Magayagaya Ngonyan Asin Sagkod Lamang
“Mag-ogma kamo, banwaan, asin maggayagaya kamo sagkod lamang sa sakong linalalang. Huli ta uya linalalang ko an Jerusalem na magin dahelan nin kagayagayahan asin an saiyang banwaan na magin dahelan nin kaogmahan.” —ISAIAS 65:18.
1. Paano an tunay na pagsamba nakaapektar sa mga indibiduwal sa nag-aging mga siglo?
SA GABOS na siglong nag-agi, kadakol kan nakanompong nin abundang kagayagayahan sa paglilingkod sa tunay na Dios, si Jehova. Si David saro sana sa dakol na nagin magayagaya sa tunay na pagsamba. Isinasaysay kan Biblia na kan an kaban kan tipan darahon sa Jerusalem, “si David asin an bilog na harong ni Israel itinutukad an kaban ni Jehova na may magayagayang pagkurahaw.” (2 Samuel 6:15) An siring na kagayagayahan sa paglilingkod ki Jehova bako sanang bagay na nakaagi na. Puede man kamong magkaigwa kaiyan. Asin may bago pang mga kagayagayahan na puedeng mapasaindo!
2. Pakalihis kan orihinal na kaotoban kan Isaias kapitulo 35 sa nagbaralik na Judio, sairisay ngonyan an kalabot sa saro pang kaotoban?
2 Sa sinundan na artikulo, siniyasat niato an enot na kaotoban kan nakapahihiro sa boot na hula na nasusurat sa Isaias kapitulo 35. Angay na apodon niato ini na hula sa pagbabalik huli ta siring kaiyan an nangyari para sa mga Judio kan suanoy. Igwa iyan nin kaparehong kaotoban sa satong panahon. Sa anong paagi? Bueno, poon sa mga apostol ni Jesus asin sa iba pa kan Pentecostes 33 C.E., si Jehova may relasyon sa espirituwal na mga Israelita. An mga ini tawo na linahidan kan banal na espiritu nin Dios na nagigin kabtang kan inaapod ni apostol Pablo na “Israel nin Dios.” (Galacia 6:16; Roma 8:15-17) Girumdomon man na sa 1 Pedro 2:9, an mga Kristianong ini inaapod na “rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri.” Dangan isinabi ni Pedro an asignasyon na itinao sa espirituwal na Israel: “‘Ipahayag nindo an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.”
Sarong Kaotoban sa Satong Panahon
3, 4. Ano an situwasyon kan an Isaias kapitulo 34 maotob sa modernong mga panahon?
3 May panahon kaidto sa pagpoon kan siglong ini na an natatada kan espirituwal na Israel digdi sa daga dai nagin dayaday na aktibo sa pagpahayag kan siring na mensahe. Dai sinda lubos na naggagayagaya kaidto sa makangangalas na liwanag nin Dios. Sa katunayan, sinda nasa grabeng kadikloman. Kasuarin idto? Asin ano an ginibo ni Jehova Dios manongod kaiyan?
4 Panahon kaidto kan Guerra Mundial I, pakatapos tolos na maestablisar an Mesiyanikong Kahadean nin Dios sa langit kan 1914. An mga nasyon, sa pagsuportar kan klero kan mga iglesia sa laen-laen na kadagaan, nagkaaranggot sa lambang saro. (Kapahayagan 11:17, 18) Siempre, an Dios kontra sa apostatang Kakristianohan kaiba an ilinalangkaw na klero kaiyan kun paanong nagin kontra sia sa mahambog na nasyon nin Edom. Huli kaini, an Kakristianohan, an antitipikong Edom, nakatalaan na makanamit kan modernong aldaw na kaotoban kan Isaias kapitulo 34. An kaotoban na ini paagi sa permanenteng pagpara kapareho kasegurado kan enot na kaotoban tumang sa suanoy na Edom.—Kapahayagan 18:4-8, 19-21.
