Nanompongan Na daw Nindo an Tamang Relihiyon?

“An porma nin pagsamba na malinig asin daing digta sa pagheling kan satong Dios asin Ama iyo ini.”​—SANTIAGO 1:27.

1, 2. (a) Sa kaisipan kan dakol na tawo, ano an nagdedeterminar kun baga tama an saindang relihiyon? (b) Ano an maninigo na seryosong horophoropon sa paghusgar sa relihiyon?

KITA nabubuhay sa panahon na an dakol na tawo kontento nang tawan an relihiyon nin kadikit sanang kabtang sa saindang buhay. Tibaad nag-aatender sinda nin nagkapirang relihiyosong seremonya, alagad pipira sana an regular na naggigibo kaiyan. An kadaklan na tawo dai nagtutubod na sala an gabos na iba pang relihiyon asin na tama an sainda. Tibaad hinohona sana ninda na an saindang relihiyon tama para sa sainda.

² Sa pagkonsiderar kaini, an hapot daw na, Nanompongan na daw nindo an tamang relihiyon? nangangahulogan sanang, Nakanompong na daw kamo nin relihiyon na gusto nindo? Ano an nagdedeterminar kun arin an gusto nindo? An saindong pamilya? An saindong kairiba? An saindo mismong saboot? Gurano nindo kaseryosong pinaghohorophorop an punto-de-vista nin Dios dapit sa bagay?

Paano Niato Maaaraman an Punto-de-vista nin Dios?

3. (a) Tanganing maaraman niato an punto-de-vista nin Dios, ano an dapat na yaon sa sato? (b) Ano an mga maninigong ihapot niato dapit sa kun taano kita ta personal na nagtutubod na an Biblia gikan sa Dios?

³ Tanganing maaraman niato kun ano an iniisip nin Dios mismo, kun siring kaipuhan na igwa nin kapahayagan gikan sa saiya. An Biblia an pinakasuanoy na libro na naghihingakong ipinasabong nin Dios. (2 Timoteo 3:​16, 17) Alagad masasabi daw nin totoo na an librong ini, kabaliktaran sa gabos na iba pa, igwa kan mensahe nin Dios para sa bilog na katawohan? Paano nindo sisimbagon an hapot na iyan, asin taano? Huli daw ta iyan an pagtubod kan saindong mga magurang? Huli daw sa kaisipan kan saindong kairiba? Siniyasat na daw nindo mismo an ebidensia? Taano ta dai iyan gibohon ngonyan, na ginagamit an minasunod na apat na ebidensia?

4. Manongod sa pagigin madaling makua, ano an nagpapaheling na an Biblia, imbes na an ibang libro, gikan sa Dios?

⁴ Pagigin madaling makua: An sarong mensahe na tunay na gikan sa Dios asin na para sa bilog na pamilya nin tawo maninigo na makukua ninda. Totoo daw iyan dapit sa Biblia? Horophoropa ini: An Biblia, an bilog o an ibang kabtang, ipinupublikar ngonyan sa labing 2,000 na lenguahe. Sono sa American Bible Society, kan haros sarong dekada na an nakaagi an mga lenguahe na ginamit sa pag-imprenta kan Biblia nagpangyari na magkaigwa kaiyan an mga 98 porsiento kan populasyon sa kinaban. Siring sa idinoon kan Guinness Book of World Records, an Biblia dai mapagdududahan na iyo “an pinakamahiwas na idinidistribuwir na libro sa kinaban.” Ini an malalaoman niato sa sarong mensahe gikan sa Dios na para sa mga tawo sa gabos na rasa asin nasyon patin grupo nin tataramon. (Ikomparar an Kapahayagan 14:6.) Mayo na nin ibang libro sa kinaban na igwang siring na rekord.

