Pasensia—Taano ta Bihirang Marhay?

LABI nang 60 an edad ni Emilio.a Nagduman sia sa Oahu para sa mamondong misyon​—tanganing ilobong an saiyang adultong aking lalaki. Mantang naglalakaw sa matoninong na kalye sa gilid nin bolod asin nakikipag-olay sa nagkapira niang amigo, nakubhanan si Emilio nin kotseng kaskas na nag-aatras hale sa sarong agihan. Dikit pa siang mabangga kan kotse, asin huli sa kaanggotan asin kadaihan nin pasensia, kinurahawan ni Emilio an drayber asin tinapak nia kan saiyang kamot an kotse. Suminunod an diskutiran. Minalataw na itinulod kan drayber si Emilio, na natumba asin nakapangko an payo sa konkretong dalan. Pakalihis nin pirang aldaw, nagadan si Emilio huli kan tama nia sa payo. Abaa kamakamomondong resulta!

Kita nabubuhay sa kinaban na kun saen an pasensia bihirang kualidad. Padakol nang padakol na mga drayber nin auto an nagpapadalagan nin marikason. An iba nagtututok sa hurihan​—haranihon na nagsusunod—​nin mga awtong nasa itinalaan na rikas. Yaon pa dian an iba na nagpapaikis-ikis hale sa sarong linya pasiring sa ibong huli ta dai makatios na yaon sa hurihan nin ibang sakayan. Sa harong, an mga miembro kan pamilya puedeng pabuelohon an kaanggotan asin magin madahas. Minsan an nagkapirang Kristiano puedeng mag-aburido nin labi-labi huli sa mga pagkukulang o pagkakasala kan saindang espirituwal na mga tugang.

Taano ta bihirang marhay an pasensia? Talaga daw na arog na iyan kaiyan? Taano ta masakiton na magin mapasensia sa panahon ta ngonyan?

Mga Halimbawa nin Kadaihan nin Pasensia

An Biblia nagsasaysay manongod sa sarong babae na dai naghalat na konsultahon an saiyang agom bago maggibo nin kritikal na desisyon. Eva an ngaran nia. Nangengenotan ki Adan, puedeng sa sarong kabtang huli sa kadaihan nin pasensia, nagkakan sia kan ipinangangalad na prutas. (Genesis 3:​1-6) Kumusta man an saiyang agom na lalaki? Sia puedeng nagpaheling man nin kadaihan nin pasensia paagi sa pagsunod ki Eva sa pagkakasala na dai nguna nagdolok sa saiyang langitnon na Ama, si Jehova, para humagad nin tabang o direksion. An saindang kapasloan, na posibleng kaiba nin kadaihan nin pasensia na naggiya sainda sa kasalan, nagkaigwang nakagagadan na mga resulta sa sato gabos. Hale sa sainda naresibi man niato bilang minana an tendensiang makakomitir nin mga kasalan, kabale na an arogansia asin kadaihan nin pasensia.​—Roma 5:12.

Mga 2,500 na taon pakalihis kan pagkakasala kan enot niatong mga magurang, an piniling banwaan nin Dios, an mga Israelita, nagpaheling nin hararom, nagdadanay na kakulangan nin pagtubod, asin kakulangan nin pasensia. Minsan ngani sa milagrosong paagi ilinigtas pa sana sinda ni Jehova hale sa kaoripnan sa Egipto, madali nindang “nalingawan an saiyang mga gibo” asin “dai ninda hinalat an saiyang hatol.” (Salmo 106:​7-14) Paorootro na naholog sinda sa seryosong pagkakasala huli ta habo nindang magpasensia. Naggibo sinda nin bulawan na baka asin sinamba iyan; naggurumodgumod sinda manongod sa materyal na probisyon na mana para sa sainda ni Jehova; asin dakol sa sainda an nagrebelde pa ngani tumang sa may banal na pagnombrang representante ni Jehova, si Moises. Tunay nanggad, an saindang kakulangan nin pasensia naggiya sa sainda sa kamondoan asin grabeng kapahamakan.

