Paoswagon an Kualidad kan Saindong mga Pamibi Paagi sa Pag-adal sa Biblia
“A, Jehova, hinanyoga tabi an pamibi kan saimong lingkod.”—NEH. 1:11.
1, 2. Taano ta magigin kapakipakinabang na estudyaran an nagkapirang pamibi na nakasurat sa Biblia?
AN PAMIBI asin pag-adal sa Biblia mahalagang marhay na kabtang kan tunay na pagsamba. (1 Tes. 5:17; 2 Tim. 3:16, 17) Siempre, an Biblia bakong libro nin mga pamibi. Pero, kadakol na pamibi an yaon dian, kaiba an dakol na nasa libro nin Salmo.
2 Mantang binabasa asin pinag-aadalan nindo an Biblia, posibleng marhay na may makukua kamong mga pamibi na angay sa mga situwasyon na napapaatubang sa saindo. Sa katunayan, kun iiniiba nindo an mapagngayongayong mga kaisipan na yaon sa Kasuratan, minaoswag an kualidad kan saindong mga pamibi. Ano an manonodan nindo sa mga sinimbag an mga pakimaherak na logod tabangan sinda asin sa laog kan saindang mga pamibi?
Hagadon Asin Sunodon an Paggiya nin Dios
3, 4. Ano an misyon kan lingkod ni Abraham, asin ano an manonodan niato sa resulta na itinao ni Jehova?
3 Sa pag-adal nindo sa Biblia, naaraman nindo na maninigong pirme kamong mamibi na logod giyahan kamo nin Dios. Estudyare an nangyari kan isugo kan patriarkang si Abraham an saiyang pinakamatuang lingkod—na posibleng marhay na si Eliezer—sa Mesopotamia tanganing magkua para ki Isaac nin magigin agom na may takot sa Dios. Mantang an mga babae nagsasakdo nin tubig sa sarong bubon, an lingkod namibi: “Jehova . . . , an hoben na babae na sabihan ko, ‘Ibaba mo, tabi, an saimong dulay tangani na makainom ako,’ asin masabi nanggad, ‘Inom, asin papainomon ko man an saimong mga kamelyo,’ ini an itao mo sa saimong lingkod, ki Isaac; asin paagi kaini ipaaram mo sa sako na nagpaheling ka nin maimbod na pagkamoot sa sakuyang kagurangnan.”—Gen. 24:12-14.
4 Sinimbag an pamibi kan lingkod ni Abraham kan an saiyang mga kamelyo painomon ni Rebeca. Dai nahaloy, si Rebeca nag-iba sa saiya pasiring sa Canaan asin nagin an namomotan na agom ni Isaac. Siempre, dai kamo makakaasa na an Dios matao sa saindo nin espesyal na tanda. Pero, gigiyahan nia kamo sa buhay kun kamo mamimibi asin determinadong magpagiya sa saiyang espiritu.—Gal. 5:18.
An Pamibi Nakakatabang na Mainaan an Kahaditan
5, 6. Ano an mahalagang mangnohon sa pamibi ni Jacob kan madali na siang makipaghelingan ki Esau?
5 An pamibi puedeng makaina nin kahaditan. Huling natatakot sa peligro dahel sa saiyang kakambal na si Esau, si Jacob namibi: “O Jehova, . . . Bako akong maninigo sa gabos na mamomoton na kabootan asin sa gabos na kaimbodan na ipinaheling mo sa saimong lingkod . . . Ligtasan ako, nakikimaherak ako sa saimo, sa kamot kan sakong tugang, sa kamot ni Esau, huli ta natatakot ako sa saiya na tibaad sia pumadigdi asin salakayon nanggad ako, an ina sagkod an mga aki. Asin ika, ika nagsabi, ‘Daing duda na tatrataron taka nin marahay asin ibubugtak ko an saimong banhi na siring sa mga baybay sa dagat, na dai mabilang huli sa kadakolan.’”—Gen. 32:9-12.
6 Pakapamibi ni Jacob, may ginibo siang pag-iingat na maprotehiran an saiyang pamilya, asin an saiyang pamibi sinimbag kan magkaulian sinda ni Esau. (Gen. 33:1-4) Maingat na basahon an pamibing iyan, asin maheheling nindo na si Jacob dai sana nakimaherak na logod tabangan sia. Ipinahayag nia an saiyang pagtubod sa ipinanugang Banhi asin pagpasalamat sa mamomoton na kabootan nin Dios. May ‘mga ikinakatakot’ daw kamo? (2 Cor. 7:5) Kun igwa, an pakiolay ni Jacob puedeng magpagirumdom sa saindo na an mga pamibi puedeng makaina nin kahaditan. Minsan siring, maninigo na an laog kaiyan bako sanang mga kahagadan kundi mga kapahayagan man nin pagtubod.
