Naoogma daw Kamo sa Personal na Pag-adal?

AN SIISAY man na sinserong lingkod nin Dios maoogma na gumamit nin dakol na oras sa personal na pag-adal sa Biblia. (Salmo 1:​1, 2) Alagad, nakakamate na kadakol kan nagkakaipo sa saindang panahon asin kosog, an dakol nadedepisilan na gumamit nin siring kadakol na panahon asin kosog sa personal na pag-adal sa gusto kutana ninda.

Minsan siring, tanganing makapadagos bilang aktibong mga lingkod nin Dios, an gabos nangangaipong mabago giraray an saindang kagayagayahan asin kosog aroaldaw paagi sa pakakua nin bago o mas hararom na mga kabtang kan katotoohan sa Tataramon nin Dios. An mga katotoohan sa Biblia na odok na nakapahiro saindo mga taon na an nakaagi tibaad dai nang gayo kamo pinahihiro ngonyan. Kun siring, marahay, patin mahalaga, na kita odok asin perming maghingoa sa pagkua nin bagong pakamansay sa katotoohan tangani na mapagdanay an satong sadiri na mabagsik sa espirituwal.

Paano an suanoy na mga tawong may pagtubod ginibo an saindang sadiri na magin marigon sa espirituwal paagi sa personal na pag-adal sa Tataramon nin Dios? Paano an ibang lingkod ni Jehova sa modernong aldaw ginibo an saindang pag-adal na magin mas nakaoogma asin mabunga man? Paano sinda tinawan nin balos para sa saindang mga paghihingoa?

Saindang Binago Liwat an Saindang Kosog Paagi sa Personal na Pag-adal

Si Hadeng Josias nin Juda ginibo an saiyang kampanya tumang sa idolatriya na may orog pang kaigotan pakabasaha sa saiya kan ‘mismong libro kan pagboot ni Jehova paagi sa kamot ni Moises.’ Mayong duwa-duwa na bako idto an enot na pangyayari na hinorophorop nia an kabtang na ini kan Tataramon nin Dios; pero an direktang pakadangog sa mensahe na hale sa orihinal na manuskrito nakaanimar saiya sa saiyang pakikilaban para sa dalisay na pagsamba.​—2 Cronica 34:​14-19.

Si propeta Daniel nasabotan an ‘kabilangan kan mga taon para sa pag-otob sa mga paggaba sa Jerusalem’ asin an kasiertohan kaiyan bako sanang sa libro ni Jeremias kundi siring man sa “mga libro.” Posible nanggad na kabale digdi an mga libro na arog baga kan Levitico (26:​34, 35), Isaias (44:​26-28), Oseas (14:​4-7), asin Amos (9:​13-15). An saiyang napatunayan sa mahigos niang pag-adal sa mga libro kan Biblia nagpahiro sa debotadong tawong ini na hanapon an Dios paagi sa odok na pagpamibi. An saiyang odok na pakimaherak sinimbag paagi sa dugang pang kapahayagan asin pag-asegurar liwat manongod sa siudad nin Jerusalem patin sa saiyang banwaan.​—Daniel, kapitulo 9.

Si Josias, na guminibo “kan matanos sa mga mata ni Jehova,” asin si Daniel, na “saro na kawiliwiling gayo” sa pagheling nin Dios, sa pundamental daing kalaenan sa sato ngonyan. (2 Hade 22:2; Daniel 9:23) An saindang personal na mga paghihingoa na dusay sa maigoton na pag-adal sa Kasuratan na makukua kan panahon na idto naggiya sainda sa orog na espirituwalidad asin nakatabang sainda na magkamit nin mas marigon na relasyon sa Dios. Totoo man iyan sa dakol na suanoy na lingkod ni Jehova, arog baga ki Jefte, sa sarong salmista sa harong ni Asaf, ki Nehemias, asin Esteban. Sinda gabos nagtao nin patotoo sa maingat na personal na pag-adal sa kabtang kan Biblia na makukua kan panahon ninda.​—Hokom 11:​14-27; Salmo 79, 80; Nehemias 1:​8-10; 8:​9-12; 13:​29-31; Gibo 6:15–7:53.

