An Maogmang Baretang Ini Kaipuhan na Ikahulit Nguna

“Sa gabos na nasyon an maogmang bareta kaipuhan na ikahulit nguna.”​—MARCOS 13:10.

1, 2. Ano an midbidan kan mga Saksi, asin taano?

TAANO an mga Saksi ni Jehova ta desididong marhay sa paghuhulit? Tunay nanggad na midbid kita sa bilog na kinaban huli sa satong ministeryo sa publiko, magsalang sa harong-harong, sa mga tinampo, o durante nin impormal na mga pakikipag-olay. Sa lambang angay na okasyon, ipinamimidbid niato an satong sadiri bilang mga Saksi asin naghihingoa na may pagkamataktika na ipakipag-olay an maogmang bareta na satong pinahahalagahan. Sa katunayan, masasabi niato na an ministeryong ini iyo an satong midbidan!​—Colosas 4:6.

² Horophoropa nanggad iyan​—kun an mga tawo nakakaheling sa saindang pagtaraed nin sarong grupo nin disenteng mga lalaki, babae, asin mga aki na igwang mga bag, ano an parateng enot nindang iniisip? Iyo daw an, ‘O, yaon na naman an mga Katoliko (o Ortodokso)!’ o, ‘Yaon na naman an mga Pentecostal (o Baptista)!’ Bako. Aram kan mga tawo na an mga relihiyon na iyan mayo nin bilog na pamilya na naggigibo nin ministeryo sa harong-harong. Tibaad an ibang grupo nin relihiyon nagpapadara nin nagkapirang “misyonero” na sagkod sana sa duwang taon sa nagkapirang lugar, pero an saindang indibiduwal na mga miembro dai nakikikabtang sa arin man na siring na ministeryo. Solamenteng mga Saksi ni Jehova an minimidbid sa bilog na kinaban huli sa saindang kaigotan sa pakikikomunikar kan saindang mensahe sa iba sa lambang angay na okasyon. Asin midbid sinda sa saindang mga magasin na An Torrengbantayan asin Awake!​—Isaias 43:​10-12; Gibo 1:8.

Kabaliktaran sa Klero nin Kakristianohan

3, 4. Paano parateng ipinaheheling sa media an klero nin Kakristianohan?

³ Sa biyong kabaliktaran, paorootrong ihinahayag nin mga bareta an dakol na klero sa nagkapirang kadagaan na seksuwal na paraabuso sa mga aki, inmoral na mga estapador, asin mga paradaya. An saindang mga gibo nin laman asin an saindang maluhong estilo nin pamumuhay hayag na naheheling kan gabos. An sarong popular na parasurat nin kanta ipinahayag nanggad iyan sa saiyang kanta na may titulong “Si Jesus daw Masulot nin Rolex [sarong mamahalon na bulawan na relo] sa Saiyang Pasale sa Telebisyon?” Ihinapot nia: “Si Jesus daw magigin politikal kun magbalik Sia digdi sa Daga? An Saiya daw na ikaduwang harong sa Palm Springs [sarong mayaman na komunidad sa California] asin magmamaigot na itago an Saiyang halaga?” Tamang-tama an mga tataramon ni Santiago: “Kamo namuhay sa luho sa daga asin nagpangana sa kasingawan sa laman. Pinataba nindo an saindong puso sa aldaw nin paggadan.”​—Santiago 5:5; Galacia 5:19-21.

⁴ An pakikiamistad nin klero sa mga politiko asin pagpartisipar pa ngani sa mga eleksion bilang politikal na mga kandidato nagbubuyagyag sainda bilang mga eskriba asin Fariseo sa modernong aldaw. Kadungan kaiyan, sa mga nasyon na arog baga kan Estados Unidos asin Canada, an mga kaha nin relihiyon nalilimasan huli sa halangkaw na gastos sa mga demanda asin sentensia tumang sa klero, bunga kan saindang malaswang iginagawe sa mga aki asin adulto.​—Mateo 23:​1-3.