Mamibi na Logod Tawan Kamo nin Kadonongan
7. Taano ta namibi si Moises na logod tawan sia nin kaaraman manongod sa mga dalan ni Jehova?
7 An pagmawot na mapaogma si Jehova maninigong magmotibar sa saindo na mamibi na logod tawan kamo nin kadonongan. Si Moises namibi na logod tawan sia nin kaaraman manongod sa mga dalan nin Dios. “Uya,” an saiyang pakimaherak, “sinasabi mo [Jehova] sa sako, ‘Giyahan mo an banwaan na ini [hale sa Egipto]’ . . . Asin ngonyan tabi, kun ako nakakua nin pabor sa saimong pagheling, ipaaram mo tabi sa sako an saimong mga dalan, . . . tanganing ako makakua nin pabor sa saimong pagheling.” (Ex. 33:12, 13) Bilang simbag, si Moises tinawan nin Dios nin orog na kaaraman manongod sa Saiyang mga dalan—na kaipuhan tanganing mapangenotan nia an banwaan ni Jehova.
8. Paano kamo puedeng makinabang sa paghorophorop sa 1 Hade 3:7-14?
8 Si David namibi man: “Ipaaram mo sa sako an saimong mga dalan, O Jehova.” (Sal. 25:4) An aki ni David na si Salomon nakiolay sa Dios na logod tawan sia nin kadonongan na kaipuhan tanganing magibo an mga katongdan bilang hade nin Israel. An pamibi ni Salomon nakapaogma ki Jehova, na nagtao sa saiya bako sana kan kahagadan nia kundi pati nin kayamanan asin kamurawayan. (Basahon an 1 Hade 3:7-14.) Kun nag-ako kamo nin mga pribilehio nin paglilingkod na garo baga depisilon, mamibi na logod tawan kamo nin kadonongan asin magpaheling nin mapakumbabang kaisipan. Dangan tatabangan kamo nin Dios na makua an kaaraman asin humiro na may kadonongan na kaipuhan tanganing maasikaso an saindong mga paninimbagan sa tama asin mamomoton na paagi.
Mamibi Hale sa Puso
9, 10. Ano an nanompongan nindo na mahalaga dapit sa pagkasambit ni Salomon manongod sa puso sa saiyang pamibi sa inagurasyon kan templo?
9 Tanganing dangogon, an pamibi dapat na hale sa puso. Si Salomon odok sa pusong namibi, na isinurat sa 1 Hade kapitulo 8, sa atubangan nin mga kaburunyogan na nagtiripon sa Jerusalem para sa inagurasyon kan templo ni Jehova kan 1026 B.C.E. Pagkatapos na an kaban kan tipan ibugtak sa Kabanalbanale asin an templo mapano kan panganoron ni Jehova, inomaw ni Salomon an Dios.
10 Pag-adalan an pamibi ni Salomon, asin mangnohon an mga pagkasambit kaiyan manongod sa puso. Minidbid ni Salomon na si Jehova sana an nakakaaram sa puso nin tawo. (1 Ha. 8:38, 39) An pamibi man sanang iyan nagpapaheling na igwa nin paglaom para sa nagkasala na ‘minabalik sa Dios sa bilog niang puso.’ Kun bihagon nin kaiwal an banwaan nin Dios, an saindang mga pakimaherak dadangogon kun an puso ninda bilog para ki Jehova. (1 Ha. 8:48, 58, 61) Kun siring, daing duwa-duwa na an saindong mga pamibi maninigong hale sa puso.
Kun Paano an Salmo Makakapaoswag sa Kualidad kan Saindong mga Pamibi
11, 12. Ano an nanodan nindo sa mapagngayongayong kapahayagan nin sarong Levita na may panahon na dai makaduman sa santuaryo nin Dios?
