Bareta kan mga Parabalangibog kan Kahadean
“Giboha an Gibohon nin Sarong Paraebanghelyo”
ANO an boot sabihon kan pagigin paraebanghelyo? An termino sarong traduksion kan Griegong eu·ag·ge·li·stesʹ, na konektadong marhay sa terminong eu·ag·geʹli·on, na an kahulogan “maogmang bareta.” Huli kaini, an paraebanghelyo sarong parahulit, o mensahero, nin maogmang bareta.
An gabos na tunay na Kristiano paraebanghelyo huli ta nagbabalangibog sinda kan maogmang bareta manongod sa Kahadean nin Dios. Angay nanggad, sinadol ni apostol Pablo si Timoteo na ‘gibohon an gibohon nin sarong paraebanghelyo.’ Kaipuhan na isaboot ni Timoteo an gibohon na ini. Dinagka sia ni Pablo na ‘magpuka sa gabos na bagay’ asin ‘lubos na otobon an saiyang ministeryo.’—2 Timoteo 4:5.
Bilang mga paraebanghelyo isinasaboot man niato an satong ministeryo asin kita ‘nagpupuka,’ o nagdadanay na alisto na ihiras an maogmang bareta sa lambang oportunidad. Sa siring dakol an nakaaram manongod ki Jehova asin sa saiyang mga panuga pakatapos na makaolay nin Mga Saksi ni Jehova sa impormal na paagi. Ini an nangyari ki Seymore, sarong lalaking taga-Barbados.
Si Seymore sarong maestro sa pampublikong eskuelahan. Si Charles, sarong maestro na por orang nagtatrabaho sa eskuelahan man sanang iyan asin saro sa Mga Saksi ni Jehova, sarong alistong paraebanghelyo. Saro siang pambilog na panahon na ministro, o payunir, asin ginagamit nia an lambang oportunidad na ihiras sa iba an maogmang bareta. Paagi sa impormal na pagpatotoo ni Charles kaya nadangog ni Seymore sa kaenot-enote an mensahe kan Kahadean.
Dai nahaloy si Seymore determinado na man na ihiras an mga katotoohan kan Biblia sa pinakadakol na mapupuede. Kaya pinonan nia an impormal na mga pakikipag-olay sa mga tawo sa saiyang pinagtatrabawohan, nangorogna sa saiyang mga estudyante. Minsan ngani sa ibang kadagaan an relihion dai dapat na itokdo sa pampublikong mga eskuelahan, an lalaking ini iinasignar na magtokdo nin relihioso asin moral na mga prinsipyo sa buhay. Alagad ngonyan an dating mga punto-de-vista ni Seymore dapit sa mga bagay na ini nasalidahan na kan saiyang bagong makuang kaaraman sa Biblia. Durante nin mga panahon nin reses, nakikipag-olay sia sa saiyang mga estudyante manongod sa panuga nin Dios na sarong bagong kinaban asin sa paglaom na buhay na daing katapusan.
Ano an nagin reaksion kan mga aki? Dakol an nagpaheling nin tunay na interes sa maogmang bareta kan Kahadean ni Jehova. Pag-abot nin panahon, si Seymore nagpoon na magkondukta nin mga pag-adal sa Biblia sa 13 kan saiyang mga estudyante. Dakulaon an saindang interes kaya iinareglo nindang mag-adal sa Biblia nin duwang beses kada semana. Sa katapustapusi an kadaklan sa sainda nagpoon nang umatender sa Kristianong mga pagtiripon sa lokal na Kingdom Hall kan Mga Saksi ni Jehova. Sagkod ngonyan siyam sa sainda an nagin nang dusay asin bautisadong Saksi ni Jehova. Kun dapit ki Seymore, lubos niang inootob ngonyan an saiyang ministeryo paagi sa paglilingkod bilang regular payunir asin magurang sa saro kan mga kongregasyon kan Mga Saksi ni Jehova sa Barbados.
Saro sana ining halimbawa kun paano an Mga Saksi ni Jehova sa bilog na kinaban ‘naggigibo kan gibohon nin mga paraebanghelyo,’ sa sarong kabtang paagi sa pakikikabtang sa impormal na pagpatotoo. Sinusunod ninda an sadol kan Biblia na yaon sa Colosas 4:5, 6, na nagsasabi: “Padagos kamong maglakaw sa kadonongan manongod sa mga nasa luwas, na tinutubos an panahon para sa saindo man sana. An saindong pagtaram magin danay na igwa nin kabootan, na tinimplahan nin asin, tanganing maaraman nindo kun paano kamo matao nin simbag sa lambang saro.”