Paano Nindo Mapaooswag an Kuwalidad kan Saindong mga Pamibi?
AN PAMIBI pambihira sa mamomoton na mga probisyon ni Jehova Dios. Puwedeng kompiskaron nin mga paratumang an saindong Biblia o olangon kamo sa pakipagtipon sa mga kapwa parasamba, alagad mayo nin siisay man na makakaagaw sa saindo kan pamibi. An pamibi labi-labi kahalaga. Importante nanggad, kun siring, para sa lambang saro sato na mahalon asin biyong aprobetsaran an pribilehiyong ini. Ano an makatatabang saindo na mapaoswag an kuwalidad kan saindong mga pamibi?
An Biblia bakong libro nin mga pamibi. Pero iyan puwedeng apodon na pinakadakulang librong pag-aadalan sa pamibi nin katawohan. An Hebreong Kasuratan sana igwa nin 150 pamibi. An iba halipot; an iba halawig. Iyan ginibo sa publiko o sa pribado, nin mga hade o nin mga bihag, sa kapangganahan o sa kahorasaan. Siring kan inawit ni David sa Salmo 65:2, “an mga tawo kan gabos na laman” nagdodorolok ki Jehova, an “Paradangog nin pamibi.” Taano ta pinasabngan nin Dios an mga kagsurat kan Biblia na isurat an siring kadakol na koleksion nin mga pamibi?
Tanganing masimbag an hapot na iyan, horophoropa an 2 Timoteo 3:16. Iyan nagsasabi: “An gabos na Kasuratan ipinasabong nin Dios asin kapakipakinabang.” Kaya, yaon an mga pamibi sa Biblia tanganing giyahan kita, arog kan Makakasuratan na hula, mga prinsipyo, asin kasaysayan. Paano kita makikinabang sa mga pamibing ini?
Paagi sa pagsiyasat sa Makakasuratan na mga pamibi, maaaraman niato an mga ipinamibi sa mga situwasyon na kaagid kan sa sato. Manonodan ta kun paano an mga pamibi nagkakalaenlaen sa katuyohan asin kamugtakan. Dugang pa, makanonompong kita nin bagong mga kapahayagan nin pag-omaw asin pagpasalamat asin makakakua nin bagong mga tataramon para sa satong mga kahagadan asin pagngayongayo. Sa halipot, an mga pamibi sa Biblia makatatabang sato na mapaoswag an kuwalidad kan sato mismong mga pamibi.
Si Maria, na nagin ina ni Jesus, sarong tawo na malinaw na nakinabang sa mga pananaram na ginamit sa sarong pamibi na isinurat sa Biblia. Dinalaw nia an saiyang paryenteng si Elizabet pakatapos na an kada saro sa sainda mangidam nin aking lalaki sa tabang nin Dios. Si Maria nagdolot nin pag-omaw asin pagpasalamat sa Dios, asin an nagkapira sa saiyang mga tataramon kaagid nanggad kan mga yaon sa sarong pamibi sa Hebreong Kasuratan. Minalataw na posibleng pamilyar si Maria sa pamibi ni Ana, an ina ni Samuel na propeta. Si Ana nangidam man nin sarong aking lalaki sa tabang nin Dios, labing 1,000 taon na an nakaagi. Posible daw na si Maria naghorophorop sa pamibing ini huli ta nagpabanaag iyan kan saiya mismong mga saboot?—1 Samuel 2:1-10; Lucas 1:46-55.
Kumusta man kamo? May magigirumdoman daw kamong sarong pamibi sa Biblia na sinambit sa irarom nin mga kamugtakan na kaagid kan kamugtakan nindo? An pakanompong, pagbasa, asin paghorophorop sa mga pamibing iyan matabang saindo na mapaoswag an kuwalidad kan saindo mismong pakikikomunikar sa Dios. Sa sunod na artikulo, inaagda niamo kamo na siyasaton an tolong pamibi gikan sa Banal na Kasuratan. An mga iyan ipinamibi sa laen-laen na kamugtakan, tibaad kaagid kan kamugtakan nindo.