An Saindang Liwanag Dai Naparong

KAIDTONG mga panahon kan Biblia may maimbod na mga Saksi ni Jehova na nakaeksperyensia nin mga kaolangan asin kasakitan. Napaatubang sinda sa pagtumang asin garo baga mga pagkasudya. Pero, dai sinda suminuko huli sa panluluya nin boot. Garo man sana dai naparong an saindang liwanag.

Halimbawa, si propeta Jeremias sinugo na magin propeta nin Dios sa apostatang nasyon nin Juda. Ibinalangibog nia an patanid manongod sa maabot na kalaglagan nin Jerusalem. (Jeremias 1:​11-19) Bilang resulta, dakol na beses na nakahampang ni Jeremias an saiyang mga kahimanwa, na ibinilang siang parakurahaw nin kapahamakan.

An saserdoteng si Pasur, an pangenot na komisyonado sa harong nin Dios, sarong beses kinologan si Jeremias huli sa saiyang ihinula asin pinandogan sia. Huli sa garo baga kaolangan na ini, si Jeremias nagsabi: “Pinagngingisihan ako sa bilog na aldaw; an gabos nagtutuya sako. Huli ta basta magtaram ako, nagkukurahaw ako. Nagkukuragrit ako nin kadahasan asin paghabon. Huli ta an tataramon ni Jehova nagin dahelan nin pagtuya asin pag-olog-olog sa sako sa bilog na aldaw.” Pinanluyahan nin boot an propeta kaya ngani sia nakasabi: “Dai ko na sia [si Jehova] sasambiton, asin dai na ako noarin man magtataram pa sa saiyang ngaran.”​—Jeremias 20:​1, 2, 7-9.

Minsan siring, si Jeremias dai napadara sa panluluya nin boot. Sa pagtaram dapit sa “tataramon ni Jehova,” sia nagpahayag: “Sa sakong puso iyan nagin siring sa naglalaad na kalayo na tuminaros sa sakong mga tolang; asin ako napagal sa pagpogol kaiyan, asin dai ko na iyan natagalan.” (Jeremias 20:8, 9) Makosog na namomotibar na itaram an mga tataramon nin Dios, si Jeremias tinabangan kan banal na espiritu asin inotob an sugo sa saiya.

Si apostol Pablo dakol man an dahelan na panluyahan nin boot, kun napadara sia sa mga iyan. Nagtagal sia nin natural na mga kalamidad, pagkalunod, paglamag, asin mga paghampak. Dugang pa, ‘pinupurisaw sia aroaldaw kan paghadit para sa gabos na kongregasyon.’ (2 Corinto 11:​23-28) Iyo, aroaldaw na kinaipuhan ni Pablo na atubangon an mga problema, na naghahadit manongod sa bagong mga kongregasyon na tinabangan niang itindog. Saro pa, sia bakong sangkap asin kinaipuhan na makilaban sa “sarong tonok sa laman,” na posibleng maluyang pagheling. (2 Corinto 12:7; Roma 7:15; Galacia 4:15) May mga nagpakaraot pa ngani ki Pablo, asin iyan nakaabot sa saiya.​—2 Corinto 10:10.

Minsan siring, dai tinogotan ni Pablo na daogon sia nin panluluya nin boot. Dai, bako siang tawo na lihis sa ordinaryo. (2 Corinto 11:​29, 30) Ano an nagpangyari sa saiyang ‘panlaog na kalayo’ na padagos na maglaad? Enot, igwa sia nin mapagsuportar na kairiba, na an iba inibanan pa ngani sia pasiring sa Roma kun saen sia ibinilanggo sa harong. (Gibo 28:​14-16) Ikaduwa, minansay kan apostol an saiyang situwasyon sa timbang na paagi. An mga paralamag asin paratumang sa saiya an sala, bakong si Pablo. Sa paghinanapos kan saiyang daganon na buhay, hinorophorop nia an saiyang ministeryo sa positibong paagi asin nagsabi: “Poon ngonyan igwa na nin nakatagama para sa sako na korona nin katanosan, na itatao sa sako kan Kagurangnan, an matanos na hokom, bilang balos.”​—2 Timoteo 4:8.

Orog sa gabos, si Pablo regular na nagdolok ki Jehova Dios sa pamibi, asin ‘sinorog sia kan Kagurangnan asin pinakosog sia.’ (2 Timoteo 4:17) “Igwa ako kan kosog para sa gabos na bagay,” sabi ni Pablo, “huli sa saiya na nagtatao nin kapangyarihan sa sako.” (Filipos 4:13) An pakikikomunikar sa Dios asin sa mga kapwa Kristiano, kaiba an positibong paghorophorop sa saiyang ministeryo, nakatabang ki Pablo na magpadagos sa paglilingkod ki Jehova.

Pinasabngan nin Dios si Pablo na sumurat: “Dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.” (Galacia 6:​7-9) Mag-aani nin ano? Nin buhay na daing katapusan. Kaya, kun siring, magin arog ki Jeremias, Pablo, asin kan dakol na iba pang maimbod na saksi ni Jehova na nasambitan sa Kasuratan. Iyo, magin arog sa sainda, asin dai padara sa panluluya nin boot. Dai pagtogotan na maparong an saindong liwanag.​—Ikomparar an Mateo 5:​14-16.

[Mga retrato sa pahina 25]

Dai tinogotan ni Pablo asin Jeremias na maparong an saindang liwanag