Mga Hobenes—Kiisay na Katokdoan an Saindong Hinihimate?
“An nagkapira masuhay sa pagtubod, na nagtatao nin atension sa . . . katokdoan nin mga demonyo.”—1 TIMOTEO 4:1.
1. (a) Ano an pagpipilian kan mga hobenes? (b) Paano nagtotokdo si Jehova?
AN HAPOT digdi na iinaatubang sa mga hobenes, Kiisay na katokdoan an saindong hinihimate? Ini nagsusuherir na kamong mga hobenes igwang pagpipilian. An pagpipilian iyo an paghimate sa katokdoan nin Dios o an pagsunod sa mga katokdoan nin mga demonyo. Si Jehova nagtotokdo paagi sa saiyang Tataramon, an Biblia, patin man paagi sa ministeryo kan mga ginagamit nia bilang saiyang mga representante digdi sa daga. (Isaias 54:13; Gibo 8:26-39; Mateo 24:45-47) Alagad napangalas daw kamo na an mga demonyo nagtotokdo man palan?
2. Taano ta mahalaga na mag-ingat tumang sa mga katokdoan nin mga demonyo partikular na sa panahon na ini?
2 Si apostol Pablo nagsurat: “Sa huring mga panahon an nagkapira masuhay sa pagtubod, na nagtatao nin atension sa mapandayang ipinasabong na mga tataramon asin katokdoan nin mga demonyo.” (1 Timoteo 4:1) Mantang kita nabubuhay na sa “huring mga aldaw” na si Satanas asin an saiyang mga demonyo nangorognang aktibo, nasasabotan daw nindo kun taano ta ihinahapot niamo an, Kiisay na katokdoan an saindong hinihimate? (2 Timoteo 3:1-5; Kapahayagan 12:7-12) Huling si Satanas asin an saiyang mga demonyo tusong marhay, mapan-akit na marhay sa saindang mga pamamaagi, mahalaga na tawan nindo nin maingat na paghorophorop an hapot na ini.—2 Corinto 11:14, 15.
An mga Demonyo Asin an Saindang mga Katokdoan
3. Sairisay an mga demonyo, ano an saindang katuyohan, asin paano ninda hinihingoang maotob iyan?
3 An mga demonyo kaidtong panahon mga anghel ni Jehova, pero nagrebelde sinda tumang sa saindang Kaglalang asin sa siring nagin mga alipores ni Satanas. (Mateo 12:24) An saindang katuyohan raoton an mga tawo asin italikod sinda sa paglilingkod sa Dios. Tanganing maotob ini, ginagamit kan mga demonyo an mga paratokdong tawo sa pagpalakop nin paslo, inmoral na paagi nin pamumuhay na kinokondenar ni Jehova. (Ikomparar an 2 Pedro 2:1, 12-15.) An pagrepaso dapit sa kun paano an dati maimbod na mga anghel nagin mga demonyo tatabangan kamong mamidbid an saindang mga katokdoan asin an paagi nin pamumuhay na pinalalakop kan mga katokdoan na ini.
4. (a) Taano an sumbikalan na mga anghel ta nagdigdi sa daga kan kaaldawan ni Noe? (b) Ano an nangyari sa maraot na mga anghel asin sa saindang mga aki durante kan Baha?
4 Kan kaaldawan ni Noe, may mga anghel na naakit na gayo sa magagayon na aking daraga nin mga tawo kaya an espiritung mga linalang na ini binayaan an saindang mga kamugtakan sa langit tanganing bumaba digdi sa daga. An saindang pakikidorog sa mga babae nagbunga nin mestisong mga aki na inaapod na Nefilim. Mantang bakong natural para sa espiritung mga linalang na makidorog sa mga tawo, an ginibo kan sumbikalan na mga anghel sa mga babaeng idto siring karaot sa homoseksuwal na mga gawe na kan huri ginibo kan mga lalaki patin aking lalaki sa Sodoma. (Genesis 6:1-4; 19:4-11; Judas 6, 7) Minsan ngani an mga kasaroan kan mga anghel napahamak sa baha kaiba kan saindang mestisong mga aki, an maraot na mga anghel hinuba an saindang nagmateryalisar na hawak na laman asin buminalik sa langit na duman sinda nagin kairibang demonyo ni Satanas na Diablo.—2 Pedro 2:4.