5. Nagkaigwa nin anong klaseng kaotoban an Isaias kapitulo 35 sa satong panahon?
5 Kumusta man an kapitulo 35 kan hula ni Isaias, kaiba an pagdodoon kaiyan sa kagayagayahan? Iyan naotob na man sa satong panahon. Paano? Iyan naotob sa pagbabalik kan espirituwal na Israel hale sa sarong klase nin pagkabihag. Siyasaton niato an mga katunayan sa tunay na bago pa sanang teokratikong kasaysayan, na nangyari sa panahon na buhay na an dakol na buhay pa ngonyan.
6. Taano ta masasabi na an natatada kan espirituwal na Israel napasa bihag na kamugtakan?
6 Sa laog nin halipot man sanang panahon durante kan Guerra Mundial I, an natatada kan espirituwal na Israel dai nakapagdanay na lubos na malinig asin kaoyon kan kabotan nin Dios. An iba sa sainda nadigtaan nin salang mga doktrina asin nakikompromiso paagi sa dai pagigin biyong neutral apabor ki Jehova kan ginigipit na sumuportar sa naggeguerrang mga nasyon. Durante kan mga taon na idto nin guerra, napairarom sinda sa gabos na klaseng paglamag, na ipinagbawal pa ngani sa dakol na lugar an saindang mga literatura sa Biblia. Sa katapustapusi, an pirang mas prominenteng tugang na lalaki nasentensiahan asin nabilanggo huli sa falsong mga sahot. Sa paggirumdom bakong depisil maheling na, sa sarong sentido, an banwaan nin Dios, imbes na talingkas, nasa bihag na kamugtakan. (Ikomparar an Juan 8:31, 32.) Sinda kulang nanggad nin espirituwal na pagheling. (Efeso 1:16-18) Sinda medyo nagin pula kun dapit sa pag-omaw sa Dios, kaya an resulta bako sindang mabunga sa espirituwal. (Isaias 32:3, 4; Roma 14:11; Filipos 2:11) Naheheling daw nindo kun paano ini nakaaagid sa situwasyon kan suanoy na mga Judio na nabibihag sa Babilonya?
7, 8. Anong klaseng pagbabalik an naeksperyensiahan kan natatada sa modernong aldaw?
7 Alagad pababayaan daw nin Dios sa kamugtakan na iyan an saiyang mga lingkod sa modernong aldaw? Dai, determinado siang ibalik sinda, kaoyon kan ihinula paagi ki Isaias. Sa siring an hula man sanang ini sa kapitulo 35 nagkaigwa nin malinaw na kaotoban sa satong panahon, paagi sa pagbabalik kan natatada kan espirituwal na Israel sa prosperidad asin marahay na salud sa sarong espirituwal na paraiso. Sa Hebreo 12:12, iinaplikar ni Pablo an Isaias 35:3 sa piguratibong sentido, na nagpapatunay sa pagigin balido kan paggibo niato nin espirituwal na pag-aplikar kan kabtang na ini kan hula ni Isaias.
8 Kan panahon pakatapos nin guerra, an nawawalat na mga linahidan kan espirituwal na Israel garo baga nagluwas sa pagkabihag. Ginamit ni Jehova Dios si Jesu-Cristo, an Mas Dakulang Ciro, tanganing patalingkason sinda. Sa siring, an natatadang ini puedeng gumibo nin pagtogdok liwat, na ikakokomparar sa gibohon kan natada kan suanoy na mga Judio, na nagbalik sa saindang daga tanganing itogdok liwat an literal na templo sa Jerusalem. Dugang pa, an espirituwal na mga Israelitang ini sa modernong mga panahon puede nang pumoon na magkultibar asin gumibo nin magayon na espirituwal na paraiso, sarong piguratibong tatamnan nin Eden.
9. Paano nangyari sa satong panahon an sarong bagay na kaagid kan ilinadawan sa Isaias 35:1, 2, 5-7?
9 Nasa isip an nasa enotan, pag-olayan ta giraray an Isaias kapitulo 35, asin helingon ta nguna an bersikulo 1 asin 2. An garo alang na lugar tunay nanggad na nagpoon na mamurak asin magin mabunga arog kan suanoy na kapatagan nin Saron. Dangan, helinga an bersikulo 5 sagkod 7. An natatada, na an nagkapira buhay pa asin aktibo sa paglilingkod ki Jehova, nagkaburuklat an mga mata nin pakasabot. Mas malinaw na nindang naheheling an kahulogan kan nangyari kan 1914 asin pakalihis kaiyan. Iyan nagkaigwa man nin impluwensia sa dakol sa sato na minabilog kan “dakulang kadaklan,” na ngonyan naglilingkod kaiba kan natatada.—Kapahayagan 7:9.
