An Saindang Paghanap sa Tamang Relihiyon
MAGPOON pa sa pagkaaki an ibang tawo naghanap na nin nakakokontentong mga simbag sa saindang mga hapot manongod sa buhay. Kan hoben pa, tibaad nag-atender sinda nin mga relihiyosong seremonya. Pero nanompongan kan dakol sa sainda na minsan an itinaong mga simbag o an rituwal sa iglesya talagang dai nakatabang sainda na maatubang an mga problema sa buhay.
Tibaad sasabihon ninda na kabale pa sinda sagkod ngonyan sa relihiyon kan saindang mga magurang, minsan ngani bihira sindang umatender sa relihiyosong mga seremonya. Sono sa sarong obispo kan Iglesya nin Inglaterra, an yaon sa sainda tada na sanang pagtubod. Pinalimanlimanan na ninda an relihiyon. An iba, na nababalde sa pagsaginsagin na naheheling ninda sa relihiyosong mga grupo, isinikwal na gabos an relihiyon. Minsan siring, an saindang mga hapot manongod sa buhay nagdadanay.
Kun Taano an Iba ta Grabe an Pagduda
An kadaklan na tawo nakakaaram na an dakol na iglesya igwa nin mga ahensia sa pagtabang sa mga mayong harong, sa pagdistribuwir nin mga kakanon sa mga daing sukat, asin sa pag-isponsor nin kultural na mga programa. Pero haros aroaldaw nakakadangog man sinda nin mga bareta dapit sa kadahasan asin pagpabulos nin dugo na nakagamot sa relihiyon bako sanang sa tahaw kan mga bakong Kristiano kundi siring man sa tahaw kan naghihingakong mga Kristiano. Maninigo daw niatong ipagngalas kun magduda sinda na an mga grupo na kalabot sa siring na kadahasan naggigibo nin tamang relihiyon?
An dakol na igwang nagimatan na relihiyon naghona na marahay an mga ampunan na sustentado nin mga iglesya. Alagad, kan nakaagi pa sanang mga taon, nangirabo sinda kan may mga padi sa surunodsunod na lugar na inakusar nin seksuwal na pan-aabuso sa mga aki na ipinaaataman sa sainda. Kan enot an paghona kan mga tawo pipira sanang padi an dapat na basolon. Ngonyan an iba sa sainda nag-iisip kun baga sa pundamental may diperensia an iglesya mismo.
May nagkapira, siring ki Eugenia, na kan dati debotadong marhay sa saindang relihiyon. Kan aki pa sa Argentina, kaiba sia kan mga nagpeperegrino tanganing sumamba sa Birhen nin Itatí. Sa laog nin 14 taon sia nag-istar sa sarong kombento bilang sarong madre. Dangan sia naghale tanganing umentra sa sarong internasyonal na relihiyoso-politikal na grupo na nagpapalakop nin tolos-tolos, radikal na pagliliwat sa sosyal asin ekonomikong areglo nin sosyedad sa rebolusyonaryong paagi. Bilang resulta kan saiyang naheling asin inagihan, sia nawaran nin pagtubod asin kompiansa sa Dios. Sia dai talaga naghahanap nin relihiyon na tutubodon nia. An gusto nia iyo an sarong paagi sa pagtao nin hustisya sa mga pobre—iyo, asin sarong katood na saiyang masasarigan.
An iba nagmamasid sa mga nangyayari sa mga iglesya asin ruminayo. An sarong ateista na an mga punto-de-vista ipinublikar kan 1991 sa magasin na Sputnik sinserong nagsabi: “Mayo akong naheheling na dakulang kalaenan sa mga atributo nin pagano asin sa Kristianong mitolohiya.” Bilang halimbawa, ilinadawan nia an sarong prosisyon na an mga pading nakasutana na bordado nin bulawan luway-luway na dara-dara sa mga tinampo sa Moscow an sarong sarcofago na may embalsamadong bangkay. Bangkay idto nin “sarong Ortodoksong Kristianong santo” na ibinabalyo hale sa sarong museo pasiring sa simbahan, asin iyan nagpagirumdom sa parasurat kan dapit sa mga padi asin embalsamadong mga bangkay sa suanoy na Egipto. Nagirumdoman man nia na mantang idtong mga uminiba sa prosisyon sa Moscow nagtutubod sa “Kristianong Trinidad,” an mga Egipcio nagsamba man sa tolong dios—si Osiris, Isis, asin Horus.
An iyo man sanang parasurat na iyan sinambit an Kristianong ideya na pagkamoot—“an Dios pagkamoot,” asin “kamotan mo an saimong kataed”—na dai nakanompong nin kaagid sa paganong Egipto. Alagad nagkomento sia: “An sa-tugang na pagkamoot dai nanggana sa kinaban, dawa sa parte kaiyan na inaapod mismong Kristianong kinaban.” Asin pinasundan pa nia iyan nin mga komento manongod sa maraot na mga ibinunga kan pag-insister kan iglesya sa pagigin kalabot sa mga aktibidad kan Estado. An saiyang naheling dai nakapahiro saiya na mamatean na an mga iglesya nin Kakristianohan iinaalok an saiyang hinahanap.
Al kontraryo, an iba nakanompong nin nakakokontentong mga simbag pero bakong sa mga iglesya nin Kakristianohan.