5. Anong klase nin mga linalang an mga demonyo, asin paano ninda hinihingoang raoton an mga ley nin Dios?
5 Sa pagkonsiderar sa makasaysayan na pangyayaring ini, nasasabotan daw nindo kun anong klase talaga nin mga linalang an mga demonyo? Sinda salang mga paragamit sa sekso na iyo an dai naheheling na mga nagkokontrol sa rungaw sa seksong kinaban na ini. Minsan ngani inolang na sinda sa pagmateryalisar giraray bilang tawo, nagkakamit sinda nin kaogmahan sa salang mga paggamit sa sekso kaidtong mga kaya nindang raoton digdi sa daga. (Efeso 6:11, 12) An mga demonyo naghihingoang raoton an mga ley ni Jehova manongod sa kabinian asin moralidad paagi sa pagpalataw kaiyan na garo baga sobra man an mga ibinabawal. An maraot na mga anghel na ini sinusuportaran an seksuwal na inmoralidad bilang normal, kawiliwiling paagi nin pamumuhay.
Pagpapalakop sa mga Katokdoan nin mga Demonyo
6. Taano ta dai kita maninigong magngalas na an mga demonyo pinalalakop an saindang mga katokdoan sa tusong paagi?
6 Na an mga demonyo magpapalakop kan saindang mga katokdoan sa tusong paagi dai niato maninigong ipagngalas, huling ini an paagi na ginamit kan saindang poon, si Satanas na Diablo, sa pagdaya ki Eva. Tandaan na sia nakipag-olay ki Eva na garo baga gusto niang makatabang. “Ano totoo na an Dios nagsabi na dai kamo magkakan sa gabos na kahoy kan tatamnan?” an hapot ni Satanas. Dangan tuso niang hiningoa na paluyahon an katokdoan nin Dios paagi sa pagsabi ki Eva na ini makikinabang sa pagkakan sa ipinangangalad na kahoy. “Sa mismong aldaw na kamo kumakan kaiyan,” an tuga kan Diablo, “mabubuklat an saindong mga mata asin kamo magigin arog nin Dios, na nakakamidbid kan marahay asin maraot.” (Genesis 3:1-5) Kaya si Eva nasugotan, iyo natentaran, na magmasumbikal sa Dios.—2 Corinto 11:3; 1 Timoteo 2:13, 14.
7. Ano an nagin epekto kan tusong mga katokdoan kan mga demonyo, asin anong patanid an itinatao kaini?
7 Siring man, dai pa sana nahahaloy, dakol an nasugotan. An mga demonyo tusong marhay na ikinapalakop an seksuwal na inmoralidad kaya iyan inaako na kan dakol na dati kinokondenar iyan. Halimbawa, kan an bantog na kolumnista sa paghatol sa Estados Unidos sinimbag an sarong surat manongod sa mga bakong kasal na nagdodorog, sia nagsurat: “Dai ko man lamang naisip na liliwaton ko an sakong paninindogan dapit sa isyung ini, pero naniniwala ako ngonyan na an mga magkailusyon na seryoso manongod sa pag-agom maninigong magkaigwa nin nagkapirang pagbiyahe na magkaibanan sa katapusan nin semana tanganing baloon kun talagang magkabagay sinda.” Dangan idinagdag nia: “Dai ako makapaniwala na isinurat ko iyan!” Minsan sia dai makapaniwala na irinekomendar nia an pakikisaro, pero ginibo nia iyan! Malinaw nanggad, dapat kitang mag-ingat na an mga katokdoan nin mga demonyo dai makaapektar sa satong pagmansay dapit sa mga gibo na kinokondenar nin Dios.—Roma 1:26, 27; Efeso 5:5, 10-12.
8. (a) Paano ginagamit sa Biblia an terminong “kinaban”? (b) Siisay an namomoon sa kinaban, asin paano maninigong mansayon kan mga parasunod ni Jesus an kinaban?