Kabtang daw Kamo kan Kaotoban?
10, 11. (a) Paano kamo napalabot sa pagkaotob kan Isaias 35:5-7? (b) Ano an personal na saboot nindo manongod sa mga pagkaliwat na ini?
10 Halimbawa kamo. Bago kamo nakiasosyar sa Mga Saksi ni Jehova, regular daw nindong binabasa an Biblia? Kun iyo, gurano kahiwas kan pakasabot na nakamtan nindo? Aram na nindo ngonyan, halimbawa, an katotoohan manongod sa kamugtakan kan mga gadan. Seguro puede nindong itokdo an sarong interesado sa bagay na iyan sa napapanongod na mga teksto sa Genesis kapitulo 2, Eclesiastes kapitulo 9, asin Ezequiel kapitulo 18, patin sa dakol pang ibang teksto. Iyo, posibleng nasasabotan nindo kun ano an itinotokdo kan Biblia dapit sa dakol na tema o isyu. Sa simpleng pagtaram, may pakasabot kamo sa Biblia, asin kaya nindong ipaliwanag sa iba an kadaklan kaiyan, siring kan daing duwa-duwa na ginigibo nindo.
11 Minsan siring, marahay na ihapot kan lambang saro sa sato, ‘Paano ko nanodan an gabos na aram ko sa katotoohan kan Biblia? Bago nakipag-adal sa banwaan ni Jehova, naheling ko na daw an gabos na tekstong nasambitan pa sana? Nasabotan ko daw iyan asin nakaabot ako sa tamang mga konklusyon kun dapit sa kahulogan kaiyan?’ An prangkang simbag sa mga hapot na ini posibleng dai. Mayo nin maninigong magraot an boot sa siring na tataramon, alagad puedeng sabihon na sa pundamental kamo buta kun dapit sa mga tekstong ini asin sa kahulogan kaiyan. Bakong iyo? Yaon iyan sa Biblia, alagad dai nindo iyan namamansayan o naiintindihan an kahulogan kaiyan. Paano, kun siring, nabuklat an saindong mga mata sa espirituwal? Iyan paagi sa ginibo ni Jehova sa pag-otob sa Isaias 35:5 sa linahidan na natatada. Dangan nabuklat man an saindong mga mata. Mayo na kamo sa espirituwal na kadikloman. Nakaheheling na kamo.—Ikomparar an Kapahayagan 3:17, 18.
12. (a) Taano ta masasabi niato na bako ini an panahon para sa milagrosong pagpaomay sa pisikal? (b) Paano iiniilustrar kan kaso ni Tugang na F. W. Franz an paagi nin pagkaotob kan Isaias 35:5 sa satong panahon?
12 An alistong mga paraadal sa Biblia asin sa mga pagtratar nin Dios sa nag-aging mga siglo nakaaaram na bako ini an panahon sa kasaysayan para sa pisikal na mga milagro nin pagpaomay. (1 Corinto 13:8-10) Kaya dai niato linalaoman si Jesu-Cristo na magpabuklat nin butang mga mata tanganing patunayan na sia an Mesiyas, an Propeta nin Dios. (Juan 9:1-7, 30-33) Ni pinangyayari man nia na an gabos na bongog makadangog liwat. Kan si Frederick W. Franz, saro sa linahidan asin presidente kaidto kan Watch Tower Society, harani na an edad sa 100, sia haros buta na asin kaipuhan nang gumamit nin elektronikong pantabang sa pagdangog. Sa laog nin pirang taon dai na sia nakababasa; pero, siisay an maghohona na sia buta o bongog sa sentido kan Isaias 35:5? An saiyang matarom an pagmansay na espirituwal na pagheling nagin bendisyon sa banwaan nin Dios sa bilog na daga.
