Mga Saksi ni Jehova sa Bilog na Kinaban—Puerto Rico
SA PAG-OLTANAN kan Dagat Caribeano asin Oseano Atlantiko yaon an berde, tropikong isla nin Puerto Rico. Idineklarar iyan ni Christopher Columbus na teritoryo nin España kan 1493 asin nginaranan iyan na San Juan Bautista bilang paggirumdom ki Juan na Bautisador. An pinakadakulang siudad kaiyan haloy na inapod na Puerto Rico, o “Mayaman na Duongan.” Pag-abot nin panahon, an ngaran na ini ginamit para sa bilog na isla, mantang an siudad inapod na San Juan.
An Puerto Rico talagang mayaman na duongan sa dakol na bagay. Dakol na bulawan an ipinaktora hale digdi kan enot na mga taon nin pamamahala kan España. An isla nag-eeksportar ngonyan nin tubo, kape, batag na kalibo, asin mga prutas na citrus, minsan ngani an mga industriya sa pagprodusir asin serbisyo iyo an kadaklan na nagsusuportar sa ekonomiya ngonyan. Minsan siring, an Puerto Rico talagang mayaman na duongan sa orog pa kahalagang sentido.
An maogmang bareta manongod sa Kahadean nin Dios nagpoon na ihulit digdi kan mga taon nin 1930. Ngonyan, igwang labing 25,000 na parahayag kan maogmang bareta sa Puerto Rico. Kan 1993 an mga tawohan sa sangang ini kan Watch Tower Society nagdakol poon sa 23 sagkod sa labing 100. Kaipuhan an pagdakol na ini tanganing mapangatamanan kan sanga an pagtradusir nin literatura sa Biblia sa Kastila, na nagpangyari sa mga publikasyon na iyan na ikapaabot sa mga 350,000,000 katawong nagtataram nin Kastila sa bilog na kinaban.
Sarong Bagong Langtad
Nagbareta man an sangang opisina: “Sarong bagong langtad an nabuksan sa Puerto Rico huli ta hinihingoa niamong ikapaabot sa mga bongog an mensahe kan Kahadean. Sarong tugang na babae an nagsaysay kan minasunod na eksperyensia: ‘Naghuhulit ako sa mga bongog asin sinongko ko an sarong babae na may duwang sadit na aki. Kan marealisar nia na ako Saksi, tolos-tolos na sinayumahan nia ako huli ta an saiyang agom, na saro man na bongog, habo sa mga Saksi ni Jehova.
“‘Pakalihis nin nagkapirang bulan an babae man sanang ini nagsongko sa sarong katood na nakikipag-adal kan Biblia sa mga Saksi. Uminiba sia asin ikinaogma nia iyan na marhay. Sinongko ko liwat an babae, asin inotro nia na an saiyang agom habo sa mga Saksi. Minsan siring, gusto niang masabotan an Biblia asin uyam na sia sa saiyang iglesya huli ta mayo man sindang itinotokdo. Nagpoon kaming mag-adal, na ginagamit an sarong tract. Sarong aldaw sinabihan nia akong bumalik sa Sabado huling yaon an saiyang agom. “Pero habo nia samo, bako?” an hapot ko. Sia nagsimbag: “Gusto niang aramon kun manongod sa ano man nanggad ini.”
“‘Kan suminunod na aldaw sindang duwa nagtotoktok sa sakong pinto! Mantang dakol an hapot kan agom na lalaki, inimbitaran ko sinda sa samong pagtiripon para sa mga bongog. Naenot pa siang nag-abot sa sako asin dai nagpapalta sa pagtiripon poon kaidto. Naghuhulit sia sa iba pang mga bongog, nakaatender na sa asamblea, asin nag-aantisipar sa bautismo.’”
An bareta kan sanga nagpapadagos: “Sa samong pandistritong kombension ngonyan na taon, an bilog na programa iinatubang sa pagtaram paagi sa senyas, kaya dakol na bongog an nag-atender kaiba an saindang mga pamilya. Nagdatong an sarong emosyonal na marhay na oras durante kan ultimong pahayag kan sambiton kan espiker an ginigibo sa tahaw kan mga bongog asin nagsabi na mga 70 an presente. Makosog an urupakan, pero, siring kan sabi kan espiker, dai iyan nadadangog kan mga bongog. Kaya hinahagad sa mga bongog na humeling sa mga nagdadangog, inotro kan espiker an hapot na ‘Naoogma daw kamo na makaiba nindo digdi an saindong mga tugang na bongog?’ asin hinagad sa mga nagdadangog na mag-urupak paagi sa pagwiriwigwig kan duwang kamot. Makaoogmang paghelingon an 11,000 na tugang na lalaki asin babae na nag-uurupak paagi sa pagwiriwigwig kan saindang mga kamot. Labi-labi an paggayagaya kan satong bongog na mga tugang na lalaki asin babae asin namatean nindang kabtang sinda kan dakulang asosasyon nin magturugang. Dakol an napaluha sa kagayagayahan.”
Mantang nakikikabtang an mga Saksi ni Jehova sa gibohon na pag-ani sa Puerto Rico, mayong duwa-duwa na iyan magpapadagos bilang mayaman na duongan. An “mga karnero” nin Dios, na inaapod niang “kawiliwiling mga bagay kan gabos na nasyon,” padagos na magraralaog kaya an harong ni Jehova pano nin kamurawayan.—Juan 10:16; Haggeo 2:7.
[Kahon sa pahina 9]
SUMARYO KAN NASYON
1994 na Taon nin Paglilingkod
PINAKAHALANGKAW NA BILANG NIN NAGPAPATOTOO: 25,428
KATIMBANG: 1 Saksi sa 139
NAG-ATENDER SA MEMORIAL: 60,252
PROMEDYONG MGA PARAHAYAG NA PAYUNIR: 2,329
PROMEDYONG MGA PAG-ADAL SA BIBLIA: 19,012
BILANG NIN NABAUTISMOHAN: 919
BILANG NIN MGA KONGREGASYON: 312
SANGANG OPISINA: GUAYNABO