5. Taano an klero nin Kakristianohan ta dai napatunayan bilang “maimbod asin madonong na oripon”?

⁵ Tama nanggad, masasabi ni Jesus sa klero kan saiyang kaaldawan: “Herak man sa saindo, mga eskriba asin Fariseo, mga parasaginsagin! huli ta kamo kabaing nin mga lolobngan na pinaputi, na sa luwas magayonon na paghelingon alagad sa laog pano kan mga tolang nin mga gadan asin nin gabos na klaseng karigsokan. Siring man kamo, sa luwas garo matanos sa mga tawo, alagad sa laog kamo parano nin pagsaginsagin asin katampalasanan.” Kaya, dai itinao nin Dios sa klero nin Kakristianohan, baga man Katoliko, Protestante, Ortodokso, o daing denominasyon na mga organisasyon, an sugo na ihulit an maogmang bareta. Dai sinda napatunayan na an ihinulang “maimbod asin madonong na oripon.”​—Mateo 23:​27, 28; 24:​45-47.

Taano ta Kaipuhan na Ikahulit Nguna an Maogmang Bareta?

6. Anong mga pangyayari an madali nang maotob?

⁶ Sa saiyang direktang bersion kan pagboot ni Jesus na ihulit an maogmang bareta sa gabos na nasyon, solamenteng si Marcos an naggagamit kan tataramon na “nguna.” (Marcos 13:10; ikomparar an Mateo 24:14.) An bersion ni J. B. Phillips nagsasabi: “Huli ta bago dumatong an katapusan an ebanghelyo kaipuhan na ihulit sa gabos na nasyon.” An adberbong pagkagamit sa “nguna” nagpaparisa na an iba pang mga pangyayari masunod sa pambilog na kinaban na pag-eebanghelyo. Kabale sa mga pangyayaring iyan an ipinanugang dakulang kahorasaan asin an matanos na pamamahala ni Cristo sa bagong kinaban.​—Mateo 24:​21-31; Kapahayagan 16:​14-16; 21:​1-4.

7. Taano ta boot nin Dios na ikahulit nguna an maogmang bareta?

⁷ Kaya taano ta boot nin Dios na ikahulit nguna an maogmang bareta? An sarong dahelan iyo na sia Dios nin pagkamoot, hustisya, kadonongan, asin kapangyarihan. Sa kaotoban kan mga tataramon ni Jesus na nasusurat sa Mateo 24:14 asin Marcos 13:​10, puwede niatong manompongan an kahangahangang pagpaheling kan mga atributong ini ni Jehova. Saro-sarong siyasaton niato iyan sa halipot asin helingon kun paano iyan konektado sa paghuhulit kan maogmang bareta.

An Maogmang Bareta Asin an Pagkamoot ni Jehova

8. Paano na an paghuhulit kan maogmang bareta pagpapaheling kan pagkamoot nin Dios? (1 Juan 4:​7-16)

⁸ Paano an paghuhulit kan maogmang bareta nagpapabanaag sa pagkamoot nin Dios? Enot sa gabos, huli ta iyan bakong mensahe na para sana sa sasarong rasa o grupo. Iyan an maogmang bareta para sa “gabos na nasyon.” Namomotan na gayo nin Dios an pamilya nin tawo kaya ngani isinugo nia digdi sa daga an saiyang bugtong na Aki na magin pantubos na atang para sa mga kasalan kan bilog na katawohan, bako sanang sarong rasa. Si apostol Juan nagsurat: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan. Huli ta an Dios nagsugo kan saiyang Aki sa kinaban, bakong tanganing sia maghokom sa kinaban, kundi tanganing ikaligtas an kinaban paagi sa saiya.” (Juan 3:​16, 17) Sierto nanggad na an maogmang bareta, mensahe na nanunuga nin sarong bagong kinaban na may katoninongan, pagkaoroyon, asin hustisya, ebidensia kan pagkamoot nin Dios.​—2 Pedro 3:13.

An Maogmang Bareta Asin an Kapangyarihan ni Jehova

9. Taano ta dai ginamit ni Jehova an makapangyarihan na mga relihiyon nin Kakristianohan na ihulit an maogmang bareta?

⁹ Paano ihinahayag kan paghuhulit kan maogmang bareta an kapangyarihan ni Jehova? Horophoropa, siisay an ginamit nia sa pag-otob sa sugong ini? An pinakamakapangyarihan daw na relihiyosong mga organisasyon nin Kakristianohan, arog baga kan Iglesya Katolika Romana o prominenteng mga denominasyon na Protestante? Bako, an saindang pakikilabot sa politika nagdidiskuwalipikar sainda sa asignasyon. (Juan 15:19; 17:14; Santiago 4:4) An saindang dakulang kayamanan asin an saindang mga koneksion patin impluwensia sa mga piling namamahalang grupo dai hinangaan ni Jehova Dios, ni an saindang teolohiya na konektadong marhay sa tradisyon. Dai kinaipuhan an kapangyarihan nin tawo tanganing magibo an kabotan nin Dios.​—Zacarias 4:6.