13. Anong pagkabaliktad o pagbabalik an naeksperyensiahan kan banwaan nin Dios sa modernong aldaw?
13 O kumusta man an saindong dila? An mga linahidan nin Dios tibaad napula durante kan saindang espirituwal na pagkabihag. Alagad kan baliktadon nin Dios an kamugtakan na iyan, an saindang dila nagpoon na magkurahaw sa kaogmahan huli sa naaraman ninda dapit sa naestablisar nang Kahadean nin Dios asin sa saiyang mga panuga para sa ngapit. Tibaad tinabangan ninda kamo na makataram man. Gurano kaparate na nagtaram kamo sa iba dapit sa katotoohan kan Biblia kan mga nakaagi? Tibaad kaidto inisip nindo, ‘Nawiwili ako sa pag-adal, alagad nungka akong maduman asin makikipag-olay sa mga dai ko midbid.’ Minsan siring, bako daw na totoo na “an dila kan pula” ‘nagkukurahaw na sa kaogmahan’ ngonyan?—Isaias 35:6.
14, 15. Paano an dakol naglalakaw sa “Dalan nin Kabanalan” sa satong panahon?
14 An suanoy na mga Judio na nakatalingkas sa Babilonya nagbaklay nin halawig papuli sa saindang sadiring daga. Ano an katimbang kaiyan sa satong panahon? Bueno, helinga an Isaias 35:8: “Magkakaigwa dian nin lansangan, nin sarong dalan; asin aapodon iyan na Dalan nin Kabanalan. Dai maagi dian an marigsok.”
15 Poon kan sinda makabutas sa espirituwal na pagkabihag, an linahidan na natatada, na ngonyan iniibanan nin minilyon kan ibang karnero, nagluwas sa Dakulang Babilonya pasiring sa sarong piguratibong lansangan, sarong malinig na dalan nin kabanalan na minagiya sa saro pasiring sa espirituwal na paraiso. Ginigibo niato an gabos na paghihingoa na makualipikar asin magdanay sa Lansangan nin Kabanalan na ini. Horophoropa an saindong sadiri. Bako daw na an saindong mga pamantayan sa moral asin an mga prinsipyo na saindong pinangangaptan mas halangkaw na gayo ngonyan kisa kan kamo nasa kinaban pa? Dai daw kamo orog na naghihingoa na ioyon sa kaisipan asin gawe nin Dios an saindong kaisipan asin gawe?—Roma 8:12, 13; Efeso 4:22-24.
16. Anong mga kamugtakan an satong makakamtan mantang kita naglalakaw sa Dalan nin Kabanalan?
16 Mantang kamo nagpapadagos sa Dalan nin Kabanalan na ini, sa pundamental kamo talingkas sa paghadit manongod sa mga tawong siring sa hayop. Totoo, sa kinaban dapat kamong magmaan na sa piguratibong paagi dai kamo sibaon na buhay nin mahanab o orongison na mga tawo. Kadakol kan naniniba sa saindang paagi nin pagtratar sa iba. Kabaliktaran nanggad sa banwaan nin Dios! Dian kamo nasa protektadong kamugtakan. Siempre, bakong sangkap an saindong mga kapwa Kristiano; kun beses an saro nasasala o nakakokolog nin boot. Alagad aram nindo na an saindong mga tugang dai man tuyong nagmamawot na kolgan kamo o sibaon kamo. (Salmo 57:4; Ezequiel 22:25; Lucas 20:45-47; Gibo 20:29; 2 Corinto 11:19, 20; Galacia 5:15) Imbes, sinda interesado sa saindo; tinabangan ninda kamo; gusto nindang maglingkod kaiba nindo.
17, 18. Sa anong sentido na may paraisong nag-eeksister ngonyan, asin ano an epekto kaini sa sato?
