Kaligtasan—An Talagang Kahulogan Kaiyan

‘ANO ligtas ka na?’ Sa parate, an mga naghahapot kaini naghohona na sinda ligtas na huli ta ‘inako na ninda si Jesus bilang saindang personal na Paraligtas.’ Pero an iba naghohona na laen-laen an dalan pasiring sa kaligtasan asin basta ‘si Jesus nasa puso mo,’ bakong mahalaga kun ano an tinutubod nindo o dawa kun sa anong iglesia kamo kabilang.

An Biblia nagsasabi na kabotan nin Dios na “an gabos na klase nin tawo makaligtas.” (1 Timoteo 2:​3, 4) Sa siring an kaligtasan makakamtan kan gabos na maako kaiyan. Alagad ano talaga an boot sabihon kan pakaligtas? Talaga daw na iyan sarong bagay na basta na sana nangyayari sa saindo na kakadikit an o mayong paghihingoa sa kabtang nindo?

An terminong “kaligtasan” nangangahulogan nin “pakaligtas sa peligro o kalaglagan.” Sa siring an kalabot sa tunay na kaligtasan bako sanang maaliwalas na kamugtakan kan isip. Iyan nangangahulogan nin pakaligtas sa kalaglagan kan presenteng maraot na palakaw na ini nin mga bagay asin sa katapustapusi sa kagadanan mismo! Alagad siisay man nanggad an ililigtas nin Dios? Bilang simbag, siyasaton ta an itinokdo ni Jesu-Cristo dapit sa temang ini. An mga resulta kan satong pag-imbestigar tibaad ikasorpresa nindo.

Kaligtasan​—Yaon daw sa Gabos na Relihion?

Sa sarong okasyon, nakipag-olay si Jesus sa sarong Samaritana. Minsan ngani bako siang Judia, tama man an pagtubod nia na an Mesiyas madatong “na inaapod Cristo.” (Juan 4:25) Igo na daw an siring na pagtubod tanganing sia makaligtas? Dai, huli ta mapusong sinabihan ni Jesus an babae: “Kamo nagsasamba kaidtong dai nindo namimidbid.” Aram ni Jesus na tanganing makamtan kan babaeng ini an kaligtasan, kaipuhan na liwaton nia an saiyang paagi nin pagsamba. Kun siring ipinaliwanag ni Jesus: “Minsan siring, an oras madatong, asin ngonyan iyo na, na an tunay na mga parasamba masamba sa Ama sa espiritu asin katotoohan, huli ta, sa katunayan, hinahanap kan Ama an mga siring na magsamba sa saiya.”​—Juan 4:​22, 23.

An saro pang okasyon na dian ihinayag ni Jesus an pagmansay nia sa kaligtasan may labot sa mga Fariseo, sarong prominenteng relihiosong sekta nin Judaismo. An mga Fariseo pinarigon an sarong sistema nin pagsamba asin an pagtubod ninda iyan inooyonan nin Dios. Alagad hinanyoga an mga tataramon ni Jesus sa mga Fariseo: “Kamong mga parasaginsagin! Tama si Isaias kan sia humula manongod sa saindo: ‘An mga tawong ini nagtataong onra sa sako paagi sa saindang mga ngabil, alagad an saindang puso harayo sa sako. Sinasamba ninda ako nin sayang sana; an saindang mga katokdoan mga reglamento sana na itinokdo nin mga tawo.’”​—Mateo 15:​7-9, New International Version.

Kumusta man an dakol na grupong relihioso ngonyan na naghihingakong nagtutubod ki Cristo? Aaprobaran daw ni Jesus an gabos na iyan bilang lehitimong mga paagi sa pagkamit nin kaligtasan? Dai kita kaipuhan na magpatibasang sa bagay na ini, huli ta si Jesus malinaw na nagsabi: “Bakong gabos na nagsasabi sa sako, ‘Kagurangnan, Kagurangnan,’ makalalaog sa kahadean kan kalangitan, kundi idtong naggigibo kan kabotan kan sakong Ama na nasa kalangitan. Balakid an masarabi sa sako sa aldaw na iyan, ‘Kagurangnan, Kagurangnan, bakong kami naghula sa ngaran mo, asin nagpaluwas nin mga demonyo sa ngaran mo, patin naggibo nin dakol na ngangalasan sa ngaran mo?’ Alagad ta sasabihan ko sinda: Dai ko kamo noarin man namidbid! Humarayo kamo sa sako, kamong mga paragibo nin katampalasanan.”​—Mateo 7:​21-23.

An Tamang Kaaraman Dapit ki Jesus Mahalagang Marhay Para sa Kaligtasan

An mga tataramon na ini ni Jesus nakapapepensar an mga ipinaririsa. An mga iyan nagpaparisa na an dakol na tawong deboto dai ‘nakagigibo kan kabotan kan Ama.’ Paano, kun siring, makakamit nin saro an tunay na kaligtasan? An 1 Timoteo 2:​3, 4 minasimbag: “An kabotan [nin Dios] iyo na an gabos na klase nin tawo makaligtas asin makaabot sa tamang kaaraman kan katotoohan.”​—Ikomparar an Colosas 1:​9, 10.