5. Taano ta mahalaga an makasaysayan na pundasyon kan Biblia?

⁵ Pagigin makasaysayan: An maingat na pagsiyasat sa Biblikal na mga tala naghahayag nin saro pang paagi na an Biblia laen sa ibang libro na naghihingakong banal. An Biblia igwa nin makasaysayan na mga katunayan, bakong dai mapatunayan na mga osipon. Si Irwin Linton, na bilang sarong abogado natuod na sa pag-analisar kun ano an kinakaipuhan bilang patotoo sa husgado, nagsurat: “Mantang an mga nobela, osipon asin falsong testimonya nag-iingat sa pagbugtak kan sinasabing mga pangyayari sa sarong harayong lugar asin sarong bakong depinidong panahon, . . . an mga tala sa Biblia itinatao sato an petsa asin lugar kan sinasabing mga bagay na may pagkaeksaktong marhay.” (Bilang mga halimbawa, helingon an 1 Hade 14:25; Isaias 36:1; Lucas 3:​1, 2.) Para sa mga tawo na minadolok sa relihiyon bakong tanganing makadulag sa katunayan kundi tanganing makua an katotoohan, ini mahalagang horophoropon.

6. (a) Paano talagang tinatabangan kan Biblia an sarong tawo sa mga problema sa buhay? (b) Sa anong tolong paagi tinatabangan kan Biblia an sarong tawo sa pag-atubang sa makolog na mga katunayan?

⁶ Pagigin praktikal: Idtong mga seryosong sinisiyasat an Biblia tolos na nakarerealisar na an mga kapagbootan asin prinsipyo kaini dai dinisenyo sa pag-aprobetsar sa sainda. Imbes, an mga ini nagsasabi nin paagi nin pamumuhay na nagtatao nin pakinabang sa mga maingat na sinusunod iyan. (Isaias 48:​17, 18) An karangahan na iinaalok kaiyan sa mga may kahaditan bakong hababaw, basado sa daing kamanungdanan na mga pilosopiya. Imbes, tinatabangan kaiyan an mga tawo sa pag-atubang sa makolog na mga katunayan nin buhay. Paano? Sa tolong paagi: (1) paagi sa pagtao nin madonong na hatol sa kun paano aatubangon an mga kadepisilan, (2) paagi sa pagpaliwanag kun paano aakoon an mamomoton na suporta na itinatao nin Dios sa saiyang mga lingkod ngonyan, asin (3) paagi sa paghayag kan mamuraway na ngapit na itinagama nin Dios para sa mga naglilingkod sa saiya, na tinatawan sinda nin tamang mga dahelan para sa kapanarigan sa saiyang mga panuga.

7. (a) Ginagamit an mga tekstong sinitar sa nota sa ibaba, ipaliwanag an simbag kan Biblia sa saro sa pangenot na mga isyu na pinaghahaditan kan mga tawo ngonyan. (b) Ipaheling kun paano an hatol kan Biblia iniingatan kita o tinatabangan kita sa pag-atubang sa sarong nakasusustong situwasyon.

⁷ Minsan ngani an hatol kan Biblia sa parate bakong popular sa mga nagsisikwal sa autoridad asin namumuhay na may pagpanigo sa sadiri, dakol an nakarealisar na an siring na pamumuhay dai nakatao sainda nin tunay na kaogmahan. (Galacia 6:​7, 8) An Biblia nagtatao nin direktang mga simbag sa mga hapot dapit sa aborsion, diborsio, asin homoseksuwalidad. An hatol kaiyan iniingatan kita tumang sa pag-abuso sa droga asin sa alkohol patin tumang sa pagkaolakit sa AIDS paagi sa naolakitan na dugo o seksuwal na pakikidorog minsan kiisay. Ipinaheheling kaiyan sato kun paano magkakaigwa nin maogmang mga pamilya. Iyan nagtatao nin mga simbag na nagpapangyari sa sarong tawo na makapanggana sa nakasusustong mga situwasyon sa buhay, kabale an pagsikwal saiya kan haraning mga miembro nin pamilya, grabeng helang, asin pagkagadan nin namomotan. Tinatabangan kita kaiyan na mamansayan an satong mga ipinaoorog kaya an satong buhay pano nin kahulogan imbes na kabasolan.a

8, 9. (a) Anong hula an nakapahihiro saindo personalmente bilang patotoo sa pagkapasabong sa Biblia? (b) Ano an pinatutunayan kan mga hula sa Biblia kun dapit sa ginikanan kan mga iyan?

