paagi “nagpaheling” si Jehova ki Abraham? Dai naheling nin direkta ni Abraham an Dios. (Exodo 33:20) Minsan siring, posibleng si Jehova nagpaheling ki Abraham sa sarong pangatorogan, paagi sa lihis sa natural na pagpaheling kan kamurawayan, o paagi sa mensaherong anghel, o representante. (Ikomparar an Genesis 18:​1-3; 28:10-​15; Levitico 9:​4, 6, 23, 24.) Ano man an paaging ginamit ni Jehova sa pagpaheling ki Abraham, an fiel na lalaking iyan may pagsarig na an Dios nagbubugtak nin sarong mahalagang marhay na pribilehio sa atubangan nia. Si Abraham huminiro oyon sa pagtubod.

10. Paano pinasarig ni Jehova an pagtubod ni Abraham?

¹⁰ An pagtubod ni Abraham dai nagdepende sa saiyang pagkaigwa nin mga detalye manongod sa daga na pinadudumanan sa saiya nin Dios. Iyan dai nagdepende sa saiyang pakaaram kun noarin itatao sa saiya an dagang iyan. Sia igwa nin pagtubod huli ta midbid nia si Jehova bilang an Dios na Makakamhan sa gabos. (Exodo 6:3) Sinabi ni Jehova ki Abraham na sia magkakaigwa nin mga aki, alagad may mga panahon na nag-iisip-isip si Abraham kun paano iyan mangyayari. Sia naggugurang na. (Genesis 15:​3, 4) Pinakosog ni Jehova an pagtubod ni Abraham paagi sa pagsabi sa saiya na tingagon an mga bitoon saka bilangon an mga iyan kun kaya nia. “Magigin siring an saimong banhi,” an sabi nin Dios. Si Abraham napahiro nanggad. Malinaw na an Kaglalang kan nakapupukaw nin hararom na paggalang na mga bagay na idto sa kalangitan kayang otobon an saiyang ipinanuga. Si Abraham “tuminubod ki Jehova.” (Genesis 15:​5, 6) Si Abraham dai nagtubod huli sana ta gusto nia an saiyang nadadangog; sia igwa nin pagtubod na may marigon na basehan.

11. (a) Mantang magsasanggatos na an edad nia, ano an nagin reaksion ni Abraham sa panuga nin Dios na an maedad nang si Sara mangangaki nin sarong aking lalaki? (b) Paagi sa anong klaseng pagtubod na inatubang ni Abraham an pagbalo na kalabot sa pagdara sa saiyang aking lalaki sa Bukid nin Moria tanganing idolot sia bilang atang?

¹¹ Kan magsasanggatos anyos na si Abraham asin an saiyang agom, si Sara, magnonobenta anyos na, inotro ni Jehova an saiyang panuga na magkakaigwa nin sarong aking lalaki si Abraham asin na si Sara an magigin ina. Realistikong inisip-isip ni Abraham an saindang situwasyon. “Alagad huli sa panuga nin Dios dai sia nagduwaduwa huli sa kakulangan nin pagtubod, kundi nagin makosog huli sa saiyang pagtubod, na nagpapamuraway sa Dios asin biyong kombensido na an saiyang ipinanuga kaya man niang gibohon.” (Roma 4:​19-21) Aram ni Abraham na an panuga nin Dios dai puedeng masudya. Huli sa saiyang pagtubod, kan huri si Abraham nagkuyog kan sinabihan sia nin Dios na darahon an saiyang aking lalaki na si Isaac sa daga nin Moria asin idolot sia bilang atang. (Genesis 22:​1-​12) Bilog an pagsarig ni Abraham na an Dios na nagpangyaring mamundag an aking lalaki na iyan sa milagrosong paagi kaya man na buhayon sia liwat tanganing otobon an iba pang mga panuga na ginibo Nia may koneksion sa saiya.​—Hebreo 11:​17-19.

12. Gurano kalawig na si Abraham padagos na naglakaw paagi sa pagtubod, asin anong balos an naghahalat sa saiya asin sa mga miembro kan saiyang pamilya na nagpaheling nin makosog na pagtubod?

¹² Ipinaheling ni Abraham na sia ginigiyahan nin pagtubod bako sanang sa nagkapirang kamugtakan kundi sa bilog niang buhay. Sa bilog na buhay nia, si Abraham dai nag-ako hale sa Dios nin arin man na kabtang kan Dagang Panuga bilang mana. (Gibo 7:5) Pero, si Abraham dai nanluya asin nagbalik sa Ur kan mga Caldeo. Sa laog nin 100 na taon, sagkod na sia magadan, sia nag-erok sa mga tolda sa daga na pinadumanan sa saiya nin Dios. (Genesis 25:7) Mapadapit sa saiya asin sa saiyang agom na si Sara, sa saindang aki na si Isaac, asin sa saindang makoapo na si Jacob, an Hebreo 11:16 nagsasabi: “Dai sinda ikinasosopog nin Dios, na apodon bilang saindang Dios, huli ta nag-andam sia nin sarong siudad para sa sainda.” Iyo, si Jehova nagtagama nin lugar para sa sainda sa daganon na rona kan saiyang Mesiyanikong Kahadean.

