Kahadean nin Dios—Nasasabotan daw Nindo Iyan?
“Kun manongod sa nakasabwag sa marahay na daga, ini an nagdadangog kan tataramon asin nakasasabot kaiyan.”—MATEO 13:23.
1. Ano an pirang lakop na paniniwala mapadapit sa ‘kahadean kan kalangitan’?
‘NASASABOTAN’ daw nindo kun ano an Kahadean nin Dios? An mga ideya dapit sa ‘kahadean kan kalangitan’ nagkalaenlaen nang marhay sa nag-aging mga siglo. An sarong lakop na paniniwala sa tahaw nin mga miembro nin iglesya ngonyan iyo na an Kahadean sarong bagay na ibinubugtak nin Dios sa puso nin tawo pagkakombertir. An paghona nin iba iyan sarong lugar na dinudumanan nin marahay na mga tawo pagkagadan tanganing magkamit nin daing sagkod na kaogmahan. May iba pang nagsasabi na itinogot nin Dios sa mga tawo an pagpangyari kan Kahadean digdi sa daga paagi sa sadiri nindang paghihingoa na itanom an Kristianong mga katokdoan asin kaugalean sa mga aktibidad nin sosyedad asin gobyerno.
2. Paano ipinaliliwanag kan Biblia an Kahadean nin Dios, asin ano an gigibohon kaiyan?
2 Minsan siring, malinaw na ipinaheheling kan Biblia na an Kahadean nin Dios bakong sarong institusyon digdi sa daga. Iyan bako man na sarong kamugtakan nin puso ni paggibong Kristiano sa sosyedad nin tawo. Totoo, an tamang pakasabot sa kun ano an Kahadean na ini nagbubunga nin darakulang pagbabago sa buhay kan mga minagibo nin pagtubod dian. Alagad an Kahadean mismo sarong langitnon na gobyernong tinindog nin Dios na nagpapangyari kan kabotan nin Dios, na hinahale an mga epekto nin kasalan asin kagadanan asin ibinabalik an matanos na mga kamugtakan digdi sa daga. An Kahadean na ini nagpupunsionar na sa kalangitan, asin sa dai na mahahaloy “iyan an maronot asin matapos kan gabos na ining kahadean [nin tawo], asin iyan magdadanay sagkod lamang.”—Daniel 2:44; Kapahayagan 11:15; 12:10.
3. Kan ponan ni Jesus an saiyang ministeryo, ano an nabuksan para sa mga tawo?
3 An historyador na si H. G. Wells nagsurat: “An doktrinang ini kan Kahadean nin Langit, na iyo an pangenot na katokdoan ni Jesus, asin saditon an kabtang sa Kristianong mga kredo, tunay nanggad na saro sa pinakarebolusyonaryong mga doktrina na nakapukaw asin nakaliwat sa kaisipan nin tawo.” Poon sa kapinonan, an tema kan ministeryo ni Jesus: “Magsorolsol kamo, banwaan, huli ta an kahadean kan kalangitan harani na.” (Mateo 4:17) Yaon sia kaidto digdi bilang linahidan na Hade, asin saro nanggad sa pinakadakulang kagayagayahan, an dalan binubuksan na ngonyan para sa mga tawo bako sanang tanganing makikabtang sa mga bendisyon kan Kahadean na iyan kundi magin man kapwa mga namamahala asin saserdote kaiba ni Jesus sa Kahadean na iyan!—Lucas 22:28-30; Kapahayagan 1:6; 5:10.
4. Kan enot na siglo, ano an nagin reaksion kan mga kadaklan sa “maogmang bareta kan kahadean,” na nagbunga nin anong paghokom?
