Umawit nin mga Pag-omaw ki Jehova
“Mag-aawit ako ki Jehova, ta sia napamuraway na gayo.”—EXODO 15:1.
1. Anong mga atributo asin kuwalidad ni Jehova an nagtatao sato nin dahelan na omawon sia?
TRESENG beses na itinatao kan Salmo 150 an pagboot na omawon si Jehova o si Jah. An ultimong bersikulo nagpapahayag: “An lambang bagay na naghahangos—mag-omaw iyan ki Jah. Omawa nindo si Jah, banwaan!” Bilang mga Saksi ni Jehova, aram niato na si Jehova maninigong tawan kan satong pag-omaw. Sia an Unibersal na Soberano, an Kaharohalangkawe, an Hadeng daing katapusan, an satong Kaglalang, an satong Parabiyaya. Sia daing kaagid, nasosolo, daing kapareho, daing kapantay sa dakol na paagi. Sia nakaaaram kan gabos, daing sagkod an kapangyarihan, sangkap sa hustisya, asin an personipikasyon nin pagkamoot. Sia orog sa gabos na iba pa marahay; sia maimbod. (Lucas 18:19; Kapahayagan 15:3, 4) Sia daw maninigong tawan kan satong pag-omaw? Tunay na maninigo nanggad!
2. Ano an satong mga dahelan sa pagpahayag nin pagpasalamat ki Jehova?
2 Si Jehova maninigong tawan bako sanang kan satong pagsamba asin pag-omaw kundi kan sato man na pagtanaw nin utang na boot asin pasasalamat para sa gabos na ginibo nia para sato. Sia an Paratao kan “lambang marahay na balaog asin lambang sangkap na regalo.” (Santiago 1:17) Sia an Burabod, an Gikanan, kan gabos na buhay. (Salmo 36:9) An gabos na satong kinakamtan bilang mga miembro kan rasa nin tawo gikan sa saiya, huling sia an satong Dakulang Kaglalang. (Isaias 42:5) Sia man an Paratao kan gabos na espirituwal na biyaya na minaabot sato paagi sa saiyang espiritu, saiyang organisasyon, asin saiyang Tataramon. Igwa kitang kapatawadan sa mga kasalan basado sa pagtao nia kan saiyang Aki bilang pantubos sa sato. (Juan 3:16) Igwa kita kan paglaom sa Kahadean na ‘bagong kalangitan asin sarong bagong daga na dian magdadanay an katanosan.’ (2 Pedro 3:13) May marahay kitang pakikiasosyar sa mga kapwa Kristiano. (Roma 1:11, 12) Igwa kita kan onra asin mga bendisyon sa pagigin saiyang mga Saksi. (Isaias 43:10-12) Asin yaon sato an mahalagang pribilehiyo nin pamibi. (Mateo 6:9-13) Tunay nanggad, kadakol tang dahelan na tumao nin pasasalamat ki Jehova!
Mga Paagi na Makakapag-omaw Kita ki Jehova
3. Sa anong manlaenlaen na paagi kita puwedeng mag-omaw ki Jehova asin magpahayag kan satong pagpasalamat saiya?
3 Paano kita, bilang dusay na mga lingkod ni Jehova, makakapag-omaw saiya asin makakapagpahayag kan satong pasasalamat? Magigibo niato iyan paagi sa pakikikabtang sa Kristianong ministeryo—pagpapatotoo sa harong-harong, mga pagdalaw liwat, pagkondukta nin mga pag-adal sa Biblia, asin pag-iba sa paghuhulit sa tinampo. Maoomaw ta man sia paagi sa impormal na pagpapatotoo kun may oportunidad. Dangan man, maoomaw niato si Jehova paagi kan satong matanos na paggawe, pati kan husay asin mabining pagbulos asin pag-alinyar niato. An mga Saksi ni Jehova parateng inoomaw huli kan pagigin marahay na mga arogan sa mga bagay na ini. Saro pa, puwede niatong omawon si Jehova asin pasalamatan sia paagi sa pamibi.—Helingon an 1 Cronica 29:10-13.