10. Siisay an pinili nin Dios na gumibo kan paghuhulit?

¹⁰ Siring iyan sa isinabi ni apostol Pablo sa saiyang surat sa kongregasyon sa Corinto: “Naheling nindo an saiyang pagkaapod saindo, mga tugang, na bakong dakol na madonong sa laman an inapod, bakong dakol na makapangyarihan, bakong dakol na mahal na tawo; kundi pinili nin Dios an mga rungaw sa kinaban, tanganing sopogon nia an mga madonong; asin pinili nin Dios an mga maluya kan kinaban, tanganing sopogon nia an mga makosog; asin pinili nin Dios an mga dusta kan kinaban asin an pinagbabasangbasang, an mga bagay na dai pa, tanganing mahalean nia nin halaga an mga bagay na iyo na, tanganing dai nin laman na makapanagsag sa atubangan nin Dios.”​—1 Corinto 1:​26-29.

11. Anong mga katunayan manongod sa mga Saksi an guminibo sainda na pambihira?

¹¹ An mga Saksi ni Jehova kakadikit kan mayayaman na miembro sa saindang organisasyon asin siertong bakong mga makapangyarihan sa politika. An saindang estriktong neutralidad sa politikal na mga bagay nangangahulogan na dai sinda puwedeng gumibo nin politikal na impluwensia. Sa kabaliktaran, sinda parateng nagin biktima nin makababaldeng paglamag sa pagsutsut kan relihiyoso asin politikal na mga namomoon durante kaining ika-20 siglo. Pero, sa ibong kan masakit na pagtumang na isinutsut tumang sainda kan mga disipulo nin Nazismo, Facismo, Komunismo, nasyonalismo, asin falsong relihiyon, bako sanang naghuhulit kan maogmang bareta sa bilog na kinaban an mga Saksi kundi makangangalas man na nagdakol an bilang ninda.​—Isaias 60:22.

12. Taano ta nagin mapanggana an mga Saksi?

¹² Sa ano iinaatribuwir kan mga Saksi an saindang kapangganahan? Si Jesus nanuga sa saiyang mga disipulo: “Kamo mag-aako nin kapangyarihan kun dumatong na saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.” Kaya, ano man nanggad an gikanan kan saindang kapangganahan? Si Jesus nagsabi: “Kamo mag-aako nin kapangyarihan kun dumatong na saindo an banal na espiritu.” Siring man ngonyan, an kapangyarihan gikan sa Dios, bakong abilidad nin tawo, an nagin liyabe sa kapangganahan kan mga Saksi sa saindang pambilog na kinaban na ministeryo. Ginagamit an garo baga pinakamaluyang mga tawo, ginigibo nin Dios an pinakadakulang edukasyonal na gibohon sa kasaysayan.​—Gibo 1:8; Isaias 54:13.

An Maogmang Bareta Asin an Kadonongan nin Dios

13. (a) Taano an mga Saksi ta naglilingkod nin boluntad asin mayo nin bayad? (b) Paano sinimbag ni Jehova an pagduhagi ni Satanas?

¹³ An maogmang bareta ihinuhulit nin mga boluntaryo. Si Jesus nagsabi: “Inako nindong daing bayad, itao man nindong daing bayad.” (Mateo 10:8) Kun siring, mayo sa mga Saksi ni Jehova an nagreresibi nin suweldo sa paglilingkod sa Dios, ni naghahagad man sinda kaiyan. Sa katunayan, dai ngani sinda nangongolekta nin kuwarta sa saindang mga pagtiripon. Sinda maogma, paagi sa saindang debotadong daing kapasloan na paglilingkod, na tumao sa Dios nin ikasisimbag sa nagsasahot saiya, si Satanas na Diablo. An espiritung paratumang na ini sa Dios garo man sana nagsabi na an mga tawo dai maglilingkod sa Dios na mayo nin paslong motibo. Sa saiyang kadonongan si Jehova nagpaluwas nin dai makukustion na simbag sa pagduhagi ni Satanas​—an minilyon na maimbod na Kristianong Saksi na naghuhulit kan maogmang bareta sa harong-harong, sa mga tinampo, asin sa impormal na paagi.​—Job 1:​8-11; 2:​3-5; Talinhaga 27:11.