13. Sairisay sa tahaw kan mga lingkod ni Jehova ngonyan an nagtatao nin ebidensia na igwa nin pagtubod na arog kan ki Abraham?

¹³ Sa tahaw kan mga lingkod ni Jehova ngonyan igwa nin mga kapareho ni Abraham. Dakol na taon na sindang naglalakaw paagi sa pagtubod. Huli sa kosog na itinatao nin Dios, napangganahan ninda an garo bukid na mga olang. (Mateo 17:20) Dai sinda nag-uurong-sulong sa pagtubod huli ta dai ninda aram kun noarin man nanggad itatao sa sainda nin Dios an mana na ipinanuga nia. Aram ninda na an tataramon ni Jehova dai puedeng masudya, asin ibinibilang ninda na daing kaagid sa halaga na pribilehio na mapabilang sa saiyang mga Saksi. Iyan daw an saindong saboot?

An Pagtubod na Nagpahiro ki Moises

14. Paano pinonan an pundasyon kan pagtubod ni Moises?

¹⁴ An saro pang halimbawa nin pagtubod iyo si Moises. Ano an pundasyon kan saiyang pagtubod? Iyan nagpoon sa pagkaomboy. Minsan ngani an aking babae ni Faraon nanompongan si Moises sa sarong lalagan na papiro sa Salog nin Nilo asin kinua sia na magin saiyang aki, an mismong inang Hebreo ni Moises, si Jocabed, an nag-aling sa aking lalaki asin inataman nia sia durante kan enot niang mga taon. Minalataw na tinokdoan siang marhay ni Jocabed, na itinatadom an pagkamoot ki Jehova asin an apresasyon sa Saiyang mga panuga ki Abraham. Kan huri, bilang miembro kan pamilya ni Faraon, si Moises “tinokdoan kan gabos na kadonongan nin mga Egipcio.” (Gibo 7:​20-22; Exodo 2:​1-​10; 6:​20; Hebreo 11:23) Minsan siring, sa ibong kan may pabor na kamugtakan ni Moises, an saiyang puso nasa inooripon na banwaan nin Dios.

15. Nangahulogan nin ano para ki Moises an pagpamidbid kan saiyang sadiri na kabilang sa banwaan ni Jehova?

¹⁵ Kan sia 40 anyos na, ginadan ni Moises an sarong Egipcio tanganing iligtas an sarong Israelita na minamaltrato. Ipinaheheling kan pangyayaring ini kun ano an pagmansay ni Moises sa banwaan nin Dios. Tunay nanggad, “huli sa pagtubod si Moises, kan dakula na, nagsayuma na apodon na aki kan aking babae ni Faraon.” Imbes na mangapot sa “dai nagdadanay na pag-ogma sa kasalan” bilang miembro kan palasyo sa Egipto, sia napahiro nin pagtubod na ipamidbid an sadiri na kabilang sa inaaping banwaan nin Dios.​—Hebreo 11:​24, 25; Gibo 7:​23-​25.

16. (a) Anong sugo an itinao ni Jehova ki Moises, asin paano sia tinabangan nin Dios? (b) Sa paggibo kan sugo sa saiya, paano nagpaheling nin pagtubod si Moises?

¹⁶ Gustong-gusto ni Moises na humiro tanganing paginhawahon an saiyang banwaan, alagad an panahon nin Dios sa pagligtas sa sainda dai pa nag-abot. Kinaipuhan ni Moises na magdulag sa Egipto. Pakalihis sana nin mga 40 taon na isinugo ni Jehova si Moises paagi sa sarong anghel na magbalik sa Egipto tanganing pangenotan paluwas sa nasyon na iyan an mga Israelita. (Exodo 3:​2-10) Ano an nagin reaksion ni Moises? Dai sia nagpaheling nin pagduwaduwa sa abilidad ni Jehova na iligtas an Israel, alagad nagsaboot sia na kulang sia nin kakayahan para sa kabtang na itinao sa saiya nin Dios. Sa mamomoton na paagi, si Jehova nagtao kan pamparigon sa boot na kaipuhan ni Moises. (Exodo 3:11–4:​17) An pagtubod ni Moises kuminosog. Sia nagbalik sa Egipto asin paorootrong pinatanidan si Faraon nin hampangan manongod sa mga damat na maabot sa Egipto huli sa pagsayuma kan namamahalang iyan na paluwason an Israel tanganing sumamba ki Jehova. Si Moises mayong personal na kapangyarihan na papangyarihon an mga damat na idto. Sia naglakaw paagi sa pagtubod, bakong paagi sa pakaheling. An saiyang pagtubod yaon ki Jehova asin sa saiyang tataramon. Si Moises hinuma ni Faraon. Alagad si Moises nagpadagos. “Huli sa pagtubod sia naghale sa Egipto, alagad dai sia natatakot sa kaanggotan kan hade, huli ta sia nagpadagos na marigon na garo baga nakaheheling kan Saro na dai naheheling.” (Hebreo 11:27) Si Moises bakong sangkap. Sia nasasala. (Bilang 20:​7-12) Minsan siring, kan isugo nin Dios, an pamumuhay nia sa kabilogan giniyahan nin pagtubod.