11 An pag-adal sa Salmo makakapaoswag sa kualidad kan saindong mga pamibi asin makakatabang sa saindo na maghalat sa Dios na simbagon iyan. Estudyare an pagigin mapasensia nin sarong nadistierong Levita. Minsan ngani may panahon na dai sia makaduman sa santuaryo ni Jehova, sia nag-awit: “Taano ta namomondo ka, O kalag ko, asin taano ta nariribok ka sa laog ko? Maghalat ka sa Dios, huli ta oomawon ko pa sia bilang an dakulang kaligtasan kan sakong pagkatawo asin bilang sakuyang Dios.”—Sal. 42:5, 11; 43:5.
12 Ano an manonodan nindo sa Levitang iyan? Kun huli sa pagkabilanggo dahel sa katanosan may panahon na dai nindo makaibanan an mga kapagtubod sa saindang lugar nin pagsamba, mapasensiang maghalat sa Dios na humiro para sa saindo. (Sal. 37:5) Horophoropon an magayagayang paglilingkod sa Dios kan nakaagi, asin ipamibi na logod makatagal kamo mantang ‘naghahalat sa Dios’ na ibalik kamo sa aktibong pakikiasosyar sa saiyang banwaan.
Mamibi na May Pagtubod
13. Kaoyon kan Santiago 1:5-8, taano ta maninigo kamong mamibi na may pagtubod?
13 Ano man an saindong mga kamugtakan, pirmeng mamibi na may pagtubod. Kun napapaatubang kamo sa sarong pagbalo sa integridad, sunodon an hatol ni disipulo Santiago. Dumolok ki Jehova sa pamibi, asin dai magduda na kaya niang itao sa saindo an kadonongan na kaipuhan tanganing matagalan an pagbalo sa saindo. (Basahon an Santiago 1:5-8.) Aram nin Dios an ano man na tibaad ikinakapurisaw nindo, asin kaya niang giyahan asin rangahon kamo paagi sa saiyang espiritu. May bilog na pagtubod na sabihon sa saiya an nasa puso nindo, na “dai nin ano man na pagduwaduwa,” asin akoon an paggiya kan saiyang espiritu asin an hatol kan saiyang Tataramon.
14, 15. Taano ta masasabing si Ana namibi asin naghiro na may pagtubod?
14 Si Ana, saro sa duwang agom kan Levitang si Elcana, namibi asin naghiro na may pagtubod. An mayong aki na si Ana tinutuya kan saro pang agom na si Penina, na nagkaigwa nin nagkapirang aki. Sa tabernakulo, si Ana nagpromesa na kun sia magkaaki nin aking lalaki, itatao nia ini ki Jehova. Huling nagkikibigkibig an ngabil ni Ana mantang sia namimibi, naghona an Halangkaw na Saserdoteng si Eli na sia burat. Kan maaraman na bako man siang burat, si Eli nagsabi: “Itao logod kan Dios nin Israel an hinagad mo.” Minsan ngani dai aram ni Ana an eksaktong magigin resulta, sia nagtutubod na sisimbagon an saiyang pamibi. Kun siring, “an saiyang lalawgon bako nang hadit sa sadiring kamugtakan.” Sia bako nang mamondo asin dai na pinanluluyahan nin boot.—1 Sam. 1:9-18.
15 Pagkamundag asin pagkabutas ki Samuel, iprinesentar sia ni Ana ki Jehova para sa sagradong paglilingkod sa tabernakulo. (1 Sam. 1:19-28) An pagtao nin panahon na horophoropon an pamibi ni Ana sa pangyayaring iyan puede nanggad na makapaoswag sa kualidad kan mga pamibi mismo nindo asin makatabang sa saindo na maheling na dawa an kamondoan huli sa nakakapurisaw na problema puedeng mapangganahan kun mamimibi kamo na may pagtubod na sisimbagon kamo ni Jehova.—1 Sam. 2:1-10.
16, 17. Ano an nangyari huling si Nehemias namibi asin naghiro na may pagtubod?
16 An matanos na tawong si Nehemias kan ikalimang siglo B.C.E. namibi asin naghiro na may pagtubod. Sia nakimaherak: “A, Jehova, hinanyoga tabi an pamibi kan saimong lingkod asin an pamibi kan saimong mga lingkod na naoogmang marhay sa pagkatakot sa saimong ngaran; asin magtao ka tabi nin kapangganahan sa saimong lingkod ngonyan asin gibohon mong kaherakan sia sa atubangan kan lalaking ini.” Siisay an “lalaking ini”? Sia an Hade kan Persia na si Artajerjes, na pinaglilingkodan ni Nehemias bilang kopero.—Neh. 1:11.
