“Idto an Pinakamagayon na Regalong Itinao Sako”

Iyan an sinabi kan 13 anyos na aking babayi kan regaluhan siya nin ido. Sarong asensadong negosyanteng babayi an nagsabi na an kompyuter na irinegalo kan saiyang ama kan siya high school pa an nagpabago sa buhay niya. Asin para sa bago pa sanang kasalon na agom na lalaki, an kard na ginibo kan agom niya para sa inot nindang anibersaryo an pinakamagayon na regalong naresibi niya.

Kada taon, ginagamit kan dakul na tawo an saindang panahon asin kusog tanganing maghanap nin “pinakamagayon” na regalong itatao sa saindang amigo o kapamilya para sa sarong espesyal na okasyon. Asin haros gabos kita gustong-gustong makadangog nin reaksiyon na kapareho kan nasambitan sa itaas. Ika, gusto mo man daw magtao o makaresibi nin mga regalong mapapahalagahan na marhay?

Magayon nanggad isip-isipon iyan, bako lang huli sa puwedeng magin epekto kan regalo sa makakaresibi kaiyan kundi huli man sa puwedeng mamatian kan kagtao. Arog kan sinasabi kan Bibliya: “Igwang urog na kaugmahan sa pagtao kisa sa pag-ako.” (Gibo 20:35) Siyempre, puwedeng magin mas nakakaugma an pagtao kun an regalo papahalagahan na marhay kan nag-ako.

Kaya pag nagtatao nin regalo, ano an gigibuhon mo para ika asin an tatawan mo magin tunay na maugma? Asin kun dai mo man maitao an “pinakamagayon” na regalo, ano an magigibo mo para mapahalagahan talaga iyan?