Magpahayag sa Publiko Para sa Kaligtasan

“An gabos na nag-aapod sa ngaran ni Jehova maliligtas.”—ROMA 10:13.

1. Sa bilog na nag-aging kasaysayan, anong mga patanid an ipinaabot?

AN KASAYSAYAN may ilinaladawan na nagkapirang “aldaw ni Jehova.” An Baha kan aldaw ni Noe, an pagpara sa Sodoma asin Gomorra, asin an paglaglag sa Jerusalem kan 607 B.C.E. asin 70 C.E. darakula asin makangingirhat na mga aldaw ni Jehova. Iyan mga aldaw nin pagtao nin maninigong hustisya sa mga nagrebelde tumang ki Jehova. (Malaquias 4:5; Lucas 21:22) Durante kan mga aldaw na idto, dakol an nagadan huli sa saindang karatan. Alagad may nagkapirang natadang buhay. Pinangyari ni Jehova na ikapaabot an mga patanid, na ipinaiisi sa mga maraot an nagdadangadang na kalamidad asin tinatawan an mga matanos an puso nin oportunidad na makanompong nin kaligtasan.

2, 3. (a) Anong makahulang patanid an kinotar kaidtong Pentecostes? (b) Poon kan Pentecostes 33 C.E., ano an kahagadan sa pag-apod sa ngaran ni Jehova?

² An pagkalaglag kan Jerusalem kan 70 C.E. sarong pambihirang halimbawa kaini. Ihinuhula an pangyayaring iyan haros 900 na taon bago pa, si propeta Joel nagsurat: “Matao ako nin mga ngangalasan sa kalangitan asin sa daga, dugo asin kalayo patin mga hariging aso. An aldaw mismo magigin kadikloman, asin an bulan magigin dugo, bago an pagdatong kan dakula asin makangingirhat na aldaw ni Jehova.” Paano matatadang buhay an siisay man sa siring kamakatatakot na panahon? Si Joel nagsurat na pinasasabngan: “Mangyayari na an gabos na mag-apod sa ngaran ni Jehova makaliligtas; huli ta sa Bukid nin Sion asin sa Jerusalem magkakaigwa kan mga nakaligtas, arog kan isinabi ni Jehova, asin sa tahaw kan nagkataradang buhay, na inapod ni Jehova.”​—Joel 2:​30-32.

³ Kan Pentecostes 33 C.E., nagpahayag si apostol Pedro sa sarong kadaklan nin mga Judio asin proselito sa Jerusalem asin kinotar nia an hula ni Joel, na ipinaheheling na an mga nagdadangog sa saiya may malalaoman na kaotoban sa saindang kaaldawan: “Magpapaheling ako nin mga ngangalasan sa langit sa itaas asin nin mga tanda sa daga sa ibaba, dugo asin kalayo asin alisngaw nin aso; an aldaw magigin kadikloman asin an bulan magigin dugo bago dumatong an dakula asin mamuraway na aldaw ni Jehova. Asin an lambang nag-aapod sa ngaran ni Jehova maliligtas.” (Gibo 2:​16-21) An mga kadaklan na naghihinanyog ki Pedro gabos sakop kan Ley ni Moises, asin kun siring aram ninda an ngaran ni Jehova. Ipinaliwanag ni Pedro na, poon sa panahon na idto, may iba pang kalabot sa pag-apod sa ngaran ni Jehova. Mahalagang marhay, kaiba digdi an pagpabautismo sa ngaran ni Jesus, an saro na ginadan dangan binuhay liwat sa inmortal na buhay sa langit.​—Gibo 2:​37, 38.

