Banal na Katokdoan Tumang sa mga Katokdoan nin mga Demonyo

“An nagkapira masuhay sa pagtubod, na nagtatao nin atension sa mapandayang ipinasabong na mga tataramon asin katokdoan nin mga demonyo.”​—1 TIMOTEO 4:1.

1. Sa anong laban napapatahaw an mga Kristiano?

IMAHINARA na sa bilog nindong buhay yaon kamo sa sarong naggeguerrang lugar. Magigin siring sa ano daw an pagtorog mantang nadadangog an ribok nin purutokan asin magimata sa tanog nin artileriya? Makamomondo, sa ibang parte kan kinaban, talagang arog kaiyan an pamumuhay nin mga tawo. Alagad, sa espirituwal na sentido, arog kaini an buhay kan gabos na Kristiano. Nasa tahaw sinda nin sarong dakulang ralaban sa laog na nin mga 6,000 na taon asin iyan naggrabe sa satong kaaldawan. Ano an halawigon nang guerrang ini? An pakikilaban kan katotoohan tumang sa mga kaputikan, kan banal na katokdoan tumang sa mga katokdoan nin mga demonyo. Bakong pagpasobra na apodon iyan na​—kisuerra sa lado kan saro sa magkalaban dian—​pinakadaing herak asin pinakanakagagadan na pag-iiwal sa kasaysayan nin katawohan.

2. (a) Sono ki Pablo, anong duwang lado an magkatumang? (b) Ano an boot sabihon ni Pablo kan “pagtubod”?

² Sinambit ni apostol Pablo an duwang lado kan pag-iiwal na ini kan sumurat sia ki Timoteo: “An ipinasabong na tataramon talagang nagsasabi na sa huring mga panahon an nagkapira masuhay sa pagtubod, na nagtatao nin atension sa mapandayang ipinasabong na mga tataramon asin katokdoan nin mga demonyo.” (1 Timoteo 4:1) Mangnohon na an mga katokdoan nin mga demonyo magigin partikular na makakaimpluwensia sa “huring mga panahon.” Siring sa pagmansay dian kan kaaldawan ni Pablo, kita nabubuhay na sa panahon na iyan. Mangnohon man kun ano an tumang sa mga katokdoan nin mga demonyo, arin na baga, an “pagtubod.” Digdi, an “pagtubod” nagrerepresentar sa banal na katokdoan, na basado sa banal an pagkapasabong na mga tataramon nin Dios na yaon sa Biblia. An pagtubod na iyan nagtatao nin buhay. Tinotokdoan kaiyan an sarong Kristiano na gibohon an kabotan nin Dios. Iyan an katotoohan na minagiya pasiring sa buhay na daing sagkod.​—Juan 3:16; 6:40.

3. (a) Ano an nangyayari sa mga biktima sa laban kan katotoohan asin kaputikan? (b) Siisay an nasa likod kan mga katokdoan nin mga demonyo?

³ An siisay man na mapasuhay sa pagtubod dai magkakamit kan buhay na daing katapusan. Sinda mga biktima kan guerra. Kapahapahamak nanggad na resulta huli sa pagtogot na madaya kan mga katokdoan nin mga demonyo! (Mateo 24:24) Paano kita bilang mga indibiduwal makalilikay na magin mga biktima? Paagi sa biyong pagsikwal sa putik na mga katokdoan na ini, na nag-ootob sana sa katuyohan kan “poon kan mga demonyo,” si Satanas na Diablo. (Mateo 12:24) Malalaoman nanggad, putik an mga katokdoan ni Satanas, huling si Satanas “an ama kan kaputikan.” (Juan 8:44) Horophoropa kun paano nia ekspertong ginamit an kaputikan sa pagdaya sa satong enot na mga magurang.

Nahayag an mga Katokdoan nin mga Demonyo

4, 5. Anong kaputikan an isinabi ni Satanas ki Eva, asin taano ta maraoton idto?

