Mahalaga daw Kun Paano Kamo Nagsasamba?

ALAS dose nin odto sa sarong sadit na banwaan sa Aprika. Hale sa haraning kababan madadangog an tanog nin makosog na turubtoban, karantahan, asin magayagayang urupakan. Alagad bako ining sosyal na aktibidad. Iyan tradisyonal na pagsamba sa Aprika. Pero an tanog nakikikompetensia sa maribok na mga tingog na naggigikan sa haraning karismatikong simbahan. Dian an labi-labi kaogmang mga parasamba naggigibo nin milagrosong “mga pagpaomay” asin nagtataram sa laen-laen na lenguahe. Sa sarong poro kan banwaan igwa nin saro pang klase nin pagsamba. An mataginting na tingog nin sarong muezzin nag-aapod sa mga kapwa parasambang Muslim na mamibi.

Iyo, an relihiyosong debosyon na manlaenlaen nanggad maheheling sa dakol na siudad asin banwaan sa Aprika. Sa laog nin dakol na henerasyon an mga taga-Aprika kontento nang sunodon an saindang sadiring relihiyosong mga tradisyon. Alagad nag-abot an mga misyonero nin Kakristianohan, na kasunod kan mga armi nin laen-laen na nasyon sa Europa, asin daing herak na pinagmaigotan na an gabos “gibohon na Kristiano”​—pati an saindang ngaran.

An resulta? Sarong klase nin relihiyon na pinagsalak an tradisyonal na mga paniniwala asin paggawe sa Aprika asin an inimportar na relihiyosong mga pagtubod. Sagkod sa aldaw na ini dakol na “Kristianong” parasamba an naggagamit nin tradisyonal na mga anting-anting asin agimat. Pero, an mga misyonero kan Kakristianohan minisrepresentar na gayo an tunay na Kristianismo, asin iwinalat ninda an pamanang paghinanakit. Sa dakulaon na sokol, responsable sinda sa pagigin sirrado kan kaisipan sa Biblia na nag-eeksister sa tahaw kan nagkapirang taga-Aprika ngonyan.

Minsan siring, an dakol na klase nin “Kristianismo” lakop pang ginigibo ngonyan. Sa dai pa sana nahahaloy na mga taon an karismatikong relihiyosong mga grupo nagin partikularmenteng popular; nagdakol an mga iglesya na nagpapaomay paagi sa pagtubod. An sarong kolumnista sa diaryo ipinaliwanag an pan-akit kan mga iglesyang ini paagi sa pagsabi na ‘an ideya sa Aprika manongod sa relihiyon sa kabilogan utilitarista. Sa kaisipan nin taga-Aprika, an relihiyon kaipuhan na may kakayahan na magtao nin direktang materyal na pagkakontento sa pag-eksister nin tawo. Kun siring, sa taga-Aprika na naniniwala na an espirituwal na pakikikomunikar mga pangangaipo sa haros gabos na bagay, an paagi nin espirituwal [o nagpapaomay paagi sa pagtubod] na mga iglesya kaoyon sa mga kahagadan kan saiyang pamumuhay.’ Pero, makamomondo, dakol na karismatikong iglesya an malinaw nang napatunayan na negosyo sana.

Ngonyan, labing 6,000 na relihiyosong sekta an nagpupunsionar sa Aprika. Tibaad naghohona kamo na an gabos na relihiyon asin sektang ini nagkakapot kan liyabe sa kaligtasan. Alagad an talagang hapot, Ano daw an paghona nin Dios?

Puwede daw na Makapaogma sa Dios an Minsan Anong Relihiyon?

Sierto nanggad, an Kaglalang kan uniberso dai kita pababayaan na mayong paggiya manongod sa bagay na ini. (Amos 3:7; Gibo 17:​26, 27) Asin dakolon an ebidensia na an paggiya nin Dios manonompongan sa Biblia. Dai, an Biblia bakong, arog kan pag-apod dian nin iba, libro nin mga puti. Sa katunayan, mayong tawo​—itom o puti—​na makakakua kan kredito para kaiyan. “An gabos na Kasuratan ipinasabong nin Dios,” nagsasabi an 2 Timoteo 3:16. An totoo, praktikal na mga katokdoan kan Biblia, an pagkasuanoy nanggad kaiyan, an pakaligtas kaiyan sa atubangan nin maringis na mga pag-atake, an eksaktong mga hula asin dai mapapantayan na panglobong sirkulasyon kaiyan​—ini malinaw na mga ebidensia na an Dios an autor kaiyan.

