Magtiwala ki Jehova Asin sa Saiyang Tataramon
“An mga nakamimidbid sa saimong ngaran magtitiwala sa saimo.”—SALMO 9:10.
1. Taano ta makakokompiar pa kita ki Jehova asin sa saiyang Tataramon sa satong modernong kaaldawan?
SA MODERNONG kinaban na ini, an pangagda na magtiwala sa Dios asin sa saiyang Tataramon, an Biblia, tibaad garo bakong praktikal asin bakong realistiko. Pero, an kadonongan nin Dios probado na sa halawig na panahon. An Kaglalang sa lalaki asin babae iyo an Kagtugdas nin pag-aragoman asin pamilya, asin aram nia an satong mga pangangaipo nin orog kisa sa siisay pa man. Kun paanong dai nagliwat an pundamental na mga pangangaipo nin tawo, an pundamental na mga paagi nin pagpanigo sa mga pangangaipong iyan iyo pa man giraray. An madonong na hatol kan Biblia, minsan ngani isinurat kaidtong dakol nang siglo an nakaagi, nagtatao pa giraray kan pinakamarahay na giya para sa kapangganahan sa pamumuhay asin sa pagresolber sa mga problema. An paghimate dian nagbubunga nin dakulang kaogmahan—maski sa komplikado, sientipikong kinaban na nabubuhayan niato!
2. (a) An pagkuyog sa mga togon nin Dios nagpaluwas nin anong marahay na mga bunga sa buhay kan banwaan ni Jehova? (b) Ano pa an mga panuga ni Jehova sa mga makinuyog sa saiya asin sa saiyang Tataramon?
2 An pagtiwala ki Jehova asin pag-aplikar kan mga prinsipyo sa Biblia nagdadara nin praktikal na mga pakinabang kada aldaw. An patotoo kaini maheheling sa buhay kan minilyon na Saksi ni Jehova sa bilog na kinaban na nagkaigwa kan kombiksion asin kapusoan na iaplikar an hatol kan Biblia. Para sa sainda, an pagtiwala sa Kaglalang asin sa saiyang Tataramon dai napasala. (Salmo 9:9, 10) An pagkuyog sa mga togon nin Dios ginibo sindang mas marahay na mga tawo pag-abot sa kalinigan, pagkasadiosan, kahigosan, paggalang sa buhay asin rogaring nin iba, asin pagigin tamang-tama sana sa pagkakan asin pag-inom. Nagbunga iyan nin tamang pagkamoot asin pagpatood sa laog kan pamilya—pagigin mainistimar, mapasensia, maheherakon, asin mapagpatawad—patin nin dakol pang ibang bagay. Sa kadaklan nakalilikay sinda sa maraot na mga bunga nin pagkaanggot, pagkaongis, paggadan, pagkauri, takot, kahugakan, kapalangkawan, pagputik, pagbalobagi, pakidodorog minsan kiisay, asin inmoralidad. (Salmo 32:10) Alagad an Dios bako sanang nanunuga nin marahay na resulta para sa mga nagkukuyog sa saiyang mga pagboot. Sinabi ni Jesus na an mga nagsusunod sa Kristianong dalan mag-aako nin “mananggatos ngonyan sa panahon na ini, . . . mga ina asin mga aki patin mga oma, na may mga paglamag, asin sa madatong na palakaw nin mga bagay buhay na daing katapusan.”—Marcos 10:29, 30.
Likayan an Pagtiwala sa Kinabanon na Kadonongan
3. Sa padagos na pagtitiwala ki Jehova asin sa saiyang Tataramon, sa anong mga problema kun beses napaaatubang an mga Kristiano?
3 An problema nin bakong sangkap na mga tawo iyo na may tendensia sindang pasaditon o lingawan an hinahagad nin Dios. Madali nindang ponan na isipon na sinda an pinakamadonong o na an kadonongan kan mga intelihente sa kinaban na ini mas halangkaw kisa kan sa Dios, na iyan mas sunod sa panahon. An mga lingkod nin Dios puede man na makapatalubo kan kaisipan na ini, mantang sinda nabubuhay sa tahaw kan kinaban na ini. Sa siring, sa pagpaabot kan mamomoton na pangagda na hinanyogon an saiyang hatol, iiniba man kan satong langitnon na Ama an angay na mga patanid: “Aki ko, dai mo paglingawan an sakong pagboot, asin kuyogon logod kan saimong puso an sakong mga togon, huli ta idadagdag saimo an lawig nin mga aldaw asin mga taon nin buhay asin katoninongan. Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia an saimong mga dana. Dai ka magpakadonong sa saimong sadiring mga mata. Matakot ka ki Jehova asin rumayo ka sa maraot.”—Talinhaga 3:1, 2, 5-7.
