Bareta kan mga Parabalangibog kan Kahadean
An Katotoohan sa Biblia Pinagsasararo an Pamilya
NGONYAN, sa dakol na parte kan kinaban, an pagkasararo nin pamilya haros mayo na. Alagad, ihinahayag kan Biblia an sekreto sa pagkasararo nin pamilya. Horophoropa an mga tataramon ni Jesus: “An gabos na nagdadangog sa mga tataramon kong ini asin naggigibo kaiyan ikababaing sa madonong, na nagtogdok kan saiyang harong sa ibabaw kan gapo.” (Mateo 7:24) An rinibong pamilya sa mga Saksi ni Jehova nagkamit nin pagkasararo paagi sa pag-aplikar kan mga tataramon na ini asin paagi sa paggamit kan Biblia bilang pundasyon sa pagtogdok nin nagkakasararong pamilya. An iba pa nakakamtan man an siring na pagkasararo, arog kan ipinaheheling kan minasunod na eksperyensia.
Kan si Daniel naglilingkod pa sa hukbo nin Pransia, an sarong kapelyan sa hukbo nagsuherir na bumakal si Daniel nin Biblia, na saiyang sinunod, asin nagpoon siang magbasa kaiyan nin regular. Pag-abot nin panahon ibinalyo sia sa Tahiti. An pira sa mga kapwa soldados ni Daniel mga Adventista, asin an iba mga Mormon. An saindang erestoryahan parateng napapaduman sa tema dapit sa relihiyon. Sarong aldaw an hepe de sarhento ipinamidbid si Daniel sa saiyang agom, na saro sa mga Saksi ni Jehova. Naubos kaini an bilog na hapon sa pagsimbag sa kadakol na hapot ni Daniel asin inibanan sia sa saro sa lokal na mga kongregasyon kan mga Saksi ni Jehova sa Tahiti. Dai nahaloy pinonan ni Daniel an regular na pag-adal sa Biblia.
An mga magurang ni Daniel sa Pransia sinserong mga Katoliko. An saiyang ama sarong parakonseho sa eskuwelahan asin namamahala sa relihiyosong pagtotokdo sa sarong Katolikong eskuwelahan. Boot na ikahiras sa saiyang mga magurang an nagkapirang mahalagang espirituwal na pakamansay na saiyang nanonodan, padikitdikit na pinonan ni Daniel na isaliot an nagkapirang tokdo sa Biblia sa saiyang mga surat sa sainda.
Kan primero naogma an ina ni Daniel, pero nabigla na sana sia kan maheling an ngaran na Jehova sa saro sa mga surat kan saiyang aki. Nagkapirang aldaw pakalihis kaidto, nadangog nia an sarong programa sa radyo na ipinamidbid an mga Saksi ni Jehova bilang “peligrosong sekta.” Suminurat sia ki Daniel, na pinakikiolayan ining sumiblag tolos sa mga Saksi. Alagad, si Daniel padagos na nag-oswag sa saiyang pag-adal sa Biblia asin dai nahaloy inareglar an paghale sa hukbo asin pagbalik sa Pransia.
Pakapuli nia giraray, ginamit ni Daniel an kada banggi—kun beses matanga na—sa halawig na pakipag-olay sa Biblia sa saiyang ina. Sa kahurihurihi ominoyon ini na umiba ki Daniel sa Kingdom Hall. Pag-atender nia sa enot niang pakipagtipon, naghanga siang marhay kaya nagpoon siang magkaigwa nin sadiring regular na pag-adal sa Biblia. Marikas an saiyang pag-oswag asin dai nahaloy nabautismohan.
An ama ni Daniel sarong mapagpahunod na tawo pero dusay na gayo sa saiyang propesyonal asin relihiyosong mga aktibidad. Alagad, sa sarong pangyayari iminaneho nia an saiyang agom asin si Daniel pasiring sa sarong pandistritong kombension. Hulyo 14 kaidto, asin nasa isip niang magheling nin parada sa Kaaldawan nin Bastille sa siudad. Mantang naghahalat nagdesisyon sia, huli sa pag-usyoso, na magmasid sa laog kan hall kan kombension. Naghanga sia sa areglo asin katoninongan na naheling nia sa tahaw kan banwaan ni Jehova, asin sa pag-agi nia sa manlaenlaen na departamento kan kombension an gabos pinag-apod siang “tugang.” Biyo na niang nalingawan an parada sa Kaaldawan nin Bastille asin nagdanay sia sagkod na matapos an kombension. Naghagad sia nin pag-adal sa Biblia asin marikas na nag-oswag sa pakanood kan katotoohan. Alagad, mantang padagos siang nakakanood, orog man siang dai napapamugtak huli sa saiyang trabaho, kaya sa edad na 58, binayaan nia an saiyang trabaho. Ngonyan an gabos na tolo sa pamilya dusay patin bautisado na asin sararong naglilingkod ki Jehova.
An katotoohan sa Biblia an nakapagpasaro sa pamilya ni Daniel. Mapagsasaro man kaiyan an iba pang pamilya kun bilog na puso nindang aadalan asin iaaplikar iyan.