Saen Kamo Makanonompong nin Masasarigan na Paggiya?
“ARAM kong gayo, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad. Tanosan ako, O Jehova.”—Jeremias 10:23, 24.
An parasurat sa Biblia na si Jeremias isinurat an mga tataramon na iyan mga 25 taon na an nakaagi. An makamomondong kamugtakan nin katawohan pakalihis nin rinibong taon na pag-aplikar kan paggiya nin tawo nagpapatunay kan dai maninigaran na katotoohan kan mga tataramon na ini. Pero puwedeng maghapot kamo, ‘Saen manonompongan an masasarigan na paggiya?’
An kinotar na teksto sa itaas nagtotokdo sa sarong gikanan nin masasarigan na paggiya asin direksion na halangkaw na gayo sa tawo—an Kaglalang nin tawo, si Jehova Dios. Siertong mayo ni saro na mas nakakaaram kan pagkahaman sa tawo asin kan saiyang mga pangangaipo kisa sa satong Kaglalang. Minsan siring, interesado daw an Dios sa pagtao sa sato nin siring na paggiya asin direksion? Paano nia iyan ginigibo? Praktikal daw iyan sa satong mga panahon?
Hinaman Tanganing Umako kan Paggiya nin Dios
Aram na gayo na an sarong pangenot na pagkakalaen kan tawo sa mga hayop nakasentro sa estruktura, kakayahan, asin mga pagpunsionar kan hotok nin tawo. Sa mga hayop an haros gabos na pagpunsionar kan hotok nakaprograma na sa inapod na kanaturalan na kadonongan. Bakong arog kaini sa mga tawo.—Talinhaga 30:24-28.
Bakong siring sa hotok nin mga hayop, an dakulang kabtang kan hotok nin tawo mayong permanenteng mga programa. Tinawan nin Dios an mga tawo nin kakayahan na libreng kabotan, na pinangyayari sinda na gumibo nin intelihenteng mga desisyon asin ipaheling an halangkaw na mga kuwalidad, siring baga kan pagkamoot, pagkamatinao, pagigin bakong paslo, hustisya, asin kadonongan.
Makatanosan daw na isipon na an Dios lalalangon an tawo na may siring na mental na kakayahan na mayong itinataong paggiya kun paano an pinakamarahay na paggamit kaiyan? Nagtao an Dios nin direktang paggiya sa enot na mga tawo. (Genesis 2:15-17, 19; 3:8, 9) Dawa kan magkasala na an tawo, padagos na giniyahan ni Jehova an maimbod na mga lalaki asin babae, orog na paagi sa saiyang sadiring ipinasabong na Tataramon, an Biblia. (Salmo 119:105) Nagtogot ini sa mga tawo na atubangon na may kapangganahan an pan-aroaldaw na mga problema sa buhay mantang madonong nindang ginagamit an saindang libreng kabotan.
Dios an Autor kan Biblia
Ano an minagibo sa Biblia na masasarigan na gikanan nin paggiya? Enot, itinatao kaiyan an impormasyon na solamenteng an Kaglalang an makatatao. Itinatao kaiyan an historya kan mga nangyari haloy pa bago an kapinonan kan buhay nin tawo. Halimbawa, itinatao kaiyan an historya kun paano inandam an daga sa sunod-sunod na tangga sagkod na iyan nagin angay na susteniran an buhay nin tawo. (Genesis, kapitulo 1, 2) Minsan ngani isinurat ini sa Biblia labing 3,000 na taon na an nakaagi, iyan kaoyon kan modernong sientipikong mga ideya.
Haloy pa bago an katawohan sa kabilogan akoon na bilog an daga, ipinahayag kan Biblia: “[An Dios] inuunat an amihanan sa mayong laog na lugar, na ibinibitin an daga sa mayo.” (Job 26:7) Saro pa, ipinahahayag kan Biblia na “igwa nin Saro na nag-eerok sa ibabaw kan katalidongan kan daga, na an mga nag-eerok dian garo mga lukton.” (Isaias 40:22) Solamente an Dios, an Kaglalang, an makatatao kan detalyeng ini.