⁴ An mga pangyayari irinekord sa Biblia sa Genesis 3:​1-5. Ginamit an sarong halas, dinolok ni Satanas an babaeng si Eva asin hinapot ini: “Ano totoo na an Dios nagsabi na dai kamo magkakan sa gabos na kahoy kan tatamnan?” An hapot garo baga dai nakararaot, pero helinga giraray iyan. “Ano totoo?” Garo baga nabigla si Satanas, na garo an boot sabihon, ‘Taano ta magsasabi an Dios nin siring kaiyan?’

⁵ Sa saiyang pagkainosente, sinabi ni Eva na totoo ini. Aram nia an banal na katokdoan dapit sa bagay na ini, na an Dios nagsabi ki Adan na sinda magagadan kun magkakan sinda sa kahoy nin pakamidbid kan marahay asin maraot. (Genesis 2:​16, 17) An hapot ni Satanas malinaw na nakapukaw sa interes ni Eva, kaya naghinanyog ini sagkod sa pinakapunto kan saiyang argumento: “Kaya an halas nagsabi sa babae: ‘Dai nanggad kamo magagadan.’” Kanigoan karaot na pananaram! Si Satanas inakusar si Jehova, an Dios nin katotoohan, an Dios nin pagkamoot, an Kaglalang, nin pagputik sa Saiyang mga aking tawo!​—Salmo 31:5; 1 Juan 4:16; Kapahayagan 4:11.

6. Paano inangat ni Satanas an pagigin marahay asin an pagkasoberano ni Jehova?

⁶ Alagad dakol pang isinabi si Satanas. Ipinadagos nia: “Huli ta naaaraman nin Dios na sa mismong aldaw na kamo kumakan kaiyan mabubuklat an saindong mga mata asin kamo magigin arog nin Dios, na nakakamidbid kan marahay asin maraot.” Oyon ki Satanas, si Jehova Dios​—na abundang marhay na nagtao sa satong enot na mga magurang—​gustong halean sinda nin sarong bagay na makangangalas. Gusto niang pogolan sinda sa pagigin arog sa mga dios. Sa siring, inangat ni Satanas an pagigin marahay nin Dios. Pinatalubo man nia an pagpagusto sa sadiri asin tuyong pag-ignoro sa mga ley nin Dios, na sinasabing an paggawe nin siring kaini magigin kapakipakinabang. Sa katunayan, inangat ni Satanas an pagkasoberano nin Dios sa Saiyang sadiring mga linalang, na soboot an Dios mayo nin diretso na magbugtak nin mga limitasyon sa ginigibo nin tawo.

7. Kasuarin enot na nadangog an mga katokdoan nin mga demonyo, asin paano iyan kapareho ngonyan?

⁷ Paagi sa mga tataramon na idto ni Satanas, an mga katokdoan nin mga demonyo nagpoon na madangog. An maraoton na mga katokdoan na ini nagpapatalubo pa sagkod ngonyan nin kaagid na maraot na mga prinsipyo. Siring kan ginibo nia sa tatamnan nin Eden, si Satanas, na ngonyan iniibanan nin iba pang rebelyosong espiritu, inaangat pa giraray an diretso nin Dios sa pagbugtak nin mga pamantayan sa paggawe. Saiyang inaangat sagkod ngonyan an pagkasoberano ni Jehova asin pinagmamaigotan na impluwensiahan an mga tawo na magmasumbikal sa saindang langitnon na Ama.​—1 Juan 3:8, 10.

8. Ano an nawara ni Adan asin Eva sa Eden, alagad paano napatunayan na tama si Jehova?

⁸ Sa enot na paghampangan na idto sa laban kan banal na katokdoan asin kan mga katokdoan nin mga demonyo, si Adan asin Eva napasala an desisyon asin nawaran kan saindang paglaom na buhay na daing katapusan. (Genesis 3:19) Mantang nag-agi an mga taon asin nagpoon na magluya an saindang hawak, lubos na napatunayan sa sainda kun siisay an nagputik asin kun siisay an nagsabi nin totoo kaidto sa Eden. Minsan siring, ginatos na taon bago sinda nagadan sa pisikal, sinda an nagin enot na mga biktima sa laban kan katotoohan asin kaputikan kan sinda mahokoman na bakong maninigo sa buhay kan saindang Kaglalang, an Burabod nin buhay. Idto an saindang pagkagadan sa espirituwal na sentido.​—Salmo 36:9; ikomparar an Efeso 2:1.

