Pagpastor sa Aripompon nin Dios na May Pagkamoot
“Pastoran an aripompon nin Dios na nasa saindong pangataman.”—1 PEDRO 5:2.
1, 2. Ano an pangenot na kuwalidad ni Jehova, asin paano iyan mismo nahahayag?
SA BILOG na Banal na Kasuratan, liniliwanag na an pagkamoot iyo an pangenot na kuwalidad nin Dios. “An Dios pagkamoot,” an sabi kan 1 Juan 4:8. Huling an saiyang pagkamoot ipinahahayag sa gibo, an 1 Pedro 5:7 nagsasabi na an Dios “may pagmakolog sa saindo.” Sa Biblia an paagi nin pagmakolog ni Jehova sa saiyang banwaan iinaagid sa paagi nin maboot na pangangataman nin sarong mamomoton na pastor sa saiyang mga karnero: “Uya! An Soberanong Kagurangnan na Jehova mismo . . . aatamanon nia an saiyang sadiring aripompon. Sa saiyang takyag titiponon nia an mga karnero; asin sa saiyang daghan dadarahon nia sinda. An mga nagpapasuso aatamanon nia.” (Isaias 40:10, 11) Kanigoan an pagkaranga ki David kaya nakapagsabi: “Si Jehova an sakuyang Pastor. Dai ako magkukulang nin ano man”!—Salmo 23:1.
2 Angay na iagid kan Biblia sa mga karnero an mga tawong inooyonan nin Dios, huli ta an mga karnero matoninong, mapagpasakop, makinuyog sa saindang mapagmakolog na pastor. Bilang mamomoton na Pastor, si Jehova odok na nagmamakolog sa saiyang arog-karnerong banwaan. Ipinaheheling nia iyan paagi sa pagtagama sa sainda sa materyal asin espirituwal patin paagi sa paggiya sainda sa masakit na “huring mga aldaw” kan maraot na kinaban na ini pasiring sa saiyang umaaboton na matanos na bagong kinaban.—2 Timoteo 3:1-5, 13; Mateo 6:31-34; 10:28-31; 2 Pedro 3:13.
3. Paano ilinadawan kan salmista an paagi nin pag-ataman ni Jehova sa saiyang mga karnero?
3 Mangnoha an mamomoton na pag-ataman ni Jehova sa saiyang mga karnero: “An mga mata ni Jehova nakatorohok sa mga matanos, asin an saiyang mga talinga nagdadangog sa saindang mga pag-agrangay. . . . Sinda nag-agrangay, asin nadangog mismo ni Jehova, asin sa gabos nindang kasakitan ilinigtas nia sinda. Si Jehova harani sa mga nababaak an puso; asin an mga nasasakitan sa espiritu saiyang iliniligtas. Dakol an kalamidad kan matanos, alagad hale sa gabos na iyan iliniligtas sia ni Jehova.” (Salmo 34:15-19) Kanigoan kadakulang karangahan an itinatao kan Unibersal na Pastor sa saiyang arog-karnerong banwaan!
An Halimbawa kan Marahay na Pastor
4. Ano an kabtang ni Jesus sa pag-ataman sa aripompon nin Dios?
4 An Aki nin Dios, si Jesus, nakanood na marhay sa saiyang Ama, huli ta inaapod kan Biblia si Jesus na “marahay na pastor.” (Juan 10:11-16) An saiyang mahalagang paglilingkod sa aripompon nin Dios ipinaririsa sa Kapahayagan kapitulo 7. Sa bersikulo 9, an mga lingkod nin Dios sa satong kaaldawan inaapod na “sarong dakulang kadaklan . . . hale sa gabos na nasyon asin tribo asin banwaan patin tataramon.” Dangan an bersikulo 17 nagsasabi: “An Kordero [si Jesus] . . . aatamanon sinda, asin gigiyahan sinda sa mga burabod kan tubig nin buhay. Asin papahidon nin Dios an gabos na luha sa saindang mga mata.” Ginigiyahan ni Jesus an mga karnero nin Dios sa mga tubig nin katotoohan na minagiya pasiring sa buhay na daing katapusan. (Juan 17:3) Mangnoha na si Jesus inaapod na “Kordero,” na nagpaparisa kan saiya mismong arog-karnerong mga kuwalidad, huling sia an pangenot na halimbawa nin pagkamapagpasakop sa Dios.