17 Namibi si Nehemias na may pagtubod sa laog nin mga aldaw pagkatapos na maaraman na an mga Judiong pinatalingkas sa pagkabihag sa Babilonya “nasa maraoton na kamugtakan asin nasa kasusupgan; asin an lanob nin Jerusalem gaba.” (Neh. 1:3, 4) An mga pamibi ni Nehemias sinimbag nin orog pa sa linalaoman nia kan tinogotan sia ni Hadeng Artajerjes na magpasiring sa Jerusalem tanganing itogdok liwat an lanob kaiyan. (Neh. 2:1-8) Dai nahaloy, an lanob nahirahay. Sinimbag an mga pamibi ni Nehemias huli ta iyan nakasentro sa tunay na pagsamba asin ipinahayag na may pagtubod. Arog man daw kaiyan an saindong mga pamibi?
Girumdomon na Mag-omaw Asin Magpasalamat
18, 19. Sa anong mga dahelan na an sarong lingkod ni Jehova maninigong mag-omaw asin magpasalamat sa saiya?
18 Kun namimibi, girumdomon na mag-omaw asin magpasalamat ki Jehova. Kadakol nin dahelan na gibohon iyan! Halimbawa, gustong-gusto ni David na irukyaw an pagigin hade ni Jehova. (Basahon an Salmo 145:10-13.) Ipinapaheling daw kan saindong mga pamibi na pinapahalagahan nindo an pribilehio na ipahayag an Kahadean ni Jehova? An mga tataramon kan mga salmista puedeng makatabang man sa saindo na ipahayag sa Dios paagi sa odok sa pusong pamibi an saindong pagpasalamat para sa Kristianong mga pagtiripon, asamblea, asin kombension.—Sal. 27:4; 122:1.
19 An pagpasalamat huli sa saindong mahalagang marhay na relasyon sa Dios puedeng magpahiro sa saindo na mamibi hale sa puso na may arog kaining kaisipan: “Oomawon taka sa tahaw kan mga banwaan, O Jehova; aawitan taka nin melodiya sa tahaw kan mga nasyon. Huli ta an saimong mamomoton na kabootan dakula sagkod sa kalangitan, asin an saimong kaimbodan sa katotoohan sagkod sa mga langit. Magin dakula ka sa ibabaw kan kalangitan, O Dios; mapasaibabaw kan bilog na daga an saimong kamurawayan.” (Sal. 57:9-11) Nakakaogma nanggad na saboot iyan! Dai daw kamo minaoyon na an siring na nakakapukaw sa boot na mga tataramon hale sa Salmo puedeng magkaigwa nin epekto sa saindong mga pamibi asin makapaoswag sa kualidad kaiyan?
Makimaherak sa Dios na May Hararom na Paggalang
20. Paano ipinahayag ni Maria an saiyang debosyon sa Dios?
20 An hararom na paggalang sa Dios maninigong magin risang-risa sa saindong mga pamibi. An may hararom na paggalang na mga tataramon ni Maria dai nahaloy pagkatapos niang maaraman na sia an magigin ina kan Mesiyas kapareho kan mga tataramon ni Ana kan ipinepresentar nia an aking si Samuel sa paglilingkod sa tabernakulo. An hararom na paggalang ni Maria sa Dios risang-risa sa saiyang mga tataramon: “Ibinabantog kan sakong kalag an kadakulaan ni Jehova, asin dai mapugolan kan sakong espiritu na maggayagaya nin labi-labi sa Dios na sakong Paraligtas.” (Luc. 1:46, 47) Mapapaoswag daw an kualidad kan saindong mga pamibi paagi sa pagpahayag nin kaparehong saboot? Bakong makangangalas na an diosnon na si Maria an pinili na magin ina ni Jesus na Mesiyas!
21. Paano an mga pamibi ni Jesus nagtataong prueba nin hararom na paggalang asin pagtubod?
21 Si Jesus namibi na may hararom na paggalang asin bilog na pagtubod. Halimbawa, bago nia buhayon liwat si Lazaro, “itiningkalag . . . ni Jesus an saiyang mga mata sa langit asin nagsabi: ‘Ama, nagpapasalamat ako sa saimo na dinangog mo ako. Totoo, aram ko na pirme mo akong dinadangog.’” (Juan 11:41, 42) An saindo daw na mga pamibi nagtatao nin prueba nin siring na hararom na paggalang asin pagtubod? Pag-adalan an may hararom na paggalang na modelong pamibi ni Jesus, asin maheheling nindo na an partikularmenteng mahalagang mga kabtang kaiyan iyo an pagpakangbanal sa ngaran ni Jehova, an pagdatong kan saiyang Kahadean, asin an paggibo kan saiyang kabotan. (Mat. 6:9, 10) Pag-isipan an saindo mismong mga pamibi. Ihinahayag daw kaiyan na interesado kamong marhay sa Kahadean ni Jehova, sa paggibo kan saiyang kabotan, asin sa pagpakangbanal sa saiyang banal na ngaran? Maninigo na iyo.
