An mga Pamibi sa Biblia Mahalaga na Siyasaton
SARONG napupurisaw na babae, sarong hade, asin an mismong Aki nin Dios an namibi kan mga pamibi na satong sisiyasaton ngonyan. An kada pamibi huli sa laen man na kamugtakan. Pero an siring na mga situwasyon puwedeng makaapektar sato ngonyan. Ano an satong manonodan sa mga halimbawang ini?
‘Masdan Mo an Kasakitan kan Saimong Oripon na Babae’
Nasasakitan daw kamo sa sarong dai nahahaleng problema? O pinagagabatan daw kamo nin kahaditan? Kun siring kapareho nanggad kamo ni Ana bago namundag an saiyang matuang aki, si Samuel. Sia mayong aki asin tinutuya nin saro pang babae. Sa katunayan, ikinauuyam asin ikinahahadit na marhay ni Ana an kamugtakan nia kaya habo na siang magkakan. (1 Samuel 1:2-8, 15, 16) Nakimaherak sia ki Jehova asin idinolot an minasunod na pagngayongayo:
“O Jehova nin mga hukbo, kun saimong mamasdan nanggad an kasakitan kan saimong oripon na babae asin girumdomon nanggad ako, asin dai mo lilingawan an saimong oripon na babae asin tawan nanggad an saimong oripon na babae nin sarong aking lalaki, itatao ko sia ki Jehova sa gabos na aldaw kan saiyang buhay, asin mayo nin labaha na maagi sa saiyang payo.”—1 Samuel 1:11.
Mangnoha na si Ana dai nagtaram nin pankagabsan na mga tataramon. Nakipag-olay sia ki Jehova na may espisipikong kahagadan (na magkaigwa nin aking lalaki) asin inibanan ini nin depinidong desisyon (na itao sia sa paglilingkod sa Dios). Ano an itinotokdo kaini sa sato?
Kun nasa kasakitan, magin espisipiko sa pamibi. Ano man an saindong problema—baga man iyan kamugtakan nindo sa harong, kamondoan, o maluyang salud—ipamibi iyan ki Jehova. Isabi saiya kun ano man nanggad an saindong problema asin an saindong namamatean. “Kada banggi ipinaniniwala ko ki Jehova an gabos kong problema,” an sabi nin sarong balo na an ngaran Louise. “Kun beses dakol, pero malinaw kong sinasambit an kada saro.”
An pakikipag-olay ki Jehova sa espisipikong mga tataramon nagtatao nin mga pakinabang. An paggibo kaiyan nagtatabang sato na masabotan nin malinaw an satong problema, na pagkatapos tibaad lumataw na bako man na gayong depisil. An espisipikong pagpamibi pinagiginhawa kita sa paghadit. Dawa bago sinimbag an saiyang pamibi, si Ana nakamate nin kosog nin boot, asin “an saiyang lalauogon bako nang mamondo.” (1 Samuel 1:18) Dugang pa, an pagigin espisipiko pinangyayari kitang magin alisto na mamansayan an simbag sa satong pamibi. “Mantang orog na ginigibo kong espisipiko an sakong mga pamibi,” an sabi ni Bernhard, sarong Kristiano sa Alemania, “nagigin mas malinaw an mga simbag.”
“Ako Sadang Pang Aki”
Alagad, an saro tibaad makamate nin laen na klase nin paghadit kun sia nag-ako nin asignasyon na naghohona sia na bako siang kuwalipikado. Kamo daw kun beses nagagabatan sa paninimbagan na itinatao saindo ni Jehova? O an ibang tawo daw ibinibilang kamong bakong angay sa saindong asignasyon? An hoben na si Salomon nasa siring na situwasyon kan lahidan siang hade sa Israel. May nagkapirang prominenteng tawo na mas gustong iba an tumukaw sa trono. (1 Hade 1:5-7, 41-46; 2:13-22) Dai pa sia nahahaloy sa paghade, si Salomon nakiolay sa pamibi:
“Jehova na sakong Dios, ika mismo an guminibo sa saimong lingkod na magin hade . . . ako sadang pang aki. Dai ako tatao kun paano maluwas asin kun paano malaog. . . . Tawan mo an saimong lingkod nin pusong makinuyog tanganing maghokom sa saimong banwaan, tanganing makamansay sa marahay asin maraot.”—1 Hade 3:7-9.