8 Dai niato noarin man dapat paglingawan na si Satanas an “poon kan kinaban na ini.” An totoo, si apostol Juan nagsabi na “an bilog na kinaban namumugtak sa kapangyarihan kan maraot.” (Juan 12:31; 1 Juan 5:19) Totoo, kun minsan ginagamit ni Jesus an terminong “kinaban” sa pagpanongod sa bilog na katawohan. (Mateo 26:13; Juan 3:16; 12:46) Alagad, mas parate, ginagamit nia an terminong “kinaban” sa pagpanongod sa gabos na organisadong sosyedad nin tawo na nag-eeksister sa luwas kan tunay na Kristianong kongregasyon. Halimbawa, si Jesus nagsabi na an saiyang mga parasunod dapat na “bakong kabtang kan kinaban” (maraot na sosyedad nin tawo) asin huling bako sindang kabtang kan kinaban, ikaoongis sinda kan kinaban. (Juan 15:19; 17:14-16) Nagpatanid pa an Biblia na maninigo niatong likayan na magin katood kan kinaban na ini na pinamamahalaan ni Satanas.—Santiago 4:4.
9, 10. (a) Anong mga bagay sa kinaban an nag-eengganyar nin salang pagmawot sa sekso? (b) Paano puwedeng mamidbid kun siisay an nasa likod kan mga itinotokdo kan mga aling-alingan sa kinaban?
9 Si apostol Juan nagsadol: “Dai kamo mamoot sa kinaban o sa mga bagay kan kinaban.” Sinabi man nia: “An gabos na nasa kinaban—an horot nin laman asin an horot nin mga mata asin an pagpaabaw-abaw kan kaya sa buhay—bakong gikan sa Ama.” (1 Juan 2:15, 16) Horophoropa ini. Ano an yaon sa kinaban ngonyan na nag-eengganyar nin salang pagmawot, halimbawa para sa bawal na sekso? (1 Tesalonica 4:3-5) Kumusta man an kadaklan na musika sa kinaban? An sarong pulis na nag-aasikaso sa mga nasa probasyon sa California nagsabi: “Sa pundamental, an musika nagtotokdo na dai nindo kaipuhan na maghinanyog sa saindong mga magurang, asin na maninigo kamong mamuhay sa paagi na gusto nindo.” Namimidbid daw nindo an gikanan kan katokdoan na itinatao kan siring na musika?
10 Tandaan na garo man sana sinabihan ni Satanas si Eva: ‘May dai ka nakakamtan. Mamuhay ka sa paaging gusto mo. Magdesisyon ka sa sadiri mo kun arin an marahay o kun arin an maraot. Dai mo kaipuhan na maghinanyog sa Dios.’ (Genesis 3:1-5) Bako daw na iyo man sana iyan an klase nin mensahe na yaon sa kadaklan na musika sa kinaban? Pero an mga demonyo dai nagtotokdo paagi sana sa musika. Ginagamit man ninda sa pagtokdo an komersial na mga programa sa telebisyon, sine, asin video. Paano daw iyan? Bueno, an mga paagihan nin komunikasyon sa kinaban nagpapaheling nin mga aling-alingan na pinalalataw na an moral na mga katokdoan nin Dios sobra kaestrikto. An mga iyan nagpapalakop nin pakikisaro paagi sa pagdodoon kaiyan asin pagpaheling kaiyan na kawiliwili.
11. Kun manongod sa moral, ano an parateng itinotokdo kan telebisyon?
11 An magasin na U.S.News & World Report nagsabi: “Kan 1991, an tolong kompaniya nin telebisyon [sa E.U.] nagpasale nin labi sa 10,000 na seksuwal na mga eksena durante nin mga oras na may pinakadakol na nagdadalan; sa kada eksena na nagpapaheling nin seksuwal na pagdodorog nin mga mag-agom, an mga kompaniya nin telebisyon nagpasale nin 14 eksena sa sekso nin mga bakong mag-agom.” Paagi sa pagpasale nin labing 9,000 na eksena nin bawal na sekso durante nin mga oras na may pinakadakol na nagdadalan sa sarong taon, ano an masasabi nindong itinotokdo nin telebisyon? Si Barry S. Sapolsky, na kaibang autor sa report na “Sekso sa mga Oras na May Pinakadakol na Nagdadalan sa Telebisyon: 1979 Kontra sa 1989,” nagsabi: “Kun an sarong barobata magdadalan nin TV sa laog nin mga taon na kun saen an mga tawo naggigibo nin pakipaggitilan o malinaw na seksuwal na gawe-gawe, an rinibong ladawan na ini sa laog nin mga taon totokdoan sinda na an sekso marahay—asin mayong ano man na maraot na ibubunga.” Mayong duda manongod kaini: An aling-alingan sa kinaban tinotokdoan an mga hobenes na mayo daa nin mga susundon, na puwede an pakikisaro, asin na mayo nin maraot na ibubunga an pamumuhay na kinokondenar nin Dios.—1 Corinto 6:18; Efeso 5:3-5.
