Sinusuportaran kan Organisasyon ni Jehova an Saindong Ministeryo
“Naheling ko pa an sarong anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag.”—KAPAHAYAGAN 14:6.
1. Paano nabalo an Mga Saksi ni Jehova, asin taano ta nakatagal sinda?
TAANO ta mahalagang marhay na midbidon an kabtang kan langitnon na organisasyon ni Jehova sa pagsuportar sa Kristianong ministeryo? Bueno, nahimo daw kutana kan Mga Saksi ni Jehova an paghuhulit kan maogmang bareta kan Kahadean nin Dios sa bilog na bakong makikatood na kinaban kun mayo an pagsuportar kan langitnon na mga hukbo ni Jehova? Nagibo kan mga Saksi an siring na paghuhulit durante nin siglo na may labi-labing nasyonalismo, totalitaryong mga sistema politikal, mga guerra mundial, asin laen-laen na kasakitan. Kun mayo an tabang ni Jehova natagalan daw kutana kan mga Saksi an internasyonal na pag-oran nin prehuwisyo, biribid na paghusgar, asin sa parate madahas na paglamag tumang sa sainda?—Salmo 34:7.
Pakatagal sa Ibong nin Lakop sa Kinaban na Pagtumang
2. Ano an pagkakaagid sa pag-oltanan kan tunay na mga Kristiano kaidtong enot na siglo asin kan mga sa ngonyan?
2 Sa ika-20 siglong ini, an mga kaiwal, kapwa relihioso asin politikal, nagbugtak nin gabos na posibleng balakid, legal asin iba pa, tanganing hingoahon na olangon o paontokon an gibohon ni Jehova. An Kristianong mga tugang na lalaki asin babae pinaglamag, minisrepresentar, binalobagi, asin pinakaraot—an dakol ginadan pa ngani—na sa parate sa sutsut kan klero nin Dakulang Babilonya. Masasabi, arog kan sa enot na mga Kristiano, na “an totoo kun dapit sa sektang ini naaaraman mi na sa gabos na lugar iyan pinaglilibak.” Kun paanong an Judiong klero kan panahon ni Cristo ginibo an bilog na makakaya na mapaontok an saiyang ministeryo, an klero asin mga apostata man, kakontsaba an saindang politikal na mga sambay, naghingoa na olangon an dakulang edukasyonal na gibong pagpatotoo kan banwaan ni Jehova.—Gibo 28:22; Mateo 26:59, 65-67.
3. Ano an manonodan ta sa integridad ni Henryka Żur?
3 Helinga bilang halimbawa an nangyari sa Polandia kan Marso 1, 1946. Si Henryka Żur, sarong 15 anyos na daragitang Saksi na tagaduman sa harani sa Chełm, nag-iba sa saro pang Saksi, sarong tugang na lalaki, tanganing songkoon an interesadong mga tawo sa kaharaning baryo. Inarestar sinda kan mga miembro nin sarong Katolikong iskuad militar na inaapod Narodowe Siły Zbrojne (Puersa Armada Nasyonal). An tugang na lalaki maringis na binugbog alagad nakaligtas. Si Henryka dai. Sia pinasakitan sa makababaldeng paagi sa laog nin dakol na oras mantang hinihingoa ninda na piriton siang mangurus kan sa Katoliko. An saro sa mga nagpapasakit sa saiya nagsabi: “Bahala ka kun ano an nasa laog kan isip mo, basta mangurus ka sana kan sa Katoliko. Ta kun dai sarong bala an naghahalat sa saimo!” Nanluya daw an saiyang integridad? Dai. An relihiosong mga kobarde ginuyod sia pasiring sa kaharaning kadlagan asin binadil sia. Pero, sia mapanggana! Dai ninda naraot an saiyang integridad.a—Roma 8:35-39.