⁸ Hula: An Biblia pambihira bilang libro nin hula, sarong libro na nagsasabi kan mangyayari sa ngapit, asin ginigibo iyan kaiyan nin detalyado. Ihinula kaiyan an pagkalaglag kan suanoy na Tiro, an pagbagsak kan Babilonya, an pagtogdok liwat kan Jerusalem, an pagtindog asin pagkapukan kan mga hade sa Medo-Persia asin Grecia, asin kadakol na pangyayari sa buhay ni Jesu-Cristo. Ihinula man kaiyan nin detalyado an mga kamugtakan sa kinaban na nangyayari sa siglong ini, asin ipinaliliwanag kaiyan an kahulogan kan mga iyan. Ipinaheheling kaiyan kun paano mareresolberan an mga problemang nakalulunos sa mga poon na tawo, asin ipinamimidbid kaiyan an Poon na magdadara nin nagdadanay na katoninongan asin tunay na katiwasayan sa katawohan.b​—Isaias 9:​6, 7; 11:​1-5, 9; 53:​4-6.

⁹ Makahulogan nanggad, iinaatubang kan Biblia an kakayahan na ikahula nin eksakto an ngapit bilang pagprobar sa pagka-Dios. (Isaias 41:1–46:13) An Saro na makakagibo kaiyan o makakapasabong sa iba na gibohon iyan bako sanang sarong daing buhay na idolo. Sia bako sanang sarong debotadong tawo. Sia an tunay na Dios, asin an libro na igwa kan siring na hula iyo an saiyang Tataramon.​—1 Tesalonica 2:13.

Tama daw an Gabos na Naggagamit kan Biblia?

10, 11. Siring sa ipinaheling ni Jesus, minsan ngani puwedeng ginagamit nin sarong klerigo an Biblia, ano an puwedeng gumibo sa relihiyon na saiyang sinusuportaran na magin daing kamanungdanan?

¹⁰ Makatanosan daw​—orog na mahalaga, Makakasuratan daw—​na magkonklusyon, kun siring, na an gabos na grupo nin relihiyon na naghihingakong ginagamit an Biblia nagtotokdo kan tunay na relihiyon? An gabos daw na nagdadara o nagkokotar sa Biblia naggigibo kan tamang relihiyon?

¹¹ An dakol sa klero, minsan ngani igwa sindang Biblia, ginagamit an relihiyon bilang paagi na mapamuraway an saindang sadiri. Sinasalakan ninda nin mga tradisyon asin pilosopiya nin tawo an dalisay na mga katotoohan. Inaako daw nin Dios an saindang pagsamba? Sa mga relihiyosong namomoon sa Jerusalem kan enot na siglo na siring man sana kaiyan an pinaggigibo, si Jesu-Cristo angay nanggad na iinaplikar an kapahayagan nin Dios paagi ki propeta Isaias, na sinasabing: “An mga tawong ini nagtataong onra sako sa saindang mga ngabil, alagad an saindang puso harayo sako. Sayang sana na sinda nagsasamba sako, huli ta itinotokdo ninda bilang mga doktrina an mga pagboot nin mga tawo.” (Mateo 15:​8, 9; 23:​5-10) Malinaw nanggad, an siring na klase nin relihiyon bakong tunay na relihiyon.

