Magkairibang Nag-eerok sa Sarong Ibinalik na “Daga”

“Kun dapit sa saindo, aapodon kamong mga saserdote ni Jehova; sasabihon kamong mga ministro kan satong Dios.”​—ISAIAS 61:6.

1, 2. (a) Ano an kamugtakan kan mga proselito sa Israel? (b) Anong espiritu an ipinaheheling sa modernong mga panahon kan mga miembro kan “dakulang kadaklan”?

KAN suanoy na mga panahon, an Israel kan maimbod pa nagserbing saksi sa kinaban para sa kamurawayan ni Jehova. (Isaias 41:​8, 9; 43:​10) Dakol na tagaibang daga an naghimate asin nagdatong tanganing sumamba ki Jehova sa kaibahan kan Saiyang piniling banwaan. Garo man sana sinabi ninda sa Israel an sinabi ni Rut ki Noemi: “An saimong banwaan magigin sakong banwaan, asin an saimong Dios sakong Dios.” (Rut 1:16) Sinunod ninda an mga kondisyon kan tipan nin Pagboot, na an mga lalaki nagpaturi. (Exodo 12:​43-48) An ibang babae naagom nin mga Israelita. Si Rahab na taga-Jerico asin si Rut na Moabita nagin mga apoon na babae ni Jesu-Cristo. (Mateo 1:5) An siring na mga proselito kabtang kan kongregasyon nin Israel.​—Deuteronomio 23:​7, 8.

² Kaagid kan mga proselito sa Israel, an “dakulang kadaklan” ngonyan nagsasabi sa linahidan na natatada: “Maiba kami sa saindo, huli ta nabaretaan niamo na an Dios yaon dian sa saindo.” (Kapahayagan 7:9; Zacarias 8:23) Minimidbid ninda na an linahidan na mga Kristianong ini iyo an “maimbod asin madonong na oripon” ni Jehova, asin sinda nakikipagtabangan na marhay sa sainda kaya an mga linahidan asin an “ibang karnero” “sarong aripompon, sarong pastor.” (Mateo 24:​45-47; Juan 10:16) Ano an mangyayari sa dakulang kadaklan kun an gabos na linahidan na tugang ninda mag-ako na kan saindang langitnon na balos? Dai sinda dapat na matakot. Durante kaining “huring mga aldaw,” si Jehova nag-aandam para sa panahon na iyan.​—2 Timoteo 3:1.

Sarong Espirituwal na “Daga”

3. Ano an “bagong kalangitan” na ihinula ni Pedro, asin kasuarin iyan tinindog?

³ Ihinula ni apostol Pedro an langitnon na areglo sa pamamahala na magigin kabtang dian an 144,000 na linahidan na Kristiano. Sia nagsabi: “Igwa nin bagong kalangitan asin sarong bagong daga na satong hinahalat oyon sa saiyang panuga, asin dian an katanosan an magdadanay.” (2 Pedro 3:13) An “bagong kalangitan” na ini tinindog kan 1914, kan si Cristo patukawon bilang Hade sa langitnon na Kahadean. Alagad kumusta man an “bagong daga”?

4. (a) Ano an dai linalaoman na pangyayari kan 1919? (b) Ano an ‘nasyon na namundag sa sarong panahon,’ asin ano an ‘daga na ipinangaki na may mga kolog sa pangangaki’?