12. Taano an aling-alingan sa kinaban ta peligroso partikular na sa Kristianong mga hobenes?
12 An musika, sine, video, asin telebisyon sa kinaban dinisenyo tanganing akiton an mga hobenes. Pinalalakop kaiyan an maraot na mga katokdoan kan mga demonyo! Alagad maninigo daw na ipagngalas ini? Horophoropa ini. Kun an falsong relihiyon asin politika kabtang kan kinaban ni Satanas—asin malinaw na talagang iyo—rasonable daw na maniwala na an aling-alingan na pinalalakop kan kinaban mayo nin impluwensia nin demonyo? Kamong mga hobenes partikularmente kaipuhan na mag-ingat na dai “pagtogotan na pormahon kamo kan kinaban na nakapalibot saindo oyon sa sadiring hormahan kaiyan.”—Roma 12:2, The New Testament in Modern English, ni J. B. Phillips.
Gumibo nin Pagsiyasat sa Sadiri
13. Anong pagsiyasat sa sadiri an maninigong gibohon?
13 An bagay dapit sa kun kiisay na mga katokdoan an hinihimate nindo nadedeterminaran bako sanang paagi sa saindong pananaram kundi siring man sa saindong mga gibo. (Roma 6:16) Kaya hapota an saindong sadiri, ‘An sako daw na ugale asin sakong pamumuhay sobra kaapektado kan nanonodan ko paagi sa mga paagihan nin propaganda sa kinaban? Nakalalaog na daw an mga katokdoan kan mga demonyo sa sakong buhay?’ Tanganing tabangan kamong masimbag an mga hapot na iyan, taano ta dai ikomparar kun guranong oras asin kosog an ginagamit nindo sa pag-adal sa Biblia, pag-atender sa Kristianong mga pagtiripon, asin pakipag-olay sa iba manongod sa Kahadean nin Dios sa oras na ginagamit nindo sa pagdalan nin TV, pagdangog nin musika, asin pagpartisipar sa paborito nindong isport, o pakikikabtang sa kaagid na mga aktibidad? Mantang kadakol—iyo nanggad, an mismong buhay nindo—an nakataya, gumibo nin sadiosan na pagsiyasat sa sadiri.—2 Corinto 13:5.
14. Ano an makaaapektar sa satong espirituwal na salud, asin anong nakapapepensar na punto an maninigo niatong girumdomon?
14 Aram nindong gayo na an materyal na kakanon na saindong kinakakan makaaapektar sa saindong pisikal na salud. Kaagid kaiyan, an saindong espirituwal na salud apektado kan ipinakakakan nindo sa saindong isip asin puso. (1 Pedro 2:1, 2) Minsan ngani puwedeng dayaon nindo an saindong sadiri manongod sa kun ano an talagang mga pinagkakainteresan nindo, dai nindo puwedeng dayaon an satong Hokom, si Jesu-Cristo. (Juan 5:30) Kaya hapota an saindong sadiri, ‘Kun si Jesus yaon digdi sa daga, masosopog daw akong padagoson sia asin madangog nia an sakong musika o maheling nia an sakong dinadalan?’ An nakapapepensar na katunayan iyo na si Jesus talagang nagheheling asin nakaaaram kan satong mga gibo.—Kapahayagan 3:15.