4. Anong mensahe an ipinahayag kan mga Kristiano nin mahiwas?

⁴ Poon kan Pentecostes, pinalakop kan mga Kristiano an bareta manongod sa binuhay liwat na si Jesus. (1 Corinto 1:​23) Ipinahayag ninda na an mga tawo puedeng amponon bilang espirituwal na mga aki ni Jehova Dios asin magin kabtang nin bagong “Israel nin Dios,” sarong espirituwal na nasyon na ‘mapahayag nin mahiwas kan mga kamurawayan ni Jehova.’ (Galacia 6:​16; 1 Pedro 2:9) An mga nagdanay na fiel sagkod sa kagadanan magmamana nin inmortal na buhay sa langit bilang kairibang paramana ni Jesus sa saiyang langitnon na Kahadean. (Mateo 24:13; Roma 8:​15, 16; 1 Corinto 15:​50-​54) Dugang pa, an mga Kristianong ini magbabalangibog kan pagdatong kan dakula asin makangingirhat na aldaw ni Jehova. Kaipuhan na patanidan ninda an Judiong kinaban na iyan maagi nin kahorasaan na makalalabi sa ano man na tuminama sa Jerusalem asin sa naghihingakong banwaan nin Dios sagkod sa panahon na idto. Minsan siring, igwa nin mga matatadang buhay. Sairisay? An mga nag-aapod kaidto sa ngaran ni Jehova.

“Sa Huring mga Aldaw”

5. Anong mga kaotoban nin hula an nangyayari ngonyan?

⁵ Sa dakol na paagi, an mga kamugtakan kan panahon na idto nanganino kan naheheling niato ngonyan. Poon kan 1914, an katawohan nabubuhay sa sarong espesyal na peryodo nin panahon na inaapod sa Biblia na “panahon kan katapusan,” “pagtatapos kan palakaw nin mga bagay,” asin “huring mga aldaw.” (Daniel 12:​1, 4; Mateo 24:​3-8; 2 Timoteo 3:​1-5, 13) Sa satong siglo, an maringis na mga guerra, daing pakundangan na kadahasan, asin pagkaraot kan sosyedad asin kan palibot nagtatao nin pambihirang kaotoban kan hula sa Biblia. Ini gabos kabtang kan tanda na ihinula ni Jesus, na nagpaparisa na maeeksperyensiahan na kan katawohan an pangultimo, dai mapagdududahan na makangingirhat na aldaw ni Jehova. Ini masagkod sa ralaban nin Armagedon, an kulminasyon nin sarong “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.”​—Mateo 24:21; Kapahayagan 16:16.

6. (a) Paano naghihiro si Jehova tanganing iligtas an mga mahoyo? (b) Saen niato makukua an hatol ni Pablo sa kun paano matatadang buhay?

⁶ Mantang orog na naghaharani an aldaw nin grabeng panlaglag, si Jehova naghihiro tanganing iligtas an mga mahoyo. Durante kan “panahon [na ini] kan katapusan,” tinipon nia an mga nawawalat pa kan espirituwal na Israel nin Dios asin dinara an atension kan saiyang mga lingkod digdi sa daga, poon kan mga taon nin 1930 padagos, sa pagtipon nin “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon.” Bilang sarong grupo, an mga ini buhay na ‘maluwas sa dakulang kahorasaan.’ (Kapahayagan 7:​9, 14) Alagad paano maseseguro nin lambang indibiduwal an saiyang pagkatadang buhay? Sinisimbag ni apostol Pablo an hapot na iyan. Sa Roma kapitulo 10, sia nagtatao nin marahay na hatol para sa pagkatadang buhay​—hatol na aplikado kaidtong saiyang kaaldawan asin aplikado pa giraray sa satong kaaldawan.

Sarong Pamibi Para sa Kaligtasan

7. (a) Anong paglaom an sinasabi sa Roma 10:​1, 2? (b) Taano ta ikapababalangibog ngonyan ni Jehova nin mas mahiwas an “maogmang bareta”?

⁷ Kan isurat ni Pablo an libro nin Roma, isinikwal na ni Jehova an Israel bilang nasyon. Pero, an apostol nagpatotoo pa man giraray: “An mawot kan sakong puso asin an sakong pagngayongayo sa Dios para sa sainda sa katunayan para sa saindang kaligtasan.” Naglalaom sia na makamtan kan indibiduwal na mga Judio an tamang kaaraman dapit sa kabotan nin Dios, na magbubunga kan pagkaligtas ninda. (Roma 10:​1, 2) Dugang pa, mawot ni Jehova na makaligtas an mga nasa bilog na kinaban nin katawohan na naggigibo nin pagtubod, siring kan ipinaririsa sa Juan 3:16: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” An pantubos na atang ni Jesus nagbukas kan dalan para sa dakulang kaligtasan na iyan. Arog kaidtong aldaw ni Noe asin iba pang mga aldaw nin paghokom na suminunod, ipinababalangibog ni Jehova an “maogmang bareta,” na nagtotokdo kan dalan nin kaligtasan.​—Marcos 13:​10, 19, 20.

