Makakapagpasensia daw Kamo?

SI Jehova nagsabi ki Abram: “Humale ka sa saimong banwaan . . . pasiring sa dagang itotokdo ko saimo; asin magibo ako nin dakulang nasyon hale saimo asin ika bebendisyonan ko asin padadakulaon ko an saimong ngaran.” (Genesis 12:​1, 2) Si Abram 75 anyos kaidto. Sia nagkuyog asin madonong na nagpasensia sa natatadang kabtang kan saiyang buhay, na naghahalat ki Jehova.

Pag-abot nin panahon, an Dios nanuga kaini sa mapasensiang si Abraham (Abram): “Sa katotoohan sa bendisyon bebendisyonan taka, asin sa pagpadakol padadakolon taka.” Idinugang ni apostol Pablo: “Kaya pakatapos na si Abraham makapaheling nin pasensia, nakamtan nia an panugang ini.”​—Hebreo 6:​13-15.

Ano an pasensia? An mga diksionaryo tinatawan iyan nin kahulogan na an abilidad “na kalmadong maghalat para sa sarong bagay” o na magpaheling nin “pagpopogol sa irarom nin pagprobokar o tension.” Kaya an saindong pasensia nababalo kun kaipuhan nindong maghalat sa sarong tawo o bagay, o kun kamo napapaanggot o nasa irarom nin tension. Sa siring na mga situwasyon an mapasensiang tawo nagdadanay na kalmado; an bakong mapasensia nagigin pabiglabigla asin aranggoton.

An Satong Bakong Mapasensiang Modernong Kinaban

Nangorogna sa dakol na siudad, an pagdodoon ibinubugtak bakong sa pagpapasensia kundi sa rikas. Para sa minilyon na tawo na nag-iistar sa surusuan na mga siudad, an kada aldaw minapoon sa pag-alarma nin relo sa aga. Pinoponan kaiyan an marikason na hiro​—sa pagduman sa sarong lugar, sa pakitagbo sa sarong tawo, sa paggibo sa sarong bagay. Makangangalas daw na dakol an tindido asin bakong mapasensia?

Kamo daw nauuyam kun napapaatubang sa mga pagkukulang nin iba? “Habo ko nin huri sa oras,” nagsabi si Albert. An kadaklan maoyon na an paghalat sa sarong tawo na nahuhuri nakakatension, espesyalmente kun igwang dapat aboton na termino. Manongod sa Duke kan Newcastle, sarong Britanong politiko kan ika-18 siglo, sinabi ini: ‘Nawawara nia an kabangang oras sa aga, na pinagpaparalamag nia sa natatadang kabtang kan aldaw na nungka niang inaabot.’ Kun madepende kamo sa siring na tawo aroaldaw, makapagdadanay daw kamong mapasensia?

Kun nagmamaneho nin awto, kamo daw tolos na nauuyam, nagduduwaduwang maghalat, o nasusugotan na magbiyaheng marikason? Sa siring na mga kamugtakan, an pagkabakong mapasensia parateng nangangahulogan nin kapahamakan. Durante kan 1989, sa dati kaidtong Solnopan na Alemania, labing 400,000 na aksidente sa tinampo an nagresulta sa pagkakologi o kagadanan. Sa mga ini, 1 sa 3 an dahelan sa pagmamaneho magsalang marikason o haranihon sa sasakyan na nasa enotan. Kun siring, minsan paano, an pagkabakong mapasensia responsable sa pagkakologi o kagadanan nin labing 137,000 katawo. Dakulaon na kabayadan huli sa pagkabakong mapasensia!

“Nadedepisilan akong magdanay na mapasensia kun an saro nan-iistorbo sa gabos na panahon,” an reklamo ni Ann, “o kun an saro nagpaparahambog na gayo.” Inadmitir ni Karl-Hermann na an saiyang pagpapasensia inaangat nin “mga hobenes na mayong paggalang sa mga gurang.”

An mga ini asin an iba pang situwasyon tibaad gibohon kamong bakong mapasensia. Kun siring, paano kamo makakapatalubo nin orog pang pasensia?

