Taano an mga Saksi ta Padagos na Nagsosongko?

‘YAON na naman sinda! Pero nagdigdi sinda pira pa sanang semana an nakalihis!’ Iyan daw an nasa isip nindo kun an saro sa mga Saksi ni Jehova nagsosongko saindo? Minilyon ngonyan an dayaday na sinosongko kan mga Saksi ni Jehova. Puwede kamong maghapot, Taano ta nagpapadagos sinda mantang aram ninda na an mga tawo igwa nang sadiring relihiyon o bakong interesado? An hapot na iyan angay na simbagon.

Paninimbagan sa Atubangan nin Dios

Nanodan kan mga Saksi ni Jehova gikan sa Kasuratan na poon kan 1914, an taon na nagpoon an Guerra Mundial I, inootob kan mga pangyayari sa kinaban an mga hula sa Biblia manongod sa katapusan kan presenteng palakaw nin kinaban asin an nagdadangadang na pamamahala kan Kahadean nin Dios sa dagang ini. An haros sarong siglong kadahasan, pagpabolos nin dugo, asin kaongisan garo baga binayaan an katawohan nin orog kisa kasuarin pa man sa sarong politikal na solusyon sa saindang mga problema. An mga guerra asin terorismo na nagpapasakit pa sa pamilya nin tawo mga patotoo na nasudya an pamamahala nin tawo na bagohon an puso, isip, asin saboot nin mga tawo. An nakatadom nang marhay na paghinanakit sa mga nangyari kan nakaaging kasaysayan nakakaraot sa mga relasyon sa pag-oltanan nin etniko, rasyal, asin relihiyosong mga grupo. Iyan totoo sa mga lugar na siring baga kaharayo kan Afghanistan, Aprika del Sur, India, Norteng Irlandia, an Tahaw na Sirangan, asin an dating Yugoslavia. Kun siring, ano an solamenteng nagdadanay na solusyon?

Ano an Nagmomotibar sa mga Saksi?

Minimidbid kan mga Saksi ni Jehova na an solusyon nin Dios​—an saiyang ipinanugang pamamahala sa Kahadean paagi ki Cristo Jesus—​iyo an solamenteng epektibong solusyon. Iiniba pa ngani ni Jesus an kahagadan para sa pamamahala kan Kahadean na iyan sa saiyang bantog na modelong pamibi: “Kaya mamibi kamo nin arog kaini: ‘Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.’” Nagtutubod an mga Saksi na an pamibing ini talagang naghahagad para sa pag-interbenir nin Dios sa gibo-gibo nin katawohan.​—Mateo 6:​9, 10.

Kaya taano ta nakakamate nin pangangaipo an mga Saksi ni Jehova na padagos na dumuman sa harong-harong tangani na pagmaigotan na darahon an mensaheng iyan? Huli sa duwang pagboot na itinampok ni Jesus: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an pinakadakula asin enot na togon. An ikaduwa, na arog kaini, iyo ini, ‘Kamotan mo an saimong kataed nin siring sa saimo man sana.’”​—Mateo 22:​37-39.

Gusto kan mga Saksi an bendisyon nin Dios para sainda mismo, asin huli ta namomotan ninda an saindang mga kataed, boot ninda an kaparehong bendisyon na iyan para sa mga ini. Kaya, sa pagsunod sa halimbawa ni Jesus, napapahiro sinda nin daing kapasloan na pagkamoot na songkoon an saindang mga kataed. Boot ninda minsan paano na alokon an mga ini kan oportunidad na maaraman kun ano an ipinanuga kan “maogmang Dios” para sa makinuyog na katawohan sa sarong nalinigan na daga.​—1 Timoteo 1:11; 2 Pedro 3:13.

An Kristianong misyonerong si Pablo nagtubod sa mga panuga nin Dios asin kun siring nagsurat: “Si Pablo, oripon nin Dios asin apostol ni Jesu-Cristo sono sa pagtubod kan mga pinili nin Dios asin sa tamang kaaraman manongod kan katotoohan na sono sa diosnon na debosyon sa pasisikadan na paglaom sa buhay na daing katapusan na ipinanuga nin Dios, na dai makakapagputik, bago an mga panahon na daing sagkod.” Iyo, an Dios, “na dai makakapagputik,” “ipinanuga” an buhay na daing katapusan duman sa mga mapakumbabang nagmamaigot na mamidbid asin makapaglingkod sa saiya.​—Tito 1:​1, 2; Sofonias 2:3.

Binabayadan daw an mga Saksi?

Paminsanminsan an iba may soboot na binabayadan an mga Saksi sa saindang ministeryo. Harayoon ini sa katotoohan! Isinasaboot ninda an mga tataramon ni Pablo sa kongregasyon sa Corinto: “Kami bakong paratinda kan tataramon nin Dios arog nin dakol, kundi bilang gikan sa sinseridad, iyo, bilang isinugo nin Dios, na naheheling nin Dios, kaiba ni Cristo, kami nagtataram.”​—2 Corinto 2:17.

May relihiyosong mga namomoon na naghuhulit tanganing magkakuwarta, baga man iyan bayad para sa relihiyosong mga seremonya o sa pagpalakop nin komersial na mga negosyo sa saindang mga ministeryo sa TV. An kadaklan na relihiyon igwa nin binabayadan na klero.