4. Ano an saro sa pinakamagayon na mga paagi na makakapag-omaw kita sa satong mamomoton na langitnon na Ama?
4 Dugang pa, an saro sa pinakamagayon na mga paagi na maoomaw niato an satong mamomoton na langitnon na Ama iyo an pag-omaw saiya asin sa saiyang mga karahayan paagi sa magayon an tonong mga awit na pan-Kahadean. An dakol na musikero asin kompositor minaoyon na an pinakamagayon na instrumento sa musika iyo an boses nin tawo. An mga eksperto sa musikang klasikal nagmawot na magsurat nin mga opera huling orog an satispaksion sa paghinanyog sa boses nin tawo na nagkakanta.
5. Huli sa anong mga dahelan na maninigo niatong isaboot an satong pagkanta nin mga awit na pan-Kahadean?
5 Sierto nanggad na naoogma si Jehova sa paghinanyog sa mga tawo na nagkakanta, nangorogna kun sinda nagkakanta nin mga awit nin pag-omaw asin pasasalamat! Sierto kun siring, maninigo niatong isaboot na gayo an satong pagkanta nin mga awit na pan-Kahadean sa satong manlaenlaen na pagtiripon—mga pagtiripon sa kongregasyon, pansirkitong asamblea, espesyal na aldaw nin asamblea, pandistritong kombension, asin internasyonal na kombension. An satong libro nin mga awit kadakol nin talagang magagayon na awit, na an kagayonan kaiyan parateng inoomaw kan mga tagaluwas. Mantang kita orog na nawiwili sa pagkanta nin mga awit na pan-Kahadean, orog man kitang nagtatao nin kaogmahan sa iba asin nin pakinabang sa sato.
Pag-awit nin mga Pag-omaw ki Jehova kan mga Panahon sa Biblia
6. Paano an mga Israelita nagpahayag nin pag-apresyar sa pagkaligtas sainda sa Dagat na Pula?
6 An Tataramon nin Dios nagsasabi sato na si Moises asin an iba pang Israelita nag-arawit na may kapangganahan kan sinda iligtas sa hukbo ni Faraon sa Dagat na Pula. An saindang awit nagpoon sa mga tataramon na ini: “Mag-aawit ako ki Jehova, ta sia napamuraway na gayo. An kabayo asin an nagkakabayo ihinolog nia sa dagat. An sakuyang kosog asin an sakuyang kapangyarihan iyo si Jah, ta sia an nagin sakuyang kaligtasan. Iyo ini an sakuyang Dios, asin papakadakulaon ko sia.” (Exodo 15:1, 2) Maiimahinar niatong marhay an entusiasmo asin kagayagayahan kan mga Israelita mantang inaawit ninda an mga tataramon na iyan pakatapos kan saindang milagrosong pagkaligtas!
7. Ano pang ibang pambihirang mga halimbawa an irinekord kan Hebreong Kasuratan mapadapit sa pag-omaw kan mga Israelita ki Jehova paagi sa pag-awit?
7 Sa 1 Cronica 16:1, 4-36, mababasa ta na si Jehova inomaw paagi sa pag-awit asin pagtogtog nin mga instrumento sa musika kan darahon ni David an Kaban sa Jerusalem. Idto tunay na magayagayang okasyon. Nagkaigwa man nin pag-awit nin pag-omaw ki Jehova na inaakompanyaran nin instrumental na musika kan panahon na idedikar ni Hadeng Salomon an templo sa Jerusalem. Mababasa ta sa 2 Cronica 5:13, 14: “Nangyari na kan an mga paratrumpeta asin paraawit garo saro sa pagpadangog nin sarong tanog sa pag-omaw asin pagpasalamat ki Jehova, asin kan pakosogon ninda an tanog paagi kan mga trumpeta asin kan mga simbalo asin kan mga instrumento sa pag-awit patin paagi sa pag-omaw ki Jehova, ‘huli ta sia marahay, huli ta an saiyang mamomoton na kabootan sagkod sa panahon na daing katapusan,’ an harong mismo napano nin panganoron, an mismong harong ni Jehova, asin an mga saserdote dai nakatindog sa paglingkod huli kan panganoron; huli ta an kamurawayan ni Jehova nakapano sa harong kan tunay na Dios.” Ano an ipinaheheling kaiyan? Na si Jehova naghihinanyog sa awit nin pag-omaw na ini asin naoogma man kaiyan, siring sa ipinarisa kan makangangalas na panganoron. Kan huri, nagkaigwa nin pag-awit nin duwang koro sa panahon kan inagurasyon kan mga lanob nin Jerusalem kan kaaldawan ni Nehemias.—Nehemias 12:27-42.