5. Ano an namatean ni Jesus manongod sa mga tawo?
5 Digdi sa daga namuhay si Jesus kaiba kan mga tawo asin naheling nia an saindang kaherakherak na kamugtakan. Ano an saiyang reaksion sa saindang mamondong kamugtakan? “Naherak sia sainda, huli ta sinda maniwang asin nagkakaralagalag siring sa mga karnero na mayong pastor.” (Mateo 9:36) An mga karnero na mayo nin pastor nagigin biktima nin naninibang mga hayop, kapareho nin mga karnero na igwa nin daing pagmakolog na mga pastor. Pero nagmakolog na gayo si Jesus, huli ta sia nagsabi: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin makanood sa sako, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:28-30.
6. Anong konsiderasyon an ipinaheling ni Jesus para sa mga nasasakitan?
6 An propesiya sa Biblia naghula na mamomoton na tatrataron ni Jesus an mga tawo: “Linahidan ako ni Jehova . . . sa pagpaomay sa mga nasasakitan an puso, . . . sa pagranga kan gabos na nagtatangis.” (Isaias 61:1, 2; Lucas 4:17-21) Nungkang minenus ni Jesus an mga dukha asin daing sukat. Imbes, inotob nia an Isaias 42:3: “Dai sia mabari nin ronot na gaho; asin kun dapit sa mitsa na madiklom na an laad, dai nia iyan paparongon.” (Ikomparar an Mateo 12:17-21.) An mga nasasakitan kaagid nin ronot na mga gaho, kaagid nin de-mitsang lampara na mapaparong na huli sa kakulangan nin gas. Sa pakarisa sa saindang makaheherak na kamugtakan, pinahelingan sinda ni Jesus nin pagkaherak asin tinawan sinda nin kosog asin paglaom, na pinaomayan sinda sa espirituwal asin pisikal.—Mateo 4:23.
7. Saen giniyahan ni Jesus an mga tawong naghimate sa saiya?
7 An arog-karnerong mga tawo naghimate ki Jesus sa darakulang bilang. Kaakit-akit an saiyang pagtotokdo kaya an mga opisyal na sinugong umaresto sa saiya nagbareta: “Dai pa nin tawong nagtaram nin arog kaini.” (Juan 7:46) Tara, an mapagsaginsagin na mga namomoon sa relihiyon nagreklamo: “An kinaban nagsusunod na sa saiya”! (Juan 12:19) Pero habo ni Jesus nin onra asin kaomawan para sa saiyang sadiri. Giniyahan nia an mga tawo sa saiyang Ama. Tinokdoan nia sinda na maglingkod ki Jehova huli sa pagkamoot sa Saiyang kahangahangang mga kuwalidad: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong kosog patin sa bilog mong isip.”—Lucas 10:27, 28.
8. Paano an pagkuyog na itinatao kan banwaan nin Dios sa saiya napapalaen sa itinatao kan iba sa kinabanon na mga poon?
8 Naggagayagaya si Jehova huling an saiyang unibersal na soberaniya sinusuportaran kan saiyang arog-karnerong banwaan, basado sa pagkamoot ninda sa saiya. Gikan sa boot nindang pinili na maglingkod sa saiya huli kan saindang pakaaram sa saiyang makawiwiling mga kuwalidad. Laen nanggad sa mga namomoon sa kinaban na ini na an mga sakop nagsusunod sana sa sainda huli sa pagkatakot, o maraot na boot, o huli ta igwa sinda nin natatagong motibo! Nungkang masasabi manongod ki Jehova o ki Jesus an nasabi manongod sa sarong papa kan Iglesya Katolika Romana: “Hinangaan sia kan dakol, kinatakotan kan gabos, mayong namoot.”—Vicars of Christ—The Dark Side of the Papacy, ni Peter De Rosa.
