An Biblia—Sarong Libro na Sinadya Para Masabotan

MAY mga tawo na nagtutubod na an Biblia iyo an malinaw na Tataramon nin Dios na maninigong sunodon nin literal. Para sa iba, “malibog na gayo an mensahe kan Biblia.” Siring an sabi kan 12-miembrong komite nin pagtubod asin teolohiya para sa pinakadakulang denominasyon nin Protestante sa Canada. An klerigong si Clifford Elliott, kan United Church, naghohona na para sa iba “an Biblia nagigin depisil saboton, bakong personal asin bakong mahalaga.”

An siring na mga punto-de-vista nagpapalataw nin mahalagang mga hapot na angay na simbagon. Mahalagang kaiba sa mga ini an, Taano ta isinurat an Biblia? Iyan daw nakakaribong na marhay asin komplikado para masabotan? Puwede daw iyan masabotan nin ordinaryong tawo? Anong tabang an kaipuhan tanganing masabotan nin saro an kahulogan kan Kasuratan? Asin taano ta mahalaga an tamang kaaraman sa Biblia sa maribok na mga panahon na ini?

Taano ta Isinurat an Biblia?

An pag-adal sa Tataramon nin Dios permi nang enot na kahagadan para sa mga magkakamit kan pabor asin pag-oyon kan Kaharohalangkaweng Dios, si Jehova. An mga hade, saserdote, magurang, lalaki, babae, asin kaakian​—mayaman asin dukha man—​tinokdoan na kumua nin panahon sa pan-aroaldaw na mga gibohon sa buhay tanganing tumao nin odok asin mapagngayongayong pag-orolay sa isinurat na Tataramon nin Dios.​—Deuteronomio 6:​6, 7; 17:​18-20; 31:​9-12; Nehemias 8:8; Salmo 1:​1, 2; 119:​7-11, 72, 98-100, 104, 142; Talinhaga 3:​13-18.

Halimbawa, pinagbotan si Josue: “Siertohon mo na an libro kan Pagboot perming binabasa sa saimong pagsamba. Pag-adalan iyan sa aldaw asin banggi, asin siertohon na kinukuyog mo an gabos na bagay na nasusurat dian. Dangan magigin kang maoswag asin mapanggana.” (Josue 1:​8, Today’s English Version) An siring kaingat na pag-adal asin pag-aplikar kan Pagboot nin Dios magbubunga nin kapangganahan asin kaogmahan. Intension ni Jehova na “an gabos na klase nin tawo” bako sanang makasabot kan saiyang Tataramon, an Biblia, kundi kuyogon man iyan, na may paglaom na umako kan regalong buhay.​—1 Timoteo 2:3, 4; Juan 17:3.

Komplikado daw na Marhay Para Masabotan?

Bago sumakat si Jesus sa langit, liniwanag nia na boot niang magpadagos sa bilog na daga an dakulang programa nin edukasyon sa Biblia. (Gibo 1:8) Aram nia na an Biblia sinadya para masabotan. Pakapaliwanag na itinao na ni Jehova sa saiya an gabos na autoridad sa langit asin digdi sa daga, itinao nia an direktang pagboot: “Kaya paduman kamo asin gumibo kamo nin mga disipulo [o, mga paraadal] sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”​—Mateo 28:​19, 20.

Bago pa an bautismo, an bagong mga disipulo kaipuhan na tokdoan dapit ki Jehova, sa saiyang Aki, asin sa pagpunsionar kan banal na espiritu. Dugang pa, kaipuhan sindang tokdoan sa pagboot kan Kristianong palakaw nin mga bagay. (1 Corinto 9:21; Galacia 6:2) Tanganing maabot an resultang ini, an mga maninigo kaipuhan na maniwala enot na an Biblia gikan ki Jehova asin ikaduwa na iyan sinadya para masabotan.​—Mateo 10:​11-13.

Ano an hinahagad sa saindo tanganing masabotan an Biblia? An Aki nin Dios espesyal na naghingoa na ipaliwanag an Kasuratan. Aram nia na tunay an Banal na Kasuratan asin na iyan igwa kan ipinahayag na kabotan ni Jehova. (Juan 17:17) Manongod sa saiyang asignadong trabaho, nagsabi si Jesu-Cristo: “Namundag ako asin nagdigdi sa kinaban huli sa sarong katuyohan na ini, na magtaram dapit sa katotoohan. An siisay man na nasa katotoohan naghihinanyog sa sako.” (Juan 18:​37, TEV; Lucas 4:43) Si Jesus dai nagpogol sa pagtokdo sa mga naghihimateng puso asin isip. Sa Lucas 24:​45, sinabihan kita: “Dangan binukas nia [ni Cristo Jesus] nin lubos an saindang isip tanganing masabotan an kahulogan kan Kasuratan.”