Isinentro ni Salomon an saiyang pamibi sa saiyang relasyon ki Jehova, sa itinaong pribilehiyo sa saiya, asin sa saiyang kakayahan na otobon an asignasyon. Sa kaagid na paagi, kun kita man natawan nin paninimbagan na sa paghona ta dai niato kaya, maninigo niatong hagadon sa Dios na sangkapan kita sa paggibo kan trabaho. Horophoropa an minasunod na eksperyensia:
“Kan apodon tanganing mangataman sa mas dakulang paninimbagan sa sangang opisina kan Watch Tower Society,” an paliwanag ni Eugene, “an pagmate ko biyo akong mayong kakayahan. Igwa pa nin ibang mas kuwalipikado asin mas dakol an kabatidan. Dai akong gayo nakatorog kan suminunod na duwang banggi, na ginagamit an kadaklan na oras sa pamimibi, na nagtao sako nin kosog asin kan kinakaipuhan na kosog nin boot.”
Hinagad ki Roy na magtao nin pahayag sa gadan kasunod kan bigla asin makamomondong pagkagadan nin sarong hoben na amigo na nagin popular na marhay. Ginatos an siertong maatender. Ano an ginibo ni Roy? “Bihira akong mamibi nin halawigon na tawan nin kosog asin kakayahan na makanompong nin angay na mga tataramon sa pagpahayag nin nakapakokosog na mga kaisipan asin sa pagtao nin karangahan.”
Mantang an Kaglalang ‘pinaririkas an mga bagay’ asin mantang nag-ooswag an saiyang organisasyon, an natural na ibinubunga iyo na mas dakol sa saiyang mga lingkod an pinaniniwalaan nin paninimbagan. (Isaias 60:22) Kun hinahagad saindo na magkaigwa nin mas dakulang kabtang, manarig kamo na kayang panoan ni Jehova an ano man na kakulangan nindo sa kabatidan, pagsasanay, o kakayahan. Dumolok sa Dios arog kan paaging ginibo ni Salomon, asin sasangkapan Nia kamo tanganing magibo an asignasyon.
“Tanganing Sinda Gabos Magin Saro”
An ikatolong situwasyon na minalataw ngonyan iyo an paghagad sa saro na irepresentar an sarong grupo sa pamibi. Kun hinahagadan na mamibi para sa iba, ano an maninigo niatong ipamibi? Horophoropa an pamibi ni Jesus na nasusurat sa Juan kapitulo 17. Ipinamibi nia ini na yaon an saiyang mga disipulo kan ultimo niang banggi bilang tawo. Anong klaseng mga kahagadan an ipinakiolay nia sa saiyang langitnon na Ama?
Idinoon ni Jesus an mga pasohan asin paglaom kan gabos na yaon duman. Sinambit nia an pagpamuraway sa ngaran ni Jehova Dios asin an pagpahayag kan Kahadean. Idinoon ni Jesus an halaga nin personal na relasyon sa Ama asin sa Aki, basado sa kaaraman sa Kasuratan. Nagtaram sia dapit sa pagigin siblag sa kinaban, na maandam kan saiyang mga parasunod para sa pagtumang. Hinagad man ni Cristo sa saiyang Ama na ingatan an saiyang mga disipulo asin pagsararoon sinda sa tunay na pagsamba.
Iyo, idinoon ni Jesus an pagkasararo. (Juan 17:20, 21) Sa kapinonan kan bangging idto, an mga disipulo nagkaigwa nin bakong sa maygurang na pagdiriskusyon. (Lucas 22:24-27) Alagad, sa pamibi dai minawot ni Jesus na mambasol kundi pagkasararoon sinda. Sa kaagid na paagi, an mga pamibi sa pamilya asin sa kongregasyon maninigong magpalakop nin pagkamoot asin magmawot na madaog an dai pagkaoroyon sa tahaw nin mga indibiduwal. An mga irinirepresentar maninigong dagkahon na magkasararo.—Salmo 133:1-3.
An pagkasararong ini nahahayag kun an mga naghihinanyog magsabing, “Amen,” o “Mangyari logod,” pagkatapos. Tanganing mangyari ini, dapat na nasasabotan asin minaoyon sinda sa gabos na sinasabi. Kaya, bakong angay na sambiton sa pamibi an sarong bagay na dai aram kan nagkapirang presente. Halimbawa, an sarong magurang na irinirepresentar an kongregasyon sa pamibi tibaad hagadon an bendisyon ni Jehova sa sarong tugang na lalaki o babae na grabe an helang. Alagad sa parate pinakamarahay na gibohon sana nia iyan kun an kadaklan kan mga irinirepresentar nia midbid an tawo asin nabaretaan an paghelang.
