Sarong Mas Marahay na Buhay​—Dai Na Mahahaloy!

IMAHINARA an sarong parabareta kan maabot na kamugtakan nin panahon na an mga prediksion haros perming nangyayari. Kun sa pambangging bareta may prediksion sia na maoran nuodma, dai kamo magduduwaduwang darahon an saindong payong paghale nindo sa harong pagkaaga. May kompiansa na kamo huli sa saiyang nakaaging rekord. Minahiro kamo kaoyon sa saiyang sinasabi.

Ngonyan, gurano kamapananarigan an panuga ni Jehova dapit sa sarong mas marahay na buhay sa sarong paraisong daga? Bueno, ano an ipinaririsa kan saiyang nakaaging rekord? An kaotoban kan mga hula sa Biblia malinaw na nagpapatunay sa rekord ni Jehova. Sia Dios nin dai nasusudyang pagigin eksakto asin totoo. (Josue 23:14; Isaias 55:11) Mapananarigan na marhay an mga panuga ni Jehova Dios kaya kun beses sia sa totoo nagtataram dapit sa ipinanugang mga pangyayari sa ngapit na garo man sana iyan nangyari na. Halimbawa, kasunod kan saiyang panuga manongod sa sarong bagong kinaban na dian mawawara na an kagadanan asin pagmondo, satong mababasa: “An mga iyan [an ipinanugang mga bendisyon] nangyari na!” Sa ibang pagtaram, “An mga iyan katunayan!”​—Kapahayagan 21:​5, 6, nota sa ibaba.

Iyo, an pagkaotob kan nakaaging mga panuga ni Jehova nagtatao sato nin kompiansa sa kaotoban kan saiyang panuga na sarong mas marahay na buhay para sa katawohan. Alagad noarin maabot an mas marahay na buhay na ini?

Sarong Mas Marahay na Buhay​—Noarin?

An buhay na orog karahay maabot sa dai na mahahaloy! Makasisierto kita kaiyan huli ta sinasabi kan Biblia na dakol na maraot na bagay an mangyayari digdi sa daga bago darahon kan Paraiso an mas marahay na buhay. An maraot na mga bagay na iyan nangyayari na ngonyan.

Halimbawa, ihinula ni Jesu-Cristo na magkakaigwa nin darakulang guerra. Sia nagsabi: “An nasyon matindog tumang sa nasyon asin an kahadean tumang sa kahadean.” (Mateo 24:7) An hulang ini nangyari. Durante kan mga taon nin 1914 sagkod 1945, nagkaigwa nin duwang guerra mundial, asin sinundan ini nin dakol na iba pang guerra na pinagralabanan nin mga nasyon. “Sa taonan na promedyo, an mga nagadan sa guerra sa peryodong ini [poon kan Guerra Mundial II] nagin labing doble kan mga nagadan kaidtong ika-19 siglo asin mas dakol nin pitong beses kisa kaidtong ika-18 siglo.”​—World Military and Social Expenditures 1993.

An paglakop nin helang saro pang ebidensia kan kaharanihan nin mas marahay na buhay sa Paraiso. Ihinula ni Jesus na magkakaigwa nin ‘mga peste sa sunod-sunod na lugar.’ (Lucas 21:11) Nangyari daw an hulang ini? Iyo. Pakatapos kan enot na guerra mundial, an trangkaso Española guminadan nin labing 20 milyones katawo. Poon kaidto, an kanser, helang sa puso, malaria, AIDS, asin iba pang helang guminadan nin minilyon na tawo. Sa nag-ooswag na mga nasyon, an mga helang dahelan sa maating tubig (kabale an pagkurso asin mga impeksion huli sa halod sa bituka) minilyon an ginagadan kada taon.

Si Jesus nagsabi man: “Magkakaigwa nin mga kakulangan nin kakanon.” (Mateo 24:7) Siring kan nasabi sa sinundan na artikulo, an mga dukha sa kinaban mayo nin bastanteng pagkakan. Saro pa ining kabtang kan ebidensia na an buhay na orog karahay sa Paraiso maabot sa dai na mahahaloy.

“Magkakaigwa nin makokosog na linog,” an sabi ni Jesus. (Lucas 21:11) Nangyari man ini sa satong panahon. Poon kan 1914 an panlaglag nin kapahapahamak na mga linog guminadan nin ginatos na ribo.