Gibohon an Ministeryo na Magin Pampakosog

An kadaklan na lingkod ni Jehova ngonyan na naglingkod saiya sa laog nin dakol nang taon igwang iskedyul sa personal na pag-adal sa Biblia. Nanompongan ninda na kaipuhan ini tanganing makapagdanay na puka asin lubos na maotob an saindang Kristianong mga paninimbagan. Minsan siring, inaako kan dakol sainda na bakong perming pasil na timbangon an paggamit kan saindang panahon asin kosog sa personal na pag-adal asin sa iba pang bagay na dai maninigong pabayaan.

Alagad, an pagdadanay na puka sa espirituwal paagi sa mahigos na personal na pag-adal mahalaga sa pag-atubang sa mga kinakaipuhan sa Kristianong ministeryo sa maoswag na kabtang na ini kan pankinaban na paghuhulit kan Kahadean. Idtong mga naoogma sa bago asin mas hararom na mga pakamansay sa Tataramon nin Dios makakaatubang sa angat na taroson an nagugutom na mga puso. Totoo ini baga man an saro iinasignar sa lugar na may malalaoman na dakol na madadakop sa espirituwal na paninira o an saro nagpapadagos sa parate nang nagigibong mga teritoryo kun saen lakop an pankagabsan na pagkaindeperente.

Regular na Magkakan sa Tataramon nin Dios

An ginigibo kan iba puwedeng magtao saindo nin mga ideya kun paano kamo orog na maoogma sa saindong rutina nin pag-adal o kun paano nindo asin kan saindong pamilya mas kapakipakinabang na magagamit an oras nin pag-adal. An saro sa mga bagay na habong malihisan kan sarong lingkod nin Dios iyo an regular na pagbasa kan Tataramon nin Dios mismo. An dakol ginibong pasohan an pagbasa nin kisuerra tolo sagkod apat na kapitulo kan Biblia kada semana. Gusto daw nindong mabasa an bilog na Biblia sa laog nin sarong taon? Kun siring maoogma kamong gumamit nin mas dakol pang panahon sa pagbasa kaiyan, puwedeng kabangang oras kada aldaw.

Nabasa na daw nindo an bilog na Biblia nin labi sa sarong beses? Taano ta dai magbugtak nin bagong pasohan sa sunod? Bilang pagliliwat, an sarong Kristiana binasa an mga libro kan Biblia sono sa pagkasunodsunod kan pagkasurat kaiyan. Nakakua sia nin dakol na detalye, basado sa kronolohikong kasaysayan, na nalihisan nia kaidto. An saro pang Kristiana nabasa an bilog na Biblia nin limang beses sa laog kan nakaaging limang taon, na sa kada panahon sa laen na punto-de-vista. Sa primero, binasa nia iyan gabos nin diretso. Durante kan ikaduwang pagbasa, sinumaryo nia an laog kan kada kapitulo sa saro o duwang linya sa sarong notebook. Magpoon sa ikatolong taon, buminalyo sia sa dakulang edisyon na may mga reperensia, primero sinisiyasat an pinili sanang mga cross-reference sa gilid asin maingat na tinatawan nin atension an mga nota sa ibaba siring man an impormasyon sa apendise. Sa ikalimang beses, naggamit sia nin mga mapa sa Biblia sa pagdugang nin pakasabot kun dapit sa heograpiya. An sabi nia: “Para sa sako, an pagbasa sa Biblia nagin siring kaogma sa pagkakan.”

An ibang maigot na estudyante sa Biblia nanompongan na kapakipakinabang na magkaigwa nin sarong kopya nin Biblia na ginagamit sana sa personal na pag-adal, na sinusuratan an mga gilid kaiyan nin interesanteng mga komento, nakapupukaw sa isip na mga ilustrasyon, o an pahina kan ibang publikasyon na magagamit nindang reperensia sa huri. An sarong pambilog na panahon na ministro naoogma na isurat sa katapusan kan kada bulan sa saiyang kopya para sa pag-adal an bagong mga punto na saiyang nanodan durante kan bulan. “An paghidaw sa pinahahalagahan kong mga oras na ini,” an sabi nia, “nakatabang sako na mas madaling maabot an iba pang mga pasohan para sa bulan.”

