Bareta kan mga Parabalangibog kan Kahadean

Marahay na mga Gibo na Nagpapamuraway ki Jehova

SA SAIYANG Sermon sa Bukid, sinabihan ni Jesus an saiyang mga disipulo: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) Siring man, an mga Kristiano ngonyan nakikakabtang sa “marahay na mga gibo” na nagpapamuraway ki Jehova.

Ano an marahay na mga gibong ini? Kaiba dian an paghuhulit kan maogmang bareta, alagad an satong arogan na paggawe mahalaga man na kabtang. Sa parate an satong marahay na paggawe an enot na minadagka sa mga tawo pasiring sa Kristianong kongregasyon. An minasunod na mga eksperyensia nag-iilustrar kun paano an Mga Saksi ni Jehova sa Martinique ‘nagpapasirang kan saindang liwanag sa atubangan nin mga tawo.’

◻ Mantang naghuhulit sa harong-harong, an saro sa Mga Saksi ni Jehova nagbisita sa sarong Katolikong babae. Sa laog nin 25 taon an babaeng ini nakikisaro sa sarong lalaki na bako niang agom. Pamilyar sia sa mga katokdoan kan Mga Saksi ni Jehova, mantang sia, mga pitong taon na an nakaagi, nakaresibi kan librong Puwede Kamong Mabuhay Sagkod Lamang sa Paraiso Digdi sa Daga.a Sinabihan kan babae an Saksi: “Kadakol kan relihion. Dai ko aram kun arin an tutubodon ko sa tahaw kan karibarawan na ini.” Ipinaliwanag kan Saksi na an katotoohan manonompongan sana sa Biblia asin na tanganing manompongan iyan, kaipuhan niang pag-adalan an Kasuratan nin maingat asin mamibi sa Dios para sa saiyang espiritu asin paggiya.

Sa laog nin pirang panahon, dawa interesado sa pag-adal nin Biblia, sinayumahan kan babae an pirang imbitasyon na umatender sa Kristianong mga pagtiripon sa Kingdom Hall kan Mga Saksi ni Jehova. Taano? Sia masosopgon na marhay. Minsan siring, kan imbitaran sa Memorial kan pagkagadan ni Cristo, napangganahan nia an saiyang pagkamasosopgon asin sia nag-atender.

An hinangaan niang gayo sa pagtiripon iyo an mamomoton na atmospera sa Kingdom Hall. Nungka niang naeksperyensiahan an siring na tunay na pakikikatood sa saiyang simbahan! Pakatapos kan pagtiripon na iyan sia nagpoon na umatender sa gabos na pagtiripon na ginigibo kan lokal na mga Saksi, asin dai nahaloy sia nagpakasal sa kasaroan niang lalaki. Sia ngonyan saro nang bautisadong miembro kan kongregasyon.

◻ An marahay na mga gibo kan saro pang Saksi nagbunga nin marahay na mga resulta. Sia igwa nin responsableng posisyon sa sarong opisina. Kan an sarong lalaki hale sa isla nin Réunion akoon sa trabaho, an nagkapirang empleyado nagpoon na tuyaon sia huli ta sia hababa. Sia nagin ngingisihan. Kabaliktaran, an Saksi perming maboot asin magalang sa lalaki. Dai nahaloy naghahapot na an lalaki kun taano sia ta napapalaen na marhay.

Ipinaliwanag kan Saksi na an saiyang magalang na paggawe resulta kan mga prinsipyo sa Biblia na nanodan nia sa Mga Saksi ni Jehova. Ipinaheling man nia sa saiya an sinasabi kan Kasuratan manongod sa mga katuyohan nin Dios asin sa paglaom para sa sarong bagong kinaban. An lalaki nag-ako nin pag-adal sa Biblia, nagpoon na umatender sa Kristianong mga pagtiripon, asin pinakasalan an kasaroan niang babae.

Katapustapusi sia nagbalik sa Réunion. Kan nakaagi, sia nagkaproblema sa saiyang mga paryente, espesyalmente sa pamilya kan saiyang agom na babae. Alagad ngonyan naghanga sindang marhay sa saiyang marahay na Kristianong paggawe. An lalaki nabautismohan asin sa presente saro nang ministeryal na lingkod. An nagkapirang miembro kan pamilya, kabale na an saiyang agom na babae asin duwang aking babae, naglilingkod na man sa Kristianong kongregasyon bilang mga parahayag kan maogmang bareta kan Kahadean nin Dios.

[Nota sa Ibaba]