Kun an Tradisyon Kontra sa Katotoohan

PELIGRO​—AN TUBIG DAI PUEDENG INOMON. Tibaad tuod na kitang makaheling nin siring na mga patanid. Sa dakol na lugar an mga tawo maingat sa saindang iniinom huli ta aram ninda na may mga tubig na hinihilo nin inaapod na “pukati nin aswang” na nakahihilong mga ati. Bilang resulta kan ati na ini, an sabi nin sarong pagsiyasat, imbes na magin “parasustenir asin paraprotehir nin buhay,” an tubig puedeng magin “paraolakit nin mga organismo nin helang asin . . . kemikal na mga ati.”​—Water Pollution.

Pag-ati sa mga Tubig nin Katotoohan

An mga tradisyon na kontra sa katotoohan kapareho nin maating mga tubig. Tibaad may pagkainosente kitang nangangapot nin marigon sa mga tradisyon​—impormasyon, mga opinyon, paniniwala, o kostumbre na ipinasa hale sa sarong kapag-arakian pasiring sa sunod—​na, sa katunayan, naatian nin “pukati nin aswang” na falso, nakadadayang mga ideya asin pilosopiya. Arog nin maating tubig, an mga ini puedeng magin dahelan nin grabeng danyos​—espirituwal na danyos.

Dawa kun pinaghohona niato na an satong tradisyonal na relihiosong mga paniniwala basado sa Biblia, kita gabos maninigong magtao nin panahon na siyasaton iyan nin maingat. Girumdomon, kan si Martin Luther mangapot sa tradisyonal na paniniwala kan panahon na idto asin kinondenar si Copernico, an pagtubod nia suportado sia kan Biblia. Pero, si Luther dai nakaarog sa marahay na halimbawa kan suanoy na mga taga-Berea na ‘orog karahay sa maingat na pagsiyasat kan Kasuratan kun baga an mga bagay na ini iyo man nanggad.’​—Gibo 17:​10, 11.

Isip-isipa an danyos na ibinunga kan tradisyonal na mga paniniwala para sa nagkapirang Judio kan kaaldawan ni Jesus. Odok sindang naniwala na tama an saindang mga tradisyon. Kan sinda magprotesta na an mga disipulo ni Jesus dai nag-otob sa mga tradisyon, inangat sinda ni Jesus paagi sa hapot: “Taano man ta linalapas nindo an togon nin Dios huli sa saindong tradisyon?” (Mateo 15:​1-3) Ano an napasala? Ipinamidbid ni Jesus an problema kan kotaron nia an mga tataramon ni propeta Isaias: “Sayang sana na sinda nagsasamba [sa Dios], huli ta itinotokdo ninda bilang mga doktrina an mga pagboot nin mga tawo.”​—Mateo 15:9; Isaias 29:13.

Iyo, imbes na mga katotoohan gikan sa Dios, isinalida ninda an mga ideya na gikan sa mga tawo o, mas maraot pa ngani, gikan sa mga demonyo. Halimbawa, an Insight on the Scriptures, Tomo 1, pahina 506, nagpapaliwanag: “Itinokdo kan mga Fariseo kan panahon na idto na oras na ipahayag nin saro na an saiyang mga rogaring ‘korban,’ o regalo na idinusay sa Dios, dai nia ini puedeng gamiton sa pagpanigo sa mga pangangaipo kan saiyang mga magurang, minsan pa gurano kagrabe kan saindang pagkatikapo, minsan ngani puede nia mismong gamiton an mga rogaring na iyan sagkod na sia magadan kun gusto nia.” An kadonongan nin tawo na nakaati sa mga tubig nin katotoohan maraot an epekto sa mga Judio sa espirituwal na paagi. Isinikwal pa ngani kan mayoriya an saindang haloy nang linalaoman na Mesiyas.

