An Tawong Maurihon
AN LENGUAHENG Hebreo saro sana an pinakagamot na termino para sa “pag-imon.” Kun pinanonongdan an makasalan na mga tawo, an Hebreo puedeng tradusiron na “pagkauri” o “pagriribal.” (Genesis 26:14; Eclesiastes 4:4) Minsan siring, an lenguaheng Griego bako sanang saro an termino para sa “pag-imon.” An terminong zeʹlos, arog kan katimbang kaiyan sa Hebreo, puedeng mapanongod kapwa sa matanos asin makasalan na pag-imon. An saro pang termino sa Griego, an phthoʹnos, biyong negatibo an kahulogan. Sa New World Translation, iyan perming tinatradusir na “envy” (sa Bicol, “pagkauri”).
Paano ginamit an terminong phthoʹnos sa suanoy na Griego? An The Anchor Bible Dictionary nagsasabi: “Bakong arog kan tawong mahanab, an tawong may phthonos dai man perming nagmamawot kan mga rogaring na ipinagsesentir niang yaon sa iba; habo sana niang magkaigwa kaiyan an iba. Napapalaen sia sa tawong nakikipagdaogan sa bagay na an saiyang katuyohan, bakong arog kan tawong nakikipagdaogan, bakong manggana kundi olangon an iba sa panggana.”
Parateng dai aram kan tawong maurihon na an saiya mismong ugale an pinakacausa kan saiyang mga problema. “An saro sa mga karakteristiko kan phthonos,” an paliwanag kan diksionaryo man sanang iyan, “iyo an kakulangan nin pakarisa sa sadiri. An tawong phthoneros, kun hinahagadan na ipangatanosan an saiyang gawe, perming sasabihan an saiyang sadiri asin an iba na an mga inaatake nia maninigo kaiyan asin na an pagkabakong makatanosan kan situwasyon an nagpapahiro sa saiya na magkritika. Kun hinahapot kun paano sia nakapagtataram dapit sa sarong katood siring sa ginigibo nia, sasabihon nia na an saiyang mga pagkritika sa pangenot para sa ikararahay kan saiyang katood.”
An kagsurat nin Ebanghelyo na sinda Mateo asin Marcos ginagamit an termino sa Griego na phthoʹnos sa pagladawan sa motibo kan mga responsable sa paggadan ki Jesus. (Mateo 27:18; Marcos 15:10) Iyo, pagkauri an nagpahiro sa sainda. An nakararaot na emosyon man sanang iyan an nagpangyari sa mga apostata na maongis nin makuri sa saindang dating mga tugang. (1 Timoteo 6:3-5) Bakong makangangalas na an mga tawong maurihon dai makalalaog sa Kahadean nin Dios! Si Jehova Dios nagboot na an gabos na nagpapadagos na “pano nin kaurihan” “maninigo sa kagadanan.”—Roma 1:29, 32; Galacia 5:21.
[Mga retrato sa pahina 7]
Dai pagtogotan na raoton nin pagkauri an saindong buhay