8. Sa pag-arog ki Pablo, kiisay ngonyan nagpapaabot nin marahay na boot an tunay na mga Kristiano, asin paano?

⁸ Ipinaheheling an saiya mismong marahay na boot kapwa sa Judio asin Hentil, si Pablo naghulit sa gabos na oportunidad. Sia ‘nangongombensir sa mga Judio asin Griego.’ Sinabihan nia an kamagurangan sa Efeso: “Dai ako nagpogol sa pagsabi sa saindo kan ano man na bagay na kapakipakinabang ni sa pagtokdo sa saindo sa publiko asin sa pagharongharong. Kundi lubos akong nagpatotoo kapwa sa mga Judio asin Griego manongod sa pagsolsol sa Dios asin pagtubod sa satong Kagurangnan na si Jesus.” (Gibo 18:4; 20:​20, 21) Sa kaagid na paagi, an mga Saksi ni Jehova ngonyan ginagamit an saindang sadiri sa paghuhulit, bako sanang sa naghihingakong mga Kristiano kundi sa gabos na banwaan, patin “sagkod sa kaporoporohi kan daga.”​—Gibo 1:8; 18:5.

Pagtuga kan “‘Tataramon’ nin Pagtubod”

9. (a) Anong klaseng pagtubod an ineenkaminar kan Roma 10:​8, 9? (b) Noarin asin paano niato maninigong ituga an satong pagtubod?

⁹ Kaipuhan para sa kaligtasan an nagdadanay na pagtubod. Kinokotar an Deuteronomio 30:​14, si Pablo nagpahayag: “‘An tataramon harani sa saimo, sa saimong sadiring ngoso asin sa saimong sadiring puso’; an boot sabihon, an ‘tataramon’ nin pagtubod, na samong ihinuhulit.” (Roma 10:8) Mantang ihinuhulit ta “an ‘tataramon’ [na iyan] nin pagtubod,” iyan orog na ikinauukit sa satong puso. Totoo iyan ki Pablo, asin an saiyang dugang pang mga tataramon puedeng magpakosog sa satong desisyon na magin arog nia sa paghiras kan pagtubod na iyan sa iba: “Kun ika magpahayag sa publiko kan ‘tataramon sa saimong sadiring ngoso,’ na si Jesus Kagurangnan, asin gumibo ka nin pagtubod sa saimong puso na binuhay sia liwat nin Dios hale sa mga gadan, ika maliligtas.” (Roma 10:9) An pagtuga na ini bako sanang ginigibo sa atubangan nin iba sa panahon nin bautismo kundi iyan dapat na magin nagpapadagos na pagtuga, sarong maigot na pagpatotoo sa publiko manongod sa gabos na marahayon na aspekto kan katotoohan. An katotoohan na iyan nakasentro sa mahal na marhay na ngaran kan Soberanong Kagurangnan na si Jehova; sa satong Mesiyanikong Hade asin Paratubos, an Kagurangnan na Jesu-Cristo; asin sa kahangahangang mga panuga sa Kahadean.