Mangnohon man na dai sinarosaro ni Jesus an personal na mga pangangaipo kan lambang miembro kan grupo. Mapapalabot sa paggibo kaiyan an pagsambit sa personal na mga bagay na nagkapira sanang indibiduwal an nakakaaram. An personal na mga bagay angay na hagadon sa pribadong pamibi, na puwedeng gibohon na halawig asin personal sono sa gusto.
Paano maninigong andamon nin saro an saiyang sadiri sa pagrepresentar sa sarong dakulang katiriponan nin mga parasamba sa pamibi? An sarong may kabatidan na Kristiano nagpaliwanag: “Hinohorophorop ko na nin patienot an mga dapat pasalamatan, an tibaad mga kahagadan kan mga tugang, asin an mga pagngayongayo na puwede kong sambiton para sa sainda. Pinagsusunodsunod ko an sakong mga ideya, kabale na an mga kapahayagan nin pag-omaw, sa sakong isip. Bago mamibi sa publiko, namimibi ako nin saboot sana, na naghahagad nin tabang na ikarepresentar an mga tugang sa may dignidad na paagi.”
Ano man an saindong mga kamugtakan, posible na makakanompong kamo nin pamibi sa Biblia na sinambit nin saro na arog sa saindo an kamugtakan. An dakol na klase nin pamibi sa Kasuratan ebidensia kan mamomoton na kabootan nin Dios. An pagbasa sa mga pamibing ini asin paghorophorop dian makakatabang saindo na mapaoswag an kuwalidad kan saindong mga pamibi.
[Kahon sa pahina 5]
MAHALAGANG MGA PAMIBI SA BIBLIA
An mga lingkod ni Jehova namibi sa irarom nin dakolon na kamugtakan. Naagihan na daw nindo an saro o labi pa kan minasunod na situwasyon?
Nangangaipo daw kamo nin paggiya nin Dios, arog kan nangyari ki Eliezer?—Genesis 24:12-14.
Kamo daw namemeligro, arog ni Jacob?—Genesis 32:9-12.
Boot daw nindong orog na mamidbid an Dios, arog kan ginibo ni Moises?—Exodo 33:12-17.
Kamo daw napapaatubang sa mga paratumang, arog kan nangyari ki Elias?—1 Hade 18:36, 37.
Kamo daw nadedepisilan na maghulit, arog kan namatean ni Jeremias?—Jeremias 20:7-12.
Kaipuhan daw nindong magtuga nin mga kasalan asin humagad nin kapatawadan, arog ni Daniel?—Daniel 9:3-19.
Kamo daw napapaatubang sa paglamag, arog kan nangyari sa mga disipulo ni Jesus?—Gibo 4:24-31.
Helingon man an Mateo 6:9-13; Juan 17:1-26; Filipos 4:6, 7; Santiago 5:16.
[Kahon sa pahina 6]
KUN ANO AN DAPAT NA IPAMIBI KUN LINALABANAN AN NAKATANOM NANG BISYO
Kamo daw nasasakitan sa pabalikbalik na kaluyahan? Paano mapakikinabangan an mga pamibi na isinurat sa Biblia? Makanood kamo ki David, na namibi sa laen-laen na panahon manongod sa saiya mismong mga kaluyahan.
Si David nag-awit: “Siyasaton mo ako, O Dios, asin midbida an sakong puso. Baloa ako, asin arama an sakuyang mga kaisipan na nakariribok.” (Salmo 139:23) Boot ni David na siyasaton ni Jehova Dios an salang mga kamawotan, emosyon, o motibo. Sa ibang pagtaram, hinagad ni David an tabang ni Jehova sa paglikay sa kasalan.
Alagad an mga kaluyahan ni David dinaog sia, asin sia nagkasala nin grabe. Sa giraray, nakatabang saiya digdi an pamibi—ngonyan tanganing ibalik an saiyang relasyon sa Dios. Sono sa Salmo 51:2, si David nakimaherak: “Hugasan mo ako nin biyo sa sakong sala, asin linigan mo ako sa sakong kasalan.”
Kita mapakumbaba man na makakapamibi para sa tabang ni Jehova tanganing mapondo an salang mga inklinasyon. Pakokosogon kita kaini na madaog an nakatanom nang kaluyahan asin makatatabang sato na malikayan an kasalan. Kun bumuwelta an dating bisyo, maninigo kitang dumolok giraray ki Jehova na hinahagad na tabangan nia kita na makapadagos sa pakikilaban.
[Mga retrato sa pahina 7]
An mga pamibi para sa sarong grupo maninigong magdoon kan Makakasuratan na mga paglaom asin espirituwal na mga pasohan kan gabos