Durante kan ministeryo ni Jesus suwelto siang nagkotar sa nasusurat na Tataramon, na ipinaliliwanag asin binubuksan an mga teksto sa “pagboot ni Moises asin sa mga Propeta asin mga Salmo.” (Lucas 24:​27, 44) An mga nakadangog sa saiyang mga paliwanag sa Kasuratan napahirong marhay kan saiyang malinaw na pakasabot, siring man kan saiyang abilidad sa pagtokdo. (Mateo 7:​28, 29; Marcos 1:22; Lucas 4:32; 24:32) Para sa saiya, an Kasuratan sarong libro na pasil na masabotan.

An Biblia Asin an mga Parasunod ni Jesus

Si apostol Pablo, sarong paraarog ki Jesu-Cristo, naheling an pangangaipo na tokdoan an iba kan laog kan Kasuratan. Aram man nia na iyan sinadya para masabotan. Iyan an dahelan na nagtokdo sia sa publiko asin daing duwa-duwang ipinaliwanag an Kasuratan sa mga harong kan mga boot na makasabot kaiyan. Ipinaaram ni Pablo an saiyang paninindogan kan sia magsabi: “Aram nindo na dai ako nagpogol nin ano man na bagay na makakatabang saindo mantang ako naghulit asin nagtokdo sa publiko asin sa saindong mga harong.” (Gibo 20:​20, TEV) Durante kan saiyang mga pakikipag-olay nangatanosan sia hale sa Kasuratan, na ipinaliliwanag asin pinapatunayan an saiyang mga punto paagi sa mga reperensia. (Gibo 17:​2, 3) Interesado sia sa pagtabang sa iba na masabotan an kahulogan kan Kasuratan.

Naghihidaw daw kamo na masabotan an mga bagay na itinokdo ni Jesus asin kan saiyang mga disipulo? (1 Pedro 2:2) An mga nag-eerok sa suanoy na Berea igwa nin siring kadakulang pagmawot, asin galaga sindang paniwalaan an itinotokdo sainda ni Pablo manongod sa Cristo. Kaya napakosog sindang pag-adalan an Kasuratan aroaldaw asin sa siring inaasegurar na an nadangog nindang maogmang bareta iyo nanggad an katotoohan. Huling mapaghimate an saindang isip, “dakol sa sainda an nagin mga paratubod.”​—Gibo 17:​11, 12.

Tanganing masabotan an Biblia, an saro kaipuhan na magkaigwa kan tamang kamugtakan nin puso, nin sinserong pagmawot na makanood, asin nin ‘pakamate sa espirituwal na pangangaipo nin saro.’ (Mateo 5:3) Kan hapoton si Jesus: “Taano ta nagtataram ka sa sainda paagi sa mga ilustrasyon?” nagsimbag sia: “Itinao saindo an pakasabot kan banal na mga hilom kan kahadean nin mga langit, alagad dai iyan itinao sa mga tawong idto.” Ihinula na ‘bubukahon nia an saiyang ngoso na may mga ilustrasyon asin ipapahayag an mga bagay na natatago.’ (Mateo 13:​10, 11, 35) Kaya nagtaram si Jesus paagi sa mga ilustrasyon tanganing ibulag an indiperente asin mausyosong parahinanyog sa sinserong parahapot. Ipinaheling kan mga disipulo ni Jesus an saindang sinseridad sa sarong okasyon kan umiba sinda saiya sa paglaog sa sarong harong asin nagsabi: “Ipaliwanag mo sa samo an ilustrasyon dapit sa mga doot sa oma.”​—Mateo 13:36.

Malinaw na nangangaipo kita nin tabang kun boot niatong masabotan an Biblia. An klerigong si Hal Llewellyn, an sekretaryo nin teolohiya, pagtubod, asin ekumenismo kan United Church, nagsabi: “Mahalagang marhay na liwanagon kun ano an boot sabihon sa sato kan Biblia asin kun paano iyan binabasa asin iniinterpretar.” Alagad dawa bakong gabos nakakarealisar kaiyan, an katunayan iyo na dai niato masasabotan an Biblia na kita sana. Kaipuhan niato nin tabang.

Anong Tabang an Makukua?

