Bareta kan mga Parabalangibog kan Kahadean

Si Jehova Mas Makosog Kisa Saiyang mga Kaiwal

AN Diablo asin an saiyang mga demonyo haloy nang nagprobar na olangon an paghuhulit kan maogmang bareta paagi sa falsong relihiyon asin espiritismo. An Biblia nagtataram dapit sa maraot na intension ni Satanas sa 2 Corinto 4:4 na dian iyan nagsasabi na “binuta kan dios kan palakaw na ini nin mga bagay an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.”

Alagad si Jehova Dios mas makosog kisa ki Satanas. Mayong magigibo an mga kaiwal ni Jehova na paontokon an pag-otob sa saiyang banal na kabotan, na “an gabos na klase nin tawo makaligtas asin makaabot sa tamang kaaraman kan katotoohan.” (1 Timoteo 2:4) An minasunod na mga bareta gikan sa mga parabalangibog kan Kahadean sa Australia nagtatampok kaini.

◻ Pakatapos nin 20 taon na pagrayo sa relihiyon, an sarong misis nagpoon giraray na basahon an Biblia. An nabago giraray na interes na ini nagpangyari saiya na magkaigwa nin dakol na hapot, kaya namibi sia sa Dios para sa tabang na manompongan an mga simbag. Boot niang hanapon an katotoohan, pero aram nia na an pagbuwelta sa saiyang dating relihiyon dai makakaresolber sa saiyang problema. Imbes, pinonan nia an saiyang paghanap paagi sa pagsongko sa sarong tindahan nin mga segunda manong libro asin paghapot kun igwa sinda nin ano man na libro manongod sa relihiyon.

Nagirumdoman kan kagsadiri kan tindahan na igwa sia nin sarong libro sa relihiyon, na mayo sa tindahan, kundi nasa harong. An titulo kan libro Puwede Kamong Mabuhay Sagkod Lamang sa Paraiso Digdi sa Daga, na ipinublikar kan mga Saksi ni Jehova. Galagang binasa kan misis an libro asin nanompongan nia an mga simbag sa dakol niang hapot sa Biblia. Pakatapos na hanapon an mga Saksi ni Jehova sa direktoryo kan telepono, sa katapustapusi nakontak nia sinda asin pinonan an regular na pag-adal sa Biblia.

◻ An sarong daraga nagbayad sa sarong lokal na diaryo tanganing ianunsio an pagpabakal sa sarong anting-anting. Sinambit iyan kan anunsio na ‘anting-anting kan edad media na makapangyarihan na marhay.’ Namangno nin saro sa mga Saksi ni Jehova an anunsio. Nagdesisyon siang apodan an itinaong numero nin telepono asin makipag-olay sa babae manongod sa gikanan kan soboot kapangyarihan kan anting-anting. Suminunod an pag-oolay manongod sa punto-de-vista kan Biblia dapit sa aktibidad nin mga demonyo. An daraga na may anting-anting nagtuga na sarong aldaw pa sana an nakaagi, namibi sia sa Dios na tabangan sia sa saiyang mga problema manongod sa mga demonyo. An Saksi naggibo nin mga areglo para sa saro pang pag-orolay sa telepono.

Kan umapod sia, mayo sa harong an daraga. An ina an nagsimbag sa telepono asin nagsabi: “Dai ko aram kun ano an isinabi mo sa aki ko, pero an nangyari sarong milagro!” Isinaysay nia na pakatapos kan primerong pag-apod sa telepono, iinapon kan saiyang aki an gabos na satanikong retrato asin libro kaini asin nagpoon sa pagbasa nin Biblia.

Dai nahaloy pakatapos kaiyan, ginibo an mga areglo para sa personal na pagsongko sa daraga. Tolos-tolos siang nag-ako nin regular na pag-adal sa Biblia kaiba kan mga Saksi ni Jehova. Nagpoon man siang makiasosyar sa mga Saksi paagi sa pag-atender sa saindang Kristianong mga pagtiripon. Sa giraray, dinaog ni Jehova an mga demonyo paagi sa pagpasirang kan tamang kaaraman sa mga katotoohan kan Biblia.