Maringis na mga Pastor sa Israel
9, 10. Iladawan an mga namomoon sa suanoy na Israel asin kan enot na siglo.
9 Bakong arog ki Jesus, an relihiyosong mga namomoon sa Israel kan saiyang kaaldawan mayo nin pagkamoot sa mga karnero. Arog sinda kan enot na mga namomoon sa Israel na sinabihan ni Jehova: “Herak man sa mga pastor nin Israel, na nagpapasabsab sa sainda man sana! Bako daw na an aripompon an maninigong pasabsabon kan mga pastor? . . . Dai nindo pinakosog an mga maniwang, asin dai nindo pinaomayan an naghehelang, asin dai nindo binugkosan an nabarian, asin dai nindo ibinalik an nalagalag, asin dai nindo hinanap an nawara, kundi sinakop nindo sinda na may karingisan, may kaisogan.”—Ezequiel 34:2-4.
10 Arog kan politikal na mga pastor na idto, an Judiong mga namomoon sa relihiyon kan enot na siglo mga matagas an puso. (Lucas 11:47-52) Sa pag-ilustrar kaini, inestorya ni Jesus an dapit sa sarong Judio na hinabonan, hinampak, asin binayaan na haros gadan na sa gilid nin dalan. Sarong Israelitang saserdote an uminabot, pero kan maheling an Judio, nagliklik sia sa ibong kan dalan. An sarong Levita iyo man an ginibo. Dangan sarong bakong Israelita, sarong hinahamak na Samaritano, an uminabot asin naherak sa biktima. Saiyang binogkosan an mga lugad kaini, isinakay sia sa sarong hayop pasiring sa sarong harong na dadagusan, asin inasikaso ini. Binayadan nia an nag-aasikaso sa harong na dadagusan asin nagsabing mabalik sia tanganing bayadan an ano man na dugang na gastos.—Lucas 10:30-37.
11, 12. (a) Paano naggrabe an karatan kan mga namomoon sa relihiyon kan kaaldawan ni Jesus? (b) Ano an sa katapustapusi ginibo kan mga Romano sa mga namomoon sa relihiyon?
11 Maraoton nanggad an mga namomoon sa relihiyon kan kaaldawan ni Jesus mala ta kan buhayon liwat ni Jesus si Lazaro hale sa mga gadan, an poon na mga saserdote asin Fariseo tiniripon an Sanhedrin asin nagsabi: “Ano an satong gigibohon, huli ta an tawong ini [si Jesus] naggigibo nin dakol na tanda? Kun pabayaan ta sana sia nin siring, sinda gabos maturubod sa saiya, asin madatong an mga taga-Roma asin kukuanon an satong lugar asin an satong nasyon.” (Juan 11:47, 48) Mayo sinda nin pakiaram sa marahay na ginibo ni Jesus sa gadan na tawo. An saindang mga posisyon an saindang iniisip. Kaya “magpoon kan aldaw na iyan nagpaharatolhatol sinda na ipagadan si [Jesus].”—Juan 11:53.
12 Sa pagdugang sa saindang karatan, dangan an poon na mga saserdote “nagpaharatolhatol na gadanon man si Lazaro, ta huli sa saiya an dakol na Judio nagduduruman asin nagturubod na ki Jesus.” (Juan 12:10, 11) Daing kamanungdanan an saindang paslong mga paghihingoa na ingatan an saindang mga posisyon, huli ta sinabihan sinda ni Jesus: “An saindong harong pinabayaan na sa saindo.” (Mateo 23:38) Bilang kaotoban kan mga tataramon na iyan, sa kapag-arakian na idto an mga Romano nagdatong asin kinua an ‘saindang lugar asin an saindang nasyon,’ patin an saindang buhay man.