⁴ Kan 1919, pinaluwas ni Jehova sa pagkabilanggo sa Dakulang Babilonya an linahidan na natatada. (Kapahayagan 18:4) Para sa mga namomoon sa Kakristianohan, an dramatikong pangyayaring ini biyong dai linalaoman. Mapadapit kaiyan, an Biblia nagsasabi: “Siisay an nakadangog nin siring na bagay? Siisay an nakaheling nin siring na bagay? Ikakapangaki daw na may mga kolog sa pangangaki an sarong daga sa laog nin sarong aldaw? O mamumundag daw an sarong nasyon sa saro sanang panahon?” (Isaias 66:8) Kan an linahidan na kongregasyon biglang lumataw sa atubangan nin mga nasyon bilang nakatalingkas na banwaan, iyan tunay nanggad na sarong nasyon na ‘namundag sa saro sanang panahon.’ Pero, ano daw an “daga”? Sa sarong sentido, iyan sarong espirituwal na katimbang kan daga nin suanoy na Israel. Iyan an rona nin aktibidad na itinao sa bagong mamundag na “nasyon,” sarong lugar kun saen an mga hula sa libro nin Isaias dapit sa Paraiso igwa nin moderno, espirituwal na kaotoban. (Isaias 32:​16-20; 35:​1-7; ikomparar an Hebreo 12:​12-14.) Saen man sa pisikal an sarong Kristiano, yaon sia sa “dagang” iyan.

5. Anong sentro an nag-eksister kan 1919? Ipaliwanag.

⁵ Ano an koneksion kaini sa “bagong daga” na ihinula ni Pedro? Bueno, an bagong “nasyon” na iyan, na namundag kan 1919 sa sarong ibinalik na “daga,” maoswag na magin pankinaban na organisasyon na binibilog nin linahidan asin bakong linahidan na mga paraomaw ki Jehova. An organisasyon na ini makaliligtas sa Armagedon pasiring sa bagong kinaban nin Dios. Sa paaging ini an nasyon na iyan puedeng ibilang na sentro kan matanos na sosyedad nin tawo, an bagong daga, na maeksister pakalaglaga kan kinaban ni Satanas.a Sa katahawan kan mga taon nin 1930, an mga linahidan, bilang sarong grupo, natipon na sa ibinalik na daga. Poon kaidto, tinawan nin pagdodoon an pagtipon sa dakulang kadaklan nin ibang karnero, na ngonyan may kabilangan na haros limang milyon. (Kapahayagan 14:​15, 16) Sobra na daw an populasyon kan “daga”? Bako, an mga linderos kaiyan puedeng pahiwason sagkod na kaipuhan. (Isaias 26:15) Tunay nanggad, nakaoogmang maheling na nagdadakol an populasyon kaiyan mantang an linahidan na natatada pinapano nin “bunga” an “daga”​—masustansia, nakapakokosog na espirituwal na kakanon. (Isaias 27:6) Alagad ano an kamugtakan kan ibang karnerong ini sa ibinalik na “daga” kan banwaan nin Dios?

Mga Tagaibang Daga na Aktibo sa “Daga”

6. Paano nagin aktibo sa “daga” kan banwaan nin Dios an mga tagaibang daga?

⁶ Kun paanong an mga proselito sa daga nin Israel nagsunod sa Mosaikong Pagboot, an dakulang kadaklan ngonyan sa ibinalik na “daga” nagkukuyog man sa mga togon ni Jehova. Tinotokdoan kan saindang linahidan na mga tugang, sinda naglilikay sa gabos na porma nin falsong pagsamba asin nag-ootob sa kabanalan nin dugo. (Gibo 15:​19, 20; Galacia 5:​19, 20; Colosas 3:5) Namomotan ninda si Jehova sa saindang bilog na puso, isip, kalag, asin kosog saka namomotan ninda an saindang mga kataed siring sa sainda man sana. (Mateo 22:37; Santiago 2:8) Sa suanoy na Israel an mga proselito nagtabang sa pagtogdok kan templo ni Salomon asin nagsuportar sa mga pagbalik kan tunay na pagsamba. (1 Cronica 22:2; 2 Cronica 15:​8-14; 30:25) Ngonyan, an dakulang kadaklan nakikikabtang man sa mga proyekto nin pagtotogdok. Halimbawa, sinda nagtatabang sa pagporma nin mga kongregasyon asin sirkito, dai na baga sambiton an ginigibong mga proyekto sa materyal na konstruksion, arog baga nin mga Kingdom Hall, Assembly Hall, asin mga pasilidad sa sanga.