22. Taano ta makakasierto kamo na tatawan kamo ni Jehova nin kosog nin boot na ipahayag an maogmang bareta?
22 Huli sa persekusyon o iba pang pagbalo, sa parate kaiba sa pamibi an mga pakimaherak na logod tabangan kita na maglingkod ki Jehova na may kosog nin boot. Kan si Pedro asin Juan pagbotan kan Sanhedrin na pumondo sa ‘pagtokdo sa ngaran ni Jesus,’ an mga apostol na iyan makosog an boot na nagsayumang pumondo. (Gibo 4:18-20) Pagkatapos sindang butasan, sinabi ninda sa mga kapagtubod kun ano an nangyari. Dangan hinagad kan gabos na presente na logod tabangan sinda nin Dios na itaram nin may pagkapusoan an saiyang tataramon. Siertong nakakapukaw nanggad sa boot kan simbagon an pamibing iyan, huli ta sinda “napano kan banal na espiritu asin nagtaram kan tataramon nin Dios na may pagkapusoan”! (Basahon an Gibo 4:24-31.) Bilang resulta, kadakoldakol an nagin parasamba ki Jehova. An pamibi makakapakosog man sa saindo na pusoan na ipahayag an maogmang bareta.
Padagos na Paoswagon an Kualidad kan Saindong mga Pamibi
23, 24. (a) Magsambit nin iba pang halimbawa na nagpapaheling kun paano an pag-adal sa Biblia makakapaoswag sa kualidad kan saindong mga pamibi. (b) Ano an gigibohon nindo tanganing mapaoswag an kualidad kan saindong mga pamibi?
23 Dakol na iba pang halimbawa an puedeng sambiton tanganing ipaheling na an pagbasa asin pag-adal sa Biblia makakapaoswag sa kualidad kan saindong mga pamibi. Halimbawa, arog ni Jonas, puede nindong midbidon sa pamibi na “an kaligtasan ki Jehova.” (Jon. 2:1-10) Kun kamo napupurisaw huli sa magabat na kasalan asin nagpatabang kamo sa kamagurangan, an mapagngayongayong saboot ni David puedeng makatabang sa saindo na ipahayag an saindong pagsolsol durante nin personal na mga pamibi. (Sal. 51:1-12) Sa nagkapirang pamibi, puede nindong omawon si Jehova arog kan ginibo ni Jeremias. (Jer. 32:16-19) Kun naghahanap kamo nin magigin agom, an pag-adal sa pamibi na yaon sa Esdras kapitulo 9, na kaiba an personal na pakiolay, makakapakosog sa saindong determinasyon na kuyogon an Dios paagi sa ‘pag-agom, basta sa Kagurangnan.’—1 Cor. 7:39; Esd. 9:6, 10-15.
24 Padagos na basahon, pag-adalan, asin siyasaton an Biblia. Maghanap nin mga punto na puede nindong iiba sa saindong mga pamibi. Puede nindong magamit an siring na sono sa Kasuratan na mga punto sa saindong mga pagngayongayo asin pamibi nin pagpasalamat saka pag-omaw. Sierto na orog pa kamong magigin dayupot ki Jehova Dios mantang pinapaoswag nindo an kualidad kan saindong mga pamibi paagi sa pag-adal sa Biblia.
Ano an Isisimbag Nindo?
• Taano ta maninigo niatong hagadon asin sunodon an paggiya nin Dios?
• Ano an maninigong magmotibar sa sato na mamibi na logod tawan kita nin kadonongan?
• Paano an libro nin Salmo makakapaoswag sa kualidad kan satong mga pamibi?
• Taano ta maninigo kitang mamibi na may pagtubod asin hararom na paggalang?
[Ritrato sa pahina 8]
An lingkod ni Abraham namibi na logod giyahan sia nin Dios. Ginigibo daw nindo iyan?
[Ritrato sa pahina 10]
An Pampamilyang Pagsamba makakapaoswag sa kualidad kan saindong mga pamibi