Igwa daw Kamo kan Espiritu nin Pagtao?
NARISA daw nindo na bako sanang saro an espiritu na nagpapahiro sa mga tawo na magtao? An regalo puedeng kapahayagan nin pagkamoot, nin pagkamatinao, nin apresasyon. Pero namangno daw nindo na an regalo puede man na gumikan sa pagmawot nin saro na paboran sia? O iyan puedeng itao huli sana sa pakamate nin obligasyon o huli ta an nagtao may minamawot na balos.
An regalo puedeng nakakahon na may magayon na laso. Alagad bako daw na totoo na an sarong magayon na regalo puede man na mga burak, pagkakan, o kabootan? Sa katunayan, parateng kabale sa mga regalo na pinakaodok na inaapresyar an pagtao kan sadiri.
May Saro daw na an Pabor Gusto Nindong Makamit?
Bakong pambihira para sa tawo na magregalo sa saro na an pabor gustong makamit. Sa nagkapirang kadagaan an sarong soltero na gustong mapasimbag an sarong iniilusyonan tibaad magtao sa saiya nin mga burak. Alagad an madonong na babae nagheheling nin lihis pa sa regalo. Hinohorophorop nia kun baga an espiritu na nasa likod kan regalo kan soltero sarong mamomoton na espiritu na magibo man sa saiya na marahay na agom na lalaki. An siring na regalo, kun iyan nagpapabanaag nin diosnon na espiritu, puedeng magbunga nin dakulang kaogmahan kapwa sa nagtao asin sa nag-ako.
An Biblia nagsasaysay dapit sa sarong okasyon na si Abigail, an agom ni Nabal, tolos-tolos na nag-andam nin dakol na regalo para ki David, na saiyang minidbid bilang pinili nin Dios na magigin hade sa Israel. Gusto man nia na magkamit nin pabor. An saiyang agom isinikwal si David asin inanggotan an mga tawohan ni David. Pinangengenotan an sarong hukbo nin mga 400 na armadong lalaki, naglarga si David tanganing gadanon si Nabal asin an saiyang pamilya. Nangoltanan si Abigail, na tolos-tolos na nagpadara ki David nin dakol na regalong pagkakan para sa saiyang mga tawohan. Sia mismo uminabot kasunod kan saiyang regalo, asin pakatapos na mapakumbabang humagad nin tawad huli sa ginibo kan saiyang agom, sia nagpaheling nin ebidensia nin dakulang pakamansay mantang sia nangangatanosan ki David.
Marahayon an saiyang katuyohan, asin marahay an resulta. Inako ni David an saiyang regalo asin sinabihan sia: “Sumakat kang may katoninongan sa saimong harong. Uya, hininanyog ko an saimong tingog tanganing ako magkaigwa nin konsiderasyon sa saimong pagkatawo.” Dai nahaloy, pagkagadan ni Nabal, si David nag-alok pa nganing agomon si Abigail, asin may kaogmahan na inako nia ini.—1 Samuel 25:13-42.
Minsan siring, sa ibang kaso an pabor na gustong kamtan nin saro tibaad may kalabot na pagpalaenlaen, patin pagraot sa hustisya. Sa siring na kaso, an regalo sarong suhol. An nagtao naghohona na sia makikinabang, alagad hinahalean nia an saiyang sadiri nin katoninongan sa isip. Yaon permi an peligro na makaaram an iba, na sia papanimbagon. Minsan pa itinao an pabor, puedeng manompongan kan naghagad kaiyan na an reputasyon nia ngonyan saro na an mga motibo kustionable. Nagpapabanaag nin diosnon na kadonongan, an Biblia nagpapatanid tumang sa siring na mga regalo.—Deuteronomio 16:19; Eclesiastes 7:7.
An Regalo daw Gikan sa Boluntad na Puso?
Mayong duda dian—an pagtao sa saro na namomotan nindo huli ta gusto nindong gibohon iyan nagtatao nin orog na kagayagayahan kisa sa pagtao huli ta ipinamamate sa saindo nin iba na maninigo nindong gibohon iyan.