An abilidad na patienot na maheling an ngapit bakong sarong balaog na itinao sa tawo. Imbes, ihinuhula kan Kaglalang an ngapit paagi sa mga pahina kan Biblia. Pinasabngan nin Dios si propeta Isaias na magsurat manongod Saiya: “Ako an Banal na Saro asin mayo na nin ibang Dios, ni siisay man na kabaing ko; an Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy.”—Isaias 46:9, 10.
Ipinaheling kan Biblia na kaya kaiyan na ihula an mangyayari sa huri poon pa sa kapinonan na may makangangalas na pagkaeksakto. Halimbawa, ihinula kaiyan an paglataw, an pagbagsak, asin an mga karakteristiko kan pangenot na mga kapangyarihan sa kinaban durante kan rinibong taon na historya kan tawo. An pambihirang mga hulang ini isinurat mga siglo bago pa an kaotoban kan mga iyan, sa ibang kaso rinibong taon bago pa. Kaya may katamaan na ihinuhula kan Biblia an modernong aldaw na mga pangyayari, siring man an ultimong resulta kaiyan. An Biblia napalalaen man huli ta itinotokdo kaiyan an dalan nin kaligtasan durante kan kalaglagan nin bakong sangkap na gibong tawong mga gobyerno sa Armagedon, “sa ralaban kan dakulang aldaw nin Dios na Makakamhan sa gabos.” An Kahadean nin Dios sa kamot kan saiyang Aki, si Jesu-Cristo, ootobon an dakulang paghirong iyan.—Kapahayagan 16:14, 16; 17:9-18; Daniel, kapitulo 2, 8.
Perming Kapakipakinabang—Nungkang Nakadadanyar
An sa tawo sanang kadonongan bakong sangkap; kun siring, an sadol nin tawo bakong perming kapakipakinabang, dawa ngani tibaad itinao iyan na may marahay na mga intension. Bako ini an kaso kan sadol sa Biblia. An Dios mismo an nagsabi: “Ako, si Jehova, . . . an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan. O kun dadangogon mo sana kutana an sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”—Isaias 48:17, 18.
An paggiya nin Dios nakatatabang sa sato na establisaron kun ano an dapat na enoton asin mangapot sa halangkaw na mga pamantayan sa buhay. Mantang an modernong sosyedad idinodoon an materyal na mga naginibo asin pasohan, idinodoon kan Biblia kun gurano kahalaga para sa sato na “nakatorohok, bakong sa mga bagay na naheheling, kundi sa mga bagay na dai naheheling. Huli ta an mga bagay na naheheling naagi sana, alagad an mga bagay na dai naheheling daing katapusan.” (2 Corinto 4:18) Sa paaging ini pinakokosog kita na magkaigwa kan pinakamararahay na pasohan sa buhay, arin na baga, an espirituwal na mga pasohan na konektado sa paggibo kan kabotan nin Dios, na an ultimong pasohan iyo an buhay na daing katapusan sa sarong makatanosan na bagong palakaw.
Mantang hinihingoa kan Kristiano na aboton an halangkaw na mga pasohan na ini, an sadol kan Biblia nakatatabang saiya na mamuhay nin pinakamarahay na posible sa maraot na palakaw na ini nin mga bagay. An modernong kadonongan nin tawo may tendensia na dagkahon an pilosopiya na magtrabaho nin pinakadikit asin magsuweldo nin pinakahalangkaw. Sa ibong na lado, nagsasabi sa sato an Biblia na “an saro na nagtatrabahong may hugakon na kamot magigin dukha, alagad an kamot kan mahigos iyo an magpapayaman sa saiya.” Nagsurat si apostol Pablo sa Hebreong mga Kristiano: “Kami nagtutubod na kami igwa nin sadiosan na konsensia, mantang minamawot niamo na gumawe nin sadiosan sa gabos na bagay.”—Talinhaga 10:4; Hebreo 13:18.