Igwa sa Biblia nin nakakaribong na mga sarabihon, nakakaribaraw na mga hapot, asin hararom na mga kapahayagan na nangangaipong liwanagon. Puwedeng tinuyo iyan na magin malibog, na naggagamit nin makahulogan na mga pagkokomparar na sinadya tanganing dai masabotan sa panahon na isinurat an mga iyan. Pero talagang kalabot dian an mga katuyohan ni Jehova. Halimbawa, an Kapahayagan 13:18 nagsasabi na “an kabilangan kan mabangis na hayop” “anom na gatos may anom na polo may anom.” Minsan ngani an bersikulo nagsasabi na “uya digdi an kadonongan,” dai kaiyan ipinaliliwanag an kahulogan kan bilang na iyan. Pero si Jehova, paagi sa saiyang organisasyon, tinogotan an saiyang maimbod na mga lingkod na masabotan an kahulogan kaiyan ngonyan. (Helingon an kahon, “Paagihan sa Pagsabot sa Biblia.”) Kamo man puwedeng magkamit kan pakasabot na ini paagi sa tabang kan mga may kabatidan sa ‘paggamit kan tataramon kan katotoohan sa tamang paagi.’​—2 Timoteo 2:​2, 15, 23-25; 4:​2-5; Talinhaga 2:​1-5.

Kun beses naggamit si Jesus nin mga ilustrasyon tanganing ipaheling an paghimate o kakulangan nin paghimate sa mensahe kan Kahadean. Ipinarisa nia na an iba dai maoswag huli sa saindang pagkadisganar sa pagtumang kan mga katood asin paryentes. An iba totogotan an “kasakitan o paglamag” na raoton an saindang pagpahalaga sa mensahe kan Kahadean. An iba pa totogotan an pan-aroaldaw na mga gibo sa buhay, “an kahaditan kan palakaw na ini nin mga bagay asin an mapandayang kapangyarihan nin kayamanan,” na matahoban an ano man na pagkamoot ninda sa maogmang bareta. Sa ibong na lado, igwa nin mga maogmang naghihimate asin andam na magdangog kan mahalagang tataramon asin sinasabot an kahulogan kaiyan. Sinda “nag-aaragagha asin nag-aaragrangay huli sa gabos na makababaldeng bagay na ginigibo” sa Kakristianohan, na sa ngaran daa ni Jesu-Cristo. An mga siring galagang matokdoan sa dalan ni Jehova asin sa siring makasabot kan saindang binabasa sa Biblia.​—Mateo 13:​3-9, 18-23; Ezequiel 9:4; Isaias 2:​2-4.

Para sa mga boot magkamit nin pakasabot bilang indibiduwal dapit sa mga katuyohan ni Jehova, seseguradohon ni Jehova na ikatao an kaipuhan na tabang. Bilang ilustrasyon, ibinabareta kan Biblia na giniyahan kan espiritu ni Jehova an ebanghelistang si Felipe na tabangan an sarong Etiope na naghohorophorop sa libro sa Biblia na Isaias mantang sia nagbibiyahe hale sa Jerusalem. Mantang papuli, binabasa nia iyan sa saiyang karuwahe. Bilang pagkuyog sa paggiya kan banal na espiritu ni Jehova, nagdalagan si Felipe sa gilid kan karuwahe asin naghapot: “Nakakasabot ka kan binabasa mo?” An lalaki mapakumbaba asin sadiosan na marhay sa pag-admitir na kaipuhan nia nin tabang. Maogmang tinokdoan ni Felipe an gutom sa espirituwal asin andam na makanood na tawong ini. An pagtotokdo nakatabang saiya na masabotan an Kasuratan. Nanodan nia an dapat na niang gibohon ngonyan tanganing magkamit nin inooyonan na relasyon ki Jehova sa pagkamit nin buhay na daing katapusan. Nagin siang maogma, bautisadong lingkod ni Jehova, na namuhay na ikinaogma nin Dios.​—Gibo 8:​26-39.

Puwedeng igwa kamo nin Biblia sa saindong harong, asin puwedeng nabasa na nindo iyan nin dakol na beses. Posibleng gayo na naeksperyensiahan na nindo an kaparehong problema na siring kan naagihan kan sinsero, mapakumbabang Etiope. Dai nia masabotan an saiyang binasa. Kaipuhan nia nin tabang asin dai nagduwaduwang akoon an tabang na ikinaogmang itao ni Jehova Dios. Siring ki Felipe, naoogma an mga Saksi ni Jehova na tabangan kamo sa pagsabot kan mga bagay manongod sa Dios na nasusurat sa saiyang Tataramon, an Biblia. Aram ninda na itinao ni Jehova an Biblia asin sinadya na iyan maninigong masabotan.​—1 Corinto 2:10; Efeso 3:18; 2 Pedro 3:​16.

Taano ta Mahalaga an Biblia?

Nabubuhay kita sa pinakaapuradong panahon sa kasaysayan nin tawo. Sinasambit iyan kan Biblia na “pagtatapos kan palakaw nin mga bagay.” (Mateo 24:3) An dakol na nangyayari bilang kaotoban kan hula sa Biblia poon kan taon 1914 nagpapaheling na dai na mahahaloy ngonyan an langitnon na Kahadean nin Dios ‘roronoton asin tatapuson an gabos na iba pang gobyerno.’​—Daniel 2:44.