Tumangon an mga Katokdoan kan mga Demonyo
15. Taano an mga Kristiano ta maninigong makilaban nin maigot sa pagtumang sa mga katokdoan nin mga demonyo?
15 Makosogon an impluwensia kan mga demonyo sa mga hobenes na himateon an saindang mga katokdoan. An marompot na mga espiritung ini garo baga nag-aalok nin buhay na an pagpanigo tolos-tolos—may kaogmahan asin kasiraman. Tanganing mapaoyonan an Dios, si Moises kan suanoy sinayumahan an “dai nagdadanay na pag-ogma sa kasalan” bilang prominenteng miembro kan harong ni Faraon. (Hebreo 11:24-27) Bakong pasil na sayumahan an mga iinaalok kan mga demonyo, kaya kaipuhan nindong makilaban nin maigot na gibohon an tama. Ini nangorognang totoo huli ta nagmana kita nin kasalan asin an satong puso parateng nagmamawot na gumibo nin sala. (Genesis 8:21; Roma 5:12) Huli sa makasalan na mga inklinasyon, maski si apostol Pablo nagkaipong estriktohan an sadiri asin dai pagtogotan na dominaron sia kan saiyang makalaman na mga horot.—1 Corinto 9:27; Roma 7:21-23.
16. Paano matutumang nin mga hobenes an impluwensia na gumibo nin inmoral na paggawe?
16 Minsan ngani tibaad nasusugotan kamong “sumunod sa kadaklan para sa karatan,” an Dios matatabangan kamong tumangon an impluwensia kan saindong mga kaedad na sunodon an saindang salang dalan. (Exodo 23:2; 1 Corinto 10:13) Pero dapat kamong maghinanyog sa mga paggiya nin Dios, na pinahahalagahan nin marhay sa saindong puso an saiyang mga kasabihan. (Salmo 119:9, 11) Kaipuhan nindong marealisar na kun an mga hobenes nagpaparasolosolo, puwedeng tumubo an horot sa sekso asin gumiya sa paglapas sa pagboot nin Dios. “Kun kami sana kan sakong kailusyon an magkaibanan, an sakong hawak may sarong bagay na gustong gibohon asin an sakong isip sinasabihan akong gumibo nin ibang bagay,” an pag-admitir nin sarong daragita. Kaya midbidon an saindong mga limitasyon asin realisaron na an saindong puso madaya. (Jeremias 17:9) Dai magparasolosolo. (Talinhaga 18:1) Magbugtak nin mga limitasyon sa mga pagpapahayag nin pagkamoot. Asin partikular nang mahalaga, dayupot na makiiba duman sana sa mga namomoot ki Jehova asin may hararom na paggalang sa saiyang mga pagboot.—Salmo 119:63; Talinhaga 13:20; 1 Corinto 15:33.
17. Ano an makatatabang sa Kristianong mga hobenes na magkamit kan kosog sa pagtumang sa mga katokdoan nin mga demonyo?
17 Makatatabang saindo an maingat na pag-adal sa Kristianong mga publikasyon na dinisenyo para sa pagpakosog saindo sa espirituwal. Halimbawa, horophoropa an librong Questions Young People Ask—Answers That Work asin an kapitulo na “An Pakipaglaban Tanganing Gumibo kan Tama” sa librong Puwede Kamong Mabuhay Sagkod Lamang sa Paraiso Digdi sa Daga. Pataroson sa saindong isip asin puso an itinataong Makakasuratan na pagtotokdo, asin pakokosogon kamo kaiyan. An bagay na dai nindo noarin man dapat paglingawan iyo na sa kinaban na ini na kontrolado nin mga demonyo an paggibo nin tama bakong pasil. Kaya makilaban nin maigot. (Lucas 13:24) Dugangan an saindong espirituwal na kosog. Dai pag-arogon an mga maluya, mga matatakton na nagsusunod sa kadaklan.
Makinabang sa Pagtotokdo nin Dios
18. Ano an pirang pakinabang sa paghimate sa pagtotokdo nin Dios?
18 Girumdomon man na nungkang may malilipasan kamong mahalaga sa paghimate sa pagtotokdo ni Jehova. Tunay na namomotan nia kamo, asin iyan an dahelan na sia ‘nagtotokdo saindo na pakinabangon an saindong sadiri.’ (Isaias 48:17) Kaya himateon an pagtotokdo ni Jehova, asin likayan an kolog sa puso huli sa laglag na konsensia, pagkawara nin respeto sa sadiri, dai ginustong pagbabados, mga helang na ikinaoolakit paagi sa seksuwal na pagdodorog, o kaagid na mga kapahamakan. Si Jehova nag-oogma kun an saiyang mga lingkod tinatawan sia nin isisimbag sa angat ni Satanas na an mga tawo dai magdadanay na maimbod sa Dios sa irarom nin pagbalo. (Job 1:6-12) Kun pinaoogma nindo an puso ni Jehova paagi sa pagigin maimbod sa saiya, makaliligtas kamo kun sia maghokom na tumang sa kinaban na ini, mantang an gabos na dai nag-iintindi sa saiyang mga pagboot mapapahamak.—Talinhaga 27:11; 1 Corinto 6:9, 10; 1 Juan 2:17.