17 Kaya puede niatong helingon an Isaias kapitulo 35, na isinasaisip an presenteng kaotoban kan bersikulo 1 sagkod 8. Bako daw na malinaw na nanompongan na niato an angay na apodon na espirituwal na paraiso? Bako, bako iyan na sangkap—bako pa. Alagad iyan tunay na sarong paraiso, ta digdi, siring kan sinasabi sa bersikulo 2, sato nang ‘maheheling an kamurawayan ni Jehova, an kagayonan kan satong Dios.’ Asin ano an epekto? An bersikulo 10 nagsasabi: “An mismong mga binalukat ni Jehova mabalik asin sierto nanggad na maduman sa Sion na may magayagayang kurahaw; asin an paggayagaya sagkod sa panahon na daing katapusan mamumugtak sa saindang payo. Maaabot ninda an kaogmahan asin paggayagaya, asin madulag an kamondoan asin pagtangis.” Tunay nanggad, nakagagayagaya an satong pakaluwas sa falsong relihion asin an satong paggibo kan tunay na pagsamba sa irarom kan pag-oyon nin Dios.
18 An kagayagayahan na konektado sa tunay na pagsamba padagos na nag-oorog, bako daw? Naheheling nindo an bagong mga interesado na naggigibo nin mga pagbabago asin natotokdoan sa katotoohan kan Biblia. Namamasdan nindo an mga hoben na nagdadakula asin nag-ooswag sa espirituwal sa laog kan kongregasyon. Yaon an mga pagbautismo, kun saen pinagheheling nindong nagpapabautismo an mga kamidbid nindo. Bako daw iyan na mga dahelan na maggayagaya, na magsopay sa kagayagayahan, ngonyan? Iyo, kanigoan na kagayagayahan na nakikiayon an iba sa satong espirituwal na katalingkasan asin paraisong mga kamugtakan!
Sarong Kaotoban na sa Maabot Pa!
19. Pinapano kita kan Isaias kapitulo 35 nin anong pano nin paglaom na paghalat?
19 Napag-olayan pa sana niato an Isaias kapitulo 35 kun dapit sa enot na kaotoban kaiyan sa pagbalik kan mga Judio asin kun dapit sa espirituwal na kaotoban na nangyayari ngonyan. Alagad bako iyan an katapusan. Kadakol pang masunod. Konektado iyan sa pag-asegurar kan Biblia dapit sa madatong na pagbabalik nin literal na paraisong mga kamugtakan digdi sa daga.—Salmo 37:10, 11; Kapahayagan 21:4, 5.
20, 21. Taano ta lohiko asin Makakasuratan na maniwala na magkakaigwa nin saro pang kaotoban an Isaias kapitulo 35?
20 Magigin pabarobago si Jehova kun sia matao nin buhay na mga paglaladawan nin sarong paraiso dangan lilimitaran an mga kaotoban sa espirituwal na mga bagay sana. Siempre, bako ining pagsabi na bakong makahulogan an espirituwal na mga kaotoban. Minsan pa kun may naestablisar na sarong literal na paraiso, dai kita maninigoan dian kun sa tahaw kan magagayon na tanawon asin matoninong na mga hayop kita napalilibotan nin mga tawong maraot sa espirituwal, mga tawong minagawe nin siring sa mabangis na mga hayop. (Ikomparar an Tito 1:12.) Iyo, dapat na maenot an espirituwal, ta iyan an pinakamahalaga.
21 Minsan siring, an maabot na Paraiso dai natatapos sa espirituwal na mga aspekto na satong nakakamtan ngonyan asin makakamtan nin orog pa sa ngapit. Igwa kitang marahay na dahelan na maglaom sa literal na kaotoban kan mga hula na siring baga kan Isaias kapitulo 35. Taano? Bueno, sa kapitulo 65, si Isaias naghula nin “bagong kalangitan asin sarong bagong daga.” Iinaplikar iyan ni apostol Pedro kan ilinaladawan kun ano an masunod sa aldaw ni Jehova. (Isaias 65:17, 18; 2 Pedro 3:10-13) Sinasabi ni Pedro na an mga kamugtakan na ilinadawan ni Isaias aktuwal na maeksister kun magkatotoo na an “bagong daga.” Kabale dian an mga paglaladawan na tibaad pamilyar sa saindo—pagtogdok nin mga harong asin pag-ontok dian; pagtanom nin mga ubasan asin pagkakan kan mga bunga kaiyan; danay na pag-ogma sa gibo kan mga kamot nin saro; lobo asin kordero na nag-eerok na magkaibanan; asin mayo nang peligro na nangyayari sa bilog na daga. Sa ibang pagtaram, halawig na buhay, tiwasay na harong, abundang kakanon, nakakokontentong trabaho, asin katoninongan sa tahaw nin mga hayop saka sa pag-oltanan nin mga hayop asin mga tawo.
