Sarong Nababangang Iglesya—Makakapagdanay daw Iyan?

“GABOS na naghihingako sa nagliligtas na katotoohan ni Cristo miembro kan naheheling na Iglesya. An pagkabaranga kan Kakristianohan​—sa pag-oltanan kan Sirangan asin Solnopan, asin sa pag-oltanan kan Roma asin kan mga iglesya nin Repormasyon​—pagkabaranga sa laog kan sarong Iglesya.” (Christians in Communion) Siring kaiyan an pagmansay nin sarong autor sa Kristianismo​—bilang sarong surusuruway na pamilya nin mga relihiyon, na gabos naghihingako nin sarong klase nin pagtubod ki Jesu-Cristo.

Alagad, iyan sarong nababangang pamilya, na igwa nin nagkokontrahan na mga pagtubod asin pamantayan sa gawe. “An presenteng panahon na Kristianismo . . . mas hababa an pamantayan para sa gustong magin miembro sa iglesya kisa para sa paglunad sa awto,” an sabi nin sarong nag-oobserbar. Kun siring, ano an masasabi niato sa espirituwal na kamugtakan kaiyan? Siring kaini an konklusyon nin Katolikong obispo na si Basil Butler: “An sarong nababangang Kristianismo tunay na igwa nin grabeng helang.” (The Church and Unity) Paano nagpoon an helang? Igwa daw nin paglaom para maomayan?

“An Tawo nin Katampalasanan”

Si apostol Pablo nagpatanid na magkakaigwa nin pagkabaranga. Sa mga Kristiano sa Tesalonica na naghona na an presensia ni Cristo harani na, sia nagsurat: “Dai kamo magpadaya sa kiisay man sa ano man na paagi, huli ta iyan [an aldaw ni Jehova] dai maabot kun dai nguna mangyari an apostasiya asin mahayag an tawo nin katampalasanan, an aki nin kalaglagan.”​—2 Tesalonica 2:3.

An “tawo nin katampalasanan” na ini an nag-introdusir nin apostasiya asin pagrebelde sa Kristianong kongregasyon. Siisay sia? Bako na siisay man na indibiduwal na tawo kundi, imbes, an klaseng klero nin Kakristianohan. Ilinangkaw kan klaseng ini an saindang sadiri sa ibabaw kan apostatang kongregasyon dai nahaloy pagkagadan kan mga apostol ni Jesus, asin sa huri nagtokdo nin paganong mga pilosopiya, siring kan Trinidad asin kan pagigin daing kagadanan kan kalag nin tawo. (Gibo 20:​29, 30; 2 Pedro 2:​1-3) Siring sa sarong nakagagadan na virus, inolakitan kaiyan an naghihingakong Kristianong kongregasyon nin mga kaisipan na ipinasabong nin mga demonyo na dai malilikayan na masagkod sa pagkabaranga.​—Galacia 5:​7-10.

An pakaolakit nagpoon na kan kaaldawan ni apostol Pablo. Nagsurat sia: “Totoo, naghihiro na ngonyan an misteryo kan katampalasanan na ini; pero sagkod sana na sia na sa ngonyan nagseserbing pan-olang mahale.” (2 Tesalonica 2:7) An mga apostol naghiro bilang pan-olang kontra sa hilo nin apostasiya. Kan mawara na an saindang impluwensia na nakapagsasararo, an dai na mapogol na apostasiya naglakop na arog kan gangrena.​—1 Timoteo 4:​1-3; 2 Timoteo 2:​16-18.

An mga gibohon kan “tawo nin katampalasanan” na ini dai minapondo. Sa sarong dai pa nahahaloy na bareta manongod sa “sarong iglesya na nakakaeksperyensia nin seksuwal asin teolohikong pagpapasakit,” kinotar an reklamo nin sarong poon na diakono kan Iglesya nin Inglaterra: “Sinasayumahan an mga proposisyon na nangangapodan sa klero na dai makidorog sa bako nindang agom. Inordenan an aktibong mga homoseksuwal. Ginibo nindang maraot an marahay asin marahay an maraot.”​—The Sunday Times Magazine, Londres, Nobyembre 22, 1992.

