Sarong Bagong Buhay Para sa Satong mga Apoon

AN TATARAMON daw nin Dios, an Biblia, nagtotokdo na an gabos natural sanang minabalyo pagkagadan pasiring sa nagpapadagos na buhay sa kinaban nin mga espiritu? Dai, dai iyan nagtotokdo. An Biblia nagtatao nin makangangalas na paglaom sa buhay pagkagadan, alagad bakong siring sa iniisip nin kadaklan.

Konsideraron kun ano an sinasabi kan Biblia manongod sa satong enot na apoon, si Adan. Pinorma sia ni Jehova “hale sa kabokabo kan daga.” (Genesis 2:7) Si Adan nagkaigwang oportunidad na mabuhay sagkod lamang na may kaogmahan sa daga. (Genesis 2:​16, 17) Alagad, nagrebelde sia tumang sa saiyang mamomoton na Kaglalang, asin an resulta kagadanan.

Saen nagduman si Adan kan sia magadan? An Dios nagsabi saiya: “Ika [mabalik] sa daga, huli ta dian ka kinua. Huli ta ika kabokabo asin sa kabokabo ka man mabalik.”​—Genesis 3:19.

Saen si Adan bago sia lalangon ni Jehova hale sa kabokabo? Mayo. Dai sia nag-eeksister. Kaya kan sinabi ni Jehova na si Adan ‘mabalik sa daga,’ boot sana niang sabihon na si Adan magigin daing buhay giraray, arog nin kabokabo. Si Adan dai ‘nag-ibong’ tanganing magin kagpundar na ama kan sarong kinaban nin mga espiritung apoon. Dai sia nagbalyo paduman sa sarong buhay nin kompletong kaogmahan sa langit ni paduman sa daing sagkod na kasakitan sa sarong lugar na pasakitan. An solamenteng pagliwat na ginibo nia iyo an pagigin may buhay pasiring sa mayo nang buhay, hale sa kamugtakan nin pag-eksister pasiring sa dai na pag-eksister.

Kumusta man an iba pa sa katawohan? An mga naggikan daw ki Adan minapondo man sa pag-eksister kun nagagadan? Minasimbag an Biblia: “An gabos [kapwa mga tawo asin hayop] pasiring sa sarong lugar. Sinda gabos gikan sa kabokabo, asin sinda gabos mabalik sa kabokabo.”​—Eclesiastes 3:​19, 20.

An Kamugtakan kan mga Gadan

Iyo, an mga gadan mayong buhay, dai nakadadangog, nakaheheling, nakatataram, o nakaiisip. Halimbawa, an Biblia nagsasabi: “An mga buhay nakakaaram na sinda magagadan; alagad kun dapit sa mga gadan, mayo man lamang sinda nin pakaaram . . . An saindang pagkamoot asin an saindang pagkaongis patin an saindang pangimon nawara na.” An Biblia nagsasabi man: “Mayo nin gibohon ni pagplano ni kaaraman ni kadonongan sa Sheol [an lolobngan], an lugar na saimong padudumanan.”​—Eclesiastes 9:​5, 6, 10.

Kaya, oyon sa Tataramon nin Dios, mantang nabubuhay an mga tawo, nakamamangno sinda sa kagadanan. Alagad, kun sinda magadan, mayo na sindang pagmangno. Dai sinda minatindog sa kataed kan saindang sadiring bangkay, na tinatanaw kun ano an ginigibo dian. Sa pagkadai nag-eeksister mayo nang kaogmahan ni kolog, mayo nang kagayagayahan ni kamondoan. An mga gadan dai nakamamangno sa pag-agi nin panahon. Yaon sinda sa sarong kamugtakan nin kadaihan nin pagkaisi na mas hararom kisa arin man na torog.

Si Job, na sarong lingkod nin Dios kan suanoy, nakaaram na an mga tawo dai nagpapadagos na mabuhay pagkagadan. Nasabotan man nia na kun dai makilabot an Dios, mayo nang paglaom na mabuhay giraray. Si Job nagsabi: “An makosog na tawo nagagadan asin minahigdang daog; asin an tawo nagagadan, asin saen na sia? [Sia] kaipuhan na humigda asin dai minabuhat.” (Job 14:​10, 12) Siertong dai naglaom si Job na kun sia magadan makakairibahan nia an saiyang mga apoon sa sarong kinaban nin mga espiritu.

An Paglaom sa Pagkabuhay Liwat

Huli ta an mga buhay minapondo sa pag-eksister kun gadan na, an kritikal na hapot iyo an pinalataw ni Job kan maghapot sia: “Kun an makosog na tawo magadan puwede pa daw siang mabuhay giraray?” Si Job mismo an nagsimbag kaini: “Sa gabos na aldaw kan sakong obligadong paglilingkod [panahon na nasa lolobngan] ako maghahalat, sagkod na umabot an sakuyang pagkakalda. Ika [Jehova] maapod, asin ako mismo masimbag sa saimo. Para sa ginibo kan saimong mga kamot ika magkakaigwa nin pagkapungaw.”​—Job 14:​14, 15.