14. Ano an “natatagong kayamanan” na nasasambitan ni Pablo?

¹⁴ An saro pang ebidensia kan kadonongan nin Dios na ikapahulit an maogmang bareta iyo na an panuga na Kahadean mismo sarong pagpaheling kan kadonongan nin Dios. Si apostol Pablo nagsurat: “Ngonyan kami nagtataram nin kadonongan duman sa mga maygurang, alagad bakong an kadonongan kan palakaw na ini nin mga bagay ni kan mga poon kaining palakaw nin mga bagay, na mga mapapara. Kundi kami nagtataram kan kadonongan nin Dios sa banal na hilom, an natatagong kadonongan, na itinalaga na nin Dios bago pa kan mga palakaw nin mga bagay para sa satong kamurawayan.” An “natatagong kadonongan” na iyan nanonongod sa madonong na mga paagi nin Dios sa pagtapos sa rebelyon na nagpoon sa Eden. An kadonongan kan banal na hilom na iyan nahayag ki Jesu-Cristo, na iyo an pangenot sa maogmang bareta kan Kahadean nin Dios.a​—1 Corinto 2:​6, 7; Colosas 1:​26-28.

An Maogmang Bareta Asin an Hustisya nin Dios

15. Paano niato naaaraman na si Jehova Dios nin hustisya? (Deuteronomio 32:4; Salmo 33:5)

¹⁵ Partikularmenteng may koneksion sa hustisya na naheheling niato an importansia kan tataramon na “nguna” sa Marcos 13:10. Si Jehova Dios nin hustisya na tinitimbangan nin mamomoton na kabootan. Sia nagsabi paagi sa saiyang propetang si Jeremias: “An naghahambog dapit sa saiya man sana maghambog dapit sa saiya man sana huli kan mismong bagay na ini, an pagkaigwa nin pakamansay asin an pagkaigwa nin kaaraman dapit sa sako, na ako si Jehova, an saro na naggigibo nin mamomoton na kabootan, hustisya asin katanosan sa daga; huli ta ikinaoogma ko an mga bagay na ini,’ an sabi ni Jehova.”​—Jeremias 9:24.

16. Paano ikaiilustrar na an hustisya naghahagad nin pagtao nguna nin patanid?

¹⁶ Paano naheheling an hustisya ni Jehova kun manongod sa paghuhulit kan maogmang bareta? Iilustrar niato iyan sa sarong ina na naggibo nin masiram na tsokolateng mamon na kakakanon pag-abot kan mga bisita pagkahapon. Kun iwawalat nia iyan sa lamesa sa kusina na mayo man lamang na isinabi sa saiyang mga aki manongod sa kun noarin iyan kakakanon, ano an magigin natural na tendensia kan mga aki? Kita gabos nagin mga aki kaidto! An moro nin aki gustong baloon an mamon na iyan! Ngonyan kun an ina dai nakatao nin maninigong patanid, magigin maluya an basihan nia para sa pagdisiplina. Sa ibong na kampi, kun malinaw niang sinabi na an mamon kakakanon taud-taod pag-abot kan mga bisita asin kun siring dai iyan dapat pagdotdoton, sa siring malinaw siang nagtao nin patanid. Kun igwa nin dai pagkuyog, may diretso siang gumibo nin marigon asin matanos na aksion.​—Talinhaga 29:15.

17. Paano si Jehova nagpaheling nin hustisya sa sarong espesyal na paagi poon kan 1919?

¹⁷ Si Jehova, sa saiyang hustisya, dai mapaabot nin paghokom tumang sa maraot na palakaw na ini nin mga bagay na dai nguna nagtatao nin kinakaipuhan na patanid. Kun siring, nangorogna poon kan 1919, pakatapos na an enot na guerra mundial nagdara nin “kolog nin kasakitan,” pinaduman ni Jehova an saiyang mga Saksi sa bilog na daga na maigot na nagbabalangibog kan maogmang bareta. (Mateo 24:​7, 8, 14) An mga nasyon dai tamang makakapaghingako nin dai pakaaram sa pambihirang patanid na ini.

Gurano na Kahiwas na Nalakopan an Kinaban?