An enot na tawong hade sa Israel, si Saul, nawaran kan oportunidad na an saiyang mga aking lalaki an magin mga kasalihid nia sa paghade. Taano? Huli ta dai sia nakahalat ki propeta Samuel, na iyo kutana an dapat na mag-atang ki Jehova. An pagkatakot sa tawo nagcausa ki Saul na enotan si Samuel sa pagdolot kan atang. Imahinaron kun ano an namatean nia kan uminabot si Samuel pakatapos sana ni Saul kan seremonya! Kun sia nakahalat sana kutana nin pirang minuto pa!​—1 Samuel 13:​6-14.

Kun nakahalat sana kutana si Eva ki Adan imbes na daing pagmamaan na ginuno an prutas! Kun nagirumdoman sana kutana kan mga Israelita na halaton an hatol ni Jehova! Iyo, an pasensia tibaad nakatabang kutana sa sainda na ikaligtas an sadiri asin kita hale sa grabeng kamondoan asin kolog.

Mga Causa kan Kadaihan nin Pasensia

Tinatabangan kita kan Biblia na masabotan an sarong pangenot na causa kan kadaihan nin pasensia ngonyan. An 2 Timoteo kapitulo 3 naglaladawan kan satong henerasyon bilang nabubuhay sa “delikadong mga panahon na masakit pakibagayan.” Sinasabi kaiyan na an mga tawo “magigin mamomoton sa sainda man sana, mamomoton sa pirak, maabhaw, mapalangkaw . . . mayong pagpopogol sa sadiri, maringis, mayong pagkamoot sa karahayan.” (Bersikulo 2, 3) An siring na paslo asin makisadiring ugale yaon sa puso asin isip nin dakol na tawo, na ginigibong masakit para sa gabos, minsan tunay na mga Kristiano, na magin mapasensia. Kun naheheling niato an mga tawong kinabanon na sobra karikas magpadalagan o nampuputol nin linya nin iba o pinapatamaan kita nin mga insulto, nababalo nanggad an satong pasensia. Puede kitang masugotan na arogon sinda o labanan sinda, sa siring nakikipantay sa saindang paslong kapalangkawan.

Kun minsan an satong sadiring napasalang konklusyon an minacausa na mawaran kita nin pasensia. Riparohon kun paanong ilinadawan kan madonong na si Hadeng Salomon an koneksion nin pabiglabigla, may depektong pangangatanosan asin nin daing pasensia, anggot na ugale: “Mas marahay an sarong mapasensia kisa sa saro na maabhaw sa espiritu. Dai ka maghidale sa saimong espiritu sa pagkaanggot, huli ta an pagkaanggot nag-eerok sa daghan kan mga kablas.” (Eclesiastes 7:​8, 9) Kun halaton niatong makua an kompleto, tamang ladawan nin sarong situwasyon bago kita magresponde, bakong harayo na kita magin mas mapagsabot, mas madinamay, mas mapasensia sa iba. Sa ibong na lado, an maabhaw, makisadiring espiritu puedeng magcausa na kita magin hayakpit an isip, daing pasensia, asin mapait an boot, arog kan naggumodgumod, matagas an liog na mga Israelita na nagpasakit ki Moises.​—Bilang 20:​2-5, 10.

An saro pang causa kan nag-oorog na kakulangan nin pasensia kan kinaban na ini iyo an daing paglaom na kamugtakan kaiyan, na resulta kan pagrayo nin boot ki Jehova. Ipinahayag ni David an pangangaipo kan tawo na maglaom ki Jehova: “Sa Dios maghalat nanggad na daing girong, O kalag ko, huli ta sa saiya hale an sakong paglaom.” (Salmo 62:5) An dakol na tawo na dai nakakamidbid ki Jehova igwang limitado, daing linalaoman na marahay na pananaw, kaya kinukua ninda an lambang kasingawan asin pakinabang na makukua ninda bago sinda mawara. Kapareho kan saindang espirituwal na ama, si Satanas na Diablo, sa parate mayo sinda nin labot kun paanong an saindang mga hiro makakakolog sa iba.​—Juan 8:44; 1 Juan 5:19.

Bako nanggad na makangangalas na an pasensia bihirang marhay ngonyan. An maraot, paslong sistemang ini nin mga bagay, an dios kaiyan na si Satanas, asin an makasalan na mga tendensia kan satong makasalan na laman ginigibong masakit para sa gabos, minsan an mga sinsero, na magin mapasensia. Alagad, an Biblia sinasadol kita na “magin mapasensia,” partikularmente manongod sa realisasyon kan mga katuyohan nin Dios. (Santiago 5:8) Taano ta mahalagang marhay an pasensia? Anong mga balos an puedeng darahon kaiyan sa sato?