An Biblia nagtatao man nin praktikal na sadol manongod sa areglo nin pamilya. Espisipikong iniestablisar kaiyan an kabtang kapwa kan agom na lalaki asin babae sa areglo nin pag-agoman, siring man an tamang paagi na padakulaon asin tokdoan an kaakian. Iyan nagsasabi: “An mga agom na lalaki kaipuhan na mamoot sa saindang agom siring sa saindang sadiring hawak. . . . Sa ibong na kampi, an agom na babae maninigong magkaigwa nin hararom na paggalang sa saiyang agom. Mga aki, magin makinuyog sa saindong mga magurang . . . Kamo, mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.” An pagsunod sa pinakamarahay na sadol kan Kaglalang nakakokontribuwir nin dakula sa karigonan asin kaogmahan nin mga pamilya.—Efeso 5:21–6:4.
Sarong Tiwasay na Ngapit Para sa mga Nagsusunod sa Paggiya nin Dios
An nasusurat na Tataramon nin Dios nagtotokdo kan solusyon nin Dios para sa gabos na problema kan katawohan. Sa madalion na hahaleon ni Jehova Dios an presenteng palakaw nin mga bagay, kaiba na an gabos na kolog, inhustisya asin mga kasakitan kaiyan, asin sasalidahan iyan kan saiyang matanos na bagong palakaw. Ilinaladawan ini kan Biblia sa 2 Pedro 3:7-10, na idinudugang sa bersikulo 13: “Igwa nin bagong kalangitan asin sarong bagong daga na satong hinahalat oyon sa saiyang panuga, asin dian an katanosan an magdadanay.” Ini an pinakamarahay na bareta na ikatatao sa pamilya nin tawo. Iyan nanggad an mensahe na itinatao kan Biblia asin na ihinuhulit kan mga Saksi ni Jehova sa labing 200 na kadagaan asin isla kan dagat.
Kun ginigibo an kabotan nin Dios sa bilog na daga, an bilog na pamilya nin tawo makikinabang paagi sa pagkuyog sa ekselenteng paggiya kan Kaglalang kaiyan, si Jehova. Mawawara na an mga problema nin kadukhaan, krimen, asin droga. An tawo dai na pasasakitan nin helang, paggurang, asin kagadanan. An pamilya nin tawo ilalangkaw pasiring sa pagkasangkap na yaon sa satong enot na mga magurang bago sinda nagrebelde tumang sa paggiya nin Dios.
Marahayon nanggad an pagkasumaryo kan huring libro kan Biblia sa maogmang kamugtakan kan mga nagbubugtak kan saindang pagsarig sa paggiya nin Dios! Nagsasabi an Kapahayagan 21:4, 5: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Ginarantiyahan iyan kan satong Kaglalang, na nagsasabing: “Uya! ginigibo kong bago an gabos na bagay.” Idinugang nia: “An mga tataramon na ini maimbod asin totoo.”
Tangani kitang mag-ako kan mga bendisyon na ini, ano an linalaoman sato nin Dios? Si apostol Pablo nagpapaliwanag na an kabotan nin Dios iyo na “an gabos na klase nin tawo makaligtas asin makaabot sa tamang kaaraman kan katotoohan.” (1 Timoteo 2:4) Maogma kamong iniimbitaran kan mga Saksi ni Jehova na kamtan an tamang kaaraman na iyan kan katotoohan paagi sa maingat na pag-adal kan Biblia. Paagi sa mahigos na pag-adal dapit kan kabotan nin Dios, maheheling man nindo paagi sa eksperyensia na an kadonongan nin Dios iyo an solamenteng masasarigan na paggiya sa peligrosong mga panahon na ini. An pagkaapurado kan mga panahon ginigibo iyan na mas mahalagang sunodon kisa kasuarin pa man!