An Biblia nagsasabi pa na an “huring mga aldaw” tatandaan nin pagkaliwat sa mga tawo. Sinda magigin “mamomoton sa sainda man sana” asin “mamomoton sa pirak,” asin an mga aki magigin “masumbikal sa mga magurang.” An kadaklan na tawo magigin “mamomoton sa kasingawan kisa magin mamomoton sa Dios.” (2 Timoteo 3:​1-5) Dai daw kamo minaoyon na dakol an tamang-tama sa paglaladawan na ini?

Mantang nagdadakol an mga tawo na naggigibo nin maraot na mga bagay, an katampalasanan nag-oorog. Ihinula man ini. Sono sa Mateo 24:​12, si Jesus nagtaram dapit sa “pag-orog nin katampalasanan.” Posibleng maoyon kamo na an krimen mas maraot ngonyan kisa kaidtong nakaaging mga taon. An mga tawo sa gabos na lugar natatakot na sinda hahabonan, dadayaon, o kokolgan.

An mga guerra, lakop na marhay na mga helang, kakulangan nin kakanon, linog, nag-oorog na krimen, asin pagraot kan mga relasyon nin tawo​—an gabos na ini naheheling ngonyan, siring kan ihinula sa Biblia. ‘Alagad bako daw na an mga bagay na ini nangyayari sa bilog na kasaysayan nin tawo?’ an tibaad ihapot nindo. ‘Ano an kalaenan kan satong kaaldawan?’

Igwa nin nagkapirang makahulogan na marhay na aspekto an nangyayari ngonyan. Dai sinasabi kan Biblia na an arin man na sarong nagpapamidbid na kabtang, arog baga kan mga kakulangan nin kakanon, magigin prueba mismo na kita yaon na sa panahon kan katapusan asin na harani na an mas marahay na buhay. An mga hula kan Biblia manongod sa panahon kan katapusan nakatalaan na maotob sa sarong daing dios na kapag-arakian.​—Mateo 24:​34-39; Lucas 17:​26, 27.

Dugang pa, pambihirang gayo na an nagkapirang nagpapamidbid na kabtang kan hula ni Jesus​—nangorogna an manongod sa mga kakulangan nin kakanon asin lakop na marhay na helang—​nangyayari na ngonyan. Taano? Huli ta an mga nahaman nin siensia dai noarin man nagin mas dakula. An medikal na kaaraman asin mga klase nin pagbolong dai noarin man nagin mas maoswag o lakop. An Dios sana an may kakayahan na humula sa saiyang Tataramon, an Biblia, na sa siring na panahon, an helang asin gutom magrabe, bakong makadikit.

Mantang nangyayari an gabos na hula kan Biblia manongod sa panahon kan katapusan, o “huring mga aldaw,” ano an puedeng ikonklusyon niato? Na harani na an sarong mas marahay na buhay! Alagad paano iyan mangyayari?

Sarong Mas Marahay na Buhay​—Paano?

Hinohona daw nindo na kaya nin mga tawo na magpangyari nin Paraiso? Sa bilog na kasaysayan sagkod sa aldaw na ini, nagkaigwa nin dakol na klase nin gobyerno nin tawo. An iba nagmaigot na marhay na panigoan an mga pangangaipo kan mga tawo. Pero, dakol na problema an naggagrabe. Kapwa sa mayayaman na nasyon asin sa dukhang kadagaan, an mga gobyerno nasasakitan na atubangon an pag-abuso sa droga, kulang na istaran, kadukhaan, krimen, kadaihan nin trabaho, asin ralaban.

Dawa kun puedeng resolberan nin mga gobyerno an nagkapira sa mga problemang ini, sinda dai noarin man makatatao nin lubos na katalingkasan sa maluyang salud; ni puede man nindang taposon an paggurang asin kagadanan. Malinaw nanggad, an mga tawo dai noarin man makapangyayari nin Paraiso sa dagang ini.

An Biblia madonong na nagsasabi: “Dai ka manarig sa mga prinsipe, ni sa aki nin daganon na tawo, na sa sainda mayo nin kaligtasan.” Sa kiisay, kun siring, kita maninigong manarig? An Biblia minasimbag: “Maogma idtong an saiyang paratabang iyo an Dios ni Jacob, na an paglaom yaon ki Jehova na saiyang Dios.” (Salmo 146:​3, 5) Kun kita maglalaom ki Jehova Dios, dai kita noarin man madidisganar.