Mapadapit sa pagtipon nin mga ayuda para sa mga kapwa Kristiano na may pangangaipo sa materyal, si apostol Pablo nagtao nin nagkapirang ekselenteng prinsipyo sa diosnon na pagtao. “Kun an pagigin andam yaon na,” an isinurat nia, “iyan orog nang inaako sono sa kun ano an nasa tawo, bakong sono sa kun ano an mayo sa tawo.” Idinagdag nia: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 8:12; 9:7) Sa siring, dakula an depende sa saindo. Imbes na magkautang huli sa daing pakundangan na pagregalo, kamo daw naggagasto sono sa kaya nindo? Imbes na makamateng napipiritan na magtao sa pangenot huli sana sa sosyal o komersial na pangigipit, ginigibo daw nindo an napagdesisyonan nindo sa saindong puso? Dapit sa enot na mga Kristiano na nag-aplikar kan siring na diosnon na mga prinsipyo, si Pablo nagsurat: “Sinda sa sadiri nindang kabotan nakiolay sa samo na may makuring pakimaherak para sa pribilehio nin maboot na pagtao asin para sa pakikikabtang sa ministeryo na nakatalaga para sa mga banal.”—2 Corinto 8:4.
Kabaliktaran kaiyan, an Royal Bank Letter na Nobyembre/Disyembre 1994 nagsabi mapadapit sa mga semana bago mag-abot an Navidad: “An panahon na iyan puedeng helingon na kamugtakan na may artipisyal na kaogmahan na pinukaw nin intereses sa negosyo tanganing agyaton an mga konsumedor na bumakal nin mga bagay na dai man kutana ninda babakalon.” Kun an pamamakal utang, an ano man na satispaksion na gikan sa mga regalo tibaad tolos-tolos na matahoban kun an mga utang panahon nang bayadan.
An Pangenot sa Saindo—An Okasyon? O Kapahayagan nin Pagkamoot?
Nanonompongan daw nindo na an saindong mga pagregalo sa kadaklan ginigibo sa mga okasyon na garo baga naghahagad kaiyan? Kun iyo, tibaad nalilihisan nindo an kadaklan sa kagayagayahan na puedeng itao nin sadiring boot na pagtao.
Dakol an tawong dai naoogma sa mga resulta nin pagregalo sa nakatalagang mga aldaw. Inako nin sarong ina na saro man na parasurat na nahayag sa saiyang mga aki an kahanaban mantang naghaharani an aldaw na linalaoman an mga regalo. Inadmitir nia na naraot an saiya mismong kaogmahan sa sarong magayon na regalo huli ta iba man an saiyang linaoman. Kadakol na bareta an nagsasabi na an mga kapiestahan na nagtatampok nin pag-oroorogma asin pagrinegalohan mga panahon man na igwa nin dakulang emosyonal na depresyon asin pag-abuso sa alkohol.
Sa pakarisa na an pagdodoon sa pagregalo sa panahon nin kapiestahan kun beses may maraot na epekto sa mga aki, an sarong propesor sa sikolohiya na kinotar sa The New York Times nagrerekomendar: “Isipon nindo an pagregalo sa ibang mga aldaw bilang paagi na mainaan an tension.” Sa paghona daw nindo magkakaigwa iyan nin marahay na epekto?
Si Tammy, sarong 12 anyos na nasa pamilyang dai nagseselebrar nin Navidad asin mga kumpleanyo, nagsurat: “Mas maogma na makaako nin regalo kun dai mo man lamang iyan linalaoman.” Sinabi nia na imbes na magregalo nin saro o duwang beses sana kada taon, an saiyang mga magurang nagreregalo sa sainda magtugang sa bilog na taon. Alagad may orog pang mahalaga para sa saiya kisa sa mga regalong iyan. Siring sa pagkasabi nia kaiyan, “Maogmahon an sakong buhay pampamilya.”
An librong Secrets of Strong Families prangkang nagsasabi: “An kadaklan sa sato nagkapirang beses kada taon na inuubos an panahon asin kuarta sa pagpili nin pinakaangay na mga regalo para sa mga kumpleanyo, anibersaryo, o kapiestahan para sa mga tawo na satong namomotan. An pinakamarahay na regalo sa gabos daing gasto. Asin dai nindo kaipuhan na patoson iyan. Kun naniniwala kamo, siring kan kadaklan na tawo, na an saindong buhay an pinakamahalagang rogaring nindo, kun siring sarong parte kan saindong buhay an pinakamahalagang regalo na ikatatao nindo. Itinatao niato an mahalagang marhay na regalong iyan paagi sa satong mga panahon na itinatao niato sa satong mga namomotan.”