8. Ano an nagpapaheling na isinaboot kan mga Israelita an pag-awit?
8 An totoo, an pag-awit importanteng marhay na kabtang kan pagsamba sa templo kaya 4,000 na Levita an itinalaga sa musikal na paglilingkod. (1 Cronica 23:4, 5) An mga ini mag-aakompanyar sa mga parakanta. An musika, nangorogna an mga parakanta, igwang importanteng kabtang sa pagsamba, bako man na tanganing itudok sa boot an mas magagabat na kabtang kan Pagboot, kundi na itao an tamang espiritu para sa pagsamba. Nakatabang iyan sa mga Israelita na sambahon si Jehova sa determinadong paagi. Mangnoha an preparasyon asin atension sa detalyeng itinao sa kabtang na ini: “An kabilangan ninda pati kan saindang mga tugang na lalaki na sanay sa pag-awit ki Jehova, na gabos eksperto, duwang gatos may walong polo may walo.” (1 Cronica 25:7) Mangnoha kun gurano ninda isinaboot an pag-awit nin pag-omaw ki Jehova. Sinda sanay sa pag-awit asin mga eksperto!
9. Anong pagdodoon an itinatao sa pag-awit sa Kristianong Griegong Kasuratan?
9 Kun dudumanan niato an enot na siglo kan satong komon na kapanahonan, ano an satong manonompongan? Si Jesus, sa banggi kan pagpasaloib saiya, na kadakol kan kagabatan sa saiyang isip, nakamate pa giraray kan pangangaipo na tapuson an saiyang pagselebrar kan Paskua asin an pagpoon kan Memorial kan saiyang kagadanan paagi sa pag-awit nin mga pag-omaw ki Jehova. (Mateo 26:30) Siring man, mababasa ta na “kan matanga na an banggi,” si Pablo asin Silas, pakatapos na hampakon asin ibilanggo, “namimibi asin nag-oomaw sa Dios sa awit; iyo, an mga bilanggo nadadangog sinda.”—Gibo 16:25.
Pag-awit nin mga Pag-omaw—Sarong Mahalagang Kabtang kan Satong Pagsamba
10. Anong kapagbootan an itinatao kan Tataramon nin Dios manongod sa pag-omaw saiya sa pag-awit?
10 May posibilidad daw na hinohona nindo na an pagkanta nin mga awit na pan-Kahadean bakong gayong mahalaga na tawan nindo nin odok sa pusong atension? Kun iyo, dai daw nindo maninigong siyasaton giraray an bagay, huli sa pagpahalaga ni Jehova Dios asin ni Jesu-Cristo sa pag-awit nin mga pag-omaw? Tara, an Tataramon nin Dios pano nin mga pagboot na omawon si Jehova asin umawit nin mga pag-omaw sa saiya! Halimbawa, sa Isaias 42:10, satong mababasa: “Awit kamo ki Jehova nin bagong awit, nin saiyang kaomawan magpoon sa kaporoporohi kan daga, kamo na mga nagdadalhog sa dagat asin sa nakapapano dian, kamong mga isla asin kamong mga nag-eerok dian.”—Helingon man an Salmo 96:1; 98:1.