An kaaraman na iyan importante sa pagkamit nin kaligtasan. Kan an sarong Romanong bantay sa bilanggoan hapoton si apostol Pablo asin an kaiba nia, si Silas, “Ano an dapat kong gibohon tanganing maligtas?” sinda nagsimbag: “Tumubod ka sa Kagurangnan na Jesus asin ika maliligtas, ika asin an saimong kairiba sa harong.” (Gibo 16:​30, 31) Boot sabihon daw kaiyan na an kaipuhan sanang gibohon kan bantay sa bilanggoan asin kan saiyang pamilya may mamatean sinda sa saindang puso? Dai, enot, dai ninda tunay na ‘matutubod an Kagurangnan na Jesus’ apuera sana kun may pakasabot sinda sa kun siisay si Jesus, ano an saiyang ginibo, asin ano an saiyang itinokdo.

Halimbawa, itinokdo ni Jesus an pagpatindog sa sarong langitnon na gobyerno​—an “kahadean nin Dios.” (Lucas 4:43) Itinao man nia an mga prinsipyo sa Kristianong moralidad asin gawe-gawe. (Mateo, kapitulo 5-7) Isinabi nia an magigin paninindogan kan saiyang mga disipulo pag-abot sa politikal na mga bagay. (Juan 15:19) Inestablisar nia an sarong lakop sa globong programa nin pagtotokdo asin isinugo an saiyang mga parasunod na makikabtang dian. (Mateo 24:14; Gibo 1:8) Iyo, an ‘pagtubod ki Jesus’ nangahulogan nin pagsabot sa dakol na bagay! Bakong makangangalas, kun siring, na si Pablo asin Silas ‘itinaram an tataramon ni Jehova sa [bantay sa bilanggoan] kaiba an gabos na nasa saiyang harong’ bago binautismohan an bagong nagturubod na ini.​—Gibo 16:​32, 33.

An Tamang Kaaraman Dapit sa Dios Mahalaga Man na Marhay

An sarong kinakaipuhan na kabtang kan tunay na pagtubod ki Jesus may labot sa pagsamba sa Dios na sinasamba mismo ni Jesus. Si Jesus namibi: “Ini nangangahulogan nin buhay na daing katapusan, an saindang pagkua nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”​—Juan 17:3.

Durante kan saiyang ministeryo digdi sa daga, an Aki nin Dios perming dinadara an atension sa saiyang Ama asin bakong sa saiyang sadiri. Nungka siang naghingako na sia an Dios na Makakamhan sa gabos. (Juan 12:​49, 50) Sa dakol na okasyon lininaw ni Jesus an saiyang kamugtakan sa areglo nin Dios paagi sa pagsabi na sia sakop kan saiyang Ama. (Lucas 22:​41, 42; Juan 5:19) Tara, si Jesus nagpahayag: “An Ama orog na dakula kisa sako.” (Juan 14:28) Itinokdo daw sa saindo kan saindong iglesia an tunay na relasyon nin Dios asin ni Cristo? O napatubod daw kamo na si Jesus mismo an Dios na Makakamhan sa gabos? An saindong kaligtasan nasasarig sa pagkaigwa kan tamang pakasabot.

Sa Pamibi kan Kagurangnan, sinadol ni Jesus an saiyang mga disipulo na mamibi: “Santipikaron logod an saimong ngaran.” (Mateo 6:9) An kadaklan na traduksion kan Biblia itinago an ngaran nin Dios, na tinatradusir iyan na “Kagurangnan.” Alagad sa suanoy na mga kopya kan “Daan na Tipan,” an ngaran nin Dios naglataw nin labing anom na ribong beses! Sa siring an Salmo 83:18 nagsasabi: “Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.” Tinokdoan daw kamo na gamiton an ngaran nin Dios, an Jehova? Kun dai, namemeligro an saindong kaligtasan, ta “an lambang nag-aapod sa ngaran ni Jehova maliligtas”!​—Gibo 2:21; ikomparar an Joel 2:32.

Sa Espiritu Asin Katotoohan

Dinara man ni Jesu-Cristo an atension sa Tataramon nin Dios, an Biblia. Kun ipinaliliwanag an pagmansay nin Dios sa nagkapirang bagay, parate niang sinasabi: “Nasusurat.” (Mateo 4:​4, 7, 10; 11:10; 21:13) Kan banggi bago sia magadan, si Jesus namibi mapadapit sa saiyang mga disipulo: “Santipikaron mo sinda paagi sa katotoohan; an saimong tataramon katotoohan.”​—Juan 17:17.