4. Paano naghingoa an politikal asin relihiosong mga elemento na paontokon an paghuhulit kan Kahadean?
4 Sa laog nin labing sanggatos na taon, an mga lingkod nin Dios sa presenteng panahon trinato nin maringis asin daing galang. Huli ta an Mga Saksi ni Jehova bako, asin habong magin, kabtang kan pangenot na mga relihion ni Satanas, an pagheling sa sainda angay na magin biktima nin siisay man na may kinakampihan na kritiko o kalaban na panatiko. Sinda maisog na sinalakay nin politikal na mga elemento. Dakol na Saksi an ginadan na martir huli sa saindang pagtubod. Maski an mga demokrasya daa naghingoang olangon an paghuhulit kan maogmang bareta. Kaidto pang 1917 sa Canada asin Estados Unidos, an klero nagsutsut nin mga sahot na subersion tumang sa Mga Estudyante sa Biblia, na apod kaidto sa mga Saksi. An mga opisyal kan Watch Tower Society ibinilanggo sa salang sahot, na kan huri na sana napatunayan na daing sala.—Kapahayagan 11:7-9; 12:17.
5. Anong mga tataramon an nakatabang na maparigon an boot kan mga lingkod ni Jehova?
5 Ginamit ni Satanas an gabos na paaging magigibo nia tanganing hingoahon na paontokon an pagpatotoo kan mga tugang ni Cristo asin kan saindang maimbod na kairiba. Pero, siring sa ipinaheheling kan kadakol na eksperyensia, an mga huma, pananakot, pisikal na kadahasan, bilanggoan, kampo de konsentrasyon, o kagadanan man dai nakapasilensio sa Mga Saksi ni Jehova. Asin totoo ini sa bilog na kasaysayan. Paorootro, an mga tataramon ni Eliseo nagserbing pamparigon sa boot: “Dai ka matakot, huli ta mas dakol an nasa sato kisa sa nasa sainda.” An sarong dahelan iyo na an fiel na mga anghel daog sa bilang an mga kampon kan Diablo!—2 Hade 6:16; Gibo 5:27-32, 41, 42.
Binebendisyonan ni Jehova an Maigot na Paghuhulit
6, 7. (a) Anong naenot na mga paghihingoa an ginibo tanganing ihulit an maogmang bareta? (b) Anong kapakipakinabang na pagliliwat an nangyari poon kan 1943?
6 Durante kan ika-20 siglo, ginamit kan Mga Saksi ni Jehova an dakol na pag-oswag sa teknolohiya tanganing pakosogon asin parikason an dakulang gibohon na pagpatotoo bago dumatong an katapusan. Kaidtong 1914, pinalakop ni Pastor Russell, an enot na presidente kan Watch Tower Bible and Tract Society, an enot na paggamit nin mga slide asin pelikula, na sinasabayan nin komentaryong basado sa Biblia na nasa mga plaka nin ponograpo, sa walong oras na pasale manongod sa Biblia na inapod na “The Photo-Drama of Creation.” Pinagngalasan iyan kan mga nagdalan sa dakol na nasyon kan panahon na idto. Sa huri, kan mga taon nin 1930 asin 1940, an mga Saksi namidbid huli sa saindang paghuhulit sa harong-harong na may darang aroalsang mga ponograpo, na naggagamit nin mga plaka nin pahayag sa Biblia na itinao ni J. F. Rutherford, an ikaduwang presidente kan Sosyedad.
7 Kan 1943 ginibo an mapusong lakdang sa pagdirehir ni Nathan H. Knorr, an ikatolong presidente kan Sosyedad, kan mapagdesisyonan na mag-establisar nin sarong paadalan para sa mga ministro sa kada kongregasyon. An mga Saksi sasanayon na maghulit asin magtokdo sa harong-harong na dai naggagamit nin mga plaka sa ponograpo. Poon kaidto, an iba pang paadalan inorganisar sa pagsanay sa mga misyonero, bilog na panahon na mga ministrong payunir, kamagurangan sa kongregasyon, asin responsableng mga paraataman sa mga sangang opisina kan Watch Tower Society. Ano an nagin resulta?
8. Paano nagpaheling nin dakulang pagtubod an mga Saksi kan 1943?
8 Kaidtong 1943, sa tahaw nin Guerra Mundial II, igwa sana nin 129,000 na Saksi na aktibo sa 54 kadagaan. Pero, yaon sa sainda an pagtubod asin determinasyon na an Mateo 24:14 maootob bago dumatong an katapusan. Kombensido sinda na ipababalangibog nguna ni Jehova an mahalagang nagpapatanid na mensahe bago an sunod-sunod na mga pangyayari na matapos sa maraot na palakaw na ini nin mga bagay. (Mateo 24:21; Kapahayagan 16:16; 19:11-16, 19-21; 20:1-3) Binalosan daw an saindang mga paghihingoa?