11. Ano an sadol ni apostol Pablo manongod sa pag-awit?
11 Aram ni apostol Pablo na an pag-awit puwedeng makapakosog sa satong espiritu, kaya makaduwa nia kitang sinadol manongod kaiyan. Satong mababasa sa Efeso 5:18, 19: “Padagos kamong mapano nin espiritu, na nag-oorolay-olay sa mga salmo asin mga pag-omaw sa Dios patin espirituwal na mga awit, na nag-aawit asin inaakompanyaran an saindong sadiri nin musika sa saindong puso ki Jehova.” Asin sa Colosas 3:16, mababasa niato: “Togotan nindo na an tataramon kan Cristo mayaman na mag-erok dian sa saindo sa gabos na kadonongan. Padagos kamong magtokdo asin magpasaradolsadol sa lambang saro paagi sa mga salmo, mga pag-omaw sa Dios, espirituwal na mga awit na may paggalang, na nag-aarawit sa saindong puso ki Jehova.”
12. Ano an satong mga halimbawa nin kanta na nagtatabang sato na magtokdo asin magpasaradolsadol sa lambang saro?
12 Risahon na sa kada okasyon si Pablo paorootrong nagsambit sa pag-awit, kun sinasambit nia an ‘mga salmo, pag-omaw sa Dios, espirituwal na mga awit, pag-awit na may musika sa saindong puso.’ Siring man, pinonan nia an saiyang pahayag sa mga taga-Colosas sa pagsabi na sa paaging ini kita ‘nakapagtotokdo asin nakapagpapasaradolsadol sa lambang saro.’ Asin iyan talagang ginigibo niato, siring kan maheheling sa mismong mga titulo kan satong mga awit—“All Creation, Praise Jehovah!” (numero 5), “Be Steadfast, Unmovable!” (numero 10), “Be Joyful for the Kingdom Hope!” (numero 16), “Fear Them Not!” (numero 27), “Laud Jehovah Our God!” (numero 100), bilang pira sanang halimbawa.
13. Paano ipinaheling kan “maimbod asin madonong na oripon” an kahalagahan kan pag-awit bilang kabtang kan satong pagsamba?
13 Kaoyon sa mga kapagbootan na ini, an “maimbod asin madonong na oripon” nag-areglo na an satong mga pagtiripon—mga pagtiripon sa kongregasyon, pansirkitong asamblea, espesyal na aldaw nin asamblea, pandistritong kombension, asin internasyonal na kombension—buksan asin tapuson sa pagkanta nin mga awit na pan-Kahadean. (Mateo 24:45) Dugang pa, an mga awit iiniiskedyul na kantahon sa ibang oras durante kan mga pagtiripon na ini. Mantang an satong mga pagtiripon perming minapoon sa pagkanta nin mga awit na pan-Kahadean, bako daw na maninigo niatong pagmaigotan na umabot na nasa oras, na tamang-tama na makapakikabtang sa kabtang na iyan kan satong pagsamba? Asin huling an mga pagtiripon tinatapos sa pag-awit, bako daw na maninigo kitang magdanay sagkod sa pantapos na kanta asin sa pamibi na kasunod tolos kaiyan?
14. Ano an satong mga halimbawa nin angay na mga kanta na pinipili para sa satong mga programa?
14 An mga awit sa satong mga pagtiripon maingat na pinili tanganing makasono sa programa. Halimbawa, sa “Banal na Pagtotokdo” na Pandistritong Kombension kan 1993, an kanta numero 191, an “Make the Truth Your Own,” na pinakokosog an mga Kristiano na tumangon si Satanas, an kinaban, asin an makasalan na laman, kasunod tolos kan tolong pahayag manongod sa mga kaiwal na ini. Siring man, an kanta numero 164, an “Children—Precious Gifts From God,” na pano nin sadol sa mga magurang, kasunod tolos kan pahayag na nagtatampok kan mga obligasyon nin mga magurang na tokdoan an saindang mga aki. An kanta numero 70, an “Be Like Jeremiah,” sinundan kan serye nin mga pahayag na basado sa mga hula ni Jeremias. Asin pakatapos kan simposium mapadapit sa manlaenlaen na kabtang kan satong ministeryo sa Kahadean suminunod an kanta numero 156, an “I Want To,” sarong kanta na nagpapahalaga sa paglilingkod. An iyo man sanang pag-iingat ginigibo sa pagpili kan mga kanta sa Pag-adal sa Torrengbantayan, Pagtiripon sa Paglilingkod, asin Teokratikong Paadalan sa Pagmiministro. Kaya angay na kun an mga magurang nagtatao nin mga pahayag-publiko asin sinasabi an kakantahon sa pagbukas kan programa, maninigo sindang pumili nin kanta na angay sa tema kan saindang pahayag.
