Pagpapatotoo sa “Gabos na Nasyon”

“An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”​—MATEO 24:14.

1. Taano ta siertong ipinagngalas kan saiyang mga parasunod an mga tataramon ni Jesus na nasusurat sa Mateo 24:14?

SIERTONG ipinagngalas nanggad kan saiyang Judiong mga disipulo an mga tataramon ni Jesus sa itaas! An mismong ideya dapit sa pinabanal na mga Judio na makikipag-olay sa ‘maating’ mga Gentil, an “mga tawo kan mga nasyon,” bago sa sarong Judio, makaoongis pa ngani.a Tara, an makinuyog sa konsensiang Judio dai maisip na lumaog sa harong nin Gentil! An Judiong mga disipulong idto kadakol pa kan dapat na manodan manongod ki Jesus, sa saiyang pagkamoot, asin saiyang sugo. Asin kadakol pa sindang dapat na manodan manongod sa pagkadaing ipinaoorog ni Jehova.​—Gibo 10:​28, 34, 35, 45.

2. (a) Gurano na kahiwas an ministeryo kan mga Saksi? (b) Anong tolong pundamental na dahelan an nakakontribuwir sa pag-oswag kan mga Saksi?

² An mga Saksi ni Jehova naghulit kan maogmang bareta sa tahaw kan mga nasyon, kabale an Israel sa modernong aldaw, asin ibinabalangibog iyan ngonyan sa mas dakol na nasyon kisa kasuarin pa man. Kan 1994 labi sa apat may kabangang milyon na Saksi an naghuhulit sa mga 230 kadagaan. Sinda nagkokondukta nin mga apat may kabangang milyon na pag-adal sa Biblia sa harong sa interesadong mga tawo. Ini ginigibo sa atubang nin pambilog na kinaban na kaanggotan, na parateng basado sa pagkaignorante dapit sa mga katokdoan asin motibo kan mga Saksi. Arog kan nasabi manongod sa enot na mga Kristiano, siring man an masasabi dapit sainda: “An totoo kun dapit sa sektang ini naaaraman mi na sa gabos na lugar iyan pinaglilibak.” (Gibo 28:22) Kaya sa ano niato ikaaatribuwir an saindang mapangganang ministeryo? Igwa nin kisuerra tolong bagay na nakakokontribuwir sa saindang pag-oswag​—pagsunod sa mga paggiya kan espiritu ni Jehova, pag-arog sa praktikal na mga paagi ni Cristo, asin paggamit sa tamang mga instrumento para sa epektibong pakikikomunikar.

An Espiritu ni Jehova Asin an Maogmang Bareta

3. Taano ta dai niato puwedeng ipaghambog an mga naginibo?

³ Ipinaghahambog daw kan mga Saksi ni Jehova an saindang kapangganahan, na garo baga iyan dahelan sa ano man na tibaad espesyal na mga abilidad ninda? Dai, huli ta minaaplikar an mga tataramon ni Jesus: “Kun nahaman na nindo an gabos na ipinagigibo sa saindo, magsabi kamo, ‘Kami mga oripon na daing kamanungdanan. An ginibo niamo iyo an katongdan niamong gibohon.’” Bilang dusay, bautisadong mga Kristiano, an mga Saksi ni Jehova boluntad na inako an paninimbagan na maglingkod sa Dios, ano man an saindang personal na mga kamugtakan. Para sa iba, iyan nangangahulogan nin bilog na panahon na paglilingkod bilang mga misyonero o bilang mga boluntaryo sa mga sangang opisina asin mga pasilidad sa pag-imprenta nin Kristianong mga publikasyon. Para sa iba an siring na Kristianong pagkaboluntad naggigiya sainda sa gibohon na pagtogdok nin relihiyosong mga edipisyo, sa bilog na panahon na paghuhulit bilang mga ministrong payunir, o sa por orang paglilingkod bilang mga parahayag kan maogmang bareta sa lokal na mga kongregasyon. Mayo sato an tamang makapaghambog kan paggibo sa satong obligasyon, ‘an katongdan niatong gibohon.’​—Lucas 17:10; 1 Corinto 9:16.