10. Kaoyon sa Roma 10:​10, 11, paano dapat na gamiton “an ‘tataramon’ [na ini] nin pagtubod”?

¹⁰ Mayo nin kaligtasan para sa siisay man na dai nag-aako asin nag-aaplikar kan “‘tataramon’ [na ini] nin pagtubod,” siring sa sinasabi pa kan apostol: “Paagi sa puso an saro naggigibo nin pagtubod para sa katanosan, alagad ta paagi sa ngoso na an saro nagpapahayag sa publiko para sa kaligtasan. Huli ta an Kasuratan nagsasabi: ‘Mayo nin nagtutubod sa saiya na mapapasopog.’” (Roma 10:​10, 11) Kita dapat na magkaigwa nin tamang kaaraman dapit sa “‘tataramon’ [na ini] nin pagtubod” asin magpadagos na pataluboon iyan sa satong puso tanganing mamotibar kita na sabihon iyan sa iba. Si Jesus mismo pinagigirumdom kita: “Kun siisay man an ikasopog ako asin an sakong mga tataramon sa parasambay asin makasalan na kapag-arakian na ini, ikasosopog man sia kan Aki nin tawo kun sia dumatong na sa kamurawayan kan saiyang Ama kaiba an banal na mga anghel.”​—Marcos 8:38.

11. Gurano kahiwas dapat na ibalangibog an maogmang bareta, asin taano?

¹¹ Siring sa ihinula ni propeta Daniel, sa panahon na ini kan katapusan, “an mga igwa nin pakarorop” naheheling na minasirang “siring sa kaliwanagan kan kahiwasan,” mantang naglalakop an pagpatotoo sa Kahadean sagkod sa kaporoporohi kan daga. Sinda “nagdadara sa dakol pasiring sa katanosan,” asin an tunay na kaaraman nagigin nanggad abunda, huli ta si Jehova nagtatao nin orog na liwanag sa mga hula mapadapit sa panahon na ini kan katapusan. (Daniel 12:​3, 4) Uya an sarong mensahe nin kaligtasan na mahalagang marhay para sa pagkatadang buhay kan gabos na namomoot sa katotoohan asin katanosan.

12. Paano an Roma 10:12 konektado sa sugo sa anghel na ilinadawan sa Kapahayagan 14:6?

¹² Nagpapadagos si apostol Pablo: “Mayo nin pagkakalaen an Judio asin Griego, huli ta saro sana an Kagurangnan kan gabos, na mayaman sa gabos na nag-aapod sa saiya.” (Roma 10:12) An “maogmang bareta” dapat na ibalangibog ngonyan nin mas mahiwas sa bilog na globo​—sa gabos na banwaan, sagkod sa kaporoporohi kan daga. An anghel sa Kapahayagan 14:6 padagos na naglalayog sa tahaw kan langit, na ipinagkakatiwala sa sato an “daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan.” Paano makikinabang digdi an mga naghihimate?

Pag-apod sa Ngaran ni Jehova

13. (a) Ano an satong teksto kan taon para sa 1998? (b) Taano ta angay na marhay ngonyan an tekstong ini kan taon?

¹³ Kinokotar an Joel 2:​32, si Pablo nagpapahayag: “An gabos na nag-aapod sa ngaran ni Jehova maliligtas.” (Roma 10:13) Kanigoan kaangay na an mga tataramon na iyan pinili na magin teksto kan taon kan Mga Saksi ni Jehova para sa 1998! Kasuarin man dai pa nagin orog na mahalaga na umabanteng nagtitiwala ki Jehova, na ipinahahayag an saiyang ngaran asin an marahayon na mga katuyohan na irinirepresentar kaiyan! Arog kaidtong enot na siglo, siring man sa huring mga aldaw kan presenteng maraot na palakaw nin mga bagay, nadadangog an nag-aagaw-aw na kurahaw: “Paligtas kamo hale sa bikong kapag-arakian na ini.” (Gibo 2:40) Iyan garo tanog nin trumpetang pangagda para sa gabos na tawong may takot sa Dios sa bilog na kinaban na mag-apod ki Jehova na sinda tawan logod nin kaligtasan siring man an mga naghihinanyog sa saindang pagpahayag sa publiko kan maogmang bareta.​—1 Timoteo 4:​16.