Magigibo nindo na an pagtaong iyan lumihis pa sa saindong sadiring pamilya. An sadiring boot na pagtao tanganing panigoan an risang pangangaipo nin iba puedeng magtao nin espesyal na satispaksion. Dinagka kita ni Jesu-Cristo na ipaheling an siring na mamomoton na pagmakolog sa mga dukha, pilay, asin buta, na sinabi pa: “Ika magigin maogma, huli ta sinda dai nin sukat na ikabalos sa saimo.”—Lucas 14:12-14.
An Rockland Journal-News (E.U.A.) dai pa sana nahahaloy na nagbareta nin sarong halimbawa nin siring na klase nin pagtao. Kan magaba an harong nin sarong gurang na babaeng buta, itinogdok sia kan mga katood nia nin bagong harong. Nagkapirang lokal na kompaniya an nagdonar, asin nagtao nin kuarta an sarong lokal na ahensia nin gobyerno. “Minsan siring, an pinakaimportante,” sabi kan diaryo, “an mga 150 katawo, na an kadaklan nag-aatender sa kongregasyon kan Mga Saksi ni Jehova sa Haverstraw, nagdonar nin panahon na itogdok an harong.”
An artikulo nagpadagos: “Sa lugar kan pagtogdok may nakatambak na materyales kataed kan mga lamesa na pano nin pagkakan. Sa laog nin duwang aldaw an mga trabahador nakatogdok nin harong na puede sa duwang pamilya, tolong eskalon an langkaw. . . . An Mga Saksi ni Jehova midbid sa saindang kakayahan sa marikas na pagtogdok nin mga estruktura. . . . Minsan siring, an rikas na iyan kabaliktaran sa pagkapermanente kan saindang misyon: gibohon na matagal an sarong gibo nin pagkamoot. Dai maheheling ni Ms. Blakely an saiyang bagong harong, alagad mamamate iyan kan saiyang mga kamot, asin naaaraman kan saiyang puso kun gurano kararom na iyan napahiro kan daing kapasloan na aksion na ini.”
Espiritu nin Pagkamatinao sa Bilog na Taon
An mga tunay na may matinaong espiritu dai naghahalat nin espesyal na mga aldaw. An saindang buhay dai nasesentro sa sadiri sana. Kun sinda nakaaako nin sarong marahay na bagay, naoogma sinda na ihiras iyan sa iba. Dai ini nangangahulogan na sinda bangkag na mga pararegalo. Dai iyan nangangahulogan na sinda nagtatao sagkod na an saindang pamilya napababayaan na. Dai iyan nangangahulogan na sinda nagtatao na dai iniisip kun ano an magigin epekto sa nag-aako. Pero, sinda mga tawo na “matinao,” siring sa itinokdo ni Jesus sa saiyang mga disipulo na gibohon.—Lucas 6:38.
Namamangno ninda an mga kamugtakan nin mga katood asin kataed na gurang na, naghehelang, o nangangaipo nin pagpakosog sa ibang dahelan. An saindang “regalo” puedeng pagsaod para sa mga ini o pagtabang sa gibohon sa harong. Iyan tibaad pagtiak nin songo o pagpala nin niebe. Iyan tibaad sarong mangko nin pagkakan o sarong oras na pagsongko asin pagbasang magkaibanan. An sainda mismong buhay tibaad sibot alagad bakong sibot na marhay tanganing tumabang. Nanodan ninda sa eksperyensia na tunay na igwa nin “orog na kaogmahan sa pagtao kisa sa pag-ako.”—Gibo 20:35.
An pinakadakulang Paratao sa gabos, siempre, iyo an satong Kaglalang, si Jehova Dios. Sia “nagtatao sa gabos nin buhay asin hinangos asin gabos na bagay.” (Gibo 17:25) Sa Biblia, tinatawan man nia kita nin pakarorop kun dapit sa saiyang katuyohan na taposon an karatan, helang, asin kagadanan, saka gibohon na paraiso an dagang ini. (Salmo 37:10, 11; Kapahayagan 21:4, 5) Kun manodan na ini, an mga may matinaong espiritu dai sinasadiri an maogmang bareta na iyan. An saro sa saindang pinakadakulang kaogmahan iyo na ihiras iyan sa iba. Tunay na yaon sa sainda an diosnon na espiritu nin pagtao. Iyan daw an espiritu na saindong pinatatalubo?
[Mga retrato sa pahina 7]
An pira sa pinakamahalagang mga regalo daing gasto