Sa ibang tataramon, minsan si Job magbalyo pasiring sa dai pag-eksister, dai sia lilingawan nin Dios. Si Job may pagtubod na maabot an panahon na si Jehova Dios “maapod” saiya pabalik sa buhay paagi sa pagkabuhay liwat.

Si Jesu-Cristo, an Aki nin Dios, nagpaheling na an paglaom ni Job sa pagkabuhay liwat realistiko. Pinatunayan ni Jesus na an mga gadan puwedeng buhayon. Paano? Paagi sa paggibo nia kaiyan! Mayo sia duman tanganing buhayon liwat si Job, alagad mantang yaon sa daga binuhay ni Jesus an aking lalaki nin sarong balo na tagasiudad nin Nain. Binuhay man ni Jesus an 12 anyos na aking babae nin sarong lalaking nagngangaran Jairo. Asin binuhay liwat nia an saiyang amigong si Lazaro, na gadan na sa laog nin apat na aldaw.​—Lucas 7:​11-15; 8:​41, 42, 49-56; Juan 11:​38-44.

Apuwera sa paggibo kan mga milagrong ini, si Jesus nagsaysay man manongod sa sarong dakulang pagbuhay liwat sa ngapit. Sia nagsabi: “An oras maabot na an gabos na nasa lolobngan nin girumdoman makadadangog kan saiyang tingog asin maruluwas.” (Juan 5:​28, 29) Kan huri, si apostol Pablo, na ginamit ni Jehova sa pagbuhay liwat sa sarong lalaking barobata, nagpahayag man nin pagtubod sa sarong pagbuhay liwat sa ngapit. Sia nagsabi: “May paglaom ako sa Dios . . . na magkakaigwa nin pagkabuhay liwat an mga matanos asin an mga bakong matanos.”​—Gibo 20:​7-12; 24:15.

An mga pagsambit na ini sa Kasuratan mapadapit sa pagbuhay liwat sa ngapit dai napapanongod sa buhay sa kinaban nin mga espiritu. Minatokdo sinda sa panahon kun noarin an minilyon na gadan mabubuhay na may pisikal na hawak digdi mismo sa daga. An mga binuhay liwat na ini dai magigin mga tawong nakalingaw na dapit sa dati nindang buhay sa daga. Dai sinda ipangangaki giraray bilang mga omboy. Imbes, sinda magigin pareho man sanang persona kan sinda nagadan, na igwa kan pareho man sanang memorya asin personalidad. Mamimidbid ninda an saindang sadiri asin siring man kan iba. Abaang kagayagayahan kun an mga tawong ini makairibahan giraray kan saindang mga amigo asin pamilya! Asin abaang pagkagalaga nanggad na mabisto niato an satong mga apoon!

Pagkabuhay Liwat Pasiring sa Buhay sa Langit

Bako daw na si Jesus nagsabi na an iba maduman sa langit? Iyo, nagsabi sia. Kan banggi bago sia gadanon, sia nagsabi: “Sa harong kan sakong Ama kadakol kan ontokan. . . . Ako maduman tanganing mag-andam nin lugar para sa saindo. Siring man, kun ako maduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.” (Juan 14:​2, 3) Si Jesus nakikipag-olay sa saiyang maimbod na mga apostol, alagad an mga tataramon nia dai nangangahulogan na an gabos na marahay na tawo maduman sa langit.

Ipinaheling ni Jesus na an mga bubuhayon liwat pasiring sa langit kaipuhan na makaabot sa iba pang mga kahagadan apuwera sa pagkaigwa nin marahay na pamumuhay. An sarong kahagadan iyo an magkaigwa nin tamang kaaraman dapit ki Jehova asin sa saiyang mga katuyohan. (Juan 17:3) Mga kahagadan man na magsagibo nin pagtubod sa atang na pantubos ni Jesu-Cristo asin magsunod sa Dios. (Juan 3:16; 1 Juan 5:3) Kahagadan pa man na “mamundag giraray” bilang sarong bautisadong Kristiano na pinaniaki kan banal na espiritu nin Dios. (Juan 1:​12, 13; 3:​3-6) An saro pang kahagadan para sa langitnon na buhay iyo an pakatagal siring kan ginibo ni Jesus, na magmaimbod sa Dios minsan sagkod sa kagadanan.​—Lucas 22:29; Kapahayagan 2:10.