Sierto nanggad na an Saro na igwa kan kadonongan asin kapangyarihan na lalangon an daga, aldaw, asin mga bitoon may kakayahan man na gibohon na paraiso an daga. Mapangyayari nia na an mga tawo magkamit nin mas marahay na buhay. An ano man na booton na gibohon ni Jehova Dios, kaya asin hahamanon nia. An saiyang Tataramon nagsasabi: “Sa Dios mayo nin tataramon na imposible.” (Lucas 1:37) Alagad paano papangyayarihon nin Dios an sarong mas marahay na buhay?

An katawohan tatawan ni Jehova nin buhay na orog karahay paagi sa saiyang Kahadean. Asin ano an Kahadean nin Dios? Iyan sarong tunay na gobyerno na igwa nin nombrado nin Dios na Namamahala, si Jesu-Cristo. An Kahadean nin Dios yaon sa langit, alagad sa dai na mahahaloy iyan matao nin makangangalas na mga bendisyon asin buhay na orog karahay sa mga mag-eerok sa Paraisong daga.​—Isaias 9:​6, 7.

Tibaad pamilyar na kamo sa modelong pamibi ni Jesus, na makukua sa Biblia sa Mateo 6:​9-13. An sarong kabtang kan pamibing iyan sa Dios nagsasabi: “Dumatong logod an kahadean mo. Gibohon logod an boot mo, kun paano sa langit, siring man sa daga.” Kaoyon sa pamibing iyan, an Kahadean nin Dios ‘madatong’ tanganing gibohon an katuyohan ni Jehova Dios para sa daga. Asin katuyohan nia na an daga magin paraiso.

Minalataw an sarong ultimong hapot: Ano an dapat nindong gibohon tanganing magkamit nin mas marahay na buhay sa maabot na Paraiso?

An Kaipuhan Nindong Gibohon

An paglaom na mas marahay na buhay sa Paraiso mamomoton na iinoopresir ni Jehova Dios sa gabos na naggigibo kan saiyang kabotan. An Biblia nagsasabi sa sato: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Alagad ano an minagibo sa saro na magin matanos sa pagheling nin Dios?

Tanganing mapaogma si Jehova kaipuhan kitang makanood nin dakol pa manongod sa gusto niang gibohon niato. Kun magkukua kita nin kaaraman dapit sa Dios asin iaaplikar iyan sa satong buhay, puede kitang mabuhay sagkod lamang. Sa sarong pamibi sa Dios, si Jesus nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”​—Juan 17:3.

An libro na nagsasabi sa sato manongod ki Jehova Dios asin ki Jesu-Cristo iyo an Tataramon nin Dios, an Biblia. Saro iyan sa pinakamahalagang mga regalo ni Jehova. An Biblia siring sa surat hale sa sarong mamomoton na ama sa saiyang mga aki. Iyan nagsasabi sato kan manongod sa panuga nin Dios na papangyarihon an sarong mas marahay na buhay para sa katawohan asin nagpapaheling sa sato kun paano niato iyan makakamit. Ipinaaaram sa sato kan Biblia an ginibo nin Dios kan suanoy asin an gigibohon nia sa ngapit. Iyan nagtatao man sa sato nin praktikal na hatol manongod sa kun paano mapangganang aatubangon an satong mga problema ngonyan. Tunay nanggad, tinotokdoan kita kan Tataramon nin Dios kun paano makanonompong nin kaogmahan maski sa maribok na kinaban na ini.​—2 Timoteo 3:​16, 17.

An Mga Saksi ni Jehova maoogmang mag-areglo para sa saindo nin daing bayad na pag-adal sa Biblia sa harong. Pag-adalan kun paano kamo magkakaigwa nin mas maogmang buhay ngonyan, na may paglaom na buhay na orog karahay sa harani nang ngapit.

[Retrato sa pahina 5]

An mga hula sa Biblia nagpaparisa na harani na an sarong mas marahay na buhay

[Retrato sa pahina 7]

An Kahadean nin Dios madara nin mas marahay na buhay para sa katawohan