Ano an itinotokdo sa sato kan librong iyan? Enot, nagsasabi iyan sa sato na igwa sanang sarong “tunay na Dios.” (Juan 17:3) Kun siring an kamugtakan, paano magkakaigwa nin katotoohan sa gabos na relihiyon? Bako daw na nagkokorontrahan an relihiyosong mga grupo kun manongod sa kun siisay asin kun ano an Dios? An parasurat sa Biblia na si Santiago nagtaram manongod sa “dalisay asin tunay na relihiyon.” (Santiago 1:​27, Today’s English Version) Kun kinakaipuhan na mamidbid an tunay na relihiyon, seguradong igwa man nin falso o palsipikadong relihiyon. Kokontrahon kaini an ideya na an gabos na relihiyon manlaenlaen sanang paagi sa pagdolok sa Dios.

An mga Pamantayan kan Kaglalang Para sa Pagsamba

Ano an tamang paagi nin pagsamba sa Dios? Tinotokdoan kita kan Biblia na an tunay na pagsamba nakagamot sa tamang kaaraman. An dakulang propetang si Jesu-Cristo nagsabi kaidto sa sarong Samaritana: “Kamo nagsasamba kaidtong dai nindo namimidbid.” (Juan 4:22) Posible daw na ini totoo man saindo? Natokdoan na daw kamo na an Makakamhan sa gabos na Dios igwa nin personal na ngaran, Jehova? (Salmo 83:18) Aram daw nindo kun ano an saiyang mga katuyohan mapadapit sa tawo asin sa daga? (Mateo 6:​9, 10; Efeso 1:​9, 10; 3:11) An saindo daw na relihiyon nag-aalok saindo nin realistikong paglaom sa sarong mas marahay na ngapit? Asin kun ibinibilang nindo an saindong sadiri na sarong Kristiano, ikapaliliwanag daw nindo gikan sa Kasuratan an saindong mga paniniwala, o an mga iyan daw ipinamana sana sa saindo na dai talaga nindo siniyasat?

Kun manompongan nindo an saindong sadiri na kulang nin tamang kaaraman, makukua nindo iyan paagi sa pag-adal kan Tataramon nin Dios, an Biblia. Linalaoman ni Jehova Dios an saiyang tunay na mga parasamba na magin pamilyar sa itinotokdo kan Banal na Librong iyan. Orog pa kaiyan, linalaoman nia sinda na iaplikar iyan sa saindang buhay. An satong kaisipan kaipuhan na magin arog kan sa salmista na nagsabi: “An saimong tataramon ilawan sa sakong mga bitis, asin liwanag sa sakong dalan.” (Salmo 119:105) Sagkod saen na tinabangan kamo kan saindong relihiyon na manodan asin masabotan an Biblia?

An saro pang importanteng kabtang nin tunay na pagsamba iyo an pagtubod ki Jesu-Cristo, bako sanang bilang dakulang propeta kundi bilang an bugtong na Aki nin Dios. An Kasuratan malinaw na naghahayag na si Jesus “an Pangenot na Ahente nin buhay.” (Gibo 3:15; 4:12) Dakol an naghihingakong nagtutubod ki Jesus, pero gurano katotoo kan saindang pagtubod? An tunay na pagtubod ki Cristo naghahagad na kuyogon an saiyang mga instruksion. An Dios mismo nandagka kaini kan saiyang ihayag: “Ini an sakong Aki, an namomotan; maghinanyog kamo saiya.” (Marcos 9:7) Kaya an tunay na mga parasamba nagmamaigot na sumunod sa mga lakad ni Jesus sa pinakaharaning mapupuwede. (1 Pedro 2:21) An sarong paagi na ginigibo ninda ini iyo an pakikikabtang sa pampublikong paghuhulit na pinonan nia. (Mateo 4:17; 10:​5-7) An saindo daw na relihiyon dinadagka kamong magkaigwa nin personal na pakikikabtang sa gibohon na ini?