4 Minsan ngani kadakoldakol kan nakadangog sa “maogmang bareta kan kahadean,” kakadikit sana kan nagtubod. Sa sarong kabtang ini huli ta an mga namomoon sa relihion ‘pinintoan an kahadean kan kalangitan sa mga tawo.’ ‘Hinale ninda an liabe nin kaaraman’ paagi sa saindang falsong mga katokdoan. Huling an kadaklan na tawo isinikwal si Jesus bilang Mesiyas asin linahidan na Hade sa Kahadean nin Dios, si Jesus nagsabi sa sainda: “An kahadean nin Dios hahaleon sa saindo asin itatao sa nasyon na nagpapaluwas kan mga bunga kaiyan.”—Mateo 4:23; 21:43; 23:13; Lucas 11:52.
5. Paano ipinaheling kan kadaklan na nakadangog sa mga ilustrasyon ni Jesus na dai sinda nagdangog na may pagsabot?
5 Kan tinotokdoan an sarong dakulang kadaklan sa sarong okasyon, si Jesus, siring sa saiyang nakaugalean, naggamit nin sunod-sunod na ilustrasyon tanganing baloon an kadaklan asin iseparar an mga hababaw sana an interes sa Kahadean. Sa enot na ilustrasyon kalabot an sarong parasabwag na nagsabwag nin mga banhi sa apat na klase nin daga. An enot na tolong klase bakong marahay na tanoman, alagad an ultimo “marahay na daga” na nagpaluwas nin marahay na mga bunga. An halipot na ilustrasyon tinapos sa sadol: “An igwa nin mga talinga maghinanyog.” (Mateo 13:1-9) Nadangog sia kan kadaklan na yaon duman, alagad dai sinda ‘naghinanyog.’ Mayo sinda nin motibasyon, mayo nin tunay na interes na maaraman kun paano an Kahadean kan kalangitan kabaing kan mga banhi na nakasabwag sa laen-laen na kamugtakan. Nagpuli sinda na nagpadagos sa aroaldaw na pamumuhay, na posibleng naghohona na an mga ilustrasyon ni Jesus kawiliwili sanang mga estorya na may mga tema dapit sa moral. Kanigoan kayaman na pakasabot asin kanigoan kamamuraway na mga pribilehio asin oportunidad an nawara ninda huli ta dai nag-aako an saindang puso!
6. Taano ta sa mga disipulo sana ni Jesus itinao an pakasabot sa “banal na mga hilom kan kahadean”?
6 Sinabihan ni Jesus an saiyang mga disipulo: “Itinao sa saindo an pakasabot kan banal na mga hilom kan kahadean kan kalangitan, alagad dai iyan itinao sa mga tawong idto.” Nagkokotar sa Isaias, idinagdag nia: “‘Huling tuminagas na an puso kan mga tawong ini, asin sa saindang mga talinga sinda nagdangog na daing pagkuyog, asin pinirong ninda an saindang mga mata; tanganing dai ninda noarin man maheling kan saindang mga mata asin madangog kan saindang mga talinga asin masabotan iyan kan saindang mga puso patin magbakle, asin paomayan ko sinda.’ Minsan siring, maogma an saindong mga mata huling an mga iyan nakaheheling, asin an saindong mga talinga huling iyan nakadadangog.”—Mateo 13:10-16; Marcos 4:11-13.
‘Pakasabot’ sa Kahadean
7. Taano ta mahalaga na ‘masabotan’ an Kahadean?
7 Sinabi ni Jesus an problema. Iyan may koneksion sa ‘pagsabot’ sa mensahe kan Kahadean. Sinabihan nia sa pribado an saiyang mga disipulo: “Kamo, kun siring, maghinanyog sa ilustrasyon kan parasabwag. Kun an siisay man makadangog kan tataramon kan kahadean alagad dai makasabot kaiyan, minaabot an maraot asin inaagaw an nakasabwag sa saiyang puso.” Ipinaliwanag nia na an apat na klase nin daga nagrerepresentar sa laen-laen na kamugtakan kan puso na sasabwagan “kan tataramon kan kahadean.”—Mateo 13:18-23; Lucas 8:9-15.