22, 23. Magkakaigwa nin anong basihan para sa kagayagayahan sa maabot na kaotoban kan Isaias kapitulo 35?
22 Bako daw na pinapano kamo nin kagayagayahan kan paglaom na iyan? Maninigo sanang iyo, ta kita linalang nin Dios na mabuhay sa siring na paagi. (Genesis 2:7-9) Kaya, ano an kahulogan kaiyan kun dapit sa hula sa Isaias kapitulo 35 na satong pinag-oolayan? Nangangahulogan iyan na igwa kitang dagdag na dahelan na magkurahaw sa kagayagayahan. An literal na mga disyerto asin alang na mga lugar mamumurak, na ikinagagayagaya niato. Dangan an mga tawo na an mga mata asul, o bulaw, o iba pang makawiwiling kolor nin mata, alagad buta ngonyan, makaheheling na. An satong mga kapwa Kristiano na bongog, o pati kita na nasasakitan na sa pagdangog, makadadangog na nin malinaw. Kanigoan na kagayagayahan na gamiton an kakayahan na iyan sa pagdangog kan Tataramon nin Dios na binabasa asin ipinaliliwanag, siring man sa paghinanyog sa mga tanog kan huyop-huyop kan doros sa mga kahoy, pagngisi nin aki, awit nin gamgam!
23 Mangangahulogan man iyan na an mga pilay, kabale idtong mga may rayuma ngonyan, mahiro na dai nakamamate nin kolog. Kanigoan na kaginhawahan! Dangan an literal na mga sapa mabolos sa mga disyerto. Pareho niatong maheheling an nag-uulakbong tubig asin madadangog an nagbuburokbusok na tanog. Kita makalalakawlakaw duman asin madodotan niato an berdeng doot asin mga papiro. Iyan tunay na magigin Paraisong ibinalik. Kumusta man an kagayagayahan na makaibaiba an leon o iba pang siring na hayop na dai na kita natatakot? Dai na niato kaipuhan pang ponan na iladawan iyan, ta kita gabos maogma nang inimahinar an eksenang iyan.
24. Taano ta makaooyon kamo sa kapahayagan na nasa Isaias 35:10?
24 Inaasegurar sato ni Isaias: “An mismong mga binalukat ni Jehova mabalik asin sierto nanggad na maduman sa Sion na may magayagayang kurahaw; asin an paggayagaya sagkod sa panahon na daing katapusan mamumugtak sa saindang payo.” Kaya makaooyon kita na igwa kitang dahelan na magkurahaw sa kagayagayahan. Kagayagayahan sa ginigibo na ni Jehova para sa saiyang banwaan sa satong espirituwal na paraiso, asin kagayagayahan sa malalaoman niato sa literal na Paraiso na harani nang marhay. Manongod sa mga magayagaya—manongod sa sato—si Isaias nagsurat: “Maaabot ninda an kaogmahan asin paggayagaya, asin madulag an kamondoan asin pagtangis.”—Isaias 35:10.
Namangno daw Nindo?
◻ Nagkaigwa nin anong ikaduwang kaotoban an Isaias kapitulo 35?
◻ Ano an espirituwal na katimbang kan milagrosong mga pagkaliwat na ihinula ni Isaias?
◻ Paano kamo nagkaigwa nin kabtang sa kaotoban kan hulang ini?
◻ Taano ta masasabi niato na pinapano kita nin paglaom para sa ngapit kan Isaias kapitulo 35?
[Retrato sa pahina 15]
An bilanggoan sa Raymond Street sa Brooklyn, Nueva York, kun saen ibinilanggo an pitong prominenteng tugang na lalaki kan Hunyo 1918
[Retrato sa pahina 16]
Minsan ngani haros buta na sa saiyang nahuhuring mga taon, an espirituwal na pagheling ni Tugang na Franz nagdanay na malinaw
[Mga retrato sa pahina 17]
An espirituwal na pagtalubo asin pag-oswag mga dahelan na maggayagaya