Sarong Nababangang Iglesya—Gurano Karaot Iyan?
“SIRING sa sarong dakula asin nakubhanan na pamilya, na nag-eerok sa sarong mapuay na lumang harong na biglang nagaba an atubangan na lanob, garo may iriwal na nangyayari sa kada kuwarto—na an mga aki ni Jesus nagkukururahaw na may kapot na tamburin na iwinawasiwas sa eleganteng Anglo-Katolikong mga homoseksuwal na nakasulot nin itom na mga amerikanang seda.”—The Sunday Times, Londres, Abril 11, 1993.
An pamilyang ini iyo an Iglesya nin Inglaterra. An kariribokan manongod sa pag-ako nin kababaihan sa pagkapadi. An malinaw na paglaladawan kan hararom na pagkabaranga minaaplikar man sa Kakristianohan. Mantang an mga patriarka kan Iglesya Ortodokso asin an papa minakondenar sa desisyon na togotan an mga babae na magin padi, an pankagabsan na resulta, sarong report an nagkonklusyon, iyo na “an pangatorogan na makasaro giraray kan ibang kabtang kan Kakristianohan mas harayo kisa kasuarin pa man.”
Gurano Kagrabe an Pagkabaranga kan Iglesya?
Siring sa mababasa niato sa Mateo 7:21, sinabi ni Jesus na dakol an maghihingako na nagtutubod sa saiya bilang Kagurangnan alagad dai pa man giraray ‘naggigibo kan kabotan kan saiyang Ama.’ An magasin na Maclean’s nagkomento: “An mga parabasa nin Mateo na minahanap nin kaligtasan puwedeng pagpasensiahan sa pagkaribong manongod sa kun ano an eksaktong kabotan nin Dios, mantang an mga Kristiano, asin an saindang mga iglesya, grabe an pagkalaenlaen sa isyung iyan.” Pagkatapos nin sarong surbey sa mga taga-Canada, nagdesisyon iyan na igwang “dakulang pagkakalaen sa mga paniniwala asin gibohon nin mga Kristiano sa Canada—an totoo, mas dakol an pagkakalaen sa pag-oltanan kan mga miembro nin arin man na denominasyon kisa sa pag-oltanan kan mga denominasyon mismo.”
Susog sa surbey kaiyan, 91 porsiento kan mga Katoliko an minaoyon na gumamit nin artipisyal na pagkontrol sa pangangaki dawa ngani kinokondenar iyan kan saindang iglesya; 78 porsiento an naghohona na an mga babae maninigong togotan na magin padi; asin 41 porsiento an minaako sa aborsion sa “nagkapirang mga kamugtakan.” An dai pagkaoroyon sa laog kan laen-laen na denominasyon manongod sa “dakol na hapot na teolohiko,” an sabi kan Maclean’s, “nagdodoon kan mga pagkabaranga na nakalalaglag sa nangengenot na mga iglesya.”
Duwang Pamantayan
Igwa nin duwang pamantayan siring man nin nagkakabanggaan na mga pamantayan sa moral. An iba naghihingako na sinusunod ninda an mga prinsipyo kan Biblia, alagad an iba minimenus an mga iyan. Halimbawa, an seremonya daw sa “kasal” na ginibo sa duwang Tomboy sa Simbahan na Metropolitano sa Toronto kaoyon sa kabotan nin Dios? Malinaw na iyan an paghona kan mga partisipante. “Gusto mi na selebraron an samuyang pagkamoot sa publiko asin sa atubangan nin Dios,” sabi ninda.
Sarong kolumnista an naghapot kun paano na an “sarong arsobispong Katoliko na sa saiya sunod-sunod na keha an ipinaabot, pinabalyo an mga padi na seksuwal na paraabuso sa mga aki sa iba pang grupo nin mga sakristan.” An padi na si Andrew Greeley nagsuherir na poon sa 2,000 sagkod sa 4,000 na padi an tibaad nan-abuso sa 100,000 na minor de edad na biktima, na sa parate mayong ginibo mapadapit dian.
An sarong nababangang iglesya nagbubunga nin barangang tawo. Sa Balkan, an mga “Kristianong” taga-Serbia asin taga-Croatia parehong naghohona na si Cristo yaon sa sainda sa saindang “makatanosan” na ralaban. Dakol an may sulot na krus sa ralaban; na an saro, oyon sa bareta, “perming ogom an saiyang krus sa saiyang ngoso kun kasagsagi an ralaban.”
“Dai Magkaigwa nin mga Pagkabaranga Dian sa Saindo”
Totoo, an Biblia nagpapabaya sa nagkapirang bagay sa konsensia, alagad ini dai maninigo na magwalat nin lugar para sa siring na pagkabaranga. Maliwanag na sinabi ni apostol Pablo: “Kamo gabos maninigong magtaram [asin humiro] nin may pagkaoroyon, asin . . . dai maninigo na magkaigwa nin mga pagkabaranga dian sa saindo.”—1 Corinto 1:10; Efeso 4:15, 16.
An odok na pagsiyasat sa “Kristianismo” mga duwang ribong taon pakatapos na isinurat ni apostol Pablo an mga tataramon na iyan nagpapalataw nin nagkapirang seryosong mga hapot. Taano an “mga Kristiano” ta nagkakabarangang gayo? An siring daw na nababangang iglesya makakapagdanay? Magkakaigwa daw nin sarong nagkakasararong Kakristianohan? An masunod na artikulo ipapaliwanag an mga hapot na ini.
[Ritrato sa pahina 3]
Demonstrasyon nin mga padi kontra sa aborsion
[Credit Line]
Tutob asin nasa itaas: Eleftherios/Sipa Press