9. Anong mga katunayan an nagpapaheling na nagin mapanggana an pagpatotoo?
9 Igwa na ngonyan nin kisuerra 13 nasyon na kada saro igwa nin labi sa 100,000 na aktibong Saksi. An nagkapira kaini kadagaan na dominado kan Iglesia Katolika. Pero, helinga an situwasyon. An Brazil igwang mga 450,000 na parahayag kan maogmang bareta, asin labing 1,200,000 an nag-atender sa Memorial kan kagadanan ni Cristo kan 1997. An Mejico saro pang halimbawa, na igwa nin haros 500,000 na Saksi asin labing 1,600,000 na nag-atender sa selebrasyon kan Memorial. An iba pang Katolikong nasyon iyo an Italia (mga 225,000 na Saksi), Pransia (mga 125,000), España (labing 105,000), asin Argentina (labi sa 115,000). Sa Estados Unidos, na nakalalabi sa bilang an mga relihion na Protestante, Katoliko, asin Judio, igwa nin mga 975,000 na Saksi asin labing 2,000,000 an nag-atender sa Memorial. Daing duwa-duwa, dakulang mga kadaklan an nagruruluwas sa Dakulang Babilonya, an pankinaban na imperyo nin falsong relihion, kaiba an mistikong mga katokdoan kaiyan asin nagdodorolok sa simple asin seguradong mga panuga nin Dios na “bagong kalangitan asin sarong bagong daga.”—2 Pedro 3:13; Isaias 2:3, 4; 65:17; Kapahayagan 18:4, 5; 21:1-4.
Pagliwat Tanganing Makabagay sa mga Pangangaipo kan mga Tawo
10. Paano nagbago an situwasyon sa nagkapirang lugar?
10 An dakol sa mga nagdolok ki Jehova paagi ki Cristo Jesus nanompongan sa harong-harong. (Juan 3:16; Gibo 20:20) Alagad may iba pang paagi na ginamit. Iba na an panahon, asin masakit na an mga kamugtakan sa pagbuhay kaya dakol na babae ngonyan an nagtatrabaho sa luwas kan harong. Sa parate, sa laog kan semana, pipira an manonompongan sa harong. Sa siring, an Mga Saksi ni Jehova nakibagay sa situwasyon. Arog ni Jesus asin kan enot na mga disipulo, nagduduman sinda sa lugar asin sa oras na manonompongan an mga tawo.—Mateo 5:1, 2; 9:35; Marcos 6:34; 10:1; Gibo 2:14; 17:16, 17.
11. Saen naghuhulit ngonyan an Mga Saksi ni Jehova, asin may anong resulta?
11 An mga Saksi naggigibo nin inisyatiba asin naghuhulit sa maingat na paagi sa mga tawo na nasa darakulang paradahan, galeriya, pabrika, opisina asin lugar nin negosyo, eskuelahan, presinto, gasolinahan, hotel asin restawran, asin sa tinampo. Sa katunayan, sinda naghuhulit saen man manonompongan an mga tawo. Asin kun nasa harong an mga tawo, kun siring an mga Saksi padagos na nagsosongko sa sainda dian. An ibinabagay asin praktikal na pamamaaging ini nagbubunga nin nadadagdagan na pagwaras nin mga babasahon sa Biblia. Nanonompongan an mga arog-karnero. Napoponan an bagong mga pag-adal sa Biblia. An pinakadakulang edukasyonal na gibohon sa kasaysayan nin tawo ginigibo nin maigot kan labi sa lima may kabangang milyon na boluntaryong ministro! Pribilehio daw nindo an pagigin saro sa sainda?—2 Corinto 2:14-17; 3:5, 6.
Ano an Nagmomotibar sa Mga Saksi ni Jehova?
12. (a) Paano tinotokdoan ni Jehova an saiyang banwaan? (b) Ano an epekto kan pagtotokdong ini?