Mapaparigon ni Jehova an Saindong Pasensia

Dakol na tawo an naghohona na an pagpapasensia nagpaparisa nin pagkabakong desidido o kaluyahan. Pero, ki Jehova, iyan nangangahulogan nin kakosogan. Sia mismo “mapasensia . . . huli ta habo nia na an siisay man malaglag kundi boot nia na an gabos makapagsolsol.” (2 Pedro 3:9) Kun siring, tanganing maparigon an saindong sadiring pagpopogol, rumani ki Jehova asin magsarig saiya sa bilog nindong puso. An pagparigon sa saindong relasyon sa Dios iyo an sarong pinakaimportanteng tangga pasiring sa pagpatalubo nin mapasensiang disposisyon.

Saro pa, mahalagang aramon an mga katuyohan ni Jehova para sa daga asin katawohan. “Hinahalat [ni Abraham] an siudad na may tunay na mga pundasyon [an Kahadean nin Dios], na an paratogdok asin kaglalang kan siudad na iyan iyo an Dios.” (Hebreo 11:10) Sa kaagid na paagi, kapakipakinabang na magpadanay nin malinaw na punto-de-vista sa mga panuga nin Dios asin na magin kontento na maghalat ki Jehova. Dangan marerealisar nindo na an pagpapasensia, imbes na magparisa nin pagduwaduwa, sa aktuwal naaakit an mga tawo pasiring sa tunay na pagsamba. Kaya “ibilang nindo an pagpapasensia kan satong Kagurangnan na kaligtasan.”​—2 Pedro 3:15.

Kumusta man kun an saindong personal na mga kamugtakan binabalo an saindong pagpapasensia na haros dai makayanan? An mga dai daw nagtutubod ibinubugtak kamo sa irarom nin nakauuyam na sakit? Nagkahelang daw kamo sa laog nin garo baga daing katapusan na lawig nin panahon? Sa siring na situwasyon, isapuso an isinurat ni disipulo Santiago. Pakasambita sa arogan na itinao kan mga propeta sa pagpapasensia, ihinayag nia an sekreto sa pagdadanay na kalmado sa irarom nin grabeng tension. Nagsabi si Santiago: “Igwa daw nin nagtitios nin maraot dian sa saindo? Padagos siang mamibi.”​—Santiago 5:​10, 13.

Odok sa boot na hagadon sa Dios sa pamibi na parigonon an saindong pasensia asin tabangan kamo na kontrolon an saindong espiritu sa irarom nin pagbalo. Dumolok ki Jehova nin paorootro, asin tatabangan nia kamo na mamidbid an mga kamugtakan o ugale nin iba na nag-aatubang nin sarong partikular na huma sa saindong pagkakalmado. An pamimibi nin patienot manongod sa puwedeng magin masakit na mga situwasyon makakatabang saindo na magdanay na kalmado.

Sarong Tamang Pagmansay sa Sadiri Asin sa Iba

Tanganing mapagdanay an matoninong na kamugtakan sa isip, kaipuhan nindong mansayon sa tamang paagi an saindong sadiri asin an iba. Posible ini paagi sa pag-adal sa Biblia, huli ta ipinaheheling kaiyan na an gabos nakamana nin pagkabakong sangkap asin kun siring igwa nin mga kaluyahan. Dugang pa, an kaaraman sa Biblia makakatabang saindo na tumalubo sa pagkamoot. Kaipuhan an kuwalidad na ini tanganing ikapaheling an pagpapasensia sa iba.​—Juan 13:​34, 35; Roma 5:12; Filipos 1:9.

An pagkamoot asin an pagkagalaga na magpatawad makapakakalma saindo kun kamo naaanggot. Kun an saro igwa nin mga ugale na nakakauyam saindo, an pagkamoot pagigirumdomon kamo na an ikinauuyam nindo iyo an mga ugale, bakong an tawo. Horophoropa kun gurano kaparate na an saindo mismong mga kaluyahan seguradong nakababalo sa pagpapasensia nin Dios asin seguradong nakauuyam sa iba.

An tamang pagmansay sa saindong sadiri makakatabang man saindo na mapasensiang maghalat. Halimbawa, pinag-aaabot daw nindo an mga pribilehiyo sa paglilingkod ki Jehova, pero nabibigo sana? Namamatean daw nindo na nauubos an saindong pasensia siring sa ultimong mga baybay sa sarong hourglass? Kun siring kaiyan, girumdomon na an kadaklan na kadaihan nin pasensia nakagamot sa kapalangkawan. “Mas marahay an sarong mapasensia kisa saro na maabhaw sa espiritu,” nagsabi si Salomon. (Eclesiastes 7:8) Iyo, an kapalangkawan dakulang kaolangan sa pagpapatalubo nin pasensia. Bako daw na totoo na an mapakumbabang tawo mas napapasilan na maghalat na kalmado? Kun siring, kultibaron an kapakumbabaan, asin mas maaako nindo an pagkaatraso na may katoninongan sa isip.​—Talinhaga 15:33.