15. Paano puwedeng pakosogon kan tsirman sa pagtiripon an apresasyon sa kakantahon?
15 Sa pagpaisi kan kakantahon, puwedeng pakosogon kan tsirman an apresasyon sa kanta paagi sa pagsabi kan titulo o tema kaiyan. Dai ta inaawit an mga numero kundi an Makakasuratan na mga tema. Matatabangan man kaiyan an kongregasyon na orog na apresyaron an kanta kun sinasambit an teksto sa ibaba kan titulo. Dangan, puwede man na isunod an pirang tataramon, arog baga kan pagsabi na an gabos maninigong umawit sono sa pagmateng ipinahahayag kan kanta.
Magpaheling nin Pag-apresyar sa Karahayan ni Jehova Paagi sa Pag-awit
16. Paano kita makakaawit sono sa pagmateng ipinahahayag kan satong mga kanta?
16 Mantang an mga liriko kan satong mga awit na pan-Kahadean pano nin kahulogan, kaipuhan tang magkonsentrar sa mga tataramon mantang inaawit niato iyan. Boot niatong umawit sono sa pagmateng ipinahahayag kan kada kanta. An iba, arog baga kan manongod sa pagkamoot, na sarong bunga kan espiritu, odok na gayo sa puso. (Galacia 5:22) An mga ini inaawit niatong may kosog nin emosyon asin init. An iba magayagaya, asin maninigo niatong hingoahon na awiton iyan nin maogma. Pero an iba pa mapuwersang mga kanta sa pagmartsa, asin an mga ini maninigong awiton na may entusiasmo asin marigon na kompiansa. Sa satong Teokratikong Paadalan sa Pagmiministro, sinasadol kitang magpahayag nin init asin pagmate patin man entusiasmo sa satong mga pag-aatubang. An pagpaheling nin init, pagmate, asin entusiasmo kun inaawit an satong mga kanta orog pa nganing mahalaga.
17. (a) Anong kasagwean sa bakong maimbod na mga Israelita an habo niatong tumama sa satong pagkanta? (b) Ano an ibinubunga kun isinasaboot niato an sadol na nasa satong mga kanta?
17 Kun makanta kita kan satong mga awit na pan-Kahadean na iba an nasa isip niato, na dai lubos na sinasabot an kahulogan kan mga termino, bako daw na garo kita kaagid kan bakong maimbod na mga Israelita na sinagwe huling, minsan ngani inoomaw ninda an Dios sa saindang mga ngabil, an saindang puso harayo sa saiya? (Mateo 15:8) Habo niato na an kasagwean na iyan tumama sa satong paagi nin pagkanta kan mga awit na pan-Kahadean, bako daw? Paagi sa pagpaheling nin igong apresasyon sa pagkanta kan satong mga awit na pan-Kahadean, maaanimar niato bako sanang an satong sadiri kundi pati an mga nasa kataed niato, kabilang na an mga barobata. Iyo, kun an gabos na nagkakanta sa satong mga Kingdom Hall isinasaboot an sadol na nasa mga awit na ini, ini magigin mapuwersang pampakosog na magin maigot sa ministeryo asin na likayan an mga siod sa paggibo nin sala.
18. Ano an nagin epekto sa sarong babae kan pagkanta nin mga awit na pan-Kahadean?
18 Sa parate, an mga tagaluwas napapahanga sa pagkanta niato kan mga awit na pan-Kahadean. An Watchtower sarong beses ipinublikar ini: “Na an [satong] pagkanta puwedeng makatabang sa mga tawo na makaaram dapit ki Jehova Dios ipinaheling nin eksperyensia nin sarong babae na nabautismohan sa 1973 na ‘Banal na Kapangganahan’ na Asamblea, sa Yankee Stadium, siudad nin Nueva York. Solo sia kan enot niang pagduman sa lokal na Kingdom Hall asin inatenderan nia an duwang pagtiripon. Kan an kongregasyon inaawit an . . . ‘Keep Your Eyes on the Prize!,’ napahanga siang gayo kapwa sa mga tataramon asin sa paagi kan pagkanta kaiyan kaya sia nagdesisyon na ini an lugar na gusto niang mamugtakan. Pagkatapos dinolok nia an saro sa mga Saksi asin naghagad nin pag-adal sa Biblia, asin [sia] padagos na nag-oswag sagkod sa pagigin Kristianong saksi ni Jehova.”