4. Gurano kalakop kan “kadonongan kan kinaban na ini,” asin taano iyan ta “kamangmangan sa Dios”?
4 Kadakoldakol kan kadonongan kan kinaban na ini asin kadakol kan mapagkukuanan. Kadakol kan institusyon sa pag-adal, asin “an paggibo nin dakol na libro mayo nin katapusan.” (Eclesiastes 12:12) Ngonyan an superhighway daa nin impormasyon sa kinaban nin komputer nanunugang matao nin daing limitasyon na impormasyon dapit sa haros ano man na tema. Alagad an pagkaigwa kan gabos na kaaraman na ini dai minagibo sa kinaban na ini na mas madonong o makaresolber sa mga problema kaiyan. Imbes, an situwasyon sa kinaban orog na nagraraot kada aldaw. Siempre, sinasabi sa sato kan Biblia na “an kadonongan kan kinaban na ini kamangmangan sa Dios.”—1 Corinto 3:19, 20.
5. Ano an mga patanid kan Biblia kun dapit sa “kadonongan kan kinaban na ini”?
5 Durante kaining huring kabtang kan mga aldaw, malalaoman ta sana na an poon na paradaya, si Satanas na Diablo, maglalansar nin dai mapogolan na alon nin mga kaputikan sa paghihingoang raoton an pagkompiar sa pagigin totoo kan Biblia. An mas halangkaw na gradong mga kritiko nagpoprodusir nin kadakoldakol na mapagbanabanang libro na inaangat an pagigin totoo asin pagkamasasarigan kan Biblia. Pinatanidan ni Pablo an saiyang kapwa Kristiano: “O Timoteo, ingatan mo an ipinaniwala sa saimo, na naglilikay sa basang na tarabilan na minalapas sa banal asin sa mga pagkakaturumang kan falsong inaapod na ‘kaaraman.’ Huli sa pagpasikat nin siring na kaaraman an nagkapira napasuhay sa pagtubod.” (1 Timoteo 6:20, 21) Nagpapatanid pa an Biblia: “Mag-ingat kamo: tibaad may saro na bumihag saindo paagi sa pilosopiya asin basang na daya sono sa tradisyon nin mga tawo, sono sa enot na mga katokdoan kan kinaban asin bakong sono ki Cristo.”—Colosas 2:8.
Labanan an Tendensiang Magduwaduwa
6. Taano ta kaipuhan an pagpuka tanganing maebitaran na makagamot sa satong puso an mga pagduwaduwa?
6 An saro pang tusong taktika kan Diablo iyo an pagtanom nin mga pagduwaduwa sa isip. Permi siang alisto na hanapan nin kaluyahan an pagtubod asin raoton iyan. Maninigong girumdomon nin siisay man na nakamamate nin mga pagduwaduwa na an nasa likod nin siring na mga pagduwaduwa iyo an saro na nagsabi ki Eva: “Ano totoo na an Dios nagsabi na dai kamo magkakan sa gabos na kahoy kan tatamnan?” Kan an Parasugot ikatanom na an pagduwaduwa sa isip kan babae, an sunod iyo an pagsabi sa saiya nin putik, na saiyang pinaniwalaan. (Genesis 3:1, 4, 5) Tanganing malikayan na raoton nin pagduwaduwa an satong pagtubod siring kan nangyari ki Eva, kaipuhan kitang magin puka. Kun may minsan kadikit na pagduwaduwa manongod ki Jehova, sa saiyang Tataramon, o sa saiyang organisasyon na dai nahahale sa saindong puso, tolos-tolos na humiro na haleon iyan bago iyan grumabe na puedeng makaraot sa saindong pagtubod.—Ikomparar an 1 Corinto 10:12.
7. Ano an magigibo tanganing mahale an mga pagduwaduwa?
7 Ano an puedeng gibohon? Sa giraray, an simbag magtiwala ki Jehova asin sa saiyang Tataramon. “Kun an siisay man saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad sia padagos na maghagad sa pagtubod, na dai nin ano man na pagduwaduwa, huli ta an nagduduwaduwa siring sa alon nin dagat na ipinapadpad nin doros asin iinaapwak minsan saen.” (Santiago 1:5, 6; 2 Pedro 3:17, 18) Kaya an odok na pamibi ki Jehova an enot na tangga. (Salmo 62:8) Dangan, dai mag-alangan na magpatabang sa mamomoton na mga paraataman sa kongregasyon. (Gibo 20:28; Santiago 5:14, 15; Judas 22) Tatabangan ninda kamo na susogon an gikanan kan saindong mga pagduwaduwa, na tibaad huli sa kapalangkawan o salang kaisipan.