Sa kabaliktaran, an mga Saksi mayo nin binabayadan na klero, asin parateng iinaalok na mayo nin bayad an saindang literatura sa Biblia sa sinserong mga naghahanap sa katotoohan, dawa ngani dakol sa mga ini an napapahiro na magtao nin boluntaryong donasyon. An mga ini ginagamit tanganing sustentohan an mga gastos kan pambilog na kinaban na paghuhulit na ini. Kaoyon sa sadol ni Jesus: “Inako nindong daing bayad, itao man nindong daing bayad,” an mga Saksi suweltong ginagamit an saindang mga kayamanan, kabale na an panahon asin kosog, sa paggamit nin minilyon na oras kada taon sa paglilingkod sa Dios. Kaya, tinotokdoan ninda an mga interesado sa harong-harong asin paagi sa mga pag-adal sa Biblia sa harong.​—Mateo 10:8; 28:​19, 20; Gibo 20:​19, 20.

An mga katunayan nagpapatotoo na mayo nin motibo sa kuwarta sa mga Saksi ni Jehova bilang mga indibiduwal, sa saindang lokal na mga kongregasyon, o sa Watch Tower Society. Mayo ni saro na nag-aako nin ano man na bayad sa pagharongharong. Kun siring paano ginagastosan an gibohon? Paagi sa boluntaryong mga kontribusyon gikan sa mapag-apresyar na mga tawo sa bilog na kinaban. Mayo nin koleksion na ginibo kasuarin pa man.

An Epekto kan Saindang Pagpatotoo

An ministeryo daw sa harong-harong asin an impormal na paghuhulit kan mga Saksi igwa nin epekto sa kaaraman kan publiko? An ebidensia sa media nagsisimbag nin makosogon na iyo sa hapot na iyan. Nasambitan na an mga Saksi ni Jehova durante kan mga programa sa TV asin pelikula kun may ipinaheheling na nagtotoktok sa pinto. Nasambitan na an mga Saksi sa mga komikong karikatura. An saindang maigot na aktibidad midbid na gayo kaya an mga karikaturista sa bilog na kinaban iiniba an mga pagkasambit sa mga Saksi ni Jehova. Ini puwedeng minalataw na mapagtuya, pero parateng basado an mga iyan sa positibong pundamental na katunayan​—na an mga Saksi midbid huli sa saindang padagos na paghuhulit sa harong-harong.​—Gibo 20:20.

An sarong dai pa sana nahaloy na karikatura ipinaheling an sarong lalaki na minatukad sa sarong bukid tanganing kumonsulta sa sarong “guru.” Nagsabi sia: “Magtaram kamo sa sako dapit sa makangangalas na mga bagay na mangyayari!” Paano nagsimbag an “guru”? “Helingon niato . . . Magkakaigwa nin mga gutom, peste, asin linog. An aldaw magigin kadikloman, asin an bulan magigin dugo.” An parahapot naghapot: “Ano an maogmang bareta?” Na dian nagsimbag an “guru”: “Papahidon nin Dios an gabos na luha . . . asin an kagadanan mawawara na ni pagmondo ni kolog!” Naghapot an bisita: “Paano nindo naaraman an dapit sa siring na mga bagay?” An simbag? “Mayo nin makakadulag sa mga Saksi ni Jehova!” Asin iyan siertong nagin totoo man sa karikaturista mismo!

An kahangahangang punto kan karikaturang ini asin kan iba pang kaagid kaiyan iyo na iyan nagpapahayag bako sanang kan padagos na pagsongko kan mga Saksi kundi kan dai man pagliwatliwat kan saindang mensahe. Sa pipira sanang tataramon, itinao kan karikaturista an pangenot na kabtang kan saindang pagpatotoo sa harong-harong asin nagkotar nin mga teksto.​—Ikomparar an Mateo 24:​7, 29; Kapahayagan 21:​3, 4.

An bagay na an pinakadakol na tawo sinasayumahan an saindang mensahe dai nakakapadisganar sa mga Saksi o nakaiina kan saindang kaigotan. Nagpatanid si apostol Pedro: “Sa huring mga aldaw an mga paraolog-olog madatong na may pag-olog-olog, na maglalakaw sono sa saindang mga horot asin magsasarabi: ‘Haen man ining ipinanugang presensia nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana poon kan kapinonan nin paglalang.’” Sa ibong kaini, minomotibar nin pagkamoot, an mga Saksi nagpapadagos na songkoon an saindang mga kataed asin gigibohon iyan sagkod na tapuson nin Dios an presenteng maraot na palakaw.​—2 Pedro 3:​3, 4.

Nagsabi si Jesus na sa huring mga aldaw, an maogmang bareta kaipuhan na ikahulit nguna. Para sa dugang pang pagsiyasat dapit sa kun taano asin paano, helingon an duwang minasunod na artikulo.​—Marcos 13:10.

[Mga ritrato sa pahina 9]

An mga Saksi ni Jehova mayong sinusuweldohan na grupong klero​—an gabos boluntaryong ministro