19. Anong ultimong pampakosog an itinatao manongod sa bilog na pusong pagkanta kan satong mga awit na pan-Kahadean?
19 Sa kadaklan kan satong pagtiripon, medyo dikit an oportunidad na ikapahayag kan mga nagdadangog an saindang saboot asin apresasyon. Alagad kita gabos makapagpapahayag kan satong saboot manongod sa karahayan ni Jehova paagi sa odok sa pusong pakikikabtang sa pagkanta kan mga awit na pan-Kahadean. Saro pa, kun kita nagtitiripon, bako daw na kita naoogma? Kaya maninigong mamatean niato na gustong-gusto tang kumanta! (Santiago 5:13) Tunay nanggad, sagkod na inaapresyar ta an karahayan ni Jehova asin an saiyang dai na kutana maninigong kabootan, mag-aawit kita nin bilog na pusong mga pag-omaw sa saiya.
Paano Nindo Sisimbagon?
◻ Ano an duwang pundamental na dahelan sa pag-omaw ki Jehova?
◻ Sa anong manlaenlaen na paagi kita puwedeng mag-omaw ki Jehova?
◻ Ano an saro sa pinakamagayon na mga paagi na makakapag-omaw kita ki Jehova?
◻ Ano an satong Makakasuratan na mga halimbawa nin pag-omaw ki Jehova sa pag-awit?
◻ Paano kita makapaheheling nin igong apresasyon sa pagkanta niato kan mga awit na pan-Kahadean?
[Kahon sa pahina 11]
Maogma sa mga Awit na Iyan!
Garo baga may mga medyo nadedepisilan sa pag-adal kan nagkapirang awit. Minsan siring, an ibang kongregasyon mayo nin dakulang problema sa pagkanta kan kadaklan sa mga awit na ini. Tibaad an kaipuhan sana kadikit pang paghihingoa na manodan an sa primero garo baga bakong pamilyar. Oras na magin pamilyar na sa siring na mga awit, parateng mas inaapresyar iyan kan kongregasyon kisa sa mga dai nagkakaipo nin paghihingoa na manodan. Dangan an gabos sa kongregasyon puwedeng awiton iyan na may kompiansa. Iyo, sinda puwedeng maogma sa mga awit na iyan.
[Kahon sa pahina 12]
Kantahon an mga Awit na pan-Kahadean sa Sosyal na mga Pagtirotiripon
An satong pagkanta nin mga awit na pan-Kahadean dai kinakaipuhan na sa Kingdom Hall sana. Si Pablo asin Silas nag-awit nin mga pag-omaw ki Jehova mientras na nasa bilanggoan. (Gibo 16:25) Asin an disipulong si Santiago nagsabi: “Igwa daw nin naoogma? Mag-awit sia nin mga pag-omaw sa Dios.” (Santiago 5:13, nota sa ibaba) Sa sosyal na mga pagtirotiripon an gabos maogma. Kaya taano ta dai kumanta nin mga awit na pan-Kahadean? Ini espesyalmenteng nakaoogma kun an pag-awit inaakompanyaran nin piano o gitara. Kun bako, igwa nin mga tape nin piano kan satong mga awit na pan-Kahadean; dakol na pamilyang Saksi an igwa nin album kan mga tape na ini. Iyan bako sanang marahay na pan-akompanyar sa pagkanta kundi bagay man para sa magayon pagdangogon na musika.
[Ritrato sa pahina 8, 9]
Pakatapos kan pagkaligtas sainda sa Dagat na Pula, ipinahayag kan Israel an saindang kagayagayahan sa pag-awit
[Ritrato sa pahina 10]
An magayagayang pag-awit sarong kabtang kan Kristianong pagsamba ngonyan