Mamomoton na mga Pastor sa Kristianong Kongregasyon
13. Siisay an ipinanugang susugoon ni Jehova tanganing pastoran an saiyang aripompon?
13 Imbes na maisog, paslong mga pastor, ibubugtak ni Jehova an Marahay na Pastor, si Jesus, tanganing atamanon an Saiyang aripompon. Nanuga man siang mabugtak nin mamomoton na mga katabang na pastor tanganing atamanon an mga karnero: “Bubugtakan ko sinda nin mga pastor na magpapastor nanggad sa sainda; asin dai na sinda magkakatarakot.” (Jeremias 23:4) Kaya, siring sa Kristianong mga kongregasyon kan enot na siglo iyo man ngonyan, ginigibo an mga ‘pagnombra nin kamagurangan na lalaki sa lambang siudad.’ (Tito 1:5) An magurang sa espirituwal na mga lalaking ini na nakakaabot sa mga kuwalipikasyon na sinasabi sa Kasuratan dapat na ‘magpastor sa aripompon nin Dios.’—1 Pedro 5:2; 1 Timoteo 3:1-7; Tito 1:7-9.
14, 15. (a) Anong kaisipan an nadepisilan na pataluboon kan mga disipulo? (b) Ano an ginibo ni Jesus tanganing ipaheling sa sainda na an mga magurang maninigong magin mapakumbabang mga lingkod?
14 Sa pag-ataman sa mga karnero, an kamagurangan dapat na “orog sa gabos” magkaigwa nin “makosog na pagkamoot” sa sainda. (1 Pedro 4:8) Alagad an mga disipulo ni Jesus, na pinagpaparaisip na gayo an manongod sa kabantogan asin posisyon, kinaipuhan na makanood kaini. Kaya kan an ina kan duwang disipulo nagsabi ki Jesus: “Ipagboot mo na an duwa kong aki tumukaw, an saro sa saimong too asin an saro sa saimong wala, sa saimong kahadean,” naanggot an ibang disipulo. Si Jesus nagsabi sainda: “An mga poon kan mga nasyon naghahade sa sainda asin an makokosog na lalaki nagkakapot nin autoridad sa sainda. Bakong siring kaini dian sa tahaw nindo; kundi an siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo.”—Mateo 20:20-28.
15 Sa sarong pang okasyon, pakatapos na an mga disipulo ‘magdiriskutiran kun siisay an mas dakula,” si Jesus nagsabi sa sainda: “Kun an siisay man boot na maenot, kaipuhan na sia mahuri sa gabos asin surugoon nin gabos.” (Marcos 9:34, 35) An kababaan nin boot asin pagigin gikan sa boot na maglingkod kinaipuhan na magin kabtang kan saindang personalidad. Pero an mga disipulo padagos na nadepisilan dapit sa mga ideyang idto, huli ta kan mismong banggi bago nagadan si Jesus, sa saiyang huring pamanggihan, nangyari an “mainit na diriskutiran” sa tahaw ninda kun baga siisay an pinakadakula! Nangyari iyan apisar na ipinaheling na ni Jesus sa sainda kun paano maninigong paglingkodan nin sarong magurang an aripompon; nagpakumbaba sia mismo asin hinanawan an saindang mga bitis. Sia nagsabi: “Kun ako, minsan ngani Kagurangnan asin Paratokdo, naghanaw kan saindong mga bitis, kun siring maninigo na hanawan man nindo an bitis kan iba. Huli ta ako nagtao sa saindo nin arogan, tanganing, kun ano an ginibo ko sa saindo, iyo man an gibohon nindo.”—Lucas 22:24; Juan 13:14, 15.