19. Ano an halaga kan pakikiasosyar sa mga nagpapahalaga sa mga pakinabang sa pagtotokdo ni Jehova?
19 Kun kamo dayupot na nakikiibaiba duman sa mga pinahahalagahan an mga ginibo ni Jehova para sa sainda, makakanood kamo sa saindang eksperyensia. An sarong babae na dating adikto sa droga asin naggigibo nin inmoralidad nagpaliwanag: “Kun dai ako naghinanyog ki Jehova, gadan na kutana ako. An lalaki na kutana makakaagom sako nagadan na sa AIDS. An gabos na dati kong kinabanon na dayupot na amigo nagadan na sa AIDS o segurado nang magagadan. Parate ko sindang naheheling sa mga tinampo, asin kada aldaw pinasasalamatan ko si Jehova huli sa saiyang mga ley na sinusunod sa saiyang banwaan asin magpapadanay sato na banal kun sato sanang iaaplikar iyan. Nungka akong nagin arog kaini kaogmang marhay, kontento, asin tiwasay sa sakong buhay.” Tunay nanggad, an paghimate sa pagtotokdo ni Jehova perming mapapakinabangan niato!
Gibohon an Tamang Pagpili
20, 21. (a) Ano an duwang pagpipilian kan mga hobenes? (b) Anong nagdadanay na pakinabang an ibubunga kan paghimate sa pagtotokdo nin Dios?
20 Sinasadol niamo kamo mga hobenes: Gibohon an tamang pagpili paagi sa paglilingkod ki Jehova. Dangan magin determinado sa pagdadanay sa desisyon na iyan. (Josue 24:15) Sa aktuwal, saro sana an puwede nindong pilion sa duwang pagpipilian. Si Jesus nagsabi na yaon an halakbang asin mahiwas na dalan—an pasil na dalan sa paggibo kan nakakapaoyon sa sadiri. An dalan na iyan may sagkodan, an kalaglagan. An saro pang dalan piot. Iyan dalan na masakit lakawan sa malaswa an pamumuhay, kontrolado nin mga demonyong kinaban na ini. Alagad an dalan na iyan sa katapustapusi gigiyahan an mga nagraralakaw dian pasiring sa mamuraway na bagong kinaban nin Dios. (Mateo 7:13, 14) Arin na dalan an saindong lalakawan? Kiisay na katokdoan an hihimateon nindo?
21 Kamo an pinapipili ni Jehova. Dai nia hinihingoang piriton kamo na maglingkod saiya. “Ibinugtak ko an buhay asin kagadanan sa atubangan mo,” an sabi kan propeta nin Dios na si Moises, na nagsasadol: “Pilion mo an buhay.” An pagpiling ini ginigibo “paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya.” (Deuteronomio 29:2; 30:19, 20) Madonong logod nindong pilion an paghimate sa pagtotokdo nin Dios asin magkamit kamo nin buhay na daing katapusan sa mamuraway na bagong kinaban nin Dios.
Paano Nindo Sisimbagon?
◻ Sairisay an mga demonyo, asin ano an saindang itinotokdo?
◻ Paano pinalalakop kan mga demonyo an saindang mga katokdoan ngonyan?
◻ Paano mahihimong tumangon an mga katokdoan kan mga demonyo?
◻ Ano an mga pakinabang sa paghimate sa pagtotokdo ni Jehova?
[Ritrato sa pahina 16]
Bago kan Baha, an sumbikalan na mga anghel asin an saindang mga aki nagpalakop nin kadahasan asin labi-labing kalaswaan
[Ritrato sa pahina 18]
Masosopog daw kamo kun madangog ni Jesus an saindong paboritong musika?