8. Ano an nakaolang sa “banhi” na nakasabwag sa enot na tolong klase nin daga na makapaluwas nin mga bunga?
8 Sa lambang kaso marahay an “banhi,” alagad an bunga madepende sa kamugtakan kan daga. Kun an daga kan puso kapareho nin parateng inaagihan, dusok nang tinampo, na pinatagas nin dakol na aktibidad na bakong espirituwal, an nakadadangog kan mensahe kan Kahadean madaling makapanarahotan, na nagsasabi na mayo nang panahon para sa Kahadean. An napabayaan na banhi madaling maagaw bago iyan makagamot. Alagad kumusta kun an banhi ikinasabwag sa puso na kaagid nin magapong daga? An banhi tibaad tumubo, alagad masasakitan iyan na pataroson nin hararom an mga gamot kaiyan tanganing makasupsup nin sustansia asin magin pusog. An paglaom na magin makinuyog na lingkod nin Dios, partikularmente kun nag-aagi nin makuring paglamag, magigin dakulaon na angat, asin masisingkog an indibiduwal. Asin sa giraray, kun an daga kan puso pano-pano nin arog sa tonok na mga kahaditan o nin materyalistikong mga pagmawot nin kayamanan, an maniwang na tinanom na Kahadean malalamos. Sa tolong tipikong situwasyon na ini sa buhay, daing mapaluluwas na bunga nin Kahadean.
9. Taano an banhi na nakasabwag sa marahay na daga ta nakapaluwas nin marahay na bunga?
9 Minsan siring, kumusta an banhi nin Kahadean na nakasabwag sa marahay na daga? An simbag ni Jesus: “Kun manongod sa nakasabwag sa marahay na daga, ini an nagdadangog kan tataramon asin nakasasabot kaiyan, na tunay na nagbubunga, an sarong ini mananggatos, an sarong iyan manganom na polo, an saro pa manolong polo.” (Mateo 13:23) Huli sa ‘pakasabot’ sa Kahadean, sinda magpapaluwas nin marahay na bunga sono sa saindang indibiduwal na mga kamugtakan.
An Paninimbagan Kadungan nin Pakasabot
10. (a) Paano ipinaheling ni Jesus na an ‘pakasabot’ sa Kahadean nagdadara kapwa nin mga bendisyon asin paninimbagan? (b) An sugo daw ni Jesus na paduman asin gumibo nin mga disipulo aplikado sana sa mga disipulo kan enot na siglo?
10 Pakatao nin anom pang ilustrasyon tanganing ipaliwanag an laen-laen na aspekto kan Kahadean, hinapot ni Jesus an saiyang mga disipulo: “Nasasabotan daw nindo an gabos na bagay na ini?” Kan sinda sumimbag nin “iyo,” sia nagsabi: “Mantang siring an kamugtakan, an lambang paratokdo sa publiko, kun natokdoan manongod sa kahadean kan kalangitan, nakaaagid sa sarong tawo, sarong kagharong, na ilinuluwas hale sa saiyang itinatagong kayamanan an mga bagay na bago asin daan.” An mga katokdoan asin pagpatood na itinao ni Jesus magibo sa saiyang mga disipulo na maygurang na mga Kristiano na makapaluluwas sa saindang ‘tambobong’ nin daing katapusan na suplay nin masisiram na espirituwal na kakanon. An dakol kaini konektado sa Kahadean nin Dios. Lininaw ni Jesus na an ‘pakasabot’ sa Kahadean magdadara bako sana nin mga bendisyon kundi nin paninimbagan. Ipinagboot nia: “Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.”—Mateo 13:51, 52; 28:19, 20.