Trigo Asin mga Doot

Si Jesu-Cristo mismo nagtokdo na an tunay na Kristianismo temporaryong mawawara. Sinabi nia na an pagtogdok kan Kristianong kongregasyon arog sa sarong tawong nagsasabwag nin marahay na banhi sa saiyang oma. Alagad, sinabi ni Jesus, “nagdatong an saiyang kaiwal asin nagsabwag nin mga doot sa tanga kan trigo.” Kan maghapot an saiyang mga oripon kun gagaboton ninda an mga doot, an kagsadiri kan oma nagsabi: “Dai; ta tibaad, sa paggabot kan mga doot, magabot nindong kaiba ninda an trigo.” Gurano kahaloy magpapadagos an pagsalak na ini nin trigo asin doot? Sinabi kan kagsadiri kan oma: “Pabayai nindong tumubo sindang magkaibanan sagkod sa pag-ani.”​—Mateo 13:​25, 29, 30.

Sagkod sa “pag-ani,” o panahon nin paglalaenlaen sa mga huring aldaw kan “palakaw nin mga bagay,” an palsipikadong mga Kristiano kasabay na tuminubo kan tunay na mga Kristiano. (Mateo 28:20) Ginamit ni Satanas na Diablo an mga apostata tanganing magpalataw nin sarong maraot asin nababangang palsipikadong kongregasyon na Kristiano. (Mateo 13:​36-39) Sinda nagbunga nin sarong nakakasopog na palsipikasyon nin tunay na Kristianismo. (2 Corinto 11:3, 13-15; Colosas 2:8) Mantang nagkakabaranga an iglesya sa nakaaging mga siglo, nagin lalong masakit na mamidbid an tunay na mga Kristiano.

Bagong Pagkabaranga

Sa mas modernong panahon, sinasabi kan The Testing of the Churches​—1932-1982, “may [b]agong pagkabaranga na naglataw, orog na an mobimiento karismatiko, na nagdodoon sa personal na pagtubod asin eksperyensia.” Interesante, minamansay kan iba an mga namundag giraray, mga mobimientong karismatiko bilang mga tanda nin espirituwal na pag-omay imbes na bagong pagkabaranga. An Amihanan na Irlandia, halimbawa, nakaeksperyensia nin siring na pagkabuhay liwat kan mga taon nin 1850. Buminangon an dakulang mga paglaom. May sarong bareta manongod sa “sa magturugang na pagkasararo . . . sa tahaw kan Presbiteriano, Wesleyano, asin Independienteng mga ministro” asin sinabi na “kada aldaw igwa nin bagong mga bareta manongod sa mga pangatorogan na mata, pagtorog, bisyon, pangatorogan, asin mga milagro.”​—Religious Revivals.

Minansay nin dakol na an madramang mga kapahayagan na ini patotoo nin paghiro kan espiritu nin Dios tanganing buhayon liwat an saiyang iglesya. “An iglesya nin Dios,” sabi nin sarong nagmamasid, “sa pinakahalangkaw na sentido kaini nabuhay liwat sa mga distritong ini.” Alagad, minsan ngani an partikular na pagkabuhay liwat na ini ibinareta siring sa “sarong mamuraway asin mayo pang nakaaagid na panahon sa kasaysayan nin relihiyon sa Ulster,” ini asin an iba pang pagkabuhay liwat na kaagid kaini dai nakatao nin relihiyosong pagkasararo sa tahaw kan mga naghihingakong ipinangaki liwat sa espirituwal.

Mangangatanosan an siring na mga tawo na sinda nagkakasararo sa mga bagay na pangenot. Alagad pareho ini kan rason na ginagamit kan iba pang kabtang kan Kakristianohan, na nangangatanosan na “an nakapagsasararo sa mga Kristiano orog na mas importante kisa sa mga bagay na nagpapabanga sa sainda.” (The Church and Unity) Siring kaini an sabi nin Kakristianohan: “An samuyang pangenot na pagkasararo sa lambang saro siring man sa gabos niamong kapwa Kristiano nakagamot sa samong bautismo ki Cristo.” (Christians in Communion) An pagsabi na an pagkabaranga bakong importante huli sa komon na pagtubod ki Jesus, minsan siring, garo pagsabi na an kanser bakong grabe sagkod na an saimong puso makosog.