12, 13. (a) Paano an paggawe kan mga miembro nin iglesya makatatabang sa sarong tawo na madeterminaran kun baga tama an saindang relihiyon? (b) Ano an pagheling nin Dios sa satong pagsamba kun pinipili niato na kairiba an mga isinisikwal nia? (2 Cronica 19:2)

¹² Kumusta kun an mga bunga na pinaluluwas kan mga katokdoan nin nagkapirang relihiyon, siring kan maheheling sa pamumuhay kan saindang mga miembro na may marahay na kamugtakan, lapa? Sa saiyang Sermon sa Bukid, si Jesus nagpatanid: “Magmaan kamo sa mga falsong propeta . . . Paagi sa saindang mga bunga mamimidbid nindo sinda. . . . An gabos na kahoy na marahay nagbubunga nin marahay, alagad an gabos na kahoy na raot nagbubunga nin daing data.” (Mateo 7:​15-17) Totoo na an mga indibiduwal puwedeng makagibo nin sala asin mangaipo nin pagtatanos. Alagad laen an kamugtakan kun an mga miembro nin iglesya, pati an klero, nagpapangana sa pakikisaro asin pagsambay, pag-iriwal, pagbuburat, kapasloan, pagputik, espiritismo, pagsamba sa mga idolo​—sa arin man o sa gabos na ini—​alagad mayong disiplina na ipinapaotob, asin an mga nagpapadagos sa dalan na ini dai hinahale sa kongregasyon. An Biblia malinaw na nagsasabi na an mga naggigibo kan siring na mga bagay maninigong iluwas sa kongregasyon; mayo sindang lugar sa Kahadean nin Dios. (Galacia 5:​19-21) An saindang pagsamba dai nakakapaoyon sa Dios, ni makakapaoyon man sa Dios an satong pagsamba kun pinipili niato na kairiba an mga isinisikwal nia.​—1 Corinto 5:​11-13; 6:​9, 10; Kapahayagan 21:8.

¹³ Malinaw na bakong gabos na grupo na naghihingakong ginagamit an Biblia naggigibo kan tunay na relihiyon na ilinaladawan kaiyan. Ano, kun siring, an sinasabi kan Biblia bilang nagpapamidbid na mga tanda kan tunay na relihiyon?

Nagpapamidbid na mga Tanda kan Tunay na Relihiyon

14. (a) Basado sa ano an gabos na katokdoan kan tunay na relihiyon? (b) Paano an mga katokdoan kan Kakristianohan manongod sa Dios asin sa kalag nakapapasar sa pagprobar na ini?

¹⁴ An mga katokdoan kaiyan marigon na ibinabasar sa ipinasabong na Kasuratan. “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16) Alagad, saen nagtataram an Banal na Biblia dapit sa Trinidad kan Kakristianohan? Asin saen itinotokdo kan Biblia, siring sa ginigibo kan klero, na an mga tawo igwa nin kalag na minaluwas pagkagadan kan pisikal na hawak? May hinapot na lamang daw kamong klerigo na ipaheling saindo an mga katokdoan na iyan sa saindong Biblia? An The New Encyclopædia Britannica nagsasabi: “An terminong Trinidad o an malinaw na doktrina pareho dai minalataw sa Bagong Tipan.” (1992 Micropædia, Tomo 11, pahina 928) Asin inaadmitir kan New Catholic Encyclopedia: “Sa mga Apostolikong Ama, mayo nanggad nin minsan nakaaagid man lamang na kaisipan o pagmansay.” (1967, Tomo XIV, pahina 299) Kun manongod sa ideya kan Kakristianohan dapit sa kalag na minasuhay sa hawak pagkagadan, inaadmitir kan mga iskolar sa iglesya na sinubli ninda an ideya sa pilosopiyang Griego. Alagad, an tunay na relihiyon dai ipinagigilid an katotoohan sa Biblia tanganing tawan nin lugar an pilosopiya nin tawo.​—Genesis 2:7; Deuteronomio 6:4; Ezequiel 18:​4; Juan 14:28.

15. (a) Paano ipinamimidbid kan Biblia an Saro na iyo sana an maninigong sambahon? (b) Ano an namamatean kan tunay na mga parasamba manongod sa pagrani ki Jehova?