16. Kan 1899, anong komento an ginibo kan Watch Tower mapadapit sa pinakaimportanteng kuwalidad kan mga magurang?
16 An mga Saksi ni Jehova permi nang nagtotokdo na an mga magurang dapat na magin siring kaini. Haros sarong siglo na an nakaagi, an Abril 1, 1899 Watch Tower nagkomento sa mga tataramon ni Pablo sa 1 Corinto 13:1-8 dangan nagsabi: “Espisipikong idinoon kan Apostol na an kaaraman asin oratoryo bakong an pinakamahalagang mga pagbalo, kundi na an pagkamoot na nakatataros sa puso asin minahiwas sa bilog na pamumuhay, asin naghihiro patin nagpupunsionar sa satong magagadanon na hawak, iyo an tunay na pagbalo—an tunay na patotoo sa satong relasyon sa Dios. . . . An nangongorog na karakteristiko na dapat hanapon sa lambang saro na inaako bilang lingkod kan iglesya, na maglingkod sa banal na mga bagay, maninigo na enot sa gabos an espiritu nin pagkamoot.” Iyan nagsabi na an mga tawo na dai mapakumbabang maglilingkod huli sa pagkamoot “mga peligrosong paratokdo, asin posibleng makakagibo nin dakol na danyos kisa karahayan.”—1 Corinto 8:1.
17. Paano idinodoon kan Biblia an mga kuwalidad na kaipuhan kan mga magurang?
17 Kun siring, an kamagurangan na lalaki dai dapat na ‘magpakanghade’ sa mga karnero. (1 Pedro 5:3) Imbes, dapat sindang mangenot sa pagigin “maboot sa lambang saro, na may maboot na pagkaherak.” (Efeso 4:32) Idinoon ni Pablo: “Isolog nindo an mamomoton na mga pagmate nin pagkaherak, kabootan, kababaan nin boot, kahoyoan, asin pakatios. . . . Alagad, laen pa sa gabos na bagay na ini, isolog nindo an pagkamoot, huli ta iyan sangkap na bogkos nin pagkasararo.”—Colosas 3:12-14.
18. (a) Anong marahay na halimbawa an itinao ni Pablo sa pagtratar sa mga karnero? (b) Taano ta dai dapat ignorohon kan mga magurang an mga pangangaipo kan mga karnero?
18 Nanodan ni Pablo na gibohon ini, na nagsasabi: “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki. Kaya, huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tesalonica 2:7, 8) Kaoyon kaiyan, sia nagsabi: “Rangahon an mga kalag na nagmomondo, tabangan an maluya, magin matinios sa gabos.” (1 Tesalonica 5:14) Ano man an problema na tibaad darahon sainda kan mga karnero, maninigong girumdomon kan mga magurang an Talinhaga 21:13: “Kun manongod sa siisay man na nagtatahob kan saiyang talinga sa nagrereklamong agrangay kan dukha, sia man mismo maapod asin dai sisimbagon.”
19. Taano ta sarong bendisyon an mamomoton na mga magurang, asin paano naghihimate an mga karnero sa siring na pagkamoot?
19 An kamagurangan na lalaking mamomoton na nagpapastor sa aripompon bendisyon sa mga karnero. An Isaias 32:2 naghula: “An lambang saro magigin siring sa pailihan sa doros asin taguan sa bagyo, siring sa mga sapa nin tubig sa sarong disyerto, siring sa limpoy nin dakulang gapo sa mainit na daga.” Naoogma kitang maaraman na an dakol sa satong mga magurang ngonyan tamang-tama sa nakagiginhawang magayon na pagkaladawan na iyan. Nanodan nindang iaplikar an minasunod na prinsipyo: “Sa pagkamoot nin sa magturugang magkaigwa kamo nin mamomoton na kapadangatan sa lambang saro. Sa pagpaheling nin onra sa lambang saro mangenot kamo.” (Roma 12:10) Kun ipinaheheling kan mga magurang an klaseng ini nin pagkamoot asin kapakumbabaan, an mga karnero naghihimate paagi sa pagtao sainda nin “orog kisa ordinaryong konsiderasyon sa pagkamoot huli sa saindang gibohon.”—1 Tesalonica 5:12, 13.