An Kakristianohan Nagdadagdag sa Ati

Kaagid na espirituwal na danyos an ibinunga pagkagadan ni Jesus. An dakol na naghingakong parasunod nia ginamit an berbal na tradisyon bilang autoridad para sa bagong mga katokdoan. Sono sa Cyclopedia of Biblical, Theological, and Ecclesiastical Literature, ni McClintock asin Strong, an ibang Kristiano daa nagtubod na an siring na tradisyon “instruksion na inako hale sa ngoso kan mga apostol kan enot na Kristianong mga iglesya, na ipinasa poon kaidtong mga panahon nin mga apostol, asin napreserbar na dalisay sagkod sa panahon ninda.”​—Samo an italiko.

Sa katunayan, an dakol sa mga tradisyon na ini bakong dalisay, salang mga ideya. Siring kan paliwanag kan Cyclopedia, an bagong mga pilosopiya na ini “bako sanang bakong kaoyon nin ibang tradisyon, kundi kan mismong mga isinurat kan mga apostol na yaon sa sainda.” Ini bakong biyong dai linalaoman. Si apostol Pablo nagpatanid sa mga Kristiano: “Mag-ingat kamo: tibaad may siisay man na bumihag saindo paagi sa pilosopiya asin basang na daya sono sa tradisyon nin mga tawo, sono sa enot na mga katokdoan kan kinaban asin bakong sono ki Cristo.”​—Colosas 2:8.

Ngonyan man, an dakol na tradisyonal na paniniwala ‘bakong kaoyon kan mismong mga isinurat kan mga apostol.’ Hinilo kan Kakristianohan an mga tubig nin katotoohan nin kadakol na ideyang ipinasabong nin demonyo, na arog baga kan Trinidad, kalayo sa impierno, inmortalidad kan kalag nin tawo, nasyonalismo, asin idolatriya.a (1 Timoteo 4:​1-3) Pinatutunayan nin kasaysayan an espirituwal na helang na uminabot sa mga tawo na nagin biktima kan mga katokdoan nin demonyo na iyo an nagin tradisyonal na mga katokdoan nin Kakristianohan.​—Ikomparar an Isaias 1:​4-7.

Sa katunayan, an siring na pag-ati sa katotoohan nangyayari na poon pa sa kapinonan nin tawo. Ipinadagos ni Satanas an prosesong pinonan nia sa Eden na paghilo sa isip nin mga tawo paagi sa mga kaputikan asin pandadaya. (Juan 8:44; 2 Corinto 11:3) Mantang an pamilya nin tawo naglalakop sa bilog na daga pakalihis kan Baha kan kaaldawan nin Noe, an mga tawo sa gabos na kultura nagin biktima nin tuyong paghilo sa mga deposito kan kaaraman nin tawo paagi sa mga pilosopiya asin ideyang ipinasabong nin demonyo.

Mga Epekto nin Espirituwal na Ati

Anong danyos an puedeng ibunga kan siring na espirituwal na pag-ati? Ikakokomparar niato iyan sa mga epekto nin maating tubig sa satong pisikal na salud. Sabi nin sarong autoridad: “Mga 200 milyones katawo an biktima nin schistosomiasis (bilharzia) [kalintura na gikan sa atol na nagdadara nin parasito, na pinaggigikanan nin anemia, pagkapurisaw, pankagabsan na pagluya nin salud, asin kagadanan pa ngani], na an causa maating tubig sa kublit. Kinyentos milyones katawo an igwa nin trachoma, saro sa pangenot na mga causa nin pagkabuta, huli sa maating tubig na pankarigos. . . . An mga dos bilyones katawo mayo nin malinig na inomon na tubig.” (Our Country, the Planet) Minilyon katawo an nanluya, nabuta, asin nagadan pa ngani sa espirituwal bilang resulta kan pagsunod sa mga tradisyon na sinalakan nin falso, sa demonyong mga katokdoan.​—1 Corinto 10:​20, 21; 2 Corinto 4:​3, 4.

Halimbawa, dakol an nariribaraw o nabubuta kun dapit sa relasyon ni Jesu-Cristo asin kan saiyang Ama, si Jehova Dios. Nagin ugale sa tahaw nin mga naghingakong Kristiano na haleon an banal na ngaran nin Dios, na Jehova, sa Kristianong Griegong Kasuratan. Sabi ni George Howard sa Journal of Biblical Literature: “An paghaleng ini kan Tetragram[maton], sa opinyon mi, nagin dahelan nin karibarawan sa isip kan enot na mga Kristianong Hentil manongod sa relasyon kan ‘Kagurangnan na Dios’ asin kan ‘Kagurangnan na Cristo.’”