4. Paano napangganahan an pambilog na kinaban na pagtumang sa Kristianong ministeryo?

⁴ An ano man na kapangganahan niato ikaaatribuwir sa espiritu, o puwersa aktiba, ni Jehova. Balido man na sabihon ngonyan arog kaidto kan kaaldawan ni propeta Zacarias: “Ini iyo an tataramon ni Jehova ki Zorobabel, na nagsasabi, ‘Bakong paagi sa puwersa militar, ni sa kapangyarihan, kundi paagi sa sakong espiritu,’ nagsabi si Jehova nin mga hukbo.” Kaya, an pambilog na kinaban na pagtumang sa paghuhulit kan mga Saksi napangganahan, bakong paagi sa paghihingoa nin tawo, kundi paagi sa pagdirehir asin proteksion ni Jehova.​—Zacarias 4:6.

5. Ano an kabtang ni Jehova sa pagpalakop kan mensahe kan Kahadean?

⁵ Manongod duman sa mga naghihimate sa mensahe kan Kahadean, si Jesus nagsabi: “Nasusurat sa mga Propeta, ‘Asin sinda gabos totokdoan ni Jehova.’ An gabos na nakadangog sa Ama asin nakanood minadolok sa sako. . . . Mayo nin makadodolok sa sako kun dai iyan itao saiya kan Ama.” (Juan 6:​45, 65) Si Jehova puwedeng makabasa nin mga puso asin isip, asin midbid nia an mga posibleng maghihimate sa saiyang pagkamoot minsan ngani tibaad dai pa ninda sia midbid. Ginagamit man nia an saiyang mga anghel na direhiran an pambihirang ministeryong ini. Iyan an dahelan na sa bisyon naheling ni Juan an pakikikabtang kan mga anghel asin sia nagsurat: “Naheling ko pa an sarong anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan.”​—Kapahayagan 14:6.

Nakakamate kan Espirituwal na Pangangaipo

6. Anong pundamental na kaisipan an kaipuhan tanganing an saro maghimate sa maogmang bareta?

⁶ An saro pang dahelan na tinatawan ni Jehova an saro nin oportunidad na mag-ako kan maogmang bareta iyo an ipinahayag ni Jesus: “Maogma idtong mga nakamamate kan saindang espirituwal na pangangaipo, huli ta an kahadean kan kalangitan sadiri ninda.” (Mateo 5:3) An tawong kontento na sa sadiri o saro na dai naghahanap kan katotoohan dai makakamate nin espirituwal na pangangaipo. Sia nag-iisip sana sa materyal, makalaman na mga termino. An pagkakontento na sa sadiri nagigin olang. Kun siring, kun an dakol na satong nakakaolay mantang kita naghaharongharong nagsasayuma sa mensahe, dapat niatong horophoropon an gabos na manlaenlaen na tibaad dahelan kan mga tawo sa saindang reaksion.

7. Taano ta dakol an dai naghihimate sa katotoohan?

⁷ An dakol nagsasayumang maghinanyog huli ta may katagasan sindang nagsusunod sa relihiyon na saindang nagimatan asin habo nang makipag-olay. An iba nadagka sa relihiyon na nakasosono sa saindang personalidad​—an iba gusto nin mistisismo, an iba naghihimate sa emosyonalismo, an iba pa interesado sana sa sosyal na mga aktibidad sa saindang iglesya. An dakol ngonyan pinili an estilo nin pamumuhay na tumang sa mga pamantayan nin Dios. Puwedeng inmoral an saindang pamumuhay, na iyo an saindang rason sa pagsabing, “Bako akong interesado.” Pero an iba, na tibaad naghihingakong edukado asin sientipiko, sinasayumahan an Biblia ta kulang na marhay.​—1 Corinto 6:​9-11; 2 Corinto 4:​3, 4.