14. Sa arin na Gapo kita maninigong mag-apod para sa kaligtasan?

¹⁴ Ano an mangyayari kun an dakulang aldaw ni Jehova biglang dumatong sa dagang ini? An kadaklan dai maglalaom ki Jehova para sa kaligtasan. An katawohan sa pankagabsan ‘magsasarabi sa mga bukid asin sa mga gapo: “Rumpagi kami nindo asin tagoa kami nindo sa lalauogon kan Saro na nagtutukaw sa trono asin sa kaanggotan kan Kordero.”’ (Kapahayagan 6:​15, 16) Maglalaom sinda sa garo bukid na mga organisasyon asin institusyon kan palakaw na ini nin mga bagay. Pero kanigoan kamas marahay kun sinda magtitiwala sa nakalalabi sa gabos na Gapo, si Jehova Dios! (Deuteronomio 32:​3, 4) Dapit sa saiya, si Hadeng David nagsabi: “Si Jehova an sakuyang kantil asin an sakuyang kuta patin an Paratao nin dudulagan para sa sako.” Si Jehova an “satong Gapo nin kaligtasan.” (Salmo 18:2; 95:1) An saiyang ngaran “makosog na torre,” an solamenteng “torre” na igo an kosog na protehiran kita sa panahon kan maabot na krisis. (Talinhaga 18:10) Huli kaini, mahalagang marhay na an pinakadakol na mapupuede sa haros anom na bilyon katawong buhay ngonyan matokdoan na mag-apod sa ngaran ni Jehova na may pagkafiel asin sinseridad.

15. Ano an ipinaririsa kan Roma 10:14 kun dapit sa pagtubod?

¹⁵ Angay nanggad, si apostol Pablo naghapot: “Minsan siring, paano sinda mag-aapod sa saiya na dai ninda tinutubod?” (Roma 10:14) Kadakol kan tibaad matabangan pa na isapuso “an ‘tataramon’ nin katotoohan,” tanganing makaapod ki Jehova para sa kaligtasan. Importanteng marhay an pagtubod. Si Pablo nagsasabi sa saro pang surat: “Kun dai nin pagtubod dai mahihimo na makapaoyon sa [Dios], huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Pero paano an minilyon pa makatutubod sa Dios? Sa surat sa mga taga-Roma, si Pablo naghahapot: “Paano man sinda matubod sa saiya na dai ninda nadangog?” (Roma 10:14) Itinatao daw ni Jehova an paagi tanganing sinda makadangog? Sierto nanggad! Hinanyoga an nagpapadagos na mga tataramon ni Pablo: “Paano man sinda makadadangog kun mayo nin parahulit?”

16. Sa areglo nin Dios, taano ta kaipuhan an mga parahulit?

¹⁶ Sono sa argumento ni Pablo malinaw na marhay na kaipuhan an mga parahulit. Sinabi ni Jesus na ini an mangyayari, “sagkod sa pagtatapos kan palakaw nin mga bagay.” (Mateo 24:14; 28:​18-20) An paghuhulit kaipuhan na kabtang kan areglo nin Dios sa pagtabang sa mga tawo na mag-apod sa ngaran ni Jehova tanganing maligtas. Dawa sa Kakristianohan an mayoriya daing ginigibo tanganing tawan nin onra an mahal na marhay na ngaran nin Dios. An dakol terible an pagkamalo ki Jehova sa duwa pang karakter sa dai ikapaliwanag na opisyal na doktrinang Trinidad. Siring man, dakol an napapabilang sa grupo na sinasabi sa Salmo 14:1 asin 53:1: “An mangmang nagsabi sa saiyang puso: ‘Mayong Jehova.’” Kaipuhan na maaraman ninda na si Jehova an buhay na Dios, asin dapat na masabotan ninda an gabos na irinerepresentar kan saiyang ngaran tanganing maligtas sinda sa nagdadangadang na dakulang kahorasaan.

An ‘Magayon na mga Bitis’ kan mga Parahulit

17. (a) Taano ta angay na kotaron ni Pablo an sarong hula dapit sa pagbabalik? (b) Ano an kalabot sa pagkaigwa nin ‘magayon na mga bitis’?