An Pagpapasensia Nagtatao nin Mayayaman na Balos

Si Abraham sa pangenot midbid huli sa saiyang pagtubod. (Roma 4:11) Pero an pagpapasensia ginibong matagal an saiyang pagtubod. Ano an saiyang balos huli sa paghalat ki Jehova?

Tinawan ni Jehova si Abraham nin nag-oorog na pagsarig. Kaya an ngaran ni Abraham nagin dakula asin an saiyang mga gikan nagin sarong makosog na nasyon. An gabos na nasyon sa daga mabebendisyonan an saindang sadiri paagi sa saiyang banhi. Si Abraham naglingkod bilang parataram nin Dios asin bilang tipo pa ngani kan Kaglalang. Igwa pa daw nin mas dakulang balos huli sa pagtubod asin pagpapasensia ni Abraham?

“Si Jehova malomoy na gayo sa kapadangatan” sa mga Kristiano na mapasensiang nagtatagal nin mga pagbalo. (Santiago 5:​10, 11) An siring na mga indibiduwal nagkakamit nin malinig na konsensia huli sa paggibo kan saiyang kabotan. Kun siring, sa saindong situwasyon, kun mahalat kamo ki Jehova asin mapasensiang nagtatagal nin mga pagbalo, an saindong pagpopogol maresulta sa pag-oyon asin bendisyon ni Jehova.

An pagpapasensia napakikinabangan na marhay kan banwaan nin Dios sa gabos na kabtang nin buhay. Duwa sa mga lingkod ni Jehova, na an ngaran Christian asin Agnes, an naaraman ini kan sinda magdesisyon na magin magkatrato. Idinigson ninda an pagigin magkatrato huli sa paggalang sa mga magurang ni Christian, na nagkakaipo nin panahon na mamidbid si Agnes. Ano an epekto kan paggaweng ini?

“Kan huri na sana na narealisar niamo kun gurano kamakahulogan sa sakong mga magurang kan samong pagpapasensia,” an paliwanag ni Christian. “An samong mapasensiang paghalat dai nakatapos kan relasyon sa pag-oltanan niamong mag-agom. Pero idto an enot na kana sa pagtogdok sa samong relasyon sa sakong mga magurang.” Iyo, an pagpapasensia nakatatao nin mayaman na mga balos.

An pagpapasensia nakakapalakop man nin katoninongan. An mga kapamilya asin katood magpapasalamat na dai nindo pinadadakula an saindang lambang sadit na sala. An saindong pagkakalmado asin pagsabot kun nakakagibo nin mga sala an iba makakaolang sa nakakasopog na mga eksena. An sarong talinhagang Intsik nagsasabi: “An pagpapasensia sa sarong segundong kaanggotan ililikay kamo sa sanggatos na aldaw nin labi-labing kamondoan.”

An pagpapasensia pinaooswag an saindong personalidad, na napagdadanay na nasa marahay na kamugtakan an iba pang marahay na kuwalidad. Pinatatagal kaiyan an saindong pagtubod, pinalalawig an saindong katoninongan, asin pinaririgon an saindong pagkamoot. An pagkamapasensia makakatabang saindo na magin magayagaya mantang naggigibo nin kabootan, karahayan, asin kahoyoan. An pagpapasensia dinudugangan an kosog na kaipuhan sa pagkultibar nin pakatios asin pagpopogol sa sadiri.

Kun siring, mapasensiang maghalat sa kaotoban kan mga panuga ni Jehova asin sinisierto saindo an sarong magayon na ngapit. Arog ki Abraham, ‘magmana logod kamo kan mga panuga paagi sa pagtubod asin pasensia.’​—Hebreo 6:12.

[Ritrato sa pahina 23]

An dayupot na relasyon ki Jehova makakatabang saindo na magpaheling nin pagpapasensia, arog ni Abraham