Magin Listo sa Paghanap nin mga Bungog sa Saindong Teritoryo
1 Ipinaaabot ni Jehova an pangagda na: “‘Madia!’ . . . An siisay man na boot kumua kan tubig nin buhay na daing bayad.” (Kap. 22:17) Padakol nang padakol an bungog na kabilang sa mga naghihimate sa pangapodan na ini. Bilang resulta, durante kan nakaaging 7 taon, sarong kongregasyon na an pagtaram sa senyas asin haros 15 grupo na an pagtaram sa senyas an inorganisar na sa Pilipinas.
2 Minsan ngani an mga kongregasyon asin grupo na an pagtaram sa senyas ikinokonsentrar an gabos na paghihingoa ninda sa paghuhulit sa pagkontak sa mga bungog asin may diperensia sa pagdangog sa kanya-kanya nindang teritoryo, dakol na siring an dapat pang hanapon asin patotoohan sa nasyon na ini.
3 Paano daw Kamo Makakatabang? Mantang nasa pampublikong mga lugar, may naririparo daw kamong mga tawo na an pagtaram sa senyas? May midbid daw kamo sa pinagtatrabawohan nindo o sa eskuelahan nindo na igwang bungog na miembro sa pamilya? Magin listo sa paghanap kan mga bungog mantang ginigibo nindo an aroaldaw na mga aktibidad nindo. Alagad paano kamo makasesegurado na sinda maako nin patotoo sa Kahadean?
4 Pagpatotoo: Kun aram nindo na may harani saindo na kongregasyon o grupo na an pagtaram sa senyas, maninigo nindo sindang impormaran manongod sa adres kan bungog. Dakol na bungog an mas marikas na nag-ooswag sa pag-adal kan katotoohan kun nakakaasosyar ninda an bungog na mga Saksi sa mga pagtiripon kan kongregasyon na pinamamayohan sa Pagtaram sa Senyas sa Pilipinas. Kun siring, kun may kongregasyon o grupo sa lugar nindo na an pagtaram sa senyas, maninigong ipadara dian kan sekretaryo kan kongregasyon nindo an impormasyon manongod sa gabos na bungog sa teritoryo nindo.
5 Paano kun mayo ni saro sa harani na makatatao nin espirituwal na tabang sa mga bungog sa komunidad nindo? Paano daw kamo makakatabang? Taano ta dai dumalaw liwat asin kaolayon an siisay man na miembro kan pamilya na nakadadangog? Alokon na mapadalan kamo nin sarong video na an pagtaram sa senyas tangani na mapukaw an interes kan bungog. Dakol na parahayag sa Pilipinas an naghihingoang mag-adal nin pagtaram sa senyas tanganing mas epektibong makakomunikar ninda an mga bungog. (Gibo 16:9, 10) Makukua an brosyur na Kahagadan asin an librong Kaaraman sa video na an pagtaram sa senyas. Nagkaigwa na nin dakol na positibong resulta an pamamayo nin mga pag-adal sa Biblia na ginagamit an mga kasangkapan na ini.
6 Paagi sa pagigin listo sa paghanap nin mga bungog sa saindong lugar, matatawan nindo sinda nin oportunidad na kumua nin tubig nin buhay na daing bayad.—Mat. 10:11.