Isip-isipa man an karibarawan, superstisyon, asin takot na gikan sa bakong Makakasuratan na tradisyon na an kalag nin tawo inmortal. (Ikomparar an Eclesiastes 9:5; Ezequiel 18:4.) Pirang tawo an naooripon sa pagsamba sa mga apoon o nabubuhay na may danay na pagkatakot na an mga gadan mabuelta tanganing kologan sinda? An paniniwalang ini nakaenganyar pa ngani sa mga tawo na gadanon an saindang sadiri asin an iba.

Dakol na Hapon an naghohona na pagkagadan an mga espiritu ninda na nagluwas magheherelingan sa ibong na buhay. Kaya, an ibang magurang na naghugot naghona na pinakamarahay na gadanon man an saindang mga aki. An An English Dictionary of Japanese Ways of Thinking nagpapaliwanag: “Sa Hapon an paghugot dai perming kinokondenar, kundi parateng ibinibilang na puede man na paagi nin paghagad nin tawad sa magabat na kasalan nin saro . . . Maski an mga paghugot nin pamilya posibleng ibabareta na may mapagdamay na mga tataramon.”

Baloon an mga Tradisyon

Huli sa mga peligrong kalabot sa butang pagsunod sa tradisyonal na mga paniniwala asin kostumbre, ano an maninigo niatong gibohon? Sa paghinanapos kan enot na siglo, itinao ni apostol Juan an hatol na ini sa saiyang mga kapwa Kristiano: “Mga namomotan, dai kamo tumubod sa gabos na ipinasabong na tataramon, kundi baloon an ipinasabong na mga tataramon [kun paanong babaloon nindo kun baga dalisay an tubig] kun baga iyan gikan sa Dios, huli ta kadakol na falsong propeta an nagruluwas sa kinaban.” (1 Juan 4:1; helingon man an 1 Tesalonica 5:21.) Paano nindo maaaraman kun baga nakadadanyar an sarong tradisyon? Kaipuhan nindo nin sarong klase nin autoridad, sarong pamantayan nin kadalisayan, tanganing baloon an saindong tinutubod.

An Biblia siring nanggad na autoridad. Si Jesu-Cristo nagsabi: “Pakangbanala sinda paagi sa katotoohan; an saimong tataramon katotoohan.” (Juan 17:17) Sia nagsabi man: “An oras madatong, asin ngonyan iyo na, na an tunay na mga parasamba masamba sa Ama sa espiritu asin katotoohan.” (Juan 4:23) Paagi sa paggamit kan ipinasabong na Tataramon nin Dios, dalisay na mga tubig nin katotoohan an makukua nindo imbes na maating mga tubig nin pilosopiyang sa tawo asin sa demonyo.​—Juan 8:​31, 32; 2 Timoteo 3:16.

Girumdomon, dawa kakadikit na ati puedeng magkaigwa nin makatatakot na mga resulta. Kun beses mga taon an minaagi bago maheling an mga epekto. “An maating tubig,” sabi ni Shridath Ramphal, an dating presidente kan World Conservation Union, “nagin an pinakapeligrosong paragadan sa kinaban. Kisuerra beinte-singko mil katawo an nagagadan kada aldaw huli sa paggamit ninda kaiyan.” Orog pa nganing peligroso an mga tradisyon na maati sa espirituwal.

May kapusoan daw kamo na bayaan an tradisyonal na mga paniniwala na tibaad dakol na taon nang sinusunod nindo kun iyan mapatunayan na kontra sa katotoohan? Kuyogon an mga patanid. Protehiran an saindong sadiri asin an saindong pamilya paagi sa pagsierto na an saindong mga tradisyon kaoyon sa dalisay na Tataramon nin katotoohan nin Dios.​—Salmo 19:​8-11; Talinhaga 14:15; Gibo 17:11.

[Nota sa Ibaba]

[Retrato sa pahina 7]

An Tataramon nin katotoohan nin Dios siring sa salog nin dalisay, malinig na tubig