11. Pag-abot nin 1914, ano an mga nangyari na konektado sa Kahadean?
11 Siring sa ipinanuga, si Jesus padagos na nasa saiyang tunay na mga disipulo sa bilog na nag-aging mga siglo sagkod sa panahon na ini. Sa huring mga aldaw na ini, progresibo nia sindang tinatawan nin pakasabot, asin tinawan man nia sinda nin paninimbagan na gamiton an nag-oorog na liwanag nin katotoohan. (Lucas 19:11-15, 26) Kan 1914, an mga pangyayari sa Kahadean nagpoon na mahayag nin marikas asin dramatiko. Kan taon na idto, bako sanang nangyari an ‘pagkamundag’ kan haloy nang linalaoman na Kahadean kundi nagpoon an “pagtatapos kan palakaw nin mga bagay.” (Kapahayagan 11:15; 12:5, 10; Daniel 7:13, 14, 27) An tunay na mga Kristiano, na nakamamansay sa kahulogan kan presenteng mga pangyayari, naggibo kan pinakadakulang kampanya nin paghuhulit kan Kahadean asin pagtotokdo sa kasaysayan. Ihinula ini ni Jesus, na an sabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
12. (a) Ano an ibinunga kan mahiwas na pagpatotoo sa Kahadean sa modernong aldaw? (b) Sa mapagdudang kinaban na ini, ano an peligro sa mga Kristiano?
12 An mahiwas na pagpatotoong ini sa Kahadean nakaabot na sa labing 230 kadagaan. Labing limang milyon na tunay na disipulo an nakikikabtang na sa gibohon na ini, asin tinitipon pa an iba. Alagad kun ikokomparar ta an bilang nin mga disipulo sa 5.6 bilyones na nag-eerok sa daga, malinaw na arog kan kaaldawan ni Jesus, an dakulang mayoriya nin katawohan dai ‘nasasabotan’ an Kahadean. Dakol, siring kan ihinula, an nag-oolog-olog asin nagsasabi: “Haen man ining ipinanugang presensia nia?” (2 Pedro 3:3, 4) An peligro sa sato bilang mga Kristiano iyo na an saindang mapagpalimanliman, mapagduda, materyalistikong kaisipan puedeng luway-luway na makaapektar sa pagmansay niato sa satong mga pribilehio sa Kahadean. Napalilibotan nin mga tawo kan kinaban na ini, madali niatong maarog an nagkapira sa saindang mga kaisipan asin kaugalean. Mahalaga nanggad na ‘masabotan’ niato an Kahadean nin Dios asin marigon na mangapot dian!
Pagsiyasat kan Satong Sadiri May Koneksion sa Kahadean
13. Kun dapit sa sugo na ihulit an maogmang bareta kan Kahadean, paano niato mababalo kun baga kita padagos na ‘nagdadangog’ na may pagmansay?
13 Si Jesus nagsabi dapit sa panahon nin pag-ani na nabubuhayan niato: “Isusugo kan Aki nin tawo an saiyang mga anghel, asin hahaleon ninda sa saiyang kahadean an gabos na bagay na nagpapasingkog asin an mga tawo na naggigibo nin katampalasanan . . . Sa panahon na iyan an mga matanos masirang na siring kaliwanag sa aldaw sa kahadean kan saindang Ama. An igwa nin mga talinga maghinanyog.” (Mateo 13:41, 43) Padagos daw kamong ‘nagdadangog’ na may makinuyog na paghimate sa pagboot na ihulit an Kahadean asin gumibo nin mga disipulo? Girumdomon, an “nakasabwag sa marahay na daga” ‘nakadangog kan tataramon asin nakasabot kaiyan’ patin nagpaluwas nin marahay na bunga.—Mateo 13:23.