An totoo iyo na an siring na modernong mga mobimiento relihiyoso nakakadagdag sana sa karibongan asin nakakapalataw nin espirituwal na anarkiya mantang an mapag-enganyar na mga paratokdo minatipon nin mga parasunod para sa saindang sadiri. Sinda Jim Jones asin David Koresh dai pa nahahaloy na mga halimbawa nin espirituwal na mga lider na nakadaya nin rinibo. (Mateo 15:14) Sarong pangenot na miembro kan Ku Klux Klan an sarong ministrong Baptist. Ikinokonektar nia an saiyang kampanya sa pangingibabaw nin mga puti sa sarong pagkabuhay liwat sa relihiyon asin sinasabi na idtong mga nakikikabtang digdi “tatawan kan kosog nin paggiya na hale sa itaas, tatawan kan kosog nin boot Nia na nagadan sa Kalbaryo [si Jesu-Cristo].”

Kumusta man an mga ipinapamugtak na mga milagro, an makapangyarihan na mga gibo, asin an mga tanda na ginibo sa ngaran ni Jesus? Girumdomon an marigon na patanid ni Jesu-Cristo na, bakong an minasabi sanang “Kagurangnan, Kagurangnan” an makakaako kan saiyang pag-oyon, kundi, imbes, ‘an mga naggigibo kan kabotan kan saiyang Ama.’ Dakol sa ngonyan an dai man lang nakakaaram kan ngaran kan saiyang Ama, si Jehova. Nagpatanid si Jesus manongod sa mga ‘nagpaluwas nin mga demonyo sa saiyang ngaran, patin naggibo nin dakol na ngangalasan sa saiyang ngaran’ alagad magigin ‘mga paragibo nin katampalasanan.’​—Mateo 7:​21-23.

“Lumuwas Kamo Saiya, Banwaan Ko”

Ano an paglaom na maomayan pa an may helang na Kakristianohan? Kadikiton. Kita daw, kun siring, maaplikar kan sadol kan Katolikong obispo na si Butler, na “umayon sa [iglesya] na mayo nin dakol pang ribok asin tabangan niato sia sa saiyang padagos na ‘paglilinig’ poon sa mismong mga miembro nia”? Dai! An nababanga asin nakakapabangang Kakristianohan dai makakaligtas. (Marcos 3:​24, 25) Sia kabtang nin sarong pankinaban na imperyo nin falsong relihiyon na inaapod na Dakulang Babilonya. (Kapahayagan 18:​2, 3) An may kasalan sa dugo na sistemang ini nin relihiyon napapaatubang sa nagdadangadang na pagkalaglag sa kamot nin Dios.

Dai isinusuherir kan Biblia na an tunay na mga Kristiano magdanay sa laog kan biko na relihiyosong organisasyon na ini asin magmaigot na bagohon sia hale sa laog. Imbes, iyan nagsasadol: “Lumuwas kamo saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat. Huli ta an saiyang mga kasalan nakaabot na sagkod sa langit, asin ginirumdom na nin Dios an saiyang mga karatan.”​—Kapahayagan 18:​4, 5.

“Lumuwas” pasiring saen? Girumdomon, nangako si Jesus na sa panahon nin pag-ani, an tunay na mga Kristiano titiponon liwat sa sarong pambilog na kinaban na pagkasararo. Naghula man si propeta Miqueas nin siring na pagtitipon liwat sa mga tataramon na ini: “Sa pagkasararo ibubugtak ko sinda, siring sa aripompon sa toril.” (Miqueas 2:12) Ini daw nangyayari na?

Iyo! tinitipon na ngonyan an tunay na mga Kristiano sa sarong nagkakasararong asosasyon nin magturugang sa bilog na kinaban. Siisay sinda? Sinda an Kristianong kongregasyon nin mga Saksi ni Jehova, na nagkakasararong nagpapahayag kan maogmang bareta manongod sa Kahadean nin Dios sa 231 kadagaan. Sinayumahan ninda an nakakabangang mga katokdoan nin Kakristianohan asin nagmamaigot na sambahon an Dios sono sa katotoohan kan saiyang Tataramon.​—Juan 8:​31, 32; 17:17.

Kamo maogmang iniimbitaran na makipag-olay sa sainda. Kun gusto pa nindo na makaaram nin orog manongod sa mga Saksi ni Jehova, tabi makipag-aram sa sainda sa saindong lugar o paagi sa tamang adres sa pahina 2 kan magasin na ini.

[Ritrato sa pahina 7]

“Ginirumdom na nin Dios an saiyang mga karatan”