8. Taano an pagsayuma ta dai maninigong makapaluya sa satong kaigotan? (Juan 15:​18-20)

⁸ Maninigo daw na an pagsayuma kan kadaklan makapaluya sa satong pagtubod asin kaigotan sa nagliligtas-buhay na ministeryo? Makakakua kita nin karangahan sa mga tataramon ni Pablo sa mga taga-Roma: “Ano, kun siring, an kamugtakan? Kun an nagkapira dai nagpahayag nin pagtubod, hahalean daw nin halaga kan saindang kadaihan nin pagtubod an kaimbodan nin Dios? Dai logod iyan mangyari noarin man! Kundi makua logod na an Dios totoo, minsan pa an gabos na tawo makuang putikon, siring sa nasusurat: ‘Tanganing ika mapatunayan na matanos sa saimong mga tataramon asin manggana kun ika hinohokoman.’”​—Roma 3:​3, 4.

9, 10. Ano an ebidensia na an pagtumang napangganahan sa dakol na kadagaan?

⁹ Makakukua kita nin pagpakosog sa dakol na halimbawa sa bilog na kinaban dapit sa mga nasyon na garo baga daing gayo naghihimate pero, pag-abot nin panahon, nagin an mismong kabaliktaran. Aram na ni Jehova asin kan mga anghel na igwa pang manonompongan na mga maboot​—pero an mga Saksi ni Jehova kaipuhan na magin desidido asin magtagal sa saindang ministeryo. Halimbawa, may nagkapirang nasyon na an Katolisismo garo baga dai madadaog na olang kaidtong 50 taon na an nakaagi​—Argentina, Brazil, Colombia, España, Irlandia, Italia, Mejico, asin Portugal. Diit an mga Saksi kaidtong 1943, 126,000 sana sa bilog na kinaban, na an 72,000 kaini sa Estados Unidos. An pagkaignorante asin kaanggotan na napapaatubang sa mga Saksi garo baga adobeng lanob na dai magagaba. Pero, ngonyan an nagkapira sa pinakamapangganang mga resulta nin paghuhulit nangyari sa mga nasyon na ini. Totoo man iyan manongod sa dating Komunistang mga nasyon. Kan 1993 an pagbautismo sa 7,402 sa kombension sa Kiev, Ukraine, nagtatao nin ebidensia kaini.

¹⁰ Anong mga paagi an ginamit kan mga Saksi tanganing ikakomunikar an maogmang bareta sa saindang kataraed? Naggamit daw sinda nin materyal na mga pan-akit tanganing makakombertir, na iyo an isinasahot kan iba? Sinongko sana daw ninda an mga dukha asin daing inadalan, siring sa hinihingako nin iba?

Mapangganang mga Paagi sa Pagpaabot kan Maogmang Bareta

11. Anong marahay na halimbawa an itinao ni Jesus sa saiyang ministeryo? (Helingon an Juan 4:​6-26.)

¹¹ Si Jesus asin an saiyang mga disipulo nagbugtak kan arogan na sinusunod kan mga Saksi sagkod ngonyan sa saindang paggibo nin mga disipulo. Si Jesus nagduman kun saen igwang tawo, mayaman o dukha​—sa mga harong, sa pampublikong mga lugar, sa mga gilid nin danaw, sa mga gilid nin bukid, pati sa mga sinagoga.​—Mateo 5:​1, 2; 8:14; Marcos 1:16; Lucas 4:15.

12, 13. (a) Paano si Pablo nagtao nin arogan para sa mga Kristiano? (b) Paano sinunod kan mga Saksi ni Jehova an halimbawa ni Pablo?

¹² Manongod sa saiyang sadiring ministeryo, si apostol Pablo tamang makakasabi: “Kamo man sana nakakaaram na poon kan enot na aldaw na nagtongtong ako sa distrito nin Asia kaibanan ako nindo sa gabos na panahon, na naglilingkod sa Kagurangnan . . . , mantang dai ako nagpogol sa pagsabi sa saindo kan ano man na bagay na kapakipakinabang ni sa pagtokdo sa saindo sa publiko asin sa pagharongharong.”​—Gibo 20:​18-20.