7. Ano an nangyari sa Jerusalem pakatapos kan pagkadistiero kan kulang an mga Levita sa paggibo kan mga paglilingkod sa templo?

⁷ Kan 537 B.C.E., kan an Israel bumalik hale sa pagkadistiero sa Babilonya, pinonan nindang organisaron an paglilingkod sa lugar kan templo. Minsan siring, bakong gayong dakol an mga Levitang nagbalik. Huli kaini, an mga Netineo​—tinuring mga nakikihimanwa na dating katabang kan mga Levita—​tinawan nin dugang pang mga pribilehio sa paglilingkod sa templo. Minsan siring, bako sindang kapantay kan linahidan na Aaronikong mga saserdote.b​—Esdras 7:24; 8:​15-20; Nehemias 3:​22-26.

8, 9. Paano ginigibo kan ibang karnero an nagdadakulang kabtang sa pagtao nin banal na paglilingkod durante kan huring mga aldaw?

⁸ Sinusunod kan linahidan na mga Kristiano ngonyan an arogan na ini. Mantang nagpapadagos an “panahon kan katapusan,” an mga nawawalat kan linahidan pakadikit nang pakadikit sa “daga” kan banwaan nin Dios. (Daniel 12:9; Kapahayagan 12:17) Huli kaini, an dakulang kadaklan ngonyan an naggigibo kan kadaklan na trabaho sa pagtao nin “banal na paglilingkod.” (Kapahayagan 7:15) Sa pagsunod sa pangengenot kan saindang linahidan na mga tugang, sinda ‘nagdodolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.’ ‘Dai ninda nalilingawan an paggibo nin marahay asin pagwaras nin mga bagay sa iba,’ sa pakaaram na “sa siring na mga atang naoogmang gayo an Dios.”​—Hebreo 13:​15, 16.

⁹ Saro pa, huli sa pagdakol kan dakulang kadaklan sa ginatos na ribo kada taon, yaon an padagos an pagdakulang pangangaipo para sa pangangataman. May panahon kaidto na an linahidan na mga Kristiano sana an nag-aasikaso kaini. Ngonyan, huli sa pangangaipo, an pangangataman sa kadaklan na kongregasyon, pati sa mga sirkito, distrito, asin sanga, ipinaniwala sa ibang karnero. Kan 1992 an nagkapira kaini tinawan kan pribilehio na mag-atender sa mga miting kan mga komite kan Namamahalang Grupo asin maglingkod bilang mga katabang na dai kaiba sa pagdedesisyon. Pero, an ibang karnero nagdadanay na maimbod sa saindang linahidan na mga kapwa Kristiano asin nakamamate na pribilehio ninda na suportaran sinda bilang maimbod asin madonong na oripon ni Jehova.​—Mateo 25:​34-40.

“Arog nin Sarong Sheik”

10, 11. Sa pagsunod sa padara kan ibang Filisteo, paano an ibang dating mga kaiwal kan banwaan nin Dios nagkaigwa nin pagbabago sa puso? Na may anong resulta?

¹⁰ An paagi nin paggamit kan maimbod asin madonong na oripon sa ibang karnero sa mga katongdan nin responsibilidad ihinula sa Zacarias 9:​6, 7. Dian satong mababasa: “Popohoon ko nanggad an kapaabaw-abawan kan Filisteo. Asin hahaleon ko sa saiyang ngoso an mga bagay nia na nadigtaan nin dugo asin sa pag-oltanan kan saiyang mga ngipon an mga bagay nia na makababalde, asin sia man mismo matatada nanggad para sa satong Dios; asin sia magigin arog nin sarong sheik sa Juda, asin an Ecron arog kan Jebuseo.”c An mga Filisteo kaiwal na marhay kan banwaan ni Jehova, arog kan kinaban ni Satanas ngonyan. (1 Juan 5:19) Kun paanong an mga Filisteo sa katapustapusi pinoho bilang banwaan, siring man an kinaban na ini, kaiba an relihioso, politikal, asin komersial na mga elemento kaiyan, madali nang makaeksperyensia kan mapanlaglag na kaanggotan ni Jehova.​—Kapahayagan 18:21; 19:19-21.