An pagkamoot saro man na kahagadan sa tunay na pagsamba. Si Jehova Dios sinasabing an mismong ladawan nin pagkamoot, asin sinabihan ni Jesus an saiyang mga parasunod na sinda mamimidbid paagi sa pagkamoot na ipinaheheling ninda sa tahaw ninda mismo. (Juan 13:​34, 35; 1 Juan 4:8) Mantang minilyon an tawo ngonyan na nagsasabing Kristiano, bako daw na an kinaban maninigong pano na kutana nin pagkamoot? Alagad, an totoo, an satong kinaban napatunayan na sarong pinakadaing pagkamoot na lugar. An mga guerra pinara an minilyon na buhay sa siglo sanang ini. Padagos na naggagrabe an krimen asin kadahasan. Kaya hapota an saimong sadiri, ‘Kun gabos karelihiyon ko, an kinaban daw magigin mas mamomoton na lugar?’

Ultimo, ipinaheheling kan Biblia na an tunay na mga parasamba kaipuhan na magdanay na siblag sa kinaban na dai nakamimidbid sa Dios. Kan an nasyon nin Israel isiblag nin Dios bilang paraingat sa dalisay na pagsamba, pinatanidan nia an saiyang banwaan na lumikay sa dayupot na pakikiasosyar sa maraot na mga nasyon na nakapalibot sainda. (Deuteronomio 7:​1-6) Sa Juan 17:​16, si Cristo Jesus nagsabi man manongod sa saiyang mga parasunod: “Sinda bakong kabtang kan kinaban, kun paanong ako bakong kabtang kan kinaban.” An tunay na mga parasamba sa Dios dai nakikikabtang sa politika, inmoralidad, paslong komersialismo, o ano man na pilosopiya na dai nagtataong onra sa Dios. (Juan 18:36; 1 Juan 2:​15-17) Kinukuyog ninda an pagboot na isinurat sa Roma 12:2: “Dai kamo maglakaw na arog sa palakaw na ini nin mga bagay.” Iyan daw an idinadagka kan saindong relihiyon na gibohon nindo?

Makukua an Tabang

Iyo, an paagi kan pagsamba nindo talagang mahalaga sa Dios. Kun para sa saiya, igwa nin sasaro sanang tunay na relihiyon. (Efeso 4:​4-6) An satong halipot na paliwanag nasambitan an pira sa pangenot na mga punto kan katokdoan sa Biblia. Taano ta dai magmaigot na makanood nin orog pa?

Ano man an saindong relihiyon na dinakulaan, an mga Saksi ni Jehova makakatabang saindo sa bagay na ini. Midbid sinda sa bilog na kinaban huli sa saindang maigoton na pagtotokdo sa Biblia. Dusay sinda sa pagtabang sa mga tawo hale sa gabos na rasa asin relihiyosong pinaghalean na magkamit nin mas hararom na pakasabot sa Biblia. (Talinhaga 2:​1-6) Nagpupublikar sinda nin siniyasat na gayong literatura sa Biblia.a Sa katunayan, masongko pa ngani sinda sa saindong harong na mayong bayad tanganing itokdo saindo an Biblia sa personal na paagi. Minilyon na tawo sa bilog na kinaban an sa presente nakikinabang sa edukasyonal na programang ini sa Biblia. Taano kamo ta dai kaiyan gumibo mismo? Tunay nanggad, mahalaga na gibohon nindo iyan huli ta talagang mahalaga kun paano kamo nagsasamba.

[Nota sa Ibaba]

[Ritrato sa pahina 5]

An mga misyonero kan Kakristianohan minisrepresentar na gayo an tunay na Kristianismo

[Ritrato sa pahina 5]

An dakol na karismatikong iglesya negosyo sana

[Ritrato sa pahina 6]

An pagtubod ki Jesus sarong mahalagang kabtang nin tunay na pagsamba

[Ritrato sa pahina 7]

An mga Saksi ni Jehova nagtatabang sa minilyon na magkamit nin tamang kaaraman paagi sa mayong bayad na mga pag-adal sa Biblia