An Ika-20 Siglong Pagnigar sa Dios

“An mga tawo mayong pagkontrang minaoyon sa ideya na mayong Dios asin independienteng inoorganisar an saindang buhay, sa ikararahay o sa ikararaot, asin dai man lamang kinokonsiderar an Dios.”​—One Hundred Years of Debate Over God—​The Sources of Modern Atheism.

MASKI ngani sa primero kahangahanga, an sarong halangkawon na kahoy sa kahurihurihi ibinibilang na ordinaryo na sana. Pamilyar an presensia kaiyan; an langkaw kaiyan bako nang makangingirhat.

Kapareho iyan kan ateismo. Minsan ngani nakapukaw iyan nin dakol na debate durante kan ika-19 siglo, an pagnigar sa pag-eksister nin Dios bakong makakukubhan ni nakakaistorbo ngonyan. An panahon nin pagkapanatiko tinogotan an ateismo na mamugtak sa matoninong na pag-eksister kadungan kan paniniwala sa Dios.

Dai ini nangangahulogan na an kadaklan na tawo direktang nagninigar sa Dios; al kontraryo, an mga resulta kan surbey hale sa 11 nasyon sa bilog na mga America, Europa, asin Asia naghahayag na, sa promedyo, labi na sanang 2 porsiento an naghihingakong mga ateista. Minsan siring, lakop an ateistikong kaisipan​—dawa sa tahaw kan dakol na naniniwala na nag-eeksister an Dios. Paano daw ini nangyayari?

Pagnigar sa Autoridad nin Dios

“Kun beses an ateismo ipinanonongod sana sa gibong pagsikwal o pag-ignoro sa Dios,” nagsabi an The Encyclopedia Americana. Sa dahelan na ini, an The New Shorter Oxford English Dictionary nagtatao kan minasunod na ikaduwang kahulogan nin “ateista”: “Sarong tawo na nagninigar sa Dios sa moral na paagi; sarong tawo na mayong Dios.”​—Samo an italiko.

Iyo, an ateismo puwedeng mangahulogan nin pagnigar magsalang sa pag-eksister nin Dios o sa saiyang autoridad o sa duwa. Sinasambit kan Biblia an ateistikong kaisipan na ini sa Tito 1:16: “Sinda naghihingako na midbid an Dios, alagad ta nagninigar sa saiya paagi sa saindang mga gibo.”​—The New English Bible; ikomparar an Salmo 14:1.

An siring na pagsikwal sa autoridad nin Dios puwedeng susugon pabalik sa enot na tawong mag-agom. Minidbid ni Eva an pag-eksister nin Dios; alagad, boot nia na ‘magin arog nin Dios, na nakakamidbid kan marahay asin maraot.’ An implikasyon iyo na puwede siang ‘magdesisyon sa saiya mismong sadiri’ asin gumibo nin sadiri niang moral na pamantayan. Sa huri uminiba si Adan ki Eva sa pagnigar na ini sa autoridad nin Dios.​—Genesis 3:5, 6.

An kaisipan daw na ini lakop ngonyan? Iyo. An pairarom na ateismo maheheling sa paghanap nin independensia. “An mga tawo ngonyan pagal na sa pamumuhay na minamasdan nin Dios,” nagkomento an librong One Hundred Years of Debate Over God​—The Sources of Modern Atheism. “Sinda . . . mas gustong mamuhay sa katalingkasan.” An moral na pamantayan sa Biblia isinisikwal na bakong praktikal, bakong realistiko. An kaisipan kan dakol siring na gayo kan Faraon sa Egipto na pangahas na nagpahayag: “Siisay man si Jehova, tanganing kuyogon ko an saiyang tingog . . . ? Dai ko man lamang namimidbid si Jehova.” Isinikwal nia an autoridad ni Jehova.​—Exodo 5:2.

Pagnigar kan Kakristianohan sa Dios

An pinakanakakakubhan na pagnigar sa autoridad nin Dios minagikan sa klero kan Kakristianohan, na sinalidahan nin gibong tawong mga tradisyon an dalisay na mga katotoohan sa Biblia. (Ikomparar an Mateo 15:9.) Dugang pa, sinuportaran ninda an pinakamadugong mga guerra kan ika-20 siglo, sa siring isinisikwal an pagboot kan Biblia na magpaheling nin tunay na pagkamoot.​—Juan 13:35.