Nagkapirang Mapag-imbentong mga Ideya

Namamatean daw nindo na an saindong iskedyul pano-pano nin pan-aroaldaw asin semanal na mga obligasyon asin na nagkakaipo kamo nin pirang suhestion sa mas marahay na paggamit sa saindong limitadong oras? Bueno, darahon nindo an gusto nindong basahon, asin gamiton nindo an saindong libreng mga oras. Sa harong o kun saen kamo parateng nag-aadal, sagkod sa rasonableng mahihimo areglaron an mga libro asin ibang pantabang sa pag-adal tanganing iyan pasil na makua. Gibohon na maginhawa an saindong lugar nin pag-adal pero bakong komportableng marhay na kamo napapatungka na. Igwa daw kamong asignasyon sa pahayag? Basahon gabos an materyal sa pinakaamay na mahihimo, dangan isipon an mga ideya kun kamo nagpapahingalo o naggigibo nin laen-laen na trabaho.

An iba puwedeng makipagtabangan saindo sa mas marahay na paggamit nin oras para sa kapakinabangan kan kada saro. Halimbawa, puwede nindong ipabasa nin makosog sa saro an madaling saboton na mga babasahon mantang kamo naggigibo nin rutinang mga trabaho o nagpapameryenda sa saindong maboot na parabasa. Ano daw kun an gabos sa harong magkaoroyon sa sarong matoninong na oras para sa personal na pag-adal? “Ano an ikinaogma nindong basahon kasuarin pa sana?” Kun beses puwede nindong mapaluwas an nanodan kan saindong mga katood paagi sa pagpopoon nin pag-orolay sa paaging ini.

Interesado daw kamo sa pag-introdusir nin nagkapirang bagong ideya sa saindong programa nin pag-adal? Puwede kamong magbugtak nin pasohan na oras para sa pag-adal sa kaparehong paagi na an dakol nagbubugtak nin pasohan na oras sa pakipag-olay sa iba manongod sa Biblia. An sarong pambilog na panahon (payunir) na parahayag nagbubugtak nin bulanan na pinakahababang pasohan na mga oras sa pag-adal asin naoogma sia mantang naheheling nia sa sarong tsart na maaabot na nia an saiyang oras. An iba binabawasan an oras sa pagdalan nin telebisyon asin sa paaging iyan nakakukua nin oras para sa pag-adal. An dakol nagpipili nin temang pag-aadalan na pinagmamaigotan nindang matapos sa laog nin pirang panahon, arog baga kan mga bunga kan espiritu, an mga kasaysayan sa likod kan mga libro kan Biblia, o abilidad sa pagtotokdo. An iba naoogma sa paggibo nin mga tsart sa kronolohiya, arog baga kan mga tsart na nagpapaheling kan relasyon kan Israelitang mga hade asin propetaa o an Mga Gibo kan mga Apostol asin an mga surat ni Pablo.

Mga hobenes, gusto daw nindo nin mas marigon na pagtubod? Taano ta dai pumili nin sarong babasahon para sa lubos na pag-adal durante kan saindong sunod na bakasyon sa eskuwelahan? An sarong bautisadong estudyante sa haiskul pinili an Mankind’s Search for God, sarong libro na ipinublikar kan Watch Tower Society. Kapitulo por kapitulo, guminibo sia nin haralipot na sumaryo sa sarong notebook manongod sa saiyang mga nanodan. Iyan kawiliwili asin nagkaipo nin mas dakol na oras kisa sa pinaghona nia. Alagad, kan matapos nia an bilog na libro, napahanga siang marhay sa pagigin totoo kan mensahe kan Biblia.