An mga Katokdoan nin mga Demonyo Ngonyan

9. Nagin gurano kaepektibo an mga katokdoan nin mga demonyo sa nakaaging mga siglo?

⁹ Siring kan nasusurat sa libro nin Kapahayagan, si apostol Juan paagi sa pasabong napasa “aldaw kan Kagurangnan,” na nagpoon kan 1914. (Kapahayagan 1:10) Kan panahon na idto si Satanas asin an saiyang mga demonyo pinalayas sa langit pasiring sa palibot kan daga​—sarong dakulang pagkapierde para sa paratumang na ini kan satong Dakulang Kaglalang. Dai na nadangog sa langit an saiyang tingog na perming inaakusar an mga lingkod ni Jehova. (Kapahayagan 12:10) Alagad, ano an naginibong pag-oswag kan mga katokdoan nin mga demonyo digdi sa daga magpoon kan pangyayari sa Eden? An rekord nagsasabi: “Ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga.” (Kapahayagan 12:9) Sarong bilog na kinaban an napadara sa kaputikan ni Satanas! Bakong makangangalas na si Satanas inaapod na “poon kan kinaban na ini”!​—Juan 12:31; 16:11.

10, 11. Sa anong mga paagi aktibo ngonyan si Satanas asin an saiyang mga demonyo?

¹⁰ Inadmitir daw ni Satanas an pagkadaog pakapalayas saiya sa langit? Dai nanggad! Desidido siang padagos na makilaban tumang sa banal na katokdoan asin sa mga nagsusunod dian. Kasunod kan pagpalayas saiya sa langit, ipinadagos ni Satanas an saiyang pakikilaban: “An dragon [si Satanas] naanggot sa babae, asin nagluwas sa pakilaban sa mga natatada kan saiyang banhi, na nagkukuyog sa mga pagboot nin Dios asin igwa kan gibohon nin pagpatotoo ki Jesus.”​—Kapahayagan 12:17.

¹¹ Dugang pa sa pakikilaban sa mga lingkod nin Dios, si Satanas pinapabahaan an kinaban nin mga propaganda nia, na pinagmamaigotan na papagdanayon an saiyang pamomogol sa katawohan. Sa saro sa saiyang mga bisyon sa Kapahayagan dapit sa aldaw kan Kagurangnan, si apostol Juan nakaheling nin tolong mabangis na hayop na simbolikong naglaladawan ki Satanas, sa saiyang politikal na organisasyon sa daga, asin sa nagdodominar na kapangyarihan pankinaban sa satong panahon. Hale sa ngoso kan tolong ini, nagruluwas an mga talapang. Ano an isinisimbolo kan mga ini? Si Juan nagsurat: “An mga ini, sa katotoohan, mga tataramon na ipinasabong nin mga demonyo asin naggigibo nin mga tanda, asin nagduduman sinda sa mga hade kan bilog na ineerokan na daga, tanganing tiriponon sinda sa ralaban kan dakulang aldaw nin Dios na Makakamhan sa gabos.” (Kapahayagan 16:14) Malinaw na aktibong gayo an mga katokdoan nin mga demonyo digdi sa daga. Si Satanas asin an saiyang mga demonyo nakikilaban pa giraray tumang sa banal na katokdoan, asin ipapadagos nindang gibohon iyan sagkod na puwersahan na sindang paontokon ni Jesu-Cristo, an Mesiyanikong Hade.​—Kapahayagan 20:2.