Ninigaran man kan klero an Dios paagi sa pagtalikod sa saiyang moral na mga pamantayan​—na maheheling, halimbawa, sa sunod-sunod na demanda tumang sa mga padi na paraabuso nin mga aki. An situwasyon kan Kakristianohan nakakaagid kan sa suanoy na Israel asin Juda. “An daga pano nin dugo asin an siudad pano nin karibokan,” sinabihan an propetang si Ezequiel, “huli ta sinda nagsarabi, ‘Pinabayaan na ni Jehova an daga, asin si Jehova dai nakakaheling.’” (Ezequiel 9:9; ikomparar an Isaias 29:15.) Bakong makangangalas na dakol an biyo nang binayaan an mga iglesya nin Kakristianohan! Pero kaipuhan daw nindang bayaan an paniniwala sa Dios?

Balidong mga Dahelan sa Ateismo?

Baga man naobserbaran ninda o dai an pagsaginsagin nin relihiyon, dakol na ateista an dai talaga puwedeng mapagkasundo an paniniwala sa Dios sa pagsakit sa kinaban. Si Simone de Beauvoir nagsabi kaidto: “Mas pasil para sako na isipon an sarong kinaban na mayong kaglalang kisa sa sarong kaglalang na nagagabatan sa gabos na kontradiksion kan kinaban.”

An mga inhustisya daw kan kinaban​—kabale an mga nasutsutan kan mapagsaginsagin na mga relihiyonista—​nagpapatunay na mayong Dios? Konsiderara: Kun ginagamit an kutsilyo tanganing man-uma, mangolog, o mangadan pa ngani nin sarong inosenteng tawo, pinatutunayan daw kaini na mayo nin kagdisenyo an kutsilyo? Bako daw na nagpapaheling sana iyan na an bagay ginamit sa sala? Siring man, an dakol sa kamondoan nin tawo nagtataong ebidensia na inaabuso kan mga tawo an saindang itinao nin Dios na mga abilidad siring man an daga mismo.

Minsan siring, an iba nakakamate na bakong makatanosan na maniwala sa Dios, huling dai niato sia naheheling. Pero kumusta an dapit sa aire, mga tanog, asin parong? Dai niato naheheling an arin man sa mga bagay na ini, alagad aram niato na nag-eeksister an mga iyan. An satong mga pulmon, talinga, asin dongo sinasabi iyan sa sato. Sierto nanggad, naniniwala kita sa dai naheheling kun igwa kita nin ebidensia.

Pakatapos na estudyaran an pisikal na ebidensia​—kabale an mga elektron, proton, atomo, amino acid, asin an komplikadong hotok—​an sientista sa naturalesa na si Irving William Knobloch napahiro na magsabi: “Naniniwala ako sa Dios huli ta para sako an Saiyang Banal na pag-eksister iyo an solamenteng lohikong paliwanag sa kamugtakan kan mga bagay.” (Ikomparar an Salmo 104:24.) Kaagid kaiyan, an pisyologong si Marlin Books Kreider nagsabi: “Kapwa bilang sarong ordinaryong tawo, asin siring man bilang sarong tawo na idinudusay an saiyang buhay sa sientipikong pag-adal asin pagsiyasat, mayo na lamang akong pagduda dapit sa pag-eksister nin Dios.”

An mga tawong ini dai nagsosolo. Sono sa propesor sa pisika na si Henry Margenau, “kun kokonsideraron nindo an pinakamadonong na mga sientista, manonompongan nindo an kakadikit na ateista sa tahaw ninda.” An mga pag-oswag sa siensia ni an pagkasudya man nin relihiyon dai kaipuhan na makapuwersa sa sato na bayaan an paniniwala sa Kaglalang. Siyasaton niato kun taano.

An Kalaenan kan Tunay na Relihiyon

Kan 1803, an presidente sa Estados Unidos na si Thomas Jefferson nagsurat: “Sa mga karatan nin Kristianismo, ako, tunay nanggad, na kontra; pero bako sa tunay na mga pagboot mismo ni Jesus.” Iyo, igwa nin kalaenan sa pag-oltanan nin Kakristianohan asin Kristianismo. Dakol sa doktrina kan Kakristianohan an napapasikad sa mga tradisyon nin mga tawo. Sa kabaliktaran, ibinabasar kan tunay na Kristianismo an mga paniniwala kaiyan solamente sa Biblia. Kaya, si Pablo nagsurat sa mga taga-Colosas kan enot na siglo na maninigo sindang kumua nin “tamang kaaraman,” “kadonongan,” asin “espirituwal na pakatalastas.”​—Colosas 1:9, 10.