¹⁷ Igwa nin saro pang mahalagang marhay na hapot si apostol Pablo: “Paano man sinda maghuhulit kun dai sinda isinugo? Siring sa nasusurat: ‘Abaang gayon kan mga bitis kan mga nagpapahayag kan maogmang bareta nin marahay na mga bagay!’” (Roma 10:15) Kinokotar digdi ni Pablo an Isaias 52:7, na kabtang nin sarong hula dapit sa pagbabalik na minaaplikar poon kan 1919. Ngonyan, sa giraray, sinusugo ni Jehova ‘an nagdadara nin maogmang bareta, an nagbabalangibog nin katoninongan, an nagdadara nin maogmang bareta dapit sa orog karahay, an nagbabalangibog nin kaligtasan.’ Makinuyog nanggad na an linahidan nin Dios na “mga bantay” asin an saindang kairiba padagos na magayagayang nagkukurahaw. (Isaias 52:​7, 8) An mga bitis kan mga nagbabalangibog nin kaligtasan ngonyan tibaad magin pagal, maalpog pa ngani, mantang sinda naghaharongharong, alagad kanigoan an pamumula kan saindang lalauogon sa kagayagayahan! Aram ninda na sinugo sinda ni Jehova tanganing ibalangibog an maogmang bareta nin katoninongan asin rangahon an mga nagtatangis, na tinatabangan an mga ini na mag-apod sa ngaran ni Jehova na tinatanaw an kaligtasan.

18. Ano an sinasabi kan Roma 10:​16-​18 kun dapit sa pangultimong resulta kan pagpadangog kan maogmang bareta?

¹⁸ Baga man an mga tawo ‘magtubod sa bagay na nadangog’ o gustohon nindang makisuway dian, totoo an mga tataramon ni Pablo: “Nagpakadangog sinda, bako daw? Tara, sa katotoohan, ‘an saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.’” (Roma 10:​16-18) Kun paanong “an kalangitan nagpapahayag kan kamurawayan nin Dios,” siring sa maheheling sa saiyang mga gibo nin paglalang, an saiyang mga Saksi digdi sa daga dapat man na magbalangibog “kan taon nin marahay na boot ni Jehova asin kan aldaw nin pamalos kan satong Dios . . . sa pagranga kan gabos na nagtatangis.”​—Salmo 19:​1-4; Isaias 61:2.

19. Ano an kaaabtan kan mga “nag-aapod sa ngaran ni Jehova” ngonyan?

¹⁹ Parani nang parani an dakula asin makangingirhat na aldaw ni Jehova. “Herak man kan aldaw; huli ta harani na an aldaw ni Jehova, asin siring sa pananamsam gikan sa Makakamhan sa gabos na Saro iyan madatong!” (Joel 1:15; 2:31) Ipinamimibi ta na kadakol pa an apuradong maghihimate sa maogmang bareta, na burunyog na maralaog sa organisasyon ni Jehova. (Isaias 60:8; Habacuc 2:3) Girumdomon na an iba pang mga aldaw ni Jehova nagdara nin kalaglagan sa mga maraot​—kan aldaw ni Noe, kan aldaw ni Lot, asin sa mga aldaw kan apostatang Israel asin Juda. Naggagatigati na kita ngonyan sa nakalalabi sa gabos na kahorasaan, na an alihoshos ni Jehova paparaon an karatan sa ibabaw kan dagang ini, na nagtataong dalan para sa sarong paraiso na may daing sagkod na katoninongan. Kamo daw magigin saro na “nag-aapod sa ngaran ni Jehova” na may pagkafiel? Kun iyo, maggayagaya kamo! Yaon sa saindo an mismong panuga nin Dios na kamo makaliligtas.​—Roma 10:13.

Ano an Isisimbag Nindo?

◻ Anong bagong mga bagay an ibinalangibog pakalihis kan Pentecostes 33 C.E.?

◻ Paano maninigong tawan nin atension kan mga Kristiano “an ‘tataramon’ nin pagtubod”?

◻ Ano an boot sabihon kan ‘pag-apod sa ngaran ni Jehova’?

◻ Sa anong sentido ‘magayon an mga bitis’ kan mga mensahero kan Kahadean?

[Mga retrato sa pahina 18]

An banwaan nin Dios nagpapahayag kan saiyang mga kamurawayan sa Puerto Rico, Senegal, Peru, Papua New Guinea​—iyo, sa bilog na globo