¹¹ Minsan siring, sono sa mga tataramon ni Zacarias, an ibang Filisteo nagkaigwa nin pagbabago sa puso, asin ipinanganino kaini na an ibang kinabanon ngonyan dai magdadanay sa pakikiiwal ki Jehova. Popondohon ninda an relihiosong idolatriya kaiba an makaoongis na mga rituwal asin makababaldeng mga atang kaiyan asin sinda magigin malinig sa pagheling ni Jehova. Sa satong kaaldawan an siring na nagbakleng “mga Filisteo” manonompongan sa dakulang kadaklan.

12. Sa modernong mga panahon, paano an “Ecron” nagigin “arog kan Jebuseo”?

¹² Sono sa hula, an mayor na Filisteong siudad nin Ecron magigin “arog kan Jebuseo.” An mga Jebuseo dati man na mga kaiwal nin Israel. Kapot ninda an Jerusalem sagkod na sakopon iyan ni David. Minsan siring, malinaw na an ibang nakaligtas sa mga pakikilaban sa Israel nagin mga proselito. Naglingkod sinda sa daga nin Israel bilang mga oripon asin nagkapribilehio pa ngani na magtrabaho sa pagtogdok kan templo. (2 Samuel 5:​4-9; 2 Cronica 8:​1-18) Ngonyan, an mga “Ecronita” na suminamba ki Jehova igwa man nin mga pribilehio nin paglilingkod sa “daga” sa irarom kan pangangataman kan maimbod asin madonong na oripon.

13. Ano an mga sheik sa suanoy na kinaban?

¹³ Si Zacarias nagsasabi na an Filisteo magigin arog nin sarong sheik sa Juda. An termino sa Hebreo na ʼal·luphʹ, kun tinatradusir na “sheik,” nangangahulogan “poon nin sarong ribo” (o, “kiliarko”). Iyan sarong halangkawon na katongdan. An nasyon nin Edom kan enot minalataw na igwa sana nin 13 sheik. (Genesis 36:​15-19) An terminong “sheik” dai parateng ginagamit kun nagtataram dapit sa Israel, alagad an ekspresyon na “payo (o, kapitan) nin sarong ribo” parateng minalataw. Kan si Moises mag-apod nin mga representante kan nasyon nin Israel, inapod nia an “mga payo kan manriboribo sa Israel.”d Igwang 12 kaiyan, na malinaw na segunda sana ki Moises. (Bilang 1:​4-16) Kaagid kaiyan, sa organisasyon kan hukbo, an mga kapitan nin manriboribo segunda sana sa heneral o sa hade.​—2 Samuel 18:​1, 2; 2 Cronica 25:5.

14. Paano ngonyan an “Filisteo” nagigin arog nin sarong sheik?

¹⁴ Si Zacarias dai naghula na an nagsolsol na Filisteo magigin sheik nanggad sa Israel. Dai magigin tama iyan, huli ta bako siang propiong Israelita. Alagad sia magigin arog nin sarong sheik, na igwang katongdan nin autoridad na arog sa sarong sheik. Asin iyan an nangyari. Mantang nag-iina an bilang kan natatada kan linahidan na mga Kristiano asin an dakol sa mga buhay pa limitado na an kakayahan huli sa edad, an sinanay na marhay na ibang karnero an garo baga minasalo sa ibang trabaho. Habo nindang salidahan an saindang linahidan na mga tugang. Alagad an maimbod asin madonong na oripon tinatawan sinda nin autoridad sa “daga” sono sa pangangaipo tanganing an organisasyon nin Dios makapadagos na umoswag sa organisadong paagi. An siring na progresibong proseso naheheling sa saro pang hula.