8. Paano sa parate minapoon an apostatang kaisipan, asin ano an remedyo?
8 An pagbasa daw o paghinanyog sa apostatang mga ideya o kinabanon na pilosopiya iyo an ginikanan nin nakahihilong mga pagduwaduwa? May kadonongan na an Biblia naghahatol: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasopog, na ginagamit an tataramon kan katotoohan sa tamang paagi. Alagad isikwal mo an daing datang mga tataramon na naglalapas sa banal; huli ta iyan mapasiring sa orog pang karatan, asin an saindang tataramon makalalakop na siring sa gangrena.” (2 Timoteo 2:15-17) Interesante na an dakol na nabiktima nin apostasiya nagpoon sa salang direksion paagi nguna sa pagreklamo manongod sa pinaghohona nindang pagtrato sa sainda sa organisasyon ni Jehova. (Judas 16) Suminunod an paghanap nin sala sa mga paniniwala. Kun paanong an sarong siruhano minahiro tolos-tolos tanganing haleon an gangrena, humiro tolos-tolos na paraon sa isip nindo an ano man na tendensiang magreklamo, dai manigoan sa paagi nin paggibo sa mga bagay sa Kristianong kongregasyon. (Colosas 3:13, 14) Haleon an ano man na nagpapaorog sa siring na mga pagduwaduwa.—Marcos 9:43.
9. Paano makatatabang sa sato an marahay na teokratikong rutina na magdanay na mabagsik sa pagtubod?
9 Magdanay na dayupot ki Jehova asin sa saiyang organisasyon. Maimbod na arogon si Pedro, na marigon na nagsabi: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan.” (Juan 6:52, 60, 66-68) Magkaigwa nin marahay na programa nin pag-adal sa Tataramon ni Jehova tanganing mapagdanay na makosog an saindong pagtubod, siring sa dakulang kalasag, na ‘makasisigbo sa gabos na naglalaad na bosog kan maraot.’ (Efeso 6:16) Magdanay na aktibo sa Kristianong ministeryo, na mamomoton na ihinihiras sa iba an mensahe kan Kahadean. Kada aldaw, may pag-apresyar na horophoropon kun paano kamo binebendisyonan ni Jehova. Magpasalamat na may kaaraman kamo sa katotoohan. An paggibo kan gabos na ini sa sarong marahay na Kristianong rutina matabang sa saindo na magin maogma, makatagal, asin magdanay na mayo nin mga pagduwaduwa.—Salmo 40:4; Filipos 3:15, 16; Hebreo 6:10-12.
Pagsunod sa Giya ni Jehova sa Pag-agoman
10. Taano ta nangorognang mahalaga na pagiya ki Jehova sa Kristianong pag-agoman?
10 Sa pag-areglo sa lalaki asin babae na mamuhay na saro bilang mag-agom, an katuyohan ni Jehova bako sanang panoon an daga nin tamang-tama kundi dagdagan man an saindang kaogmahan. Minsan siring, an kasalan asin pagkabakong sangkap nagdara nin magagabat na problema sa relasyon nin mag-agom. An mga Kristiano bakong puera digdi, huli ta sinda bako man na sangkap asin nakamamate kan mga kadepisilan sa buhay sa modernong aldaw. Pero, sagkod na sinda nagtitiwala ki Jehova asin sa saiyang Tataramon, an mga Kristiano puedeng magkaigwa nin dakulang kapangganahan sa pag-agoman asin sa pagpadakula sa saindang mga aki. Mayo nin lugar sa Kristianong pag-agoman an kinabanon na mga kaugalean asin paggawe. Sinasadol kita kan Tataramon nin Dios: “Magin logod kagalanggalang sa gabos an pag-aragoman, asin dai pagdigtaan an higdaan kan mag-agom, huli ta hohokoman nin Dios an mga parapakisaro asin parasambay.”—Hebreo 13:4.
11. Sa pagresolber sa mga problema nin mag-agom, ano an maninigong midbidon kan mag-agom?
11 An pag-agoman na inootob sono sa hatol kan Biblia may pakamate nin pagkamoot, kapanugaan, asin seguridad. An mag-agom pareho nakasasabot asin iginagalang an prinsipyo nin pagkapayo. Kun minalataw an mga problema, parate na iyan huli sa pagpabayang iaplikar an hatol kan Biblia. Sa pagresolber sa dai nahahaleng problema, mahalaga na an mag-agom pareho sadiosan na magkonsentrar sa kun ano talaga an problema asin atubangon an mga dahelan imbes na an mga sintomas. Kun sa dai pa sana nahahaloy na mga pag-oolay daing gayo o mayo nin napagkaoyonan, an mag-agom puedeng humagad nin daing kinakampihan na tabang sa sarong mamomoton na paraataman.