12 Ano an kabtang kan langitnon na organisasyon sa gabos na ini? Si Isaias naghula: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda.” (Isaias 54:13) Tinotokdoan ni Jehova an lakop sa kinaban na sararong asosasyon na ini nin magturugang paagi sa saiyang naheheling na organisasyon digdi sa daga—sa mga Kingdom Hall, sa mga kombension, asin sa mga asamblea. Pagkasararo asin katoninongan an ibinubunga. An pagtotokdo ni Jehova nagpaluwas nin sarong banwaan na daing kapareho, na tinokdoan na kamotan an lambang saro asin an saindang kataed nin siring sa sainda man sana, bakong kaongisan an saindang kataraed, saen man sinda nag-iistar sa nakababanga asin baranga na kinaban na ini.—Mateo 22:36-40.
13. Paano niato naseseguro na kalabot an paggiya kan mga anghel sa paghuhulit?
13 An pagkamoot an nagmomotibar sa Mga Saksi ni Jehova na padagos na maghulit sa ibong nin pagkaindiperente o paglamag. (1 Corinto 13:1-8) Aram ninda na an saindang nagliligtas-buhay na gibohon dinidirehiran hale sa langit, siring sa sinasabi kan Kapahayagan 14:6. Ano an mensahe na ibinabalangibog sa paggiya nin mga anghel? “Matakot kamo sa Dios asin pamurawayon sia, huli ta nag-abot na an oras kan saiyang paghokom, asin kaya sambahon nindo an Saro na naggibo kan langit asin daga asin dagat patin mga burabod nin tubig.” An paghuhulit kan maogmang bareta kan Kahadean pinamumuraway an ngaran ni Jehova. An mga tawo inaagda na pamurawayon an Kaglalang, an Dios, bakong an mga linalang asin daing isip na ebolusyon. Asin taano ta apretadong marhay an paghuhulit? Huli ta nagdatong na an oras nin paghokom—paghokom tumang sa Dakulang Babilonya asin sa gabos na iba pang aspekto kan naheheling na palakaw nin mga bagay ni Satanas.—Kapahayagan 14:7; 18:8-10.
14. Sairisay an kalabot sa dakulang kampanyang ini nin pagtotokdo?
14 Daing dusay na Kristiano na puera sa paghuhulit na ini. An espirituwal na kamagurangan an nangengenot sa paghuhulit kaiba kan kongregasyon. An sinanay na mga payunir biyong sibot sa gibohon. An maigot na mga parahayag kan mensahe kan Kahadean, baga man nakapaghuhulit sana nin pirang oras kada bulan o nin dakol, pinalalakop an mensahe sa gabos na parte kan daga.—Mateo 28:19, 20; Hebreo 13:7, 17.
15. Ano an sarong nagpaparisa kan epekto kan paghuhulit kan Mga Saksi ni Jehova?
15 Nagkaigwa daw nin epekto sa kinaban an gabos na paghihingoang ini? An sarong simpleng prueba na iyan nagkaigwa nin epekto iyo an dakol nang beses na an Mga Saksi ni Jehova itinatampok sa mga programa sa TV asin mga bareta sa diaryo. An mga ini parateng nagtatampok kan satong pagkadesidido asin determinasyon na makaolay an gabos. Iyo, an satong kaigotan asin dayaday na presensia hararom an epekto, dawa kun sinasayumahan kan mayoriya an mensahe asin mga mensahero!
An Satong Kaigotan na Taposon an Pagpatotoo
16. Anong kaisipan an maninigong ipaheling ngonyan sa limitadong panahon na natatada?
16 Dai niato aram kun gurano pa kahaloy na panahon an natatada para sa palakaw na ini nin mga bagay, ni kaipuhan tang maaraman iyan basta dalisay an satong motibo sa paglilingkod ki Jehova. (Mateo 24:36; 1 Corinto 13:1-3) Alagad aram nanggad niato na tanganing mahayag an pagkamoot, kapangyarihan, asin hustisya ni Jehova, dapat na ikahulit “nguna” an maogmang bareta. (Marcos 13:10) Kun siring, gurano man kadakol nang taon na tibaad galaga niatong hinahalat an katapusan kan maraot, bakong makatanosan, asin madahas na kinaban na ini, kita dapat na maigot na gumawe sono sa satong pagdusay depende sa satong mga kamugtakan. Tibaad kita may edad na o may helang, alagad puede pa kitang maglingkod ki Jehova na igwa kan kaigotan na yaon sa sato kaidtong kita mas hoben pa o mas makosog pa an salud. Tibaad dai na niato kayang gumamit nin oras sa ministeryo na arog kadakol kan nagagamit niato kaidto, alagad tunay nanggad na kaya niatong papagdanayon an kualidad kan satong atang nin pag-omaw ki Jehova.—Hebreo 13:15.