Magin Perming Galaga na Makanood

An kadakol na maimbod na lingkod ni Jehova sa modernong aldaw dati nang “dakol an gigibohon sa gibohon kan Kagurangnan.” (1 Corinto 15:58) Dawa igwa nang rinepasong iskedyul asin sinserong mga paghihingoa, an rutina na saindong sinusunod sa sarong tipikal na semana tibaad daing gayo magliwat. Minsan siring, an saindong nagdadanay na pagkagalaga na magkamit nin mas hararom na pakasabot sa katotoohan asin na mapagdanay an saindong sadiri na lubos na kaoyon sa paghayag kan mga katuyohan ni Jehova dakula an ikatatabang saindo.

Nakapakokosog na madangog an mga balos kaidtong mga nagpaoswag kan saindang iskedyul nin pag-adal. An sarong Kristiano, na nakarerealisar na nawawara an saiyang positibong kaisipan sa paghanap nin mas hararom na pakasabot sa katotoohan, inorganisar an saiyang buhay tangani na ikadusay nia an kadaklan niang libreng oras sa personal na pag-adal. “Iyan nagtao sako nin kaogmahan na dai ko namatean kaidto,” an sabi nia. “Igwa nin orog pang nagtatalubong pagsarig na an Dios an autor kan Biblia, nanompongan ko na kaya kong makipag-olay sa iba manongod sa sakong pagtubod na may tunay na entusiasmo. Namamatean ko na ako igong napapakakan, makosog sa espirituwal, asin kontento pagkatapos kan kada aldaw.”

An sarong nagbibiyaheng paraataman kan mga Saksi ni Jehova, na nagsosongko sa dakol na kongregasyon, ilinadawan an ibang pakinabang sa paaging ini: “Idtong mga mahigos sa personal na pag-adal sa pankagabsan buhay asin malinaw sa saindang mga pananaram. Mas marahay sindang makiibahan sa iba, asin dai tolos sinda napaluluya kan negatibong mga tataramon nin iba. Kun nasa ministeryo sa langtad, sinda madaling makibagay patin alisto man sa mga pangangaipo kan mga tawo na saindang nakakaolay.”

May idinagdag pa siang sarong punto na puwedeng girumdomon kan iba kun inaanalisar ninda an saindang sadiring iskedyul nin pag-adal. “Sa mga pagtiripon para sa pag-orolay sa Kasuratan, an dakol may tendensiang basahon an saindang mga komento sa mga pahina mismo. Orog sindang makikinabang kun hohorophoropon ninda kun paano an materyal konektado sa dati na nindang nanodan o sa sainda mismong buhay.” Sa paghona daw nindo puwede kamong umoswag sa bagay na ini?

Si propeta Daniel, pakaagi nin labi nang 90 taon nin buhay, dai nakamateng igo na an saiyang pakasabot dapit sa mga dalan ni Jehova. Sa saiyang ultimong mga taon, sia naghapot manongod sa sarong bagay na dai nia lubos na nasasabotan: “O kagurangnan ko, ano an magigin kasagkodan kan mga bagay na ini?” (Daniel 12:8) Mayong duwa-duwa na an dai nagliliwat na pagkagalagang ini na makanood nin dakol pa dapit sa katotoohan nin Dios sarong liyabe sa saiyang nangongorog na integridad durante kan saiyang makasaysayan na pagkabuhay.​—Daniel 7:​8, 16, 19, 20.

An kada saro sa mga lingkod ni Jehova kapareho man kagabat an paninimbagan na manindogan nin marigon bilang saro kan Saiyang mga Saksi. Magin perming galaga na makanood tanganing mapagdanay an saindong sadiri na marigon sa espirituwal. Hingoahon na makadagdag nin saro o duwang bagong kabtang sa saindong semanal, bulanan, o taonan na iskedyul sa personal na pag-adal. Helingon nindo kun paano bebendisyonan nin Dios an ano man na dikit na paghihingoa nindo. Iyo, maogma kamo sa saindong personal na pag-adal sa Biblia asin sa mga bunga na dadarahon kaiyan.​—Salmo 107:43.

[Nota sa Ibaba]