Igalang an Paggamit sa Libreng Kabotan
20. Taano ta dapat na igalang kan mga magurang an libreng kabotan?
20 Linalang ni Jehova an mga tawo na igwa nin libreng kabotan na gibohon an sadiri nindang mga desisyon. Minsan ngani an mga magurang an dapat na maghatol asin magdisiplina pa ngani, dai ninda dapat kontrolon an buhay o pagtubod nin iba. Si Pablo nagsabi: “Bako na kami an mga kagurangnan kan saindong pagtubod, kundi kami mga katabang para sa saindong kagayagayahan, huli ta paagi sa saindong pagtubod na kamo nagtitindog.” (2 Corinto 1:24) Iyo, “an lambang saro magpapasan kan saiyang sadiring pasan.” (Galacia 6:5) Tinawan kita ni Jehova nin dakol na katalingkasan na limitado kan saiyang mga pagboot asin prinsipyo. Kaya maninigong likayan kan mga magurang an pagbugtak nin mga susundon kun saen dai man nababalga an mga prinsipyo sa Kasuratan. Asin maninigo nindang tumangon an ano man na tendensia na magtao kan saindang sadiring personal na mga opinyon bilang doktrina o togotan an saindang amor propio na makilabot kun may saro na dai minaoyon sa siring na mga punto-de-vista.—2 Corinto 3:17; 1 Pedro 2:16.
21. Ano an manonodan sa kaisipan ni Pablo ki Filemon?
21 Mangnoha kun paano trinatar ni Pablo, mantang nakabilanggo sa Roma, si Filemon, sarong Kristianong kagsadiri nin oripon sa Colosas sa Asia Minor. An oripon ni Filemon na an ngaran Onesimo nagdulag pasiring sa Roma, nagin Kristiano, asin nagtabang ki Pablo. Si Pablo nagsurat ki Filemon: “Boot ko kutanang sia magdanay digdi sa sako tanganing sa kasalihid mo sia makapaglingkod sa sako sa mga gapos nin bilanggoan na pinapasan ko para sa maogmang bareta. Alagad kun mayo kan saimong pagtogot habo kong gumibo nin ano man, tanganing an saimong marahay na gibo magin, bakong siring sa napipiritan, kundi sa saimong sadiring libreng kabotan.” (Filemon 13, 14) Iinuli ni Pablo si Onesimo, na pinakiolayan si Filemon na trataron ini bilang Kristianong tugang. Aram ni Pablo na bako niang sadiri an aripompon; sa Dios iyan. Bakong sia an kagurangnan kaiyan kundi lingkod kaiyan. Dai diniktahan ni Pablo si Filemon; iginalang nia an libreng kabotan kaini.
22. (a) Ano an maninigong masabotan kan mga magurang dapit sa saindang posisyon? (b) Anong klaseng organisasyon an pinaooswag ni Jehova?
22 Mantang nag-ooswag an organisasyon nin Dios, dakol na magurang an ninonombrahan. Sinda, patin an dakol pang mas may kabatidan na magurang, dapat na makasabot na an saindang posisyon sarong mapakumbabang paglilingkod. Sa paaging ini, mantang iinaabante nin Dios an saiyang organisasyon pasiring sa bagong kinaban, iyan padagos na mag-ooswag mantang gusto nia—organisadong marhay pero dai isinasakripisyo an pagkamoot asin pagkaherak para sa kahusayan. Sa siring, an saiyang organisasyon magigin orog na nakadadagka sa mga arog-karnero na makakaheling dian kan ebidensia na “pinapangyayari nin Dios na an gabos niang gibo magtarabangan para sa karahayan kaidtong mga namomoot sa Dios.” Iyan an malalaoman sa sarong organisasyon na napapasikad sa pagkamoot, huli ta an “pagkamoot dai nanggad nasusudya.”—Roma 8:28; 1 Corinto 13:8.
Paano Nindo Sisimbagon?
◻ Paano ilinaladawan kan Biblia an pag-ataman ni Jehova sa saiyang banwaan?
◻ Ano an kabtang ni Jesus sa pag-ataman sa aripompon nin Dios?
◻ Anong pangenot na karakteristiko an dapat na yaon sa mga magurang?
◻ Taano ta maninigong konsideraron kan mga magurang an libreng kabotan kan mga karnero?
[Ritrato sa pahina 16]
Si Jesus, an “marahay na pastor,” nagpaheling nin pagkaherak
[Mga ritrato sa pahina 17]
An maraot na mga namomoon sa relihiyon nagkasapakat na gadanon si Jesus