May rason an siring kaharalangkaw na kahagadan. An mga bubuhayon liwat pasiring sa langit igwang importanteng trabahong gigibohon. Naaaraman ni Jehova na dai kaya nin mga gobyerno nin tawo na makapamahala nin mapanggana sa daga. Kaya inareglo nia an sarong langitnon na gobyerno, o Kahadean, na mamomoon sa katawohan. (Mateo 6:​9, 10) Si Jesus an magigin Hade kan Kahadean na iyan. (Daniel 7:​13, 14) An nagkapirang pinili hale sa daga asin bubuhayon liwat pasiring sa langit mamomoon kaiba nia. An Biblia naghula na an mga binuhay liwat na ini magigin sarong “kahadean asin mga saserdote kan satuyang Dios, asin sinda magsasakop bilang hade sa daga.”​—Kapahayagan 5:10.

Maaabot daw nin dakulang kabilangan nin mga tawo an mga kahagadan para sa langitnon na pagkabuhay liwat? Dai. Minsan bako man nindang sala, dakol kaidtong mga natotorog sa kagadanan an dai minakuwalipikar. Dakol an nagkaigwa nin kadikit sana o mayo ngani nin oportunidad na makaaram kan katotoohan manongod ki Jehova asin sa saiyang mga katuyohan. Nabuhay sinda asin nagadan na mayong kaaraman manongod ki Jesu-Cristo o sa Kahadean nin Dios.

Inapod ni Jesus an mga maduman sa langit na “sadangoton na aripompon.” (Lucas 12:32) Kan huri ipinahayag na an mga “binakal hale sa daga” na maghahade kaiba ni Cristo sa langit may bilang na 144,000. (Kapahayagan 14:​1-3; 20:6) Minsan ngani an 144,000 dakulang bilang na para sa mga mag-ookupar sa ‘kadakol na ontokan’ na sinambit ni Jesus, kadikit ini kun ikokomparar sa binilyon na tawong naggikan ki Adan.​—Juan 14:2.

Mga Mangyayari Bago an Daganon na Pagbuhay Liwat

Repasohon ta an mga napag-olayan na niato. Oyon sa Biblia, an mga gadan mayo nang buhay sa kagadanan sagkod na sinda buhayon liwat ni Jehova Dios. An iba bubuhayon liwat pasiring sa langit, kun saen sinda maghahade kaiba ni Jesu-Cristo sa gobyerno kan Kahadean. An kadaklan na tawo bubuhayon liwat sa daga, tanganing magin mga sakop kan Kahadean na iyan.

Sa sarong kabtang paagi sa daganon na pagbuhay liwat, ootobon ni Jehova an saiyang katuyohan sa daga. Linalang iyan ni Jehova “tanganing pag-istaran.” (Isaias 45:18) Iyan an magigin permanenteng istaran nin katawohan. Kaya, an salmista nag-awit: “Kun manongod sa kalangitan, an kalangitan rogaring ni Jehova, alagad an daga itinao nia sa mga aki nin mga tawo.”​—Salmo 115:16.

Bago ponan an pagbuhay liwat sa daga, kaipuhan na magkaigwa nin dakulang mga pagbabago. Posibleng maoyon kamo na bakong katuyohan nin Dios na an daga mapano nin ralaban, polusyon, krimen, asin kadahasan. An mga problemang ini dahelan sa mga tawong mayong respeto sa Dios asin sa saiyang matanos na mga pagboot. Kaya, an Kahadean nin Dios ‘lalaglagon an mga naglalaglag kan daga’​—sarong mayor na tangga sa pag-otob sa saiyang kabotan digdi sa daga. (Kapahayagan 11:18) Popohoon kan Kahadean an gabos na maraot na tawo, na iwawalat an mga matanos tanganing mag-istar sa daga sagkod lamang.​—Salmo 37:​9, 29.

Paraiso sa Daga

An mga bubuhayon liwat sa lininig na daga mahoyo, mapag-ataman na mga tawo na naggigibo kan tama. (Ikomparar an Mateo 5:5.) Sa irarom kan mamomoton na pangangataman kan Kahadean nin Dios, sinda mabubuhay nin maogma sa seguridad. An Biblia nagtatao kaining makangangalas na patanaw kan mga mangyayaring kamugtakan: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:4.

Iyo, an daga liliwaton na magin paraiso. (Lucas 23:43) Isip-isipa kun ano an magigin kahulogan kaiyan! An mga ospital asin klinika sa pag-ataman sa mga gurang asin may helang malalaos na. Sa Paraiso, an mga nasasakitan ngonyan huli sa epekto nin kagurangan magigin makosog asin mabagsik giraray an salud. (Job 33:25; Isaias 35:​5, 6) Mawawara na an mga punerarya, sementeryo, asin mga pantson. Paagi sa saiyang Kahadean, “hahalonon [ni Jehova] an kagadanan sagkod lamang.” (Isaias 25:8) An siring na mga bendisyon siertong mangangahulogan nin bagong buhay para sa sato asin sa satong mga apoon.

[Retrato sa pahina 7]

An mga bubuhayon liwat sa daga magigin mga sakop kan Kahadean