Ini an maninigo niatong laoman sa tunay na mga Kristiano, huli ta pinagbotan ni Jesus an saiyang mga parasunod: “Gumibo kamo nin mga disipulo sa mga tawo kan gabos na nasyon, na bautismohan nindo sinda . . . na tokdoan nindo sinda na otobon an gabos na bagay na ipinagboot ko sa saindo.”​—Mateo 28:​19, 20.

Ngonyan, inootob kan mga Saksi ni Jehova an pagboot na ini sa 231 kadagaan sa bilog na kinaban. Ikinatradusir na ninda an Biblia sa 12 lenguahe asin nakaimprenta nin labing 74,000,000 na kopya. Saro pa, paagi sa programa nin pag-adal sa Biblia sa harong, sa presente tinatabangan ninda an labing 4,500,000 katawo na ‘otobon an gabos na bagay na ipinagboot ni Jesus.’

An programang ini nin edukasyon nagkakaigwa nin halawig na gayong mga resulta. Iyan nagdadara nin tunay na kaliwanagan, huli ta iyan basado, bakong sa mga kaisipan nin tawo, kundi sa kadonongan nin Dios. (Talinhaga 4:18) Saro pa, tinatabangan kaiyan an mga tawo sa gabos na nasyon asin rasa na gibohon an sarong bagay na an “Kaliwanagan” nin tawo nungkang kayang gibohon​—na magsolog nin “bagong pagkatawo” na nagpapangyari sa sainda na pataluboon an tunay na pagkamoot sa lambang saro.​—Colosas 3:​9, 10.

An tunay na relihiyon nanggagana sa satong ika-20 siglo. Iyan dai nagninigar sa Dios​—minsan sa saiyang pag-eksister ni sa saiyang autoridad. Iniimbitaran niamo kamo na siyasaton nindo mismo ini paagi sa pagdalaw sa mga Saksi ni Jehova sa saro kan saindang mga Kingdom Hall.

[Kahon sa pahina 6]

PAGPARIGON SA MGA GAMOT NIN ATEISMO

Kan kabangaan kan ika-18 siglo, sinugo an pilosopong si Denis Diderot na tradusiron sa Pranses an sarong nagsosolo na tomong ensiklopedia na Ingles. Alagad, nalabihan niang gayo an mga linalaoman kan saiyang among. Guminamit si Diderot nin mga tolong dekada sa pagsurat kan saiyang Encyclopédie, sarong 28 tomong libro na nagpreserbar sa tendensia kan historya na kinabuhayan nia.

Maski ngani an Encyclopédie igwang dakol na praktikal na impormasyon, an idinodoon kaiyan iyo an kadonongan nin tawo. Sono sa koleksion nin mga libro na Great Ages of Man, iyan “mapusong gayong naghulit kan radikal na kredo [nin mga pilosopo] na puwedeng paoswagon nin tawo an saiyang buhay kun sasalidahan nia nin pakasabot an pagtubod bilang saiyang naggigiyang prinsipyo.” Risa-risang dai sinambit an Dios. “Paagi sa saindang pagpili nin mga tema,” nagsabi an librong The Modern Heritage, “liniwanag kan mga editor na an relihiyon bakong saro sa mga bagay na kaipuhan na maaraman nin mga tawo.” Bako nanggad makangangalas, hiningoa kan iglesya na olangon an Encyclopédie. Dinenunsiar iyan kan solicitor general bilang subersibo sa politika, moral, asin relihiyon.

Sa ibong kan mga kaiwal kaiyan, an Encyclopédie ni Diderot pinedido nin mga 4,000 katawo​—sarong makangangalas na bilang, kun kokonsideraron an mahalon na presyo kaiyan. Siertong mangyayari sa dai mahahaloy na an ateistikong natatagong opinyon na ini matalubo pasiring sa lubos na pagnigar sa Dios.