Sa siring an pagkaigwa nin pakasabot sa mga katokdoan kan Tataramon nin Dios, an Biblia, saro pang kahagadan para sa kaligtasan. (2 Timoteo 3:​16) Solamente an Biblia an nakasisimbag sa mga hapot na arog baga kan: Ano an kahulogan nin buhay? Taano ta tinogotan nin Dios an karatan na magpadagos sa halawigon na panahon? Ano an nangyayari sa sarong tawo pagkagadan nia? Talaga daw na pinadudusahan nin Dios an mga tawo sa sarong nagkakalayong impierno? Ano an katuyohan nin Dios para sa daga?a An saro dai makasasamba sa Dios sa tamang paagi kun mayo nin tamang pakasabot sa mga isyung iyan, huli ta si Jesus nagsabi: “An tunay na mga parasamba masamba sa Ama sa espiritu asin katotoohan.”​—Juan 4:23.

An Pagtubod Nagpapahiro

Bako sanang pagkua nin impormasyon an kalabot sa kaligtasan. Sa sarong naghihimateng puso, an tamang kaaraman dapit sa Dios nagbubunga nin pagtubod. (Roma 10:​10, 17; Hebreo 11:6) An pagtubod na iyan nagpapahiro sa saro. Halimbawa, an Biblia nagsasadol: “Magsorolsol kamo, kun siring, asin magbakle tanganing an saindong mga kasalan mapara, tanganing dumatong an mga panahon nin kaginhawahan hale sa persona ni Jehova.”​—Gibo 3:19.

Iyo, kalabot man sa kaligtasan an pagkuyog sa mga pamantayan nin Dios sa gawe-gawe asin moralidad. Sa nakapababagong impluwensia kan Tataramon nin Dios, an haloy nang mga ugale nin pagputik asin pandadaya nasasalidahan nin pagkaonesto asin pagkasadiosan. (Tito 2:10) An inmoral na mga gibo, arog baga kan homoseksuwalidad, pagsambay, asin pakikisaro, binabayaan asin sinasalidahan nin mabining gawe-gawe sa moral. (1 Corinto 6:​9-​11) Ini bakong temporaryong paglikay basado sa emosyon kundi permanenteng pagliwat na bunga nin maingat na pag-adal asin pag-aplikar kan Tataramon nin Dios.​—Efeso 4:​22-24.

Pag-abot nin panahon, an pagkamoot asin pag-apresyar sa Dios nagpapahiro sa sarong sadiosan an puso na lubos na magdusay sa Dios asin simbolisaran iyan paagi sa bautismo sa tubig. (Mateo 28:​19, 20; Roma 12:1) An bautisadong mga Kristiano ligtas na sa pagheling nin Dios. (1 Pedro 3:21) Sa maabot na kalaglagan kan maraot na kinaban na ini, lubos sindang ililigtas nin Dios paagi sa pagpadanay sa sainda na buhay sa kahorasaan na iyan.​—Kapahayagan 7:​9, 14.

An Puedeng Magin Kahulogan Para sa Saindo kan Kaligtasan

Malinaw gikan sa halipot na pag-orolay na ini na an kalabot sa pagkamit nin kaligtasan bako sanang ‘pagigin yaon kan Kagurangnan na Jesus sa saindong puso.’ Iyan nangangahulogan nin pagkua nin tamang kaaraman dapit ki Jehova Dios asin ki Jesu-Cristo asin paggibo nin kinakaipuhan na mga pagliliwat sa buhay nin saro. An paggibo kaini tibaad garo magabat, alagad an Mga Saksi ni Jehova andam na tabangan kamo sa paghihingoang ini. Paagi sa daing bayad na pag-adal sa Biblia sa harong, matatabangan ninda kamong pumoon na maglakaw sa dalan na pasiring sa tunay na kaligtasan.b

Huli sa kaharanihan kan maabot na aldaw nin paghokom nin Dios, an paggibo kaiyan mas apurado kisa kasuarin pa man! Ngonyan na an panahon na himateon an mga tataramon kan propeta: “Bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”​—Sofonias 2:​2, 3.

[Mga Nota sa Ibaba]

[Kahon sa pahina 6]

An Kaligtasan Bunga nin . . .

◻ Pagkua nin tamang kaaraman dapit sa Dios asin ki Jesus.​—Juan 17:3.

◻ Paggibo nin pagtubod.​—Roma 10:17; Hebreo 11:6.

◻ Pagsolsol asin pagbakle.​—Gibo 3:​19; Efeso 4:​22-24.

◻ Pagdusay asin bautismo.​—Mateo 16:24; 28:​19, 20.

◻ Padagos na pagpapahayag sa publiko.​—Mateo 24:14; Roma 10:10.

[Mga retrato sa pahina 7]

An pag-adal sa Biblia, pag-aplikar kan nanodan, pagdusay, asin bautismo mga tangga pasiring sa kaligtasan