Saiyang Nanodan an Katotoohan Manongod sa mga Gadan
Si Magdalena, na ngonyan 37 anyos na, nag-iistar sa Bulgaria. Pagkagadan kan saiyang panugangan na lalaki kan 1991, nawaran siang gayo nin paglaom. Paorootro niang hinapot an saiyang sadiri, ‘Saen nagduduman an mga gadan? Haen an sakong panugangan?’ Nagsimba sia, asin sia namibi sa sarong imahen sa harong, alagad mayo siang nakuang simbag.
Dangan sarong aldaw an sarong kataed nagtelepono sa pag-imbitar sa saiya sa harong kaini. An sarong soltero na nakikipag-adal sa mga Saksi ni Jehova nasa pagsongko sa kataed. Naghinanyog sia mantang an soltero nagtataram manongod sa Kahadean nin Dios asin sa Saiyang katuyohan na gibohon an daga na magin sarong paraiso kun saen an mga tawo puwedeng mabuhay sagkod lamang sa kaogmahan. Nasa lamesa an librong Puwede Kamong Mabuhay Sagkod Lamang sa Paraiso Digdi sa Daga. Ginagamit iyan, an soltero dinara an saiyang atension sa teksto sa Biblia sa Eclesiastes 9:5, na nagsasabing: “Kun dapit sa mga gadan, mayo man lamang sinda nin pakaaram.” Kan bangging idto nagparabasa pa sia. Nanodan nia na an mga gadan dai napapaduman sa saro pang buhay sa langit o sa impierno; mayo sinda nin pakaaram, na garo man sana nasa nanok na pagtorog. Maogma niang inako an imbitasyon na umatender sa sarong pagtiripon kan lokal na kongregasyon kan mga Saksi ni Jehova. Pakatapos kan pagtiripon uminoyon sia sa sarong regular na pag-adal sa Biblia. Namasdan sa pagtiripon an paagi kan pagpamibi ki Jehova, sia nagpoon man na mamibi ki Jehova para sa tabang na madaog an sarong nakatanom nang marhay na kaluyahan. Kan sinimbag an saiyang pamibi, aram nia na saiya nang nanompongan an tamang relihiyon.
Nakanompong Sinda nin Buhay na May Kahulogan
Si André nagdakula sa sarong Katolikong marhay na harong sa Belgium asin naglingkod bilang katabang kan lokal na padi. Alagad, durante kan panahon na idto, nakaheling sia nin mga bagay na nagpaluya kan saiyang paggalang sa iglesya. Bilang resulta, Katoliko sia sa ngaran sana.
Sa laog nin 15 taon nagkawat sia nin propesyonal na putbol. Sa sarong pangyayari kan an saiyang grupo nagkakawat sa sarong torneo sa Italia, sinda inimbitaran sa sarong pormal na pakipag-olay sa papa. Dai man lamang nakapakokosog sa espirituwal an pagsongkong idto, asin an kinabanon na kayamanan na nakapalibot sa papa nakapapungot ki André. Nag-orog an saiyang mga pagduda manongod sa iglesya. An saiyang pribadong buhay bakong maogma huli sa duwang pag-agom na suminagkod sa pagbubulag. An situwasyon sa kinaban nakapaluya sa saiyang boot. Kan 1989 suminurat sia sa saiyang dayari: ‘Ano an kahulogan kan gabos na katontohan na nangyayari sa palibot ta?’ Mayo siang nakuang simbag sa saiyang relihiyon.
Kan 1990, kan si André nagtatrabaho bilang parasanay sa putbol sa Iceland, nakaolay sia ni Iiris, sarong misyonera kan mga Saksi ni Jehova. Nag-ako sia nin mga literatura asin inimbitaran niang bumalik an misyonera. An misyonera nagbalik kaiba an saiyang agom, si Kjell. Kan sa katapustapusi makatukaw na sinda asin makaolay si André, maririsang gayo na sia interesadong marhay na masabotan an Biblia. An saiyang agom, si Ásta, interesado man. Kun odto, may tolong oras sia sa pag-oltanan kan saiyang mga pagsanay, asin nagdesisyon sinda na gamiton an oras na iyan para sa pag-adal sa Biblia. “Mas nagiginhawahan ako sa pag-adal sa Biblia kisa pagpahingalo sana,” an sabi nia. Progresibong sinimbag kan Biblia an saindang mga hapot. Luway-luway na nagtalubo an saindang pagtubod ki Jehova asin sa saiyang Kahadean. An mamuraway na mga panuga kan Biblia mapadapit sa sarong matoninong na bagong kinaban, sarong kinaban na mayo kan “gabos na katontohan na nangyayari,” nagin sarong katunayan sa sainda. Si André asin Ásta pareho ihinihiras ngonyan sa iba an saindang bagong nanompongan na pagtubod.
Si Magdalena, André, asin Ásta may pagsarig na sa katapustapusi sainda nang nanompongan an tamang relihiyon. Siring man si Eugenia, pakatapos kan paghihingoa na resolberan an mga problema sa kinaban sa politikal na paagi, sa kahurihurihi nanompongan sa mga Saksi ni Jehova an relihiyon na para sa saiya iyo an tamang relihiyon. Alagad ano an talagang nagdedeterminar kun baga an sarong relihiyon iyo an tama? Tabi helingon an minasunod na materyal.
[Ritrato sa pahina 7]
An regular na pag-adal sa Biblia kaiba kan mga Saksi ni Jehova tinatabangan an labing limang milyon katawo sa saindang paghanap nin nakakokontentong mga simbag