¹⁵ An tunay na relihiyon pinalalakop an pagsamba sa iyo sanang tunay na Dios, si Jehova. (Deuteronomio 4:35; Juan 17:3) Sa pagtao kan kahulogan kan Deuteronomio 5:​9 asin 6:13, si Jesu-Cristo marigon na nagsabi: “Ika magsamba ki Jehova na saimong Dios, asin sa saiya ka sana magtao nin banal na paglilingkod.” (Mateo 4:10) Kaoyon kaiyan, ipinamidbid ni Jesus sa saiyang mga disipulo an ngaran kan saiyang Ama. (Juan 17:26) Tinokdoan daw kamo kan saindong relihiyon na sambahon si Jehova? Midbid na daw nindo an Persona na ipinamimidbid kan ngaran na iyan​—an saiyang mga katuyohan, saiyang mga aktibidad, saiyang mga kuwalidad—​kaya namamatean nindo na may pagsarig kamong makararani sa saiya? Kun an saindo iyo an tunay na relihiyon, an simbag iyo.​—Lucas 10:22; 1 Juan 5:14.

16. Ano an kahulogan kan pagtubod ki Cristo para duman sa mga naggigibo kan tunay na relihiyon?

¹⁶ An sarong mahalagang kabtang kan pagsamba na nakakapaoyon sa Dios iyo an pagtubod sa saiyang Aki, si Jesu-Cristo. (Juan 3:36; Gibo 4:12) Ini dai sana nangangahulogan nin pagtubod na sia nabuhay o na sia sarong pambihirang persona. Kabale dian an pag-apresyar sa itinotokdo kan Biblia manongod sa halaga kan atang na sangkap na buhay ni Jesus bilang tawo asin pagmidbid sa saiyang posisyon ngonyan bilang langitnon na Hade. (Salmo 2:​6-8; Juan 3:16; Kapahayagan 12:10) Kun kabilang kamo duman sa mga naggigibo nin tunay na relihiyon, aram nindo na sa aroaldaw na buhay sinda sadiosan na naghihingoang kuyogon si Jesus, arogon an saiyang halimbawa, asin personal asin maigot na makikabtang sa gibohon na saiyang iinasignar sa mga disipulo nia. (Mateo 28:​19, 20; Juan 15:14; 1 Pedro 2:21) Kun iyan bakong totoo manongod sa kairiba nindong nagsasamba, kaipuhan nindong humanap sa iba.

17. Taano an tunay na mga parasamba ta nag-iingat na dai madigtaan kan kinaban, asin ano an kabale dian?

¹⁷ An tunay na pagsamba dai naaatian paagi sa pakikikabtang sa politika asin pag-iriwal sa kinaban. (Santiago 1:27) Taano ta dai? Huli ta si Jesus nagsabi manongod sa saiyang mga parasunod: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) Si Jesus dai nakilabot sa politika, asin binawalan nia an saiyang mga parasunod sa paggamit nin karnal na mga armas. (Mateo 26:52) An mga isinasapuso an sinasabi kan Tataramon nin Dios ‘dai na nag-aadal sa pakilaban.’ (Isaias 2:​2-4) Kun an arin man na relihiyon na dian kamo miembro minsan sa ngaran sana dai nakakasono sa paglaladawan na iyan, oras nang sumiblag kamo dian.​—Santiago 4:4; Kapahayagan 18:​4, 5.

18. (a) Ano an ipinamimidbid kan Juan 13:35 bilang lataw na karakteristiko kan tunay na relihiyon? (b) Paano nindo puwedeng tabangan an saro na madeterminaran kun arin na grupo an nagkukuyog sa Juan 13:​3-5?