Basahon nindo mismo an ihinula sa Biblia sa Mateo kapitulo 24, Marcos kapitulo 13, asin Lucas kapitulo 21. Maheheling nindo na an sinambit na mga pangyayari pinag-oorolayan sa bilog na globo. Kabale sa mga iyan an mga guerra​—na laen sa gabos na iba pang guerra. Poon kan Guerra Mundial I, naheling niato an ihinulang mga kakulangan sa pagkakan, linog, asin panahon nin pambihirang katampalasanan. Asin ngonyan an mga nasyon garo baga haros gumibo na nin paghingako na matao nin dai mapagdududahan na senyal na harani na an kalaglagan kan kinaban. Manongod kaini, nagsurat si apostol Pablo: “An aldaw ni Jehova madatong na kabaing na gayo nin parahabon kun banggi. Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda; . . . dai sinda makaliligtas minsan sa anong paagi.” (1 Tesalonica 5:​2, 3) Sairisay an mga dai makaliligtas? Nagpaliwanag si Pablo: ‘An mga dai nakamimidbid sa Dios asin an mga dai nagkukuyog kan maogmang bareta manongod sa satong Kagurangnan na si Jesus.’ (2 Tesalonica 1:​7-9) An sarong parte kan dakol an kabtang na tanda ootobon kan mga minakuyog sa pagboot na itinao sa Mateo 24:14 na ihulit an ‘maogmang bareta kan kahadean sa bilog na ineerokan na daga.’

Minilyon na Saksi ni Jehova an naggigibo kan pagboot na ini sa 231 kadagaan asin isla kan dagat. Sinda nagsosongko sa harong kan mga tawo asin personal na iniimbitaran sinda na mag-adal dapit sa gobyerno kan Kahadean ni Jehova. Maboot na idinodoon ninda an paghiro na kaipuhan na gibohon kan kada saro tanganing makabilang sa mga makakaligtas sa palakaw na ini nin mga bagay asin mabuhay sa sarong paraisong daga na mayo nang pagmondo, pag-agrangay, kolog, o kagadanan.​—Kapahayagan 21:​3, 4.

An panahon marikas na nauubos para sa maraot na kinaban na ini, asin mahalaga para sa gabos na boot na makaligtas sa katapusan kan kinaban na ini na pag-adalan an kalabot sa ‘pagkuyog sa maogmang bareta’ asin sa siring makaligtas sa kalaglagan. Sa masunod na panahon na dumalaw an mga Saksi ni Jehova sa saindong harong, taano ta dai akoon an imbitasyon na magkaigwa nin semanal na pag-adal sa Biblia? Pero mas marahay, taano ta dai hagadon sainda na mag-adal kan Biblia kaiba nindo huli ta boot nindong masabotan iyan?

[Kahon sa pahina 8]

PAAGIHAN SA PAGSABOT SA BIBLIA

SI Jesus inasegurar kita na pagkagadan asin pagkabuhay nia liwat, mabugtak sia nin sarong “maimbod asin madonong na oripon” na magseserbi bilang saiyang paagihan nin komunikasyon. (Mateo 24:​45-47) Ipinamidbid ni apostol Pablo sa mga Kristiano sa Efeso an paagihan na ini kan sia magsurat na “ikapaaram . . . paagi sa kongregasyon an manlaenlaen na gayong kadonongan nin Dios, sono sa daing sagkod na katuyohan na binilog nia may koneksion ki Cristo, si Jesus na satong Kagurangnan.” (Efeso 3:​10, 11) An kongregasyon kan linahidan na mga Kristiano, na namundag kan Pentecostes 33 C.E., an pinaniwalaan kan “mga bagay na ihinayag.” (Deuteronomio 29:29) Bilang sarong grupo, an linahidan na mga Kristiano naglilingkod bilang an maimbod asin madonong na oripon. (Lucas 12:​42-44) An saindang nombradong asignasyon gikan sa Dios iyo na magtao nin espirituwal na pakasabot manongod sa “mga bagay na ihinayag.”

Kun paanong an hula sa Biblia nagtokdo pasiring sa Mesiyas, ginigiyahan man kita kaiyan pasiring sa dayupot na grupo kan linahidan na Kristianong mga Saksi na ngonyan naglilingkod bilang maimbod asin madonong na oripon.a Tinatabangan kita kaiyan na masabotan an Tataramon nin Dios. An gabos na boot na masabotan an Biblia maninigong pahalagahan na an “manlaenlaen na gayong kadonongan nin Dios” puwede sanang maaraman paagi sa paagihan nin komunikasyon ni Jehova, an maimbod asin madonong na oripon.​—Juan 6:68.

[Nota sa Ibaba]