Pasensia​—Kun Taano ta Mahalagang Marhay

“Naglilingkod man sinda na nagtitindog asin naghahalat.” An mga tataramon na iyan sinabi kan Ingles na poetang si John Milton labi nang tolong gatos na taon an nakaagi sa saiyang sonetong “Sa Saiyang Pagkabuta.” Sa enotan kan saiyang berso, ipinahayag nia an saiyang pagkadisganar asin kapurisawan manongod sa saiyang namamatean na dai makaserbi sa Dios nin suelto huli ta sia nabuta na pag-edad nia nin 40. Alagad siring sa ipinaheheling kan ultimong linya kan berso na kinotar sa itaas, narealisar nia na an saro puedeng sumamba sa Dios paagi sa mapasensiang pagtagal sa kahorasaan asin kalmadong paghanap nin bukas na mga oportunidad na makapaglingkod. Naheling ni Milton an halaga kan mapasensiang pagsarig sa Dios.

An kadaklan sa sato puedeng marahay an pagheling, alagad kita gabos may mga limitasyon na puedeng magcausa na kita maanggot o mahadit. Paano kita magkakaigwa asin makagigibo nin pagpapasensia?

Nakapakokosog na mga Halimbawa

An Biblia nagtatao sato nin nagkapirang marahay na halimbawa nin pasensia. An pasensia ni Jehova ginigibong posible an buhay na daing katapusan para sa milyon-milyon na tawo. (2 Pedro 3:​9, 15) Sa saiyang maboot na imbitasyon na pasanon niato an saiyang sakal asin “makakakua [kita] nin kaginhawahan sa [satong] kalag,” sangkap na ipinaheling ni Jesus an makangangalas na pasensia kan saiyang Ama. (Mateo 11:​28-30) An paghorophorop sa mga halimbawa ni Jehova asin Jesus puedeng makatabang sa sato na magin mas mapasensia.

An saro na garo may bastanteng rason na maanggot, magin mapait an boot, o magin benggatibo iyo an aki ni Jacob na si Jose. Sia daing katanosan nanggad na trinato kan saiyang mga tugang, na nagpapakana sa paggadan sa saiya asin sa katapustapusi nagpabakal saiya sa kaoripnan. Sa Egipto, sa ibong kan saiyang sadiosan, maimbod na serbisyo ki Potifar, si Jose bakong makatanosan na inakusar asin ibinilanggo. Mapasensia niang tinagalan an gabos niang kahorasaan, puedeser huli sa pakasabot na an siring na mga pagbalo puedeng kasangkapanon sa mga katuyohan ni Jehova. (Genesis 45:5) Huli ta kinultibar nia an pagtubod asin paglaom ki Jehova kadungan an kapakumbabaan asin pakasabot, kinaya ni Jose na magin mapasensia minsan sa masakiton na mga kamugtakan.

An saro pang importanteng tabang iyo an banal na espiritu ni Jehova. Kun, halimbawa, madali kitang maanggot asin may mapagtuyang dila, puede kitang mamibi para sa tabang kan banal na espiritu tanganing makultibar ta an bunga kaiyan. An paghorophorop sa kada bunga kaiyan, siring baga kan pakatios asin pagpopogol sa sadiri, matabang sato na maheling kun gurano kararom kan relasyon kaiyan sa pasensia.​—Galacia 5:​22, 23.

An mga Balos sa Pasensia

An pagigin mapasensia puedeng magdara satuya nin dakol na pakinabang. Pinakokosog kaiyan an satong karakter asin pinoprotehiran kita tumang sa paggibo nin pabiglabigla, mangmang na mga gibo. Siisay sa sato an dai nakaginibo nin nakakokolog na mga sala huli sa pagigin marikas tang humiro sa masakit o nagtatao nin tension na mga kamugtakan? Puedeng daing kabootan kitang nakataram o naggawe kita sa daing modong paagi. Tibaad pinabayaan niato an mayong halagang pangyayari na dumakula pasiring sa grabeng pakipagtagasan ta sa sarong mahal sa buhay. Pakatapos nin sobrang kaanggotan, pagkasudya kan mawot, asin kakologan, tibaad may pagbasol tang napag-isip-isip, ‘Kun naghalat sana kutana ako nin kadikit.’ An pagigin mapasensia puedeng protehiran kita sa gabos na klase nin kamondoan. An katunayan sanang iyan nagtatao na sa satong buhay nin orog nanggad na katoninongan, estabilidad, asin pagkakontento.​—Filipos 4:​5-7.