Mga Saserdote Asin Paraoma

15. (a) Sa kaotoban kan Isaias 61:​5, 6, sairisay an “mga saserdote ni Jehova,” asin noarin sinda maglilingkod sa katongdan na ini sa lubos na sentido? (b) Sairisay an “mga tagaibang banwaan” na iyo an naggigibo kan trabahong agrikultural sa Israel, asin​—sa espirituwal na sentido—​ano an kalabot sa gibohon na ini?

¹⁵ An Isaias 61:​5, 6 nagsasabi: “An mga tagaibang banwaan matirindog nanggad asin magpapastor sa mga aripompon nindo, asin an mga tagaibang daga magigin saindong mga paraoma asin saindong mga paraataman sa ubasan. Asin kun dapit sa saindo, aapodon kamong mga saserdote ni Jehova; sasabihon kamong mga ministro kan satong Dios. Kakakanon nindo an mga kayamanan kan mga nasyon, asin sa saindang kamurawayan kamo magtataram na may kagayagayahan dapit sa saindo man sana.” Ngonyan, an “mga saserdote ni Jehova” iyo an linahidan na mga Kristiano. Sa sarong pangultimo asin lubos na sentido, sinda maglilingkod bilang “mga saserdote ni Jehova . . . , mga ministro kan satong Dios,” sa langitnon na Kahadean. (Kapahayagan 4:​9-11) Sairisay an “mga tagaibang banwaan” na may paninimbagan sa trabahong agrikultural? An mga ini iyo an ibang karnero, na nag-eerok sa “daga” kan Israel nin Dios. Ano an pagpastor, pag-oma, asin pag-ataman sa ubasan na ipinaniwala sa sainda? Sa mahalagang espirituwal na sentido, an mga trabahong ini may koneksion sa pagtabang, pag-ataman, asin pag-ani nin mga tawo.​—Isaias 5:7; Mateo 9:​37, 38; 1 Corinto 3:9; 1 Pedro 5:2.

16. Sairisay sa katapustapusi an mag-aasikaso sa gabos na gibohon sa “daga” kan banwaan nin Dios?

¹⁶ Sa presente, sarong sadit na bilang nin espirituwal na mga Israelita an natatada pa digdi sa daga na nakikikabtang sa espirituwal na pagpastor, pag-oma, asin pag-ataman sa ubasan. Kun an linahidan na kongregasyon sa kabilogan kaiyan sa katapustapusi makasaro na ni Cristo, an gabos na gibohon na ini iwawalat sa ibang karnero. Pati an pangangataman nin tawo sa “daga” sa panahon na iyan aasikasohon nin kualipikadong ibang karnero, na sa libro nin Ezequiel inaapod na grupong kapitan.​—Ezequiel, kapitulo 45, 46.e

An “Daga” Nagdadanay

17. Anong mga pag-andam an ginigibo ni Jehova durante kaining huring mga aldaw?

¹⁷ Iyo, an dakulang kadaklan dai dapat na matakot! Si Jehova naggibo nin igong mga pag-andam para sa sainda. An sarong pinakaimportanteng pangyayari digdi sa daga durante kaining huring mga aldaw iyo an pagtipon asin pagtatak sa mga linahidan. (Kapahayagan 7:3) Minsan siring, mantang sinisierto na nagigibo ini, dinara ni Jehova an ibang karnero sa pakikiasosyar sa sainda sa sarong ibinalik na espirituwal na daga. Dian sinda pinakakakan sa espirituwal asin sinasanay sa Kristianong pamumuhay. Dugang pa, sinda natokdoan na marhay sa banal na paglilingkod, kabale na an pangangataman. Huli kaini odok nindang pinasasalamatan si Jehova asin an saindang linahidan na mga tugang.

