Ligtas Na daw Kamo?
SI Johnny dies anyos kan an sarong lalaki pinondo sia sa sarong peryahan asin naghapot: “Solterito, ano inaako mo si Jesu-Cristo bilang saimong Kagurangnan asin Paraligtas?” Pambihirang hapot idto para ki Johnny, mantang kaidto pa tinutubod na nia si Jesus. Kaya sia nagsimbag, “Siempre nagtutubod ako.” “Omawon an Kagurangnan!” an kurahaw kan lalaki sa pagdangog kan gabos. “Saro pang kalag an naligtas para ki Cristo!”
Arog sana daw talaga kaiyan kasimple an kaligtasan? Si Johnny daw “ligtas na” poon kan sabihon nia an mga tataramon na idto, dawa pa ano an gibohon nia sa natatada niang buhay? Dakol na sinserong tawo an masimbag nin iyo. Nagkapirang relihiosong tract an nagsasabi na isurat an petsa kan kamo “naligtas” tanganing iyan magirumdoman nindo.
An sarong klerigo nagsurat na “basta tumubod na ki Cristo . . . an kaaabtan nin saro permanente nang areglado.” Sia naghingako na sinasabi kan Biblia na an kaligtasan depende sa uniko, sarong beses na “akto nin pagtubod, bakong sa nagpapadagos na pagtubod.” An saro pang parasurat dapit sa relihion nagsurat: “Ini sarong natapos nang gibohon. Iyan nagibo na para sa saindo . . . An saindong ‘pakikilaban tapos na.’ An saindong ‘kasalan hinale na.’” Alagad minsan an mga tawong marigon na nagtutubod na ini totoo tibaad may maheling na problema digdi. Malinaw na an dakol na tawong sinabihan na sinda “ligtas na” dai namumuhay sa paaging sinasabi kan Biblia na maninigong ipamuhay ninda. An sarong komon na paliwanag iyo na posibleng dai man talaga ninda “inako” si Cristo.
Kaya, ano daw talaga an kahulogan kan “pag-ako” ki Jesus? Iyan daw sarong beses na akto nin pagtubod, o iyan daw sarong nagpapadagos na dalan nin buhay? Kaipuhan daw na magin makosog nin igo an satong pagtubod tanganing mamotibar kitang humiro? Puede ta daw talagang akoon an mga pakinabang sa atang ni Jesus na daing kaibang paninimbagan na sumunod sa saiya?
Dakol na tawo an gusto kan mga bendisyon alagad habo kan paninimbagan na sumunod asin kumuyog ki Jesus. Sa katunayan, an terminong “kumuyog” parateng nakadidistorbo sa sainda. Pero si Jesus nagsabi: “Madia sumunod ka sa sako.” (Lucas 18:18-23) Asin an Biblia nagpapahayag: ‘An mga dai nagkukuyog kan maogmang bareta manongod sa satong Kagurangnan na si Jesus magtitios kan silot nin daing katapusan na pagkalaglag.’—2 Tesalonica 1:8, 9; Mateo 10:38; 16:24.
An Biblia nagsasabi nin dakol na bagay na nagpapalataw nin seryosong mga hapot manongod sa itinotokdo manongod sa kaligtasan. Kun mawot nindong siyasaton kun ano an aktuwal na sinasabi kan Biblia sa temang ini, manonompongan nindo na partikularmenteng interesante an minasunod na mga pahina. Buksan an saindong mga Biblia, asin basahon an sitadong mga teksto tanganing helingon kun ano an itinokdo ni Jesus asin kan saiyang mga apostol manongod sa mahalagang bagay na ini.