¹³ An mga Saksi ni Jehova midbid sa bilog na kinaban sa saindang pagsunod sa arogan kan mga apostol, an ministeryo sa harong-harong. Imbes na magkonsentrar sa mamahalon, hababaw, asin bakong personal na ministeryo sa TV, an mga Saksi nagduduman sa mga tawo, mayaman asin dukha, asin kinakaolay sinda nin personal. Pinagmamaigotan nindang makipag-olay manongod sa Dios asin sa saiyang Tataramon.b Dai sinda naghihingoang gumibo nin malutong mga Kristiano, na nananao nin materyal na mga bagay. Sa mga gustong mangatanosan, saindang idinodoon na an solamenteng tunay na solusyon sa mga problema nin katawohan iyo an pamamahala kan Kahadean nin Dios, na mabago sa mga kamugtakan digdi sa satong daga para sa ikararahay.​—Isaias 65:​17, 21-25; 2 Pedro 3:13; Kapahayagan 21:​1-4.

14. (a) Paano an dakol na misyonero asin payunir nagtogdok nin marigon na pundasyon? (b) Ano an satong manonodan sa eksperyensia kan mga Saksi ni Jehova sa Hapon?

¹⁴ Tanganing mahaman an gibohon sa pinakadakol na nasyon na mapupuwede, an mga misyonero asin payunir nakaabante na sa dakol na nasyon. Nakatogdok na sinda nin pundasyon, dangan pinangenotan kan mga Saksi sa lokal. Kaya, dai nangaipo nin dakulang bilang nin mga Saksing tagaibang nasyon tanganing ikapadagos an paghuhulit asin mapagdanay iyan na organisadong marhay. An sarong pambihirang halimbawa iyo an sa Hapon. Kaidtong huring mga taon nin 1940, haros Australasiano asin Britano sanang mga misyonero an nagduruman, pinag-adalan an tataramon, nakibagay sa medyo suanoy na mga kamugtakan kan panahon na iyan pakatapos nin guerra, asin pinonan an pagpatotoo sa harong-harong. Durante kan Guerra Mundial II, an mga Saksi pinagbawalan asin pinaglamag sa Hapon. Kaya pipira sanang aktibong mga Saksing Hapones an naabotan kan mga misyonero. Pero ngonyan sinda nagdakol nin labi sa 187,000 sa labing 3,000 na kongregasyon! Ano an sekreto kan saindang enot na kapangganahan? An sarong misyonero na igwa nin labi nang 25 taon nin paglilingkod duman nagsabi: “Pinakaimportante na makanood na makipag-olay sa mga tawo. Paagi sa pakaaram sa saindang tataramon, nagibo niamong makiibaiba sa sainda, na saboton asin apresyaron an saindang pamumuhay. Kaipuhan niamong ipaheling na namomotan mi an mga Hapones. Mapakumbaba niamong hiningoa na magin kabtang kan lokal na komunidad na dai, siyempre, ikinokompromiso an samong Kristianong mga pamantayan.”

An Kristianong Paggawe Patotoo Man

15. Paano an mga Saksi nagpaheling nin Kristianong paggawe?

¹⁵ Alagad, an mga tawo dai naghimate sa mensahe sana kan Biblia. Naheling man ninda an Kristianismo na ginigibo. Namasdan ninda an pagkamoot, pagkaoroyon, asin pagkasararo kan mga Saksi maski sa irarom nin pinakamasakit na mga situwasyon, arog baga nin mga guerra sibil, paglalaban nin mga tribo, asin iriwal sa rasa. An mga Saksi nagpadanay nin malinaw na paninindogan sa Kristianong neutralidad sa gabos na iriwal asin inotob an mga tataramon ni Jesus: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.”​—Juan 13:​34, 35.

16. Anong eksperyensia an nag-iilustrar nin praktikal na Kristianong pagkamoot?

¹⁶ An pagkamoot sa kataed iinilustrar sa kamugtakan nin sarong gurang nang lalaki na nagsurat sa lokal na peryodiko manongod ki “Mr. asin Mrs. Marahay na Tawo.” Saiyang ipinaliwanag na an saiyang kataraed nagin maboot saiya kan naghihingagdan an saiyang agom. “Magpoon kan sia magadan . . . sinda nagin marahayon nanggad,” an isinurat nia. “Magpoon kaidto ‘inampon’ ninda ako . . . , na ginigibo an gabos na klaseng gibohon asin nagtatabang na resolberan an problema nin sarong 74 anyos na retirado. An minagibo kaini gabos na orog pang pambihira iyo na sinda itom, ako puti. Sinda mga Saksi ni Jehova, ako hale sa pagigin Katoliko.”