17. An paglakaw paagi sa pagtubod nagbunga nin ano para ki Noe, Abraham, asin Moises, dawa ngani nagadan sinda na dai naheling an bagong kinaban nin Dios?

¹⁷ An pagtubod logod nindo magin arog kan ki Noe, Abraham, asin Moises. Totoo na dai ninda naheling an bagong kinaban nin Dios sa saindang kaaldawan. (Hebreo 11:39) Dai pa kaidto nag-abot an itinalaan na panahon nin Dios; igwa pa nin ibang mga aspekto kan saiyang katuyohan na kaipuhan na gibohon. Pero, an saindang pagtubod sa tataramon nin Dios dai nanluya, asin an saindang ngaran nasa libro nin buhay nin Dios.

18. Para sa mga inapod sa langitnon na buhay, taano ta kinakaipuhan na maglakaw paagi sa pagtubod?

¹⁸ “An Dios patienot na nakaheling nin sarong bagay na mas marahay para sa sato,” an isinurat ni apostol Pablo. An boot sabihon, patienot na naheling nin Dios an sarong bagay na mas marahay para sa mga, arog ni Pablo, inapod pasiring sa langitnon na buhay kaiba ni Cristo. (Hebreo 11:40) An mga ini an partikularmenteng nasa isip ni Pablo kan isurat nia an mga tataramon na nakarekord sa 2 Corinto 5:​7: “Kita naglalakaw paagi sa pagtubod, bakong paagi sa pakaheling.” Kan panahon na isurat iyan, mayo pa sa sainda an nagkamit kan saindang langitnon na balos. Iyan dai ninda naheling paagi sa saindang pisikal na mga mata, alagad an saindang pagtubod dian may marigon na basehan. Si Cristo binuhay na hale sa mga gadan, an enot na bunga kan mga bebendisyonan nin langitnon na buhay. Asin labing 500 na saksi an nakaheling sa saiya bago sia nagsakat sa langit. (1 Corinto 15:​3-8) Sinda igwa nin bastanteng rason na giyahan an bilog nindang buhay kan pagtubod na iyan. Kita igwa man nin marahay na rason sa paglakaw paagi sa pagtubod.

19. Siring sa ipinaheheling sa Hebreo 1:​1, 2, paagi kiisay nagtaram sa sato an Dios?

¹⁹ Ngonyan, si Jehova dai nagtataram sa saiyang banwaan paagi sa sarong anghel, siring sa ginibo nia ki Moises sa naglalaad na palongpong. An Dios nagtaram paagi sa saiyang Aki. (Hebreo 1:​1, 2) An sinabi nin Dios paagi sa saiya, ipinarekord Nia sa Biblia, na trinadusir sa mga lenguahe kan mga tawo sa bilog na kinaban.

20. Paano nagin mas paborable an satong situwasyon kisa kan ki Noe, Abraham, asin Moises?

²⁰ An yaon sa sato labi kisa kan yaon kaidto ki Noe, Abraham, asin Moises. Yaon sa sato an kompletong Tataramon nin Dios​—na an kadaklan kaiyan naotob na. Huli sa gabos na sinasabi kan Biblia manongod sa mga lalaki asin babae na pinatunayan an saindang sadiri na fiel na mga saksi ni Jehova sa atubangan kan gabos na klase nin pagbalo, an Hebreo 12:1 nagsasadol: “Pabayaan ta man an gabos na kagabatan asin an kasalan na pasil sanang nakagagapos sa sato, asin dumalagan kita na may pakatagal sa paorumbasan na nasa atubangan ta.” An satong pagtubod bakong sarong bagay na puedeng palimanlimanan. “An kasalan na pasil sanang nakagagapos sa sato” iyo an kadaihan nin pagtubod. Kaipuhan an maigot na pakikilaban tanganing kita padagos na ‘maglakaw paagi sa pagtubod.’

[Nota sa Ibaba]

Ano an Saindong Komento?

◻ Ano an kalabot sa ‘paglakaw paagi sa pagtubod’?

◻ Paano kita makikinabang sa paagi nin pagpaheling nin pagtubod ni Noe?

◻ Paano nakatatabang sa sato an paagi nin paggibo nin pagtubod ni Abraham?

◻ Taano an Biblia ta nagtotokdo ki Moises bilang halimbawa nin pagtubod?

[Retrato sa pahina 10]

Si Abraham naglakaw paagi sa pagtubod

[Retrato sa pahina 10]

Si Moises asin Aaron nagpaheling nin pagtubod kan nasa atubangan ni Faraon