14. Kun may itinataong instruksion, paano niato ipinaheheling na ‘nasasabotan’ niato an itinaong hatol?
14 Kun personal na nag-aadal asin nag-aatender sa Kristianong mga pagtiripon, dapat niatong ‘ikiling an satong puso sa pakamansay.’ (Talinhaga 2:1-4) Kun may itinataong hatol dapit sa paggawe, gubing, musika, asin pag-aling-aling, dapat niatong togotan iyan na tumaros sa satong puso asin pahiroon kitang gumibo nin ano man na kinakaipuhan na mga pagliliwat. Nungkang mangatanosan, manarahotan, o dai maghimate. Kun an Kahadean tunay sa satong buhay, kita mamumuhay sono sa mga pamantayan kaiyan asin maigot na magbabalangibog kaiyan sa iba. Si Jesus nagsabi: “Bakong an gabos na nagsasabi sako, ‘Kagurangnan, Kagurangnan,’ makalalaog sa kahadean kan kalangitan, kundi idtong naggigibo kan kabotan kan sakong Ama na nasa kalangitan.”—Mateo 7:21-23.
15. Taano ta mahalaga na ‘hanapon nguna an kahadean asin an katanosan nin Dios’?
15 An tendensia nin tawo maghadit sa kinakaipuhan na kakanon, gubing, asin istaran, alagad si Jesus nagsabi: “Kaya padagos na hanapon nguna an kahadean asin an . . . katanosan [nin Dios], asin ini gabos na ibang bagay idadagdag na sana sa saindo.” (Mateo 6:33, 34) Sa pagbugtak nin mga eenoton, an Kahadean an enoton sa saindong buhay. Papagdanayon na simple an saindong buhay, na naninigoan na sa mga kinakaipuhan. Katontohan na panoon an satong buhay nin dai kinakaipuhan na mga aktibidad asin natipon na mga rogaring, na tibaad ipinangangatanosan na puede man ini, huling mayo man nin maraot sa mismong mga bagay na ini. Minsan ngani tibaad totoo iyan, ano daw an gigibohon kan pagparatipon asin paggamit nin siring na mga dai kinakaipuhan sa satong pag-iskedyul nin personal na pag-adal, pag-atender sa Kristianong mga pagtiripon, asin pakikikabtang sa paghuhulit? Sinabi ni Jesus na an Kahadean nakaaagid sa sarong parabariwas na nakakua nin sarong “perlas na dakulaon an halaga [asin] napaduman sia asin ipinabakal tolos an gabos niang sadiri patin binakal iyan.” (Mateo 13:45, 46) Ini an maninigong magin saboot niato manongod sa Kahadean nin Dios. Maninigo niatong arogon si Pablo bakong si Demas, na binayaan an ministeryo “huli ta namotan nia an presenteng palakaw nin mga bagay.”—2 Timoteo 4:10, 18; Mateo 19:23, 24; Filipos 3:7, 8, 13, 14; 1 Timoteo 6:9, 10, 17-19.
“An mga Bakong Matanos Dai Magmamana kan Kahadean nin Dios”
16. Paano an ‘pakasabot’ sa Kahadean nin Dios matabang sa sato na malikayan an salang gawe?
16 Kan an inmoralidad kinokonsinte kan kongregasyon sa Corinto, si Pablo prangkang nagsabi: “Ano! Dai kamo nakaaaram na an mga bakong matanos dai magmamana kan kahadean nin Dios? Dai kamo madaya. Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki, ni mga parahabon, ni mga paslo, ni mga paraburat, ni mga paramuda, ni mga parakikil an magmamana kan kahadean nin Dios.” (1 Corinto 6:9, 10) Kun ‘nasasabotan’ niato an Kahadean nin Dios, dai niato dadayaon an satong sadiri paagi sa pag-isip na kokonsintehon ni Jehova an sarong klase nin inmoralidad basta naheheling nia kitang sibot sa Kristianong paglilingkod. An karigsokan dai ngani maninigong masambitan sa tahaw niato. (Efeso 5:3-5) Naririsa daw nindo na may pirang maraot na kaisipan o kaugalean kan kinaban na ini na minapoon na makalaog sa saindong buhay? Tolos-tolos na haleon iyan sa saindong buhay! An Kahadean orog nanggad na mahalaga tanganing iwara dahel sa siring na mga bagay.—Marcos 9:47.