17. Anong dalan an maninigo niatong likayan?

¹⁷ An eksperyensiang ini nag-iilustrar na kita puwedeng magpatotoo sa dakol na paagi, kabale an satong aroaldaw na paggawe. Sa katunayan, apuwera sana kun arog-Cristo an satong paggawe, an satong ministeryo magigin arog sa mga Fariseo, mayo nin epekto. Habo niatong magin arog kan mga ilinadawan ni Jesus: “An gabos na bagay na isinasabi ninda sa saindo, giboha asin kuyoga nindo, alagad dai nindo arogon an saindang mga ginigibo, huli ta sinda nagtataram alagad dai naggigibo.”​—Mateo 22:​37-39; 23:3.

An Grupong Oripon Nagtatao kan Tamang mga Instrumento

18. Paano kita sinasangkapan kan literatura sa Biblia sa pagtabang sa mga sadiosan an puso?

¹⁸ An saro pang mahalagang bagay sa paghuhulit kan maogmang bareta sa gabos na nasyon iyo an madaling makuang literatura sa Biblia na pinoprodusir kan Watch Tower Bible and Tract Society. Igwa kita nin mga libro, brochure, tract, asin magasin na puwedeng panigoan an haros gabos na sinserong naghahapot. Kun kita nakakanompong nin Muslim, nin Hindu, nin Budista, nin Taoista, o nin Judio, puwede tang gamiton an librong Mankind’s Search for God o an manlaenlaen na tract asin pulyeto sa pagpoon nin orolay asin posibleng pag-adal sa Biblia. Kun an sarong ebolusyonista naghahapot manongod sa paglalang, puwede tang gamiton an librong Life​—How Did It Get Here? By Evolution or by Creation? Kun an sarong hoben naghahapot, ‘Ano an katuyohan nin buhay?’ puwede niato siang itokdo sa librong Questions Young People Ask​—Answers That Work. Kun may saro na nasasakitan sa personal na mga problema​—depresyon, kapagalan, panlulugos, diborsio—​igwa kita nin mga magasin na ipinaliwanag sa praktikal na paagi an siring na mga tema. Tunay nanggad, an maimbod na grupong oripon na ihinula ni Jesus na magtatao nin “kakanon sa igong panahon” nag-ootob sa katongdan kaiyan.​—Mateo 24:​45-47.

19, 20. Paano nagin marikas an pan-Kahadean na gibohon sa Albania?

¹⁹ Pero tanganing maabot an mga nasyon, kinaipuhan na maprodusir an literaturang ini sa dakol na tataramon. Paano nagin posible na ikatradusir an Biblia asin Makakasuratan na literatura sa labing 200 na tataramon? An halipot na pagkonsiderar sa sarong halimbawa, an Albania, nag-iilustrar kun paano nahimo kan grupong maimbod asin madonong na oripon na ipalakop an maogmang bareta sa ibong nin darakulang kadepisilan asin mayo nin modernong Pentecostes na matao nin tolos-tolos na pakaaram sa mga tataramon.​—Gibo 2:​1-11.

²⁰ Kaidtong mga pirang bulan pa sana an nakaagi, an Albania ibinibilang pa na solamenteng tunay na ateistang nasyon na Komunista. An magasin na National Geographic nagsabi kan 1980: “An Albania nagbabawal [nin relihiyon], na ipinoproklamar an sadiri kan 1967 na ‘an enot na ateistang estado sa kinaban.’ . . . An bagong kapag-arakian sa Albania ateismo sana an aram.” Ngonyan na buminagsak na an Komunismo, an mga taga-Albania na minimidbid an saindang espirituwal na pangangaipo naghihimate sa paghuhulit na ginigibo kan mga Saksi ni Jehova. An sarong sadit na grupo sa pagtradusir na kompuwesto nin hoben na mga Saksi na igwa nin kaaraman sa Italiano asin Ingles binilog sa Tiranë kan 1992. An kuwalipikadong mga tugang na lalaki na nagsosongko hale sa ibang nasyon tinokdoan sinda sa paggamit nin laptop na mga komputer sa pagtradusir sa Albaniano. Sinda nagpoon nang magtradusir nin mga tract asin kan magasin na Torrengbantayan. Mantang nagkakaigwa sinda nin kabatidan, sinda nagtatradusir nin iba pang mahalagang mga publikasyon sa Biblia. Sa ngonyan igwa nin mga 200 na aktibong Saksi sa sadit na nasyon na iyan (an populasyon 3,262,000), asin 1,984 an nag-atender sa Memorial kan 1994.