Pagmidbid sa mga Katokdoan nin mga Demonyo

12. (a) Taano ta mahihimong tumangon an mga katokdoan nin mga demonyo? (b) Paano pinagmamaigotan ni Satanas na maotob an saiyang katuyohan sa mga lingkod nin Dios?

¹² Kaya daw na tumangon kan matatakton sa Dios na mga tawo an mga katokdoan nin mga demonyo? Kaya nanggad ninda, huli sa duwang rason. Enot, huli ta an banal na katokdoan mas mapuwersa; asin ikaduwa, huli ta ibinuyagyag ni Jehova an mga estratehiya ni Satanas tanganing matumang niato iyan. Arog kan sabi ni apostol Pablo, “bako kitang ignorante kan saiyang mga pakana.” (2 Corinto 2:11) Aram niato na ginagamit ni Satanas an paglamag bilang sarong paagi tanganing mahimo an saiyang katuyohan. (2 Timoteo 3:12) Alagad, orog nanggad na tuso, hinihingoa niang impluwensiahan an isip asin puso kan mga naglilingkod sa Dios. Saiyang dinaya si Eva asin ibinugtak an salang mga pagmawot sa puso kaini. Pinagmamaigotan nia an iyo man sanang bagay ngonyan. Sinuratan ni Pablo an mga taga-Corinto: “Ako natatakot na tibaad, siring na nadaya kan halas si Eva paagi sa katusohan kaiyan, maraot an saindong isip parayo sa sinseridad asin kalinigan na para kan Cristo.” (2 Corinto 11:3) Horophoropa kun paano nia rinaot an kaisipan kan katawohan sa pankagabsan.

13. Anong kaputikan an isinabi ni Satanas sa katawohan pakalihis kan pangyayari sa Eden?

¹³ Ki Eva, si Satanas inakusar si Jehova nin pagputik asin nagsabi na an mga tawo puwedeng magin arog sa mga dios kun dai sinda makuyog sa saindang Kaglalang. An makasalan na kamugtakan kan katawohan ngonyan nagpapatunay na si Satanas, bakong si Jehova, an putikon. An mga tawo ngonyan bakong mga dios! Alagad, pinasundan ni Satanas an enot na kaputikan na idto nin iba pang kaputikan. Saiyang iinintrodusir an ideya na an kalag nin tawo inmortal, dai nagagadan. Sa siring nakatetentar niang iinalok sa katawohan an posibilidad na pagigin arog sa mga dios sa saro pang paagi. Dangan, basado sa falsong doktrinang iyan, pinalakop nia an mga katokdoan nin kalayo sa impierno, purgatoryo, espiritismo, asin pagsamba sa mga apoon. Ginatos na milyon katawo pa sagkod ngonyan an inooripon kan mga kaputikan na ini.​—Deuteronomio 18:​9-13.

14, 15. Ano an totoo manongod sa kagadanan asin sa paglaom nin tawo sa ngapit?

¹⁴ Siyempre, totoo an isinabi ni Jehova ki Adan. Si Adan nagadan nanggad kan sia magkasala tumang sa Dios. (Genesis 5:5) Kan magadan si Adan asin an saiyang mga gikan, sinda nagin gadan na mga kalag, mayong pakaisi asin daing maginibo. (Genesis 2:7; Eclesiastes 9:​5, 10; Ezequiel 18:4) Huli sa pakamana nin kasalan ki Adan, an gabos na kalag na tawo nagagadan. (Roma 5:12) Alagad, kaidto sa Eden, ipinanuga ni Jehova an pagdatong nin banhi na makikilaban sa mga gibo kan Diablo. (Genesis 3:15) An Banhing idto si Jesu-Cristo, an sadiring Aking bugtong nin Dios. Si Jesus nagadan na mayo nin kasalan, asin an saiyang iinatang na buhay nagin pantubos sa pagbalukat kan katawohan sa saindang magagadanon na kamugtakan. An mga makinuyog na nagtutubod ki Jesus igwa kan oportunidad na umako kan buhay na daing katapusan na iwinara ni Adan.​—Juan 3:36; Roma 6:23; 1 Timoteo 2:​5, 6.