18. Sa anong mga pangyayari na an ibang karnero magdadanay na maimbod sa “daga” kan espirituwal na Israel?

¹⁸ Kun gibohon na ni Gog nin Magog an saiyang pangultimong pagsalakay sa banwaan nin Dios, an ibang karnero marigon na maninindogan sa kaibahan kan linahidan na natatada sa “daga nin banwaan na mayong kudal.” An ibang karnero yaon pa giraray sa “dagang” iyan pakaligtas ninda sa kalaglagan kan mga nasyon asin paglaog ninda sa bagong kinaban nin Dios. (Ezequiel 38:11; 39:​12, 13; Daniel 12:1; Kapahayagan 7:​9, 14) Sa pagpadagos na maimbod, dai sinda noarin man kaipuhan na humale sa maogmang lugar na iyan.​—Isaias 11:9.

19, 20. (a) Sa bagong kinaban, anong dakulaon na pangangataman an kakamtan kan mga nag-eerok sa “daga”? (b) Sa ano kita nagtatanaw na may dakulang pag-antisipar?

¹⁹ An suanoy na Israel pinamahalaan nin mga tawong hade asin nagkaigwa nin mga saserdoteng Levita. Sa bagong kinaban, an mga Kristiano magkakaigwa nin orog kadakulang pangangataman. Sa irarom ni Jehova Dios, sinda magigin sakop kan dakulang Halangkaw na Saserdote asin Hade, si Jesu-Cristo, asin kan 144,000 na kairibang saserdote asin hade​—na an iba kaiyan dati na nindang midbid bilang saindang Kristianong mga tugang na lalaki asin babae digdi sa daga. (Kapahayagan 21:1) An maimbod na mga nag-eerok sa espirituwal na daga mag-iistar sa sarong daga na ibinalik sa sarong literal na paraiso, na mag-oogma sa nakapaoomay na mga bendisyon na ipaaabot paagi sa Bagong Jerusalem.​—Isaias 32:1; Kapahayagan 21:2; 22:​1, 2.

²⁰ Mantang an dakulaon na langitnon na karuwahe ni Jehova daing ontok na nag-aabante sa paggibo kan saiyang mga katuyohan, kita gabos nagtatanaw sa enotan na may odok na pag-antisipar sa pag-otob sa kabtang na iinasignar sato. (Ezequiel 1:​1-28) Kun an mga katuyohan na iyan sa katapustapusi maotob na, isip-isipa kun gurano an kagayagayahan na seselebraron an mapangganang pagpakangbanal ki Jehova! An makosog na himno na nasusurat sa Kapahayagan 5:13 aawiton kan gabos na linalang sa panahon na iyan: “Sa Saro na nagtutukaw sa trono asin sa Kordero mapasainda an kaomawan asin an kagalangan asin an kamurawayan patin an kakosogan sagkod noarin pa man”! Baga man an satong lugar sa langit o digdi sa daga, dai daw kita naghihimuyawot na logod yaon kita duman, na pinagdudurungan an satong mga boses sa magayonon na korong iyan nin pag-omaw?

[Mga Nota sa Ibaba]

Ano an Saindong Simbag?

◻ Anong “daga” an ikinabalik kan 1919, asin paano iyan pinano nin mga mag-eerok?

◻ Paano an ibang karnero tinawan nin dugang na mga paninimbagan sa “daga” kan nakabalik na banwaan nin Dios?

◻ Sa anong paagi na an mga miembro kan dakulang kadaklan “arog kan Jebuseo”? “arog nin sarong sheik sa Juda”?

◻ Sagkod noarin magdadanay sa “daga” an maimbod na ibang karnero?

[Retrato sa pahina 23]

An modernong Filisteo magigin “arog nin sarong sheik sa Juda”

[Mga retrato sa pahina 24]

An mga linahidan asin an ibang karnero iribang naglilingkod sa espirituwal na daga