Kita Gabos Igwa nin Paninimbagan

21. Sa anong klaseng peryodo kita nabubuhay?

²¹ An mga pangyayari sa kinaban makaaabot na sa kulminasyon. Sa pag-orog nin krimen asin kadahasan, pangadan asin panlulugos sa lokal na mga guerra, presenteng malaswang moralidad asin mga ibinunga kaiyan na mga helang na ikinaoolakit paagi sa seksuwal na pagdodorog, kadaihan nin paggalang sa lehitimong autoridad, an kinaban malinaw na nagigin maribok, dai napapamahalaan. Kita nasa peryodo na kaagid sa mga panahon bago kan Baha na ilinaladawan sa Genesis: “Naheling ni Jehova na an karatan nin tawo labi-labi na sa daga asin an tendensia kan mga kaisipan kan saiyang puso danay na sa karatan na sana. Asin si Jehova nagbasol na saiyang ginibo an mga tawo sa daga, asin ta nakolgan an saiyang puso.”​—Genesis 6:​5, 6; Mateo 24:​37-39.

22. Ano an Kristianong paninimbagan kan gabos na Saksi ni Jehova?

²² Siring man sana kan kaaldawan ni Noe, si Jehova mahiro. Pero sa saiyang hustisya asin pagkamoot, boot niang ikahulit nguna sa gabos na nasyon an maogmang bareta asin an nagpapatanid na mensahe. (Marcos 13:10) Sa bagay na ini an mga Saksi ni Jehova igwa nin paninimbagan​—hanapon idtong mga angay na mag-ako kan katoninongan nin Dios asin tokdoan sinda sa saiyang mga dalan nin katoninongan. Dai na mahahaloy, sa itinalaan na panahon nin Dios, an sugo na paghuhulit mapangganang makokompleto. “Dangan madatong an katapusan.”​—Mateo 10:​12, 13; 24:14; 28:19, 20.

[Mga Nota sa Ibaba]

Nagigirumdoman daw Nindo?

◻ Anong kapangganahan an nakamtan kan modernong-aldaw na mga Saksi sa saindang ministeryo?

◻ Taano an dakol ta sinasayumahan an Kristianong mensahe?

◻ Anong paagi sa paghuhulit kan mga apostol an ginagamit kan mga Saksi?

◻ Ano an mga instrumento niato para sa epektibong ministeryo?

◻ Ano an dapat na gibohon niato gabos kaoyon sa Marcos 13:10?

[Kahon sa pahina 19]

NASYON MGA SAKSI NA AKTIBO KAN 1943 KAN 1993

Argentina 374 102,043

Brazil 430 366,297

Chile 72 44,668

Colombia ?? 60,854

France Guerra Mundial II-mayo nin rekord 122,254

Ireland 150? 4,224

Italy Guerra Mundial II-mayo nin rekord 201,440

Mexico 1,565 380,201

Peru Mayo nin rekord nin aktibidad 45,363

Philippines Guerra Mundial II-mayo nin rekord 116,576

Poland Guerra Mundial II-mayo nin rekord 113,551

Portugal Mayo nin rekord nin aktibidad 41,842

Spain Mayo nin rekord nin aktibidad 97,595

Uruguay 22 9,144

Venezuela Mayo nin rekord nin aktibidad 64,081

[Ritrato sa pahina 17]

Nagdadakol an mga Saksi ni Jehova sa dakol na Katolikong nasyon, arog baga kan España

[Mga ritrato sa pahina 18]

Aktibo an mga Saksi ni Jehova sa mga nasyon sa bilog na globo