17. Sa anong mga paagi na an pag-apresyar sa Kahadean nin Dios nagpapaoswag nin kapakumbabaan asin naghahale nin mga singkogan?
17 An mga disipulo ni Jesus naghapot: “Siisay man nanggad an pinakadakula sa kahadean kan kalangitan?” Si Jesus nagsimbag paagi sa pagbugtak nin sarong sadit na aki sa tahaw ninda asin pagsabi: “Sa katotoohan ako nagsasabi saindo, Kun dai kamo magbakle asin magin siring sa saradit na aki, dai kamo sa ano man na paagi makalalaog sa kahadean kan kalangitan. Kun siring, an siisay man na magpakumbaba arog kan sadit na aking ini iyo an pinakadakula sa kahadean kan kalangitan.” (Mateo 18:1-6) An mga mapalangkaw, mapaghanap, daing pagmakolog, asin tampalasan dai makalalaog sa Kahadean nin Dios, ni magigin mga sakop man sinda kan Kahadean. An saindo daw na pagkamoot sa saindong mga tugang, an saindong kapakumbabaan, an saindong diosnon na takot, nagpapahiro sa saindo na likayan na makapasingkog sa iba paagi sa saindong gawe? O iiniinsistir daw nindo an saindong “mga diretso” ano man an magin epekto sa iba kan ugale asin gaweng ini?—Roma 14:13, 17.
18. Ano an ibubunga sa makinuyog na katawohan kun papangyarihon na kan Kahadean nin Dios na maotob an Saiyang kabotan “kun paano sa langit, siring man sa daga”?
18 An satong langitnon na Ama, si Jehova, sa dai na mahahaloy lubos na sisimbagon an odok na pamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” Sa dai na nanggad mahahaloy an namamahala nang Hade, si Jesu-Cristo, madatong sa sentido nin pagtukaw sa saiyang trono para sa paghokom, tanganing ibulag an “mga karnero” sa “mga kanding.” Sa itinalaan na panahon na iyan, “an hade masabi sa mga yaon sa saiyang too, ‘Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.’” An mga kanding “maduman sa pagkaparang daing katapusan, alagad an mga matanos sa buhay na daing katapusan.” (Mateo 6:10; 25:31-34, 46) Paparaon kan “dakulang kahorasaan” an daan na palakaw asin an gabos na habong ‘saboton’ an Kahadean. Alagad an minilyon na makaliligtas sa “dakulang kahorasaan” asin an binilyon na bubuhayon liwat daing sagkod na magmanana kan mga bendisyon kan Kahadean sa ibinalik na daganon na Paraiso. (Kapahayagan 7:14) An Kahadean an bagong gobyerno digdi sa daga, na namamahala hale sa kalangitan. Hahamanon kaiyan an katuyohan ni Jehova para sa daga asin katawohan, na gabos para sa pagpakangbanal sa saiyang kabanalbanaleng ngaran. Bako daw na iyan sarong mana na bawi nanggad na pagmaigotan, pagsakripisyohan, asin halaton? Ini an maninigong magin kahulogan para sa sato kan ‘pagsabot’ sa Kahadean!
Ano an Saindong Simbag?
◻ Ano an Kahadean nin Dios?
◻ Taano an kadaklan na nagdangog ki Jesus ta dai ‘nakasabot’ sa Kahadean?
◻ Paano an ‘pakasabot’ sa Kahadean nagdadara kapwa nin mga bendisyon asin paninimbagan?
◻ Kun dapit sa paghuhulit, ano an nagpaparisa kun baga ‘nasasabotan’ niato an Kahadean?
◻ Paano niato ipinaheheling paagi sa satong gawe na ‘nasasabotan’ niato an itinaong hatol?
[Mga retrato sa pahina 17]
An mga disipulo ni Jesus ‘nakasabot’ sa Kahadean asin nagpaluwas nin marahay na bunga