18. (a) Ano an ebidensia dapit sa aktibidad kan mga Saksi sa puwerang mga lugar? (b) Ano pang ibang halimbawa an aram nindo manongod dian?

¹⁸ An indikasyon sa pagkaepektibo kan pambilog na kinaban na edukasyonal na gibohon na ini maheheling sa librong Last Places​—A Journey in the North. An autor kaiyan nagsasabi na kan siyasaton nia an mga tsart sa dagat para sa puwerang mga isla sa Foula, saro sa Shetland Islands sa amihanan nin Scotland, an mga tsart igwa nin mga tanda “sa bilog na isla na WKS (mga naraot), RKS (mga gapo), LDGS (mga bahora), asin OBS (mga olang).” An mga ini “nagpapatanid sa posibleng umabot na marinero na rumayo. An kadagatan sa Foula igwa nin makakatakot na gayong mga bombang nakalubong, na ipinangangalad an isla sa mga parayate, parabiyahe kun aldaw, asin pati sa brigada nin obras publicas kan Saiyang Kamahalan, pero dai nakaolang​—naaraman ko sa nakaaging pirang aldaw—​sa mga Saksi ni Jehova.” Sia nagpadagos: “Kun paanong maigot nindang hinahanap an mga makokombertir sa mga iskuwater sa dakulang siudad asin sa Third World, sinda naggigibo man nin proselito para sa saindang pagtubod sa puwerang lugar nin Foula.” Sinabi nia na an sarong tagaduman, si Andrew, igwa kan kopya nin An Torrengbantayan na iwinalat sa saiyang pinto mga pirang bulan na an nakaagi. Dangan idinugang nia: “Pakalihis nin sarong semana nakaheling ako nin sarong kopya nin [Awake! sa Danes] sa Faeroe [mga isla sa North Sea] asin pakalihis nin duwang bulan sarong kopya nin [An Torrengbantayan sa Danes] sa Nuuq, Greenland.” Sarong marahay an pagkataram na patotoo sa maigot na aktibidad kan mga Saksi ni Jehova sa amihanan na mga rehiyon na iyan!

Ano an Nagpapahiro sa mga Saksi na Magpadagos?

19, 20. (a) Ano an nagpapahiro sa mga Saksi ni Jehova na magpadagos sa paghuhulit? (b) Anong mga hapot an sunod na sisimbagon?

¹⁹ Siyempre, an paghuhulit sa mga estranyo sa harong-harong bakong pasil, dawa kun pirang taon nang Saksi an saro. Kaya ano an nagpapahiro sa mga Kristianong ini na magpadagos? An saindang Kristianong pagdusay asin pakamate nin paninimbagan. Si Pablo nagsurat: “Ngonyan, kun ako nagpapahayag kan maogmang bareta, bako iyan na dahelan na ako maghambog, huli ta iyan kaipuhan na gibohon ko. Sa katotoohan, herak man sa sako kun dai ako maghulit kan maogmang bareta!” An tunay na mga Kristiano igwa nin mensahe na nangangahulogan nin buhay, kaya paano ninda magigibong sadirihon na sana iyan? An mismong prinsipyo nin kasalan sa dugo huli sa dai pakatao nin patanid sa oras nin peligro sarong nagpapahirong dahelan na maghulit kan maogmang bareta.​—1 Corinto 9:16; Ezequiel 3:​17-21.

²⁰ Kun siring, paano ihinuhulit an maogmang bareta? Ano an liyabe sa kapangganahan kan mga Saksi? Anong mga kabtang kan saindang ministeryo asin organisasyon an nakatatabang na mamidbid sinda bilang tunay na relihiyon? An satong masunod na artikulo sisimbagon an mga hapot na iyan.

[Nota sa Ibaba]

Nagigirumdoman daw Nindo?

◻ Paano an mga Saksi ni Jehova napapalaen sa klero?

◻ Paano an paghuhulit nagpapabanaag kan pagkamoot, kapangyarihan, asin kadonongan nin Dios?

◻ Paano an paghuhulit kan maogmang bareta nagpapabanaag kan hustisya nin Dios?

◻ Ano an nagpapahiro sa mga Saksi ni Jehova na magpadagos sa saindang ministeryo?

[Mga ritrato sa pahina 15]

Gurano man tibaad kaharayo kan mga tawo, sinda gustong maabot kan mga Saksi ni Jehova