¹⁵ An pantubos, bakong an malibog na ideya na an kalag dai nagagadan, iyo an tunay na paglaom para sa katawohan. Ini banal na katokdoan. Iyan katotoohan. Iyan makangangalas man na pagpaheling kan pagkamoot asin kadonongan ni Jehova. (Juan 3:16) Maninigo nanggad kitang magpasalamat na kita nakanood kan katotoohan na ini asin nakabutas sa mga katokdoan nin mga demonyo sa mga bagay na ini!​—Juan 8:32.

16. Ano an halawig na mga resulta kun sinusunod nin mga tawo an saindang sadiring kadonongan?

¹⁶ Paagi sa kaputikan nia sa tatamnan nin Eden, dinagka ni Satanas si Adan asin Eva na magmawot na magin independiente sa Dios asin magsarig sa sadiri nindang kadonongan. Ngonyan, naheheling niato an halawig na resulta kaiyan sa krimen, pagtios sa ekonomiya, mga guerra, asin grabeng pagpalaenlaen sa kinaban ngonyan. Bakong makangangalas na nagsabi an Biblia: “An kadonongan kan kinaban na ini karungawan sa Dios”! (1 Corinto 3:19) Minsan siring, an kadaklan na tawo may karungawan na pinipiling magsakit kisa maghimate sa mga katokdoan ni Jehova. (Salmo 14:​1-3; 107:17) An mga Kristiano, na nag-ako kan banal na katokdoan, naglilikay na maholog sa siod na iyan.

17. Anong “falsong inaapod na kaaraman” an pinalakop ni Satanas, asin ano an mga ibinunga kaiyan?

¹⁷ Si Pablo nagsurat ki Timoteo: “O Timoteo, ingatan mo an ipinaniwala sa saimo, na naglilikay sa basang na tarabilan na minalapas sa banal asin sa mga pagkakaturumang kan falsong inaapod na ‘kaaraman.’ Huli sa pagpaheling nin siring na kaaraman an nagkapira napasuhay sa pagtubod.” (1 Timoteo 6:​20, 21) An “kaaraman” na iyan nagrerepresentar man sa mga katokdoan nin mga demonyo. Kan kaaldawan ni Pablo, iyan posibleng manongod sa apostatang mga ideya na pinalalakop nin nagkapira sa mga kongregasyon. (2 Timoteo 2:​16-18) Kan huri, an falsong inaapod na kaaraman, arog baga nin Gnostisismo asin pilosopiyang Griego, nakaraot sa kongregasyon. Sa kinaban ngonyan, an ateismo, agnostisismo, mga teoriya nin ebolusyon, asin mas halangkaw na gradong pagkritika sa Biblia mga halimbawa nin falsong inaapod na kaaraman, siring man an bakong Makakasuratan na mga ideya na pinalalakop kan modernong mga apostata. An mga ibinunga kan gabos na falsong inaapod na kaaraman na ini naheheling sa pagraot nin moral, lakop na paglapastangan sa autoridad, pagkabakong sadiosan, asin kapasloan na nagpapamidbid sa palakaw nin mga bagay ni Satanas.

Pagdadanay sa Banal na Katokdoan

18. Sairisay ngonyan an naghahanap nin banal na katokdoan?

¹⁸ Minsan ngani pinapabahaan ni Satanas an daga nin mga katokdoan nin mga demonyo magpoon pa kan panahon sa Eden, perming may mga naghanap kan banal na katokdoan. An siring na mga tawo minaabot na sa minilyon an bilang ngonyan. Kabilang sainda an natatadang linahidan na mga Kristiano na igwa kan seguradong paglaom na maghade kaiba ni Jesus sa saiyang langitnon na Kahadean asin an nagdadakol na dakulang kadaklan nin “ibang karnero” na an paglaom magmana kan daganon na rona kan Kahadean na iyan. (Mateo 25:34; Juan 10:16; Kapahayagan 7:​3, 9) Ngonyan, an mga ini tiniripon sa sarong pankinaban na organisasyon na dian minaaplikar an mga tataramon ni Isaias: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda.”​—Isaias 54:13.