17. Isaysay an sarong nakaparirigon sa boot na eksperyensia na tibaad makatabang sa sato gabos.
17 Kun siring, baga man hoben o gurang, ipaheling ta an kaigotan asin ihiras an satong positibong mensahe manongod sa bagong kinaban sa gabos na nanonompongan ta. Arogon ta an masosopgon na siete anyos na aking babae sa Australia na uminiba sa saiyang ina pasiring sa tindahan. Nadangog nia sa Kingdom Hall kun gurano kahalaga na an gabos maghulit, kaya naglaag sia nin duwang brosyur sa Biblia sa saiyang bag. Mantang sibot an saiyang ina sa pamamakal, nawara an aki. Kan hanapon sia kan saiyang ina, nakua sia na nag-aalok nin brosyur sa sarong babae! Nagrani an ina tanganing humagad nin dispensasyon sa ano man na tibaad pakaistorbo kan saiyang aki sa babae. Alagad maboot na inako kan babae an brosyur. Kan masolo giraray kan ina an saiyang aki, hinapot nia ini kun paano sia nagkaigwa nin kapusoan na dolokon an sarong dai kamidbid. “An sabi ko sana, Uno, Dos, Tres! Asin ruminani na ako!”
18. Paano niato ikapaheheling an kahangahangang espiritu?
18 Kaipuhan niato gabos an espiritu na kapareho kan sa aking iyan na Australiana, nangorogna tangani na ikapaabot sa mga dai kamidbid o maski mga opisyal an maogmang bareta. Tibaad kita natatakot na sayumahan. Dai niato paglingawan an sinabi ni Jesus: “Dai kamo mahadit manongod sa kun paano o kun ano an itataram nindo sa pagdepensa o kun ano an sasabihon nindo; huli ta an banal na espiritu an magtotokdo sa saindo sa mismong oras na iyan kan mga bagay na dapat nindong sabihon.”—Lucas 12:11, 12.
19. Ano an saboot nindo manongod sa saindong ministeryo?
19 Kaya magtiwala sa tabang kan espiritu nin Dios mantang ipinaaabot nindo an maogmang bareta sa mga tawo sa maboot na paagi. Minilyon an nagtitiwala sa parate daing kuentang mga lalaki asin babae na yaon ngonyan asin mayo na sa aga. Kita nagtitiwala ki Jehova asin sa saiyang langitnon na organisasyon—si Cristo Jesus, an banal na mga anghel, asin an binuhay liwat na linahidan na mga Kristiano—na buhay sagkod lamang! Kun siring, girumdomon: “Mas dakol an nasa sato kisa sa nasa sainda”!—2 Hade 6:16.
[Nota sa ibaba]
a Para sa dugang na halimbawa, helingon an 1994 Yearbook of Jehovah’s Witnesses, pahina 217-20.
Ano an Simbag Nindo?
◻ Ano an nagin kabtang kan langitnon na organisasyon nin Dios sa pakatagal kan banwaan ni Jehova?
◻ Anong politikal asin relihiosong mga elemento an suminalakay sa Mga Saksi ni Jehova sa ika-20 siglo?
◻ Paano liniwat kan Mga Saksi ni Jehova an saindang ministeryo tanganing makabagay sa mga pangangaipo sa presenteng mga panahon?
◻ Ano an nagmomotibar sa saindo na maghulit?
[Retrato sa pahina 17]
Si Henryka Żur
[Mga retrato sa pahina 18]
Hapon
Martinique
Estados Unidos
Kenya
Estados Unidos
An Mga Saksi ni Jehova naghuhulit saen man asin noarin man manonompongan an mga tawo
[Retrato sa pahina 20]
Sa mas naenot na mga taon kan siglong ini, an mga ponograpo ginamit sa pagpalakop kan mensahe kan Kahadean