¹⁸ An tunay na relihiyon nagtotokdo asin naggigibo nin daing kapasloan na pagkamoot. (Juan 13:35; 1 Juan 3:​10-12) An siring na pagkamoot dai sana isinisermon. Aktuwal na pinagsasararo kaiyan sa tunay na pagkamagturugang an mga tawo sa gabos na rasa, gabos na ekonomikong grupo, gabos na tataramon, gabos na nasyon. (Kapahayagan 7:​9, 10) Isinisiblag kaiyan an tunay na mga Kristiano sa kinaban na nakapalibot sa sainda. Kun dai pa nindo nagigibo iyan, umatender sa mga pagtiripon sa Kingdom Hall kan mga Saksi ni Jehova, patin man sa saindang mas darakulang kombension. Masdan sinda mantang iriba sindang nagtatrabaho sa pagtogdok kan saro sa saindang mga Kingdom Hall. Magmasid kun paano ninda tinatratar kapwa an mga gurang na (kabale an mga balo) asin an mga barobata (kabale an mga saro na sana an magurang o ilo nang lubos). (Santiago 1:27) Ikomparar an saindong naoobserbaran sa saindong naheling na sa arin man na iba pang relihiyon. Dangan hapota an saindong sadiri, ‘Siisay an naggibo kan tunay na relihiyon?’

19. (a) Anong solusyon sa mga problema nin katawohan an sinusuportaran kan tunay na relihiyon? (b) Ano an maninigong ginigibo kan mga miembro kan grupo na nagsusunod sa tunay na relihiyon?

¹⁹ An tunay na relihiyon sinusuportaran an Kahadean nin Dios bilang an nagdadanay na solusyon sa mga problema nin katawohan. (Daniel 2:44; 7:​13, 14; 2 Pedro 3:13; Kapahayagan 21:​4, 5) Ginigibo daw iyan kan arin man sa mga iglesya kan Kakristianohan? Kasuarin nindo ultimong nadangog an sarong klerigo na nagpapaliwanag kan Kahadean nin Dios asin kan ipinaheheling kan Kasuratan na ootobon kaiyan? An organisasyon daw na kinabibilangan nindo dinadagka kamong ipakipag-olay sa iba an manongod sa Kahadean nin Dios, asin kun iyo, an mga miembro daw sa kabilogan nakikikabtang sa paggibo kaiyan? Si Jesus ginibo an siring na pagpapatotoo; an saiyang enot na mga disipulo iyo man. Kamo man puwedeng magkapribilehiyo na makikabtang sa aktibidad na ini. Iyan an pinakamahalagang gibohon na ginigibo sa ibabaw kan daga ngonyan.​—Mateo 24:14.

20. Dugang pa sa pagmidbid sa tamang relihiyon, ano an kaipuhan niatong gibohon?

²⁰ Minsan ngani rinibo an relihiyon, an Biblia tolos-tolos kitang tinatabangan na mahale an pagkaribaraw tanganing mamidbid an tunay. Alagad kaipuhan niatong gibohon an labi pa sa pagmidbid sana kaiyan. Mahalaga na gibohon niato iyan. Kun ano an kalabot digdi kokonsideraron nin harohalawig sa sunod niatong artikulo.

[Mga Nota sa Ibaba]

Paano Nindo Sisimbagon?

◻ Sa pagmidbid sa tamang relihiyon, kiisay na punto-de-vista an pinakamahalaga?

◻ Anong apat na ebidensia an nagtotokdo sa Biblia bilang Tataramon nin Dios?

◻ Taano ta bakong gabos na relihiyon na naggagamit kan Biblia inaako nin Dios?

◻ Ano an anom na midbidan na tanda kan sarong tamang relihiyon?

[Kahon sa pahina 10]

An mga Saksi ni Jehova . . .

◆ Ibinabasar an gabos nindang katokdoan sa Biblia.

◆ Sinasamba an sarong tunay na Dios, si Jehova.

◆ Namumuhay sono sa saindang pagtubod ki Jesu-Cristo.

◆ Bakong kalabot sa politika asin iriwal sa kinaban.

◆ Nagmamaigot na ipaheling an daing kapasloan na pagkamoot sa aroaldaw na buhay.

◆ Sinusuportaran an Kahadean nin Dios bilang an nagdadanay na solusyon sa mga problema nin katawohan.

[Ritrato sa pahina 9]

AN BIBLIA​—ano an nagpapaheling na iyan igwa kan mensahe nin Dios para sa bilog na katawohan?