19. Ano an kabale sa pagigin tinokdoan ni Jehova?

¹⁹ An pagigin tinokdoan ni Jehova nangangahulogan nin labi pa sa pakanood kan tunay na doktrina​—minsan ngani importante man iyan. Tinotokdoan kita ni Jehova kun paano mamumuhay, kun paano iaaplikar an banal na katokdoan sa satong personal na buhay. Halimbawa, satong tinutumang an kapasloan, inmoralidad, asin an espiritu nin independensia na lakop na gayo sa kinaban sa palibot niato. Minimidbid niato kun ano man nanggad an daing herak na paghanap nin kayamanan sa kinaban na ini​—nakagagadan. (Santiago 5:​1-3) Dai niato noarin man linilingawan an banal na katokdoan na ipinahayag sa mga tataramon ni apostol Juan: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya.”​—1 Juan 2:15.

20, 21. (a) Ano an ginagamit ni Satanas sa saiyang pagmamaigot na butahon an mga tawo? (b) Anong mga bendisyon an nakakamtan kan mga nagdadanay sa banal na katokdoan?

²⁰ An epekto kan mga katokdoan nin mga demonyo sa mga biktima kaiyan maheheling sa mga tataramon ni Pablo sa mga taga-Corinto: “Binuta [ni Satanas] an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.” (2 Corinto 4:4) Boot ni Satanas na butahon an tunay na mga Kristiano sa paagi man na ini. Kaidto sa Eden, guminamit sia nin sarong halas tanganing dayaon an saro sa mga lingkod nin Dios. Ngonyan, saiyang ginagamit an madahas o inmoral na mga sine asin programa sa telebisyon. Saiyang inaaprobetsaran an radyo, babasahon, asin musika. An sarong mapuwersang armas na ginagamit nia iyo an salang pag-iriba. (Talinhaga 4:14; 28:7; 29:3) Perming midbidon kun ano man nanggad an siring na mga bagay​—mga pakana asin katokdoan nin mga demonyo.

²¹ Girumdomon, an mga tataramon ni Satanas sa Eden mga kaputikan; an mga tataramon ni Jehova napatunayan na totoo. Magpoon pa kan enot na mga aldaw na idto, nagpapadagos an kaparehong kamugtakan. Si Satanas perming napapatunayan na putikon, asin an banal na katokdoan mayong salto na totoo. (Roma 3:4) Kun magdadanay kita sa Tataramon nin Dios, kita perming nasa lado nin panggagana sa laban kan katotoohan asin mga kaputikan. (2 Corinto 10:​4, 5) Kun siring, magin determinado kita na isikwal an gabos na katokdoan nin mga demonyo. Sa paaging iyan magdadanay kita sagkod na matapos an laban kan katotoohan asin kaputikan. Manggagana an katotoohan. Si Satanas mawawara na, asin banal na katokdoan na sana an madadangog digdi sa daga.​—Isaias 11:9.

Ikakapaliwanag daw Nindo?

◻ Kasuarin enot na nadangog an makademonyong mga katokdoan?

◻ Ano an nagkapirang kaputikan na pinalakop ni Satanas asin kan saiyang mga demonyo?

◻ Sa anong mga paagi aktibong marhay ngonyan si Satanas?

◻ Ano an ginagamit ni Satanas tanganing ipalakop an mga katokdoan nin mga demonyo?

◻ Anong mga bendisyon an nakakamtan kan mga nagdadanay sa banal na katokdoan?

[Ritrato sa pahina 9]

An makademonyong katokdoan enot na nadangog sa tatamnan nin Eden

[Ritrato sa pahina 10]

An banal na katokdoan dapit sa pantubos asin Kahadean nag-aalok kan solamenteng paglaom nin katawohan