12. (a) An Biblia nagtatao nin hatol sa anong usong mga problema nin mag-agom? (b) Taano ta kaipuhan na an mag-agom pareho gumibo nin mga bagay sono sa paagi ni Jehova?
12 An problema daw komunikasyon, paggalang sa mga saboot nin lambang saro, paggalang sa pagkapayo, o kun paano magdedesisyon? Iyan daw may koneksion sa pagpadakula sa mga aki, o sa pagigin timbang sa seksuwal na mga pangangaipo? O iyan daw badyet kan pamilya, pag-aling-aling, pakiaasosyar, kun baga maninigong magtrabaho an agom na babae, o kun saen kamo maistar? Ano man an problema, an Biblia nagtatao nin praktikal na sadol magsalang direkta paagi sa mga pagboot o bakong direkta paagi sa mga prinsipyo. (Mateo 19:4, 5, 9; 1 Corinto 7:1-40; Efeso 5:21-23, 28-33; 6:1-4; Colosas 3:18-21; Tito 2:4, 5; 1 Pedro 3:1-7) Kun an mag-agom pareho minalikay sa paslong mga kahagadan asin lubos na ipinahahayag an pagkamoot sa saindang pag-agoman, orog na kaogmahan an ibinubunga. An mag-agom dapat na pareho igwa nin nangingibabaw na pagmawot na gumibo nin kinakaipuhan na mga pagbabago, na gibohon an mga bagay sono sa paagi ni Jehova. “Sia na nagpapaheling nin pakarorop sa sarong bagay makanonompong nin karahayan, asin maogma sia na nagtitiwala ki Jehova.”—Talinhaga 16:20.
Mga Barobata—Hinanyoga Nindo an Tataramon nin Dios
13. Taano ta bakong pasil para sa Kristianong mga barobata na dumakulang makosog an pagtubod ki Jehova asin sa saiyang Tataramon?
13 Bakong pasil para sa Kristianong mga barobata na dumakulang makosog sa pagtubod mantang an maraot na kinaban nakapalibot sa sainda. An sarong dahelan iyo na “an bilog na kinaban namumugtak sa kapangyarihan kan maraot,” si Satanas na Diablo. (1 Juan 5:19) An mga barobata inaatake kan maraot na kaiwal na ini na kayang palatawon na marahay an maraot. An mga ugaleng ako-nguna, paslong mga ambisyon, pagmawot nin inmoral asin madahas, asin abnormal na paghanap nin kasingawan—ini gabos napagsasararo sa uso, nangingibabaw na ugale na ilinaladawan sa Biblia bilang “an espiritu na naghihiro ngonyan sa mga aki nin kasumbikalan.” (Efeso 2:1-3) May katusohan na pinalakop ni Satanas an “espiritung” ini sa mga librong pinag-aadalan sa eskuelahan, sa kadaklan na musika, sa isport, asin sa iba pang klase nin aling-alingan. An mga magurang kaipuhan na magin alisto na sanggahon an siring na mga impluwensia paagi sa pagtabang sa saindang mga aki na dumakulang nagtitiwala ki Jehova asin sa saiyang Tataramon.
14. Paano an mga hoben ‘makadudulag sa mga horot na konektado sa pagkabarobata’?
14 Si Pablo nagtao nin sa amang hatol sa saiyang barobatang kaiba na si Timoteo: “Dumulag ka sa mga horot na konektado sa pagkabarobata, kundi sumunod ka sa katanosan, pagtubod, pagkamoot, katoninongan, kaibanan kaidtong mga nag-aapod sa Kagurangnan gikan sa malinig na puso.” (2 Timoteo 2:22) Minsan ngani bakong gabos na “horot na konektado sa pagkabarobata” maraot, an mga barobata maninigong “dumulag” dian sa bagay na dai ninda maninigong pagtogotan an mga ini na magin pinagkakasibotan, na kakadikit na sana, kun igwa man, an panahon para sa diosnon na mga aktibidad. An pagpapusog sa hawak, isport, musika, aling-alingan, apisyon, asin pagpasyar, minsan ngani bako man mismong maraot, puedeng magin siod kun iyan an magin mahalaga sa buhay. Biyong dumulag sa daing kamanungdanan na orolay, pagparaistambay, abnormal na hilig sa sekso, pagparatukawtukaw sana asin pagkalangkag, asin pagparareklamo na dai kamo naiintindihan kan saindong mga magurang.