An pagigin pasensioso puedeng tumabang man sato na magkaigwa nin kalmado, nananarig na puso. Ini puedeng gumiya pasiring sa pagkamit niato nin mas marahay na pisikal, emosyonal, asin espirituwal na salud. (Talinhaga 14:30) Kun dai kontrolon, an naglalaad na kaanggotan puedeng magcausa nin grabeng emosyonal asin pisikal na helang asin nin kagadanan. Sa ibong na kampi, paagi sa pagigin pasensioso puede kitang magkaigwa nin mas positibong kaisipan manongod sa iba, nangorogna sa satuyang espirituwal na mga tugang asin mga miembro kan pamilya. Sa siring maorog an tendensia niatong magin makonsiderasyon asin matinabang imbes na iritable asin matinuyaw. Huli kaini, magigin pasil asin magayagaya para sa iba na pakiibanan kita.

An kamagurangan sa Kristianong kongregasyon espesyalmenteng nangangaipo na magin mapasensia. Kun beses, igwang mga kapwa Kristianong minadolok sa sainda na may darang seryosong mga problema. An mga sinserong ini tibaad nariribong, aburido, o grabe an kamondoan, mantang an kamagurangan mismo tibaad pagal o nariribaraw man sa sadiring personal o pampamilyang mga problema. Alagad, kinakaipuhan na gayo na an kamagurangan magin mapasensia sa siring na masakit na mga kamugtakan! Sa paaging ini sinda makatotokdo “na may kahoyoan” asin “magigin maboot sa aripompon.” (2 Timoteo 2:​24, 25; Gibo 20:​28, 29) Mga buhay na mahalaga an nakataya. Bendisyon nanggad sa kongregasyon an maboot, mamomoton, asin mapasensiang kamagurangan!

An mga payo nin pamilya maninigong trataron na may pasensia, pakasabot, asin kabootan an saindang pamilya. Maninigong laoman asin pakosogon man ninda an gabos na miembro kan pamilya na ipaheling an parehong mga kualidad. (Mateo 7:12) Ini makontribwir nin dakula sa pagkamoot asin katoninongan kan harong.

An pagpasensia mantang nakikiiba sa ministeryo sa langtad matabang sa Kristianong mga ministro na magin mas lubos an kaogmahan sa paglilingkod na ini. Orog na matatagalan ninda an ano man na pagkaindiperente asin pagkontra na manonompongan. Imbes na makidiskutiran sa anggot na mga kagharong, an mapasensiang mga ministro makatatao nin mahoyong simbag o toninong na maghale, sa siring an katoninongan asin kagayagayahan nareretener. (Mateo 10:​12, 13) Dagdag pa, kun trinatratar nin mga Kristiano na may pasensia asin kabootan an gabos, an mga arog-karnero mapararani sa mensahe kan Kahadean. Binendisyonan ni Jehova an mapasensiang pagmamaigot sa pambilog na kinaban na sokol, mantang ginatos na ribong mahoyong parahanap nin katotoohan an nagraralaog sa mamomoton na kongregasyon ni Jehova taon-taon.

Sa katotoohan, an pagigin mapasensia madara sato nin marahay na mga balos. Malilikayan niato an dakol na aksidente asin problema na causa nin daing pagpopogol na mga hiro o nin dilang pabiglabiglang magtaram. Kita magigin mas maogma, mas kalmado, asin posibleng mas mabaskog an salud. Maeeksperyensiahan niato an mas dakulang kagayagayahan asin katoninongan sa satong ministeryo, sa kongregasyon, asin sa harong. Alagad orog sa gabos, makakamtan niato an mas haraning relasyon sa Dios. Kaya maghalat ki Jehova. Magpasensia!

[Nota sa Ibaba]

[Mga retrato sa pahina 10]

Gurano kamo kapasensioso sa pan-aroaldaw na buhay?