15. Anong mga bagay an puedeng mangyari sa harong na puedeng magbunga nin duwang klaseng pamumuhay nin mga barobata?
15 Minsan sa harong, tibaad may nagtatagong peligro sa mga barobata. Kun dinadalan an inmoral o madahas na mga pasale sa TV asin video, an pagmawot na gumibo nin maraot puedeng ikatanom. (Santiago 1:14, 15) An Biblia naghahatol: “O kamong mga namomoot ki Jehova, ikaongis nindo an maraot.” (Salmo 97:10; 115:11) Aram ni Jehova kun an siisay man nagpoprobar na magkaigwa nin duwang klaseng buhay. (Talinhaga 15:3) Kristianong mga barobata, mangalagkalag kamo sa saindong kuarto. May nakapaskil daw kamong mga retrato nin inmoral na mga sikat sa isport o musika, o an ipinaheheling daw nindo kapakipakinabang na mga bagay na marahay na mga pagirumdom? (Salmo 101:3) Sa saindong bugtakan nin gubing, mabini daw an saindong mga bado, o an ibang gubing daw nindo nagpapaheling kan palaen na mga estilo nin bado sa kinaban na ini? Sa tusong mga paagi puede kamong masiod kan Diablo kun napadadara kamo sa sugot na namitan an maraot. An Biblia madonong na naghahatol: “Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.”—1 Pedro 5:8.
16. Paano matatabangan kan hatol sa Biblia an sarong barobata na ipag-orgolyo sia kan gabos na may halaga sa saiya?
16 Sinasabihan kamo kan Biblia na magmaan sa saindong pag-iriba. (1 Corinto 15:33) An saindong kairiba maninigo na idtong mga natatakot ki Jehova. Dai kamo padara sa impluwensia nin kairiba. (Salmo 56:11; Talinhaga 29:25) Magin makinuyog sa saindong mga magurang na matatakton sa Dios. (Talinhaga 6:20-22; Efeso 6:1-3) Magpatabang sa kamagurangan para sa paggiya asin pagparigon sa boot. (Isaias 32:1, 2) Itorohok an saindong isip asin mga mata sa espirituwal na mga prinsipyo sa buhay asin mga pasohan. Humanap nin mga oportunidad na umoswag sa espirituwal asin makapartisipar sa mga aktibidad kan kongregasyon. Makanood na magtrabaho. Dumakula kamo na makosog asin mabagsik sa pagtubod, dangan mapatutunayan nindo na kamo importanteng tawo—tawong angay na tawan nin buhay sa bagong kinaban ni Jehova! Ipag-oorgolyo kamo kan satong langitnon na Ama, ikaoogma kamo kan saindong daganon na mga magurang, asin maparirigon nindo an boot kan saindong Kristianong mga tugang na lalaki asin babae. Iyan an mahalaga!—Talinhaga 4:1, 2, 7, 8.
17. Anong mga pakinabang an nakakamtan kan mga nagtitiwala ki Jehova asin sa saiyang Tataramon?
17 Sa estilong berso an salmista pinasabngan na sumurat: “Si Jehova mismo dai isasayuma an ano man na marahay sa mga naglalakaw sa katotoohan. O Jehova kan mga hukbo, maogma an tawo na nagtitiwala sa saimo.” (Salmo 84:11, 12) Iyo, kaogmahan asin kapangganahan, bakong pagkabigo asin pagkasudya, an kakamtan kan gabos na nagtitiwala ki Jehova asin sa saiyang Tataramon, an Biblia.—2 Timoteo 3:14, 16, 17.
Ano an Saindong Simbag?
◻ Taano an mga Kristiano ta dai maninigong magtiwala sa “kadonongan kan kinaban na ini”?
◻ Ano an maninigong gibohon kun an saro nakaeeksperyensia nin mga pagduwaduwa?
◻ Paano nagdadara nin kapangganahan asin kaogmahan sa pag-agoman an paggibo sa mga bagay sono sa paagi ni Jehova?
◻ Paano tinatabangan kan Biblia an mga barobata na ‘makadulag sa mga horot na konektado sa pagkabarobata’?
[Retrato sa pahina 23]
An mga Kristiano nagsasarig ki Jehova asin sa saiyang Tataramon mantang isinisikwal bilang kamangmangan “an kadonongan kan kinaban na ini”
[Retrato sa pahina 25]
An mga pamilya na nagtitiwala ki Jehova